USANG DAHA' ISRAEL 12
12
Na Dau Aya' Paskah
1 #
Lewi 23:5; Kah d Is 9:1-5; 28:16; Kel d M 16:1-2 Lun en Tuhan duan nah Musa dawa' Harun ha' tana Mesir la'an, 2“Bulan anih nah bulan aleng una' loh-loh men lim-lim bulan, jadi' anih nah bulan aleng una' loh-loh alem ha'ut-ha'ut duman lahuh. 3Nunih kua' katuk peng daha' Israel nan: Té' pulu dau bulan anih sayu nah ha'ut-ha'ut amin ala ji anak duba, ngioh ha'ut-ha'ut panak daha', ji anak duba anun ji amin. 4Awi daha' alem amin kanya lan em deng seng ala ji duba, sayu nah dalo' peji té' ji duba dahin daha' amin aleng béh dalo'. Ngioh ngahum daha' deng kuman na' ateng ha' pah, sayu kam ngio'-ngio' tulan ji-ji la'ung té' duba anan. 5Sayu kam ala duba aleng laké' umun ji duman, meng té' nun-nun ji'ek na', men hang duba men hang kading kah deng kam ala na'. 6Sayu kam muleng iha' ateng pulu-pat dau bulan anih, tegu anan iha' nah lim ikam pahu Israel nevek na' tegu dau herep. 7En kam ala uk daha na' en kam usut sepipah ketamen dahin nyelibau ketamen hino'-hino' ngavan kelunan aleng kani duba anan. 8En kam isak nah sin na' malem anan, uh anan en kam kani nah dahin luti aleng em té' tavah dahin dapi uro' aleng pa'i. 9Meng kam kuman na' ata, bi meng pah ikam maru na', en kam isak nah tua té' apui, paget kahung dahin kudek dahin buréh na'. 10Meng kam melek nun-nun sin na' ateng jihima, awi té' aleng melek ateng jihima sayu kam nutung na' pah té' apui. 11Nunih nah tuk kam kani na', iung-u'ing kam en kam ngepah, sayu kam meté' kasut, gem hekun kam lahuh, salet-salet kam kani na', anan nah Paskah men Akui.
12“Awin malem anan Akui seng tei panau ha' lim tana Mesir, lim anak aké' daha' aleng una', anak kelunan dahin anak una' tulan lahuh seng Ek lematei. Akui seng mukum lim ket en daha' Mesir ketalau, Akui nah Tuhan. 13Daha anan nah jadi' tada' kam té' uma ngavan kam melo'. Tegu Akui jam daha anan té' té' ketamen kam, Ek lalau tua nah ikam Nusi' nah seng té' parit dahin tasa' seng nei té' ikam tegu Akui mukum daha' Mesir anan. 14#Us 23:15; 34:18; Lewi 23:6-8; Kah d Is 28:17-25; Kel d M 16:3-8 “Sayu nah ikam hituk té' dau anan pa'en. Sayu nah ikam meju dau anan na dau anan ji dau aya' men Akui pa'en ateng-ateng baya,” ken Tuhan.
Dau Aya' Luti Aleng Em té' Tavah
15“Alem tusu dau, sayu nah ikam kuman luti aleng em té' tavah té' iha'. Té' dau aleng aring-aring na', en kam sau nah lim tavah-tavah men alem amin kam, avin hi-hi aleng kuman nun-nun aleng té' tavah na', men dau aleng una' ateng dau aleng ketusu, kelunan anan en bet men hang kam. 16Dau aleng aring-aring na' atih dahin dau aleng ketusu, sayu nah ikam pepeng mahek Akui. Tegu dau anan meng kam na nun-nun hadui, bi na ket en kam kani deng kah, ket anan tua deng en kam na. 17Sayu kam pa'en na Dau Aya' Ngavan Kam Kani Luti Aleng Em Té' Tavah, avin té' dau anih nah Akui geri ikam musang men tana Mesir. Avin anan sayu nah ikam meju ji dau aya' anih pa'en ateng-ateng baya tih. 18Men levi pulu-pat dau bulan ji ateng levi dua'-pulu-ji dau té' bulan ji anan, kuman luti aleng em té' tavah tua nah ikam. 19Meng té' tavah nun-nun alem amin kam jarun tusu dau anan. Hi-hi aleng kuman nun-nun aleng té' tavah, kelunan anan en bet#12:19 Té' dua' ukum aleng bahat lelan kenan Tuhan, aleng bara ayan sala atih. Ji ukum, iha' tih harin kelunan aleng sala anan lematei iha' pelalau. Aleng ji atih, en daha' bet nah iha' men hang daha', ja iha' murip liong-liong tua ha' tana ngahit, ujung-ujung matei nah iha', levah pah pahu na', avin iha' uh kep'ung na sala. men alem peng kam Israel nan, sayu pah iha' kelunan hakei, sayu pah iha' kelunan aleng asen alem daléh lahuh. 20Nun-nun ket kani aleng té' tavah meng kam kani na', hino'-hino' kam té', sayu kam kani luti aleng em té' tavah atih tua,” ken Tuhan.
Paskah aleng una'
21En Musa duan nah lim-lim daha' aleng dekaya' men hang daha' Israel, ken na' men daha', “Tei nah ha'ut amin, mili nah anak duba kam, en tevek nah anak duba anan men dau Paskah#12:21 PASKAH aleng aran dau atih, Paskah pah aleng aran anak duba aleng en daha' tevek en daha' kani té' dau anan lahuh. Nyineng 1 Kor 5:7. 22Ala nah ji kepah hisop#12:22 HISOP iha' tih ji na'an kayo' aleng liva aleng murip ha' tana ngahit. ngavan kam musut daha aleng uh en kam lo' alem bisin, en usut nah nyelibau ketamen dahin sepipah na'. Meng mun ji la'ung nei musang hawang ateng jihima. 23#Ib 11:28 Tuhan seng panau menei tulah té' daha' Mesir, Iha' seng pelalau tua té' ikam tegu Iha' jam daha té' té' nyelibau ketamen dahin sepipah ketamen kam, nusi' nah Iha' mun ket aleng nasa' atih nei halem amin kam, ja ikam em tasa'. 24Hituk nah ikam té' hadui anih ja ikam hituk na adet anih, ikam dahin anak-anak kam lahuh, ateng-ateng baya tih. 25Tegu ikam ateng ha' daléh aleng seng en Tuhan uk ikam, awi aleng dahun Na' dih, sayu nah ikam na adet anih pa'en. 26Awi té' anak kam meteng ikam, ‘Nun tavit itam na adet nunih du?’ 27sayu kam nyu'ei, ‘Anih nah anak duba aleng en tam uk men dau Paskah en tam uk men Tuhan, avin Tuhan nei nyelibau uma-uma tam Israel en Na' lalau nah itam tegu Iha' nei lematei daha' Mesir, itam anih en Na' pekurip,’ ken kam nah.” Pelalau nah lim daha' kahum anan ngelu'ep nyepukun sebayang.
28Tei nah daha' Israel anan na awi dahun Tuhan men Musa dawa' Harun, nunan lim-lim daha' na.
Tulah kepulu: Anak una' matei
29 #
Us 4:22-31
Tegu belua malem, lun nei nah Tuhan lematei lim anak aleng una' ha' daléh Mesir anan, anak una' Firaun aleng melo' hujung ladung aren na' dahin anak una' daha' aleng té' alem uma jin, nunan pah lim anak una' hulung lahuh. 30Firaun dahin daha' aleng ida na' dahin kelunan alem daléh Mesir anan pah ma'un malem anan, beka' pehia tua nah tirau daha' hiréh hitih, avin alem ha'ut amin té' aleng matei.
31Malem anan en Firaun duan nah Musa dawa' Harun, “Ma'un nah, tei nah kua' dahin daha' Israel musang men daléh kui nih. Tei nah ikam sebayang té' Tuhan, awi kurin kua' dih. 32Lim hulung-hulung kam en kam geri nah lahuh, awi kurin kua' dih, tei nah salet. Sebayang kua' akei asi men akui lahuh.”
33Daha' Mesir pah aleng niga' lelan nyihu daha' Israel tei leka' men daléh anan, avin daha' kuma', “Matei lim tam na'a.” 34En daha' Israel ala nah tepung aleng em payan daha' kelugau té' tavah, dahin ala ngavan daha' ngelugau na' anan, en daha' nutun té' balun, en daha' hi'un. 35#Us 3:21-22 Daha' Israel pah na awi aleng kurin Musa atih dih, daha' akei met dahin pirek dahin balun té' daha' Mesir, 36Tuhan uh na kenep daha' Mesir pasi té' daha' Israel, nun-nun en daha' Israel akei en daha' Mesir ih kah tua. Nunan nah tuk daha' Israel ala-ala ketanun daha' Mesir.
Daha' Israel musang men Mesir
37Leka' nah daha' Israel men Raamses tei ha' Sukot, kio'-kio' nem atuh libu' daha' laké' aleng dekaya' panau kudek, nusi' itung daha' doh dahin daha' nyam. 38Té' pah daha' bengsa' ha' béh, bengsa' peklet, tei tugung daha' lahuh, kahum lelan pah hulung kading, duba dahin sapi' daha'. 39En daha' pesak nah tepung aleng em payan té' tavah aleng en daha' geri men Mesir anan dih, na na' luti aleng em té' tavah. Té' pah iha' em té' tavah té' tepung anan avin daha' em havah metei na' avin daha' Mesir niga' daha', nusi' nah daha' havah nemei nguyo' daha'.
40 #
Ar Kel 15:13; Gal 3:17 Dara daha' Israel melo' ha' Mesir pat atuh telo'-pulu duman. 41Tegu pat atuh telo'-pulu duman anan uh pah, tegu dau anan pah lim peng daha' kelunan Tuhan musang men daléh Mesir anan. 42Malem anan Tuhan puboh lan-lan nah daha' Israel, geri daha' musang men tana Mesir. Avin anan, malem anan jadi' ji malem aleng ngavan lim-lim daha' anak Israel pehingat ja meju Tuhan ha'ut-ha'ut duman, ha'ut-ha'ut tebin daha' ateng-ateng baya.
Marung tuk Paskah
43Lun en Tuhan bara nah Musa dawa' Harun, “Sayu nah hituk té' tebara anih marung adet Paskah. Meng bengsa' ha' béh kani ket en na té' dau anan, 44bi daha' nyam amin aleng uh en kelo' melé', aleng uh en nyunat, deng kah iha' kani na'. 45Daha' hakei dahin daha' aleng gaji' nusi' deng kani na'. 46#Kah d Is 9:12; Yoh 19:36 Sayu kani na' alem ji amin tua, uk-iduk pah meng geri na' hawang, meng peletu-letu merung ji tulang na'. 47Sayu nah lim-lim kam Israel hituk sayu-sayu meju dau anan. 48Awi té' kelunan ha' béh aleng menangen murip alem amin kam ngenep na Dau Aya' Paskah anan lahuh men Akui, sayu nah lim daha' laké' en nyunat, nuréh daha' deng nei na Dau Aya' Paskah anan, daha' anan pah en itung kelunan alem daléh kam. Bi meng kelunan aleng em nyunat kani na'. 49Ji tua nah tebara men ikam aleng alem daléh nurei pah men kelunan hakei aleng nei alem daléh kam,” ken Tuhan. 50Lim daha' Israel na nah nutih awi dahun Tuhan men Musa dawa' Harun. 51Tegu dau anan pah Tuhan tei geri daha' Israel musang men daléh Mesir ngioh peng pahu-pahu daha'.
Currently Selected:
USANG DAHA' ISRAEL 12: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
