USANG DAHA' ISRAEL 11
11
Musa bara marung tulah aleng kepulu, lim anak una' seng matei
1Lun en Tuhan duan pah Musa la'an, “Akui seng menei ji katé' la'an té' Firaun dahin té' daléh Mesir nan, uh anan mekoh nah iha' ikam tei men inih. Tegu iha' mekoh ikam tei, adang iha' muga ikam lan-lan tei tegak tua men inih. 2Sayu im bara daha' Israel ja daha' laké' tei akei met dahin pirek té' daha' aleng sepipah amin daha', nunan pah daha' doh tei akei na' té' daha' aleng sepipah amin daha' lahuh.” 3En Tuhan na nah kenep daha' Mesir anan pasi lelan nyineng daha' Israel. Ji pah lahuh, en daha' aleng té' ida Firaun dahin daha' alem daléh anan ju lan nah Musa.
4Ken Musa, “Nunih nah dahun Tuhan, ‘Tegu belua malem na'a, Akui seng nei panau ha' Mesir nan. 5Ha'ut-ha'ut anak aké' aleng una' ha' tana Mesir seng matei, anak una' Firaun aleng melo' ujung ladung aren na' ateng anak una' daha' dipen na' atih aleng tepa' ha' sung kisan, nunan pah anak una' sapi' lim lahuh. 6Ha'ui dahin tirau seng té' ha' tana Mesir, nusi' payan té' ket aleng nunan uh men'a, nunan pah aleng seng la'an. 7Bi té' daha' Israel anih ji aso' pah em té' aleng kaséh ngimet jelan na', ji-ji pah em té' aleng matei lahuh, nurei kelunan nurei pah hulung lahuh, ja ikam jam Akui nah Tuhan aleng na hang té' daha' Mesir dahin kam Israel anan,’ ken Tuhan nuréh dih. 8Lim daha' aleng hida ka' seng nei nyepukun akei asi té' akui dahin kuma', ‘Tei nah im musang dahin lim daha' aleng ngioh ika' anan.’ Men'uh atih, adang kui musang,” ken Musa men Firaun. Bunget lelan nah iha', lun leka' nah iha' men béh Firaun.
9Lun kuma' nah Tuhan men Musa, “Nusi' loh kah Firaun seng ngioh dahum. Bei ha', ja si' Akui sa' mi'at tada'-tada' Kui la'an ha' Mesir anan.” 10Lan pah Musa dawa' Harun na lim tada'-tada' anih ha' unan Firaun, bi Tuhan na kenep na' mahing, nusi' loh kah iha' mun daha' Israel tei leka' men daléh na' anan.
Currently Selected:
USANG DAHA' ISRAEL 11: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
