USANG DAHA' ISRAEL 18
18
Yitro tei nesek Musa
1Laké Yitro#18:1 YITRO Rehuel aran na' lahuh. Nyineng behida 3:1., iha' tih imam ha' Midian, aleng taman divan Musa, kitan na' nah lim-lim hadui aleng en Allah na men Musa dahin men daha' Israel pahu Na' atih, marung Tuhan uh nei geri daha' Israel musang men daléh Mesir atih lahuh. 2#Us 2:21-22 Tei nah Yitro taman divan Musa geri Zipora hawan Musa aleng en Musa nyihu tei uli arei dih, 3#HST 7:29 dahin dua' anak aké' Zipora anan lahuh. Aran ji anak atih Gersom, avin Musa kuma', “Avin akui uh jadi' kelunan nyakei ha' daléh sawih anih,” 4dahin aran ji Eliezer, avin ken Musa, “Allah tamak aleng masi akui dahin uh pekurip akui men malat Firaun.”
5Yitro taman divan Musa dahin dawa' anak na' atih dahin hawan Musa nan tei pala Musa ha' tana ngahit, ha' ngavan na' na lepau jeleng ngalang Allah atih. 6En na' nyihu nah ji la'ung tei bara men Musa, “Akui Yitro aleng taman divan ka', nei geri hawam dahin dawa' dua' anak aké' ka' dih anih.” 7Pelalau nah Musa tei musang tei pala taman divan na' anan dih, pelalau nukem ha' unan na' dahin marek iha'. “Té' kah ika' ja' ni,” ken ji nurei pah dahun ji, pelepamat lelan nah dalo', uh anan tei nah dalo' halem lepau. 8Iha' nah Musa bara men taman divan na' anan lim hadui Tuhan na té' Firaun dahin té' daha' Mesir atih, dahin bara lim tusah alem anau-anau daha' dahin nuno' tuk Tuhan pekurip daha' Israel lahuh. 9Melu lelan nah Yitro jam lim halam Tuhan na té' daha' Israel anan, avin Iha' uh pekurip daha' men usu daha' Mesir atih. 10Ken Yitro, “Hek nah Tuhan aleng uh pekurip ikam men usu daha' Mesir dahin men usu Firaun! 11Kerei inih akui jam, Tuhan aleng dekaya' lelan men'uh lim-lim ket en daha' ketalau, avin Iha' uh pekurip bengsa' anih men usu kelunan Mesir, avin daha' Mesir anan dih balang kenep té' daha' Israel anih.” 12Iha' nah Yitro taman divan Musa geri bun usu na' en na' tevek men Tuhan, en na' pahun, dahin kuri-kuri ket ha' béh lahuh en na' uk men Allah. Nei nah Harun dahin lim daha' kelunan aya' men daha' Israel nei pahlung dahin taman divan Musa anan ha' unan Allah.
Ilau kelunan petneng daho'
Kel d M 1:9-18
13Dau malah ji melo' nah Musa mutet daho' men daha' bengsa' atih, daha' atih nekring ha' unan Musa men jihima ateng levi. 14Tegu taman divan Musa jam ket aleng en na' na atih, kuma' nah iha', “Nun aleng im na men daha' kelunan anih du? Na' nun ha' ika' dep tua aleng melo' petneng daho', beka' daha' kelunan anan nekring ha' unan ka' nunih pahdau-pahdau anih ré?”
15Ken Musa nyu'ei taman divan na' anan, “Daha' nei meteng aleng dahun Allah anan ha' akui pa. 16Tegu té' tusah té' hang daha', nei nah daha' nunan ha' akui, akui aleng nemei na' men daha', akui nah aleng bara no' aleng dahun Allah dahin aleng tebara-tebara Na' men daha' lahuh.”
17En taman divan Musa nyu'ei nah iha, “Nusi' ha' sayu kurin kenep kui anan anak, 18la'ei ka' na'a, nurei pah daha' anih lahuh, avin bahat lelan hadui ka' ji'ek nunan, nusi' ka' deng na na' dep. 19Akui seng katuk ika' anak, adang Tuhan té' dahim pah lahuh. Sek nunih im na. Adang ika' kah aleng petneng daha' bengsa' anih ha' unan Allah, tusah-tusah daha' anan adang ika' nah aleng geri na' ha' unan Allah. 20Bi im katuk nah daha' té' tebara-tebara Tuhan dahin té' lim dahun Na' atih, dahin bara daha' alan aleng teneng en daha' ngioh dahin hadui aleng tekep en daha' na. 21Sayu im ilau kuri-kuri la'ung aleng tugé' men hang daha' anan aleng takut té' Allah, kelunan aleng en kam kinah dahin aleng duyah té' suap, nyihu nah daha' aleng nunan jadi' mayak awi peng daha' ji libu' la'ung, mayak ji atuh la'ung, lima'-pulu la'ung, pulu la'ung nunan. 22Sayu daha' anan petneng tusah daha', té' tusah aleng dekaya' ké', en daha' geri pala ika' kah, bi tusah aleng da'uk, daha' dep nah aleng petneng na', uréh hadui ka' nyi'an uk, avin daha' atih nah aleng gem na' dahim. 23Awi ika' na nunan, awi ha' dahun Allah nunan men ika' lahuh, iha' ka' seng tahen, lim daha' anih seng tei uli ha' ngavan daha' dahin sayu kenep lahuh.”
24Tegu Musa uh kelenghi dahun taman divan na' nunan, lun en na' ngioh nah lim dahun na' atih. 25Musa mili nah men hang daha' Israel anan kuri-kuri la'ung aleng tugé' jadi' kepala' daha' bengsa' atih, té' aleng gem ji libu' la'ung, té' aleng gem ji atuh, aleng gem lima'-pulu, dahin aleng gem pulu la'ung daha'. 26Daha' anih nah aleng petmei tusah-tusah daha', tusah aya' en daha' geri ha' unan Musa kah, bi tusah aleng da'uk, daha' dep nah aleng petneng na'.
27Men'uh anan iha' nah Musa mekoh taman divan na' tei uli ha' daléh na' atih.
Currently Selected:
USANG DAHA' ISRAEL 18: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
