HADUI DAHA' SIHU TUHAN 27
27
Paulus panau kapen tei ha' Roma
1 #
HST 25:12
Tegu daha' uh petneng marung tuk kamé' seng tei ha' Italia, en daha' uk nah Paulus dahin kuri-kuri la'ung ha' béh aleng jin men ji kopral aleng aran na' Yulius aleng men peng seladu Kaisar. 2#HST 19:29; 20:4 Tegu kamé' uh ma'un hujung ji kapen aleng men Adramitium, aleng seng panau dahin nyangei ha' daléh-daléh aleng té' bahé' Asia, pelalau leka' nah kamé'. Té' pah Aristakhus kelunan Makedonia daléh Tesalonika té' dahin amé'. 3#HST 24:23; 28:2,16 Dau malah ji nyangei nah kamé' ha' Sidon, dahin Yulius atih masi nah Paulus, dahin mekoh iha' tei jam daha' bakéh na' ja daha' ngelema kenep na'. 4Tegu kamé' hu'uh leka' men inan, panau nah kamé' nevei bahé' Siprus, avin bahui nyura' kamé'. 5Tegu kamé' hu'uh lawat banget béh Kilikia dahin Pamfilia, kamé' ateng nah ha' Mira, ji daléh alem daléh Likia.
6Hinan nah kopral atih pesuk ji kapen aleng men Aleksandria, aleng ngenep tei ha' Italia, pelalau iha' metei kamé' tei alem kapen atih. 7Kuri-kuri dau dara na' kamé' pekanap pelihei lelan, li'an-li'an kamé' nei ateng jeleng Knidus. Avin bahui meté' nyura' kamé', iha' nah kamé' tei nevei bahé' busang Kreta tei lalau ajui Salmone. 8Kelalau katé' nah kamé' nevei busang atih, ateng nah kamé' té' ji ngavan aleng aran na' Hangei Sayu, jeleng daléh Lasea.
Tusah kenan bahui aya' dahin lupak
9 #
Lewi 16:29; 2 Kor 11:25-26 Alem anau amé' uh dara nunan dih, dau adet pelien pah uh lebau, tula nah kamé' seng ga' tusah. Iha' nah Paulus nebara daha' avin kamé' seng ga' tusah nutih, 10ken na', “U kelo' tamak, akui nyineng anau tam nih adang seng té' tusah nah anih, nusi' ha' udan anih dahin kapen anih tua, mina batung tam pah seng tei tasa' lahuh.” 11Bi laké' kopral atih lalau nginah té' kelunan aleng gem pengudi kapen dahin kelunan aleng hipun kapen atih men'uh té' ket aleng en Paulus nira atih. 12Avin lirung atih em lugah em sayu men kapen tegu jaka' bahui aya', iha' nah daha' mavéh kamé' tei leka' pelalau tei ha' Feniks, ja kamé' melo' tinan alem dara unya anan. Daléh Feniks anan nah ji hangei té' busang Kreta aleng men béh matan dau uli. 13Tegu dih men pedah ta'o matan dau pa'un uh nei medih, en daha' ngio' nah jaka' kamé' seng leka', lun en daha' jat ma'un nah titei kelakang pelalau tei leka' nevei bahé' busang Kreta nan. 14Bi nusi' nuno' dara la'an men'uh atih nei nah men tana atih ji barik bahui aya' aleng aran na' Yurakulon. 15Tegu kapen atih en bahui geri dahin em deng nyura' dih atih, kamé' pah kelung tua, pelalau negelung nyayang. 16Men'uh anan manyun nah kamé' tei ha' bahé' ji busang uk, aran na' Kauda, tinan nah kamé' pekaté' lelan mejat haruk bagung kapen anan. 17Tegu daha' uh mejat haruk bagung ujung kapen, iha' nah daha' ngepah kapen atih#27:17 ngepah kapen iha' tih daha' metei kuri-kuri talé' aya' men ida na', ngepah na' ja ha' em bi'ang.. Avin kamé' takut tei nasak té' busang Sirtis, iha' nah daha' mahut larei kapen ja bahui em mahnga' meté' kamé', kamé' pah negelung tua. 18Avin kamé' kelalau-lalau ngaju kenan bahui, dau malah ji daha' pah mesau udan daha' alem banget. 19Dau malah ji la'an en daha' sau nah uvung-uvung kapen anan. 20Alem kuri-kuri dau dara na' kamé' em jam matan dau nurei kah kelawing lahuh, bahui aya' pah kelalau lalé' meté' kamé'. Pah tua nah kenep amé', nusi' nah kamé' kuma' kamé' seng murip la'an.
21Dara lelan nah daha' uh em kuman, iha' nah Paulus nekring té' hang daha' atih, dahin kuma', “Iha' kah akui em mun itam leka' men Kreta dau arei dipa, beka' ikam pah em ngioh dahuk, iha' kah ulah itam tei ga' tusah nunih nih. 22Bi kerei inih akui nangen ikam, petneng nah kenep kam, avin ji la'ung pah em padé' hengan na' men itam, bi kapen anih dep kah aleng seng tasa'. 23Avin malem di nekring nah ji meliket Allah té' béh kui, Allah atih aleng hipun akui dahin aleng ngavak sebayang atih, 24#HST 23:11 ken meliket atih, ‘Meng takut, Paulus, adang ika' seng nekring ha' unan Kaisar. Lan, alem anau anih Allah uh ma'uk asi Na' men ika', lim kelunan aleng dahim anih pah adang seng murip lahuh,’ ken na'. 25Avin ha' nunan, u kelo' tamak, petneng nah kenep kam, avin akui nginah té' Allah, adang lim dahun Na' aleng uh Na' bara men akui atih seng la'ung. 26#HST 28:1 Bi adang itam seng nasak té' ji busang lahuh.”
27Té' malem aleng kepulu-pat, alem kamé' tei negelung pivek-pivek tua ha' banget Adria, kio'-kio' belua malem kelunan aleng nyadui alem kapen atih pah ngio' kamé' uh jeleng bahé' daléh. 28En daha' sau nah bato' tuken, iha' nah daha' jam dalem na' telo'-pulu-nem meter. Nusi' nuno' su men inan en daha' sau nah bato' tuken atih ngelua', dua'-pulu-tusu meter dalem na'. 29Avin kamé' takut kamé' nasak té' bato' jelini, en daha' sau nah pat kelakang ha' muré', kenep amé' iah-iah seng malah nah dau. 30Bi alem daha' aleng nyadui alem kapen atih seng lap men kapen, jam-jam daha' awi seng mesau bato' kelakang atih kah daha' ha' dulung tih, bi aleng lan na' haruk bagung aleng en daha' uloh alem banget. 31Iha' nah Paulus kuma' men kepala' seladu dahin men lim daha' seladu atih, “Awi dalo' anan em melo' alem kapen, nusi' sebaya' ikam murip.” 32Pelalau nah dalo' seladu netek talé' haruk bagung atih, dahin kelung haruk atih tei manyun.
33 #
HST 27:27
Tegu dau seng malah Paulus pah pehituk daha' lim marung kuman, dahin kuma', “Anih nah pulu-pat dau ikam uh pelengui tua, em kuman ket nun-nun pah. 34#1 Sam 14:45; 2 Sam 14:11; Mat 10:30 Avin ha' nutih akui nyihu ikam kuman, avin anih nah ngavan kam seng murip. Avin ji irah buk pah em té' aleng seng pebet té' kahung kam.” 35#Lk 22:19; Yoh 6:11; 1 Tim 4:4 Tegu iha' uh kuma' nunan, en na' ala nah luti dahin bara sayu kenep men Allah ha' unan daha' atih lim, en na' mi'ang-mi'ang nah, pelalau iha' kuman. 36Uh anan teneng nah kenep daha' atih, pelalau daha' pah kuman lahuh. 37Té' pah kahum amé' alem kapen atih dua' atuh tusu-pulu-nem la'ung. 38Tegu kamé' hu'uh besoh kuman, en daha' sau nah parei halem banget ja kapen sa' nei laga'.
Marung kapen kahem
39Tegu dau uh nei malah daha' alem kapen atih pah em jam nelana' tatah titih dih, bi té' nah ji lirung aleng sayu lan mekah bahé' na' kitan amé', iha' nah daha' piah kenep tei geri kapen anih nasak ha' lirung anan iha' awi deng dih. 40Lun en daha' netek nah talé' kelakang tih, melek na' tua alem banget, en daha' uvan pah talé' pengudi dahin meju larei atih, ja bahui geri kapen tei ha' bahé' tih. 41Kapen amé' pah nasak kalen tinan, dulung na' tageng em deng mahnoh, lun meté' nah lupak men duré', pelalau tasa' nah muré' kapen anan kenan tu'a lupak atih. 42Pelalau lim seladu atih pah ngenep lematei lim kelunan aleng jin, bahi ji la'ung men daha' tei nyatung tei lap. 43Bi avin tavit laké' kopral atih ngenep pekurip Paulus tih, iha' em mun daha' ngioh kenep daha' atih, bi iha' nyihu lim daha' aleng jam nyatung nesau halem banget dahin ma'ung usun tana una', 44#HST 27:22-25 dahin aleng ha' béh atih gem latau tegan, balei daha' na latau i'ang kapen. Nunan nah daha' lim murip ateng ha' usun tana.
Currently Selected:
HADUI DAHA' SIHU TUHAN 27: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
