USANG DAHA' ISRAEL 13
13
Nelesen anak una'
1En Tuhan duan nah Musa, 2#Kah d Is 3:13; Lk 2:23 “Lim anak aleng una', sayu nah ikam nelesen daha' men Akui. Sayu anak una' kam kelunan Israel aleng muloh men tulang kam, nunan pah anak una' hulung kam lahuh, Akui aleng hipun daha' anan,” ken Tuhan.
Dau Aya' Luti Aleng Em Té' Tavah
3En Musa bara nah daha' Israel, ken na', “Hituk nah té' dau anih, avin dau anih ikam musang men daléh Mesir, daléh ngavan kam jadi' dipen anan dih, avin kenan tu'a usu Tuhan ikam deng nei musang men inan. Avin anan, meng nah ikam kuman nun-nun aleng té' tavah. 4Dau anih ikam musang, alem bulan Abib. 5Tegu Tuhan uh geri ikam tei ateng ha' daléh kelunan Kanaan, kelunan Het, kelunan Amori, kelunan Hewi dahin kelunan Yebus, daléh aleng uh en Na' jaji seng ma'uk na' men daha' sepun kam ja ikam hipun na', daléh anan penu té' telang uso' dahin nyihun, sayu nah ikam na adet awi anih alem bulan anih lahuh. 6Alem tusu dau sayu nah ikam kani luti aleng em té' tavah, té' dau aleng ketusu anan nah ikam na dau aya' anan men Tuhan. 7Luti aleng em té' tavah tua en kam kani alem tusu dau anan, nun-nun aleng té' tavah té' iha' meng peletu nyineng na', tavah na' pah nusi' kam deng nyineng na' té' alem daléh kam anih.
8“Tegu dau anan, sayu kam bara daha' anak aké' kam, ‘Na adet anih nah itam avin akui hituk té' hadui aleng en Tuhan na té' akui tegu kui musang men Mesir menuna' dih,’ ken kam nah men anak kam. 9Bei nah anih jadi' awi ji tada' té' usu kam, dahin ji tada' té' likau kam, ja dahun Tuhan té' té' ba kam, avin té' usu Tuhan aleng ningan atih nah Iha' hu'uh geri itam musang men Mesir. 10Sayu nah ikam na nunih pa'en tegu jaka' na' awi aleng uh, ha'ut-ha'ut duman,” ken Musa bara dahun Tuhan.
Marung Anak una'
11“Tegu Tuhan uh geri ikam ha' alem daléh kelunan Kanaan, dahin ma'uk na' men ikam, awi aleng en Na' jaji, Iha' pah tevah dahin kam nurei pah dahin sepun kam lahuh, 12#Lk 2:23 tegu anan sayu nah ikam ma'ih lim-lim anak una' aleng mulon men tulang kam men Tuhan. Nunan pah anak hulung kam aleng una' lahuh, iha' tih anak aleng laké', Tuhan lim nah aleng hipun anak una' aleng laké' anan. 13Bi anak keledei kam aleng una' deng kah ikam melé' na' uli la'an té' ji anak duba. Awi ika' em melé' na' nunan, sayu im ngu'en keran na'. Bi marung kelunan, lim-lim anak aké' kam aleng una', sayu nah ikam bayen ala daha' uli. 14Tana' anak kam meteng ikam nunih baya tih, ‘Nun tavit itam na nunan du?’ ken na', sayu kam nyu'ei iha', ‘Avin kenan tingan usu Tuhan aleng uh geri itam musang men Mesir, men alem uma ngavan tam jadi' dipen arei dih. 15Avin kenan Firaun haten em mun itam musang, iha' nah Tuhan lematei lim anak aleng una' ha' tana Mesir, sayu anak una' kelunan, nunan pah anak una' hulung lahuh. Avin anan nah akui mengalei ma'uk men Tuhan lim anak hulung aleng laké' aleng anak una', dahin anak aké' kui aleng una' ek bayen ala iha' uli la'an,’ ken kam men anak kam. 16Sayu nah ket nunan jadi' awi ji tada' té' usu kam dahin awi tada' té' likau kam, avin kenan u'a usu Tuhan Iha' uh nei geri itam musang men Mesir tih,” ken Musa.
Pelulo' avun dahin beluluk apui
17Tegu Firaun mekoh daha' anan tei, nusi' Allah mayak daha' tei men alan aleng tei ha' daléh kelunan Filistin, lan pah alan anan aleng jeleng, avin Allah kuma', “Bahi daha' kawah kenep nyineng jam ayau na'a, ujung-ujung nei nguli pah kenep daha' na'a tei nepulet pala tana Mesir la'an.” 18Bi Allah mayak daha' men alan aleng tei ha' tana ngahit tei ha' Banget Teberau. Tegu daha' leka' men Mesir anan dih, paget kanan kebiteng lim kah daha' lahuh.
19 #
Ar Kel 50:25; Yos 24:32 Tulang Yusuf pah té' en Musa geri, avin men em payan Yusuf matei iha' na ji daho' tevah na' men daha' Israel, “Adang Tuhan seng nei masi ikam, tegu anan sayu nah ikam geri tulang kui men inih.”
20Nunan nah tuk daha' leka' men Sukot ateng ha' Etam, na lepau nah daha' tinan té' béh tana ngahit. 21En Tuhan ayak nah daha' té' alan, tana' tegu ngedau Iha' té' alem pelulo' avun ja mayak daha' panau, tana' tegu malem Iha' pah té' alem beluluk apui ja ha' unan daha' malah, ja daha' deng panau ngedau dahin malem. 22Nusi' peletu pelulo' avun anan pasan té' unan daha' tegu ngedau, nurei pah beluluk apui anan em pasan tegu malem ha' unan kelunan kahuma atih.
Currently Selected:
USANG DAHA' ISRAEL 13: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
