USANG DAHA' ISRAEL 17
17
Ata' men alem bato'
Kah d Is 20:1-13
1 #
Kah d Is 20:2-13
Lun leka' nah lim peng daha' Israel anan dih men tana ngahit Sin atih, leka' men ji ngavan tei ha' ji ngavan, ngioh dahun Tuhan. En daha' na nah lepau daha' ha' Rafidim, bi tinan nusi' nah té' ata' en daha' du'i. 2Lun pekelebeng nah daha' la'an na Musa, ken daha', “Uk ata' men kamé', ja kamé' du'i.”
Bi Musa kuma' men daha' anan, “Na' nun kam pekelebeng tua na akui nunan du? Na' nun kam pesek Tuhan?”
3Avin megang lelan nah ba daha' tinan, pekelebeng tua nah daha' anan na Musa, dahin kuma' men iha', “Nun men'uh ka' nei geri kamé' men Mesir tih, seng lematei kamé' dahin anak-anak amé' dahin hulung amé' na té' megang ba amé' nunih?”
4En Musa duan nah Tuhan, ken na', “Nun aleng seng ek na té' daha' bengsa' anih? Daha' seng nyeparik bato' té' akui anih!”
5Iha' nah Tuhan kuma' men Musa, “Tei nah im panau ha' unan daha' bengsa' anan, im geri nah kuri-kuri la'ung kelunan aya' daha' Israel anan dahim, im geri hekun ka' aleng ngavan nyaman hungei Nil anan dih, tei nah! 6Akui seng té' nekring hinan ha' unan ka' ha' ujung ngalang bato' ha' Horeb tih. Sayu im nyaman bato' anan, ata' pah pelalau nei musang men alem na', en daha' anan du'i,” ken Na'. Nunan nah Musa na ha' unan daha' kelunan aya' daha'.
7En na' na nah aran tinan Masa dahin Meriba, avin daha' Israel uh pesek Tuhan dahin pekelebeng na Tuhan nutih, avin daha' kuma', “Té' lan kah Tuhan dahin tam nih lo ké'?”
Kebiteng dahin daha' Amalek
8Lun nei nah daha' Amalek ngayau daha' Israel nan ha' Rafidim. 9Ken Musa men Yosua, “Mili im kuri-kuri kelunan men hang tam, ja daha' tei kebiteng lawan daha' Amalek anan. Jima akui seng tei nekring hujung ngalang atih gem hekun Allah.” 10Pelalau en Yosua na nah awi hu'en Musa men iha' anan, tei kebiteng lawan daha' Amalek atih, bi Musa dalo' Harun dahin Hur uh té' tei ha' hujung ngalang. 11Tegu daha' kebiteng anan, tana' Musa meju usu na', tu'a lelan nah daha' Israel, bi tegu iha' em meju usu na', daha' Amalek atih aleng tu'a. 12Tegu Musa uh ngila' meju usu na', en dawa' ala nah ji bato', en dawa' lo' nah ida Musa ja iha' melo' hujung na', Harun dawa' Hur pelengep meju usu na', ji bah ji, ji bah ji, ja usu na' pa'en peju ateng dau tei ngesem. 13Nunan nah Yosua pekalah daha' Amalek tegu daha' kebiteng anan.
14 #
Kel d M 25:17-19; 1 Sam 15:2-9 Men'uh anan Tuhan kuma' men Musa, “Im ngalung nah anih alem ji buhup, ja jadi' ji tada' ngavan kam hituk, dahin bara nah anih men Yosua, Akui seng pelevah lim daha' Amalek anan hida langit nih, ja kelunan em hituk té' daha' la'an.” 15En Musa na nah ji avo' ngavan na' ma'uk bun usu na' men Tuhan tinan dahin na aran na', “Tuhan nah aleng jadi' Kelebit men akui.” 16Ken na' la'an, “Usu tam gem kelebit Tuhan, Tuhan aleng kebiteng lawan daha' Amalek anan ateng-ateng baya.”
Currently Selected:
USANG DAHA' ISRAEL 17: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
