HADUI DAHA' SIHU TUHAN 26
26
Tira Paulus ha' unan Festus dahin Agripa
1Ken Agripa men Paulus, “Sayu batung ka' bara marung ika'.” Pelalau Paulus mejei usu na' dahin bara marung batung na',
2“U Amei Laja' Agripa, akui kelalau sayu kenep avin dau anih nah akui seng deng nyu'ei dahin musang dahuk té' ida kudek ka' marung lim kema' kelunan Yahudi té' akui, 3lalau lan pah la'an avin ika' jam lim adet dahin tukit té' hang daha' Yahudi. Avin anan akui akei asi té' ika', kelenghi nah marung akui dahin aru kenep.
4“Marung akui nih, adang daha' Yahudi uh jam barik kui men-men akui nyam, avin aring-aring akui murip, iha' nah akui murip té' hang daha' bengsa' kui dahin daha' ha' Yerusalem lahuh. 5#HST 23:6; Fil 3:5 Uh menuna' nah daha' uh jam akui, iha' daha' kaséh bara ia', adang deng kah daha' bara, avin akui uh murip awi ji kelunan Farisi aleng atek tangen lan ngioh alem adet tam. 6#HST 28:20 Kerei inih akui nekring hinih ga' besara' anih avin akui nginah té' jaji aleng uh en Allah jaji men sepun tam menuna', 7#HST 24:15 dahin aleng en daha' pulu-dua' pahu tam atih idah lahuh, aleng ngavan daha' tangen lelan sebayang té' Allah. Avin kenan kinah ta' aleng nunan nah, u amei Laja' Agripa, daha' Yahudi nih meté' leput ita' nunih nih. 8Na' nun ikam em nginah Allah seng deng pekurip kelunan matei pa?
9 #
HST 9:1-29; 22:3-21 #HST 8:3; 22:4-5 “Nunan lan kah akui menuna' dih, akui dep pah aleng meté' lawan dengah sayu Yesus kelunan Nazaret atih. 10Tuk aleng nutih lahuh uh ek na ha' Yerusalem, ateng akui tei ala surat té' dalo' imam aya' ja akui deng metei daha' aleng anak Tuhan alem jin. Akui lahuh piah kenep dahin daha' tegu daha lematei daha' anak Tuhan atih. 11Tutek lelan kui pekaté' daha' atih alem lim uma sebayang, dahin ngenep ngepden daha' peji'ek Allah, kelalau busek kui dahin daha' ateng kui livoh daha' ateng ha' daléh ha' béh.
Paulus bara marung aring ha' nginah té' Tuhan Yesus
HST 9:1-19; 22:6-16
12“Akui pejoh hadui anan dih nah pa'un kui tei ha' Damsyik tegu akui uh ala surat men dalo' imam aya' dahin tei ngioh sihu dalo'. 13Alem kamé' bakéh kui ngeluveng alan tegu dau negreng, u Amei Laja' Agripa, beka' nei nah ji alah aleng kelalau malah men'uh alah dau aleng nei men langit, nei netan té' kamé'. 14Lun puva nah kamé' lim ha' tana, ek kelenghi nah ji daho' aleng kuma' nunih alem dahun tam Ibrani, ‘Saulus, Saulus, avin nun tavit na' ika' pekaté' Akui? Nusi' sebaya' ika' deng nyakat ket nyi'et anih.’ 15Lun kek nah nyu'ei Iha', ‘Hi kah Ika' du, u Tuhan?’ en Na' pah nyu'ei akui, ‘Akui nah Yesus aleng im pekaté'. 16#Yehez 2:1,3 Peju nah, nekring nah im, avin anih nah tavit na' Akui tula té' ika', avin Akui ngenep petneng ika' jadi' sihu Kui dahin bara marung Akui, marung lim ket aleng ngavam uh nyineng Akui, nurei pah marung ket aleng Ngavak seng tula té' ika' uh anih. 17#1 Tuk 16:35; Yer 1:7 Akui seng makau ika' men pahu anih dahin men daha' aleng alem adet ha' béh, aleng ngavam seng tei Hu'ek. 18#Kel d M 33:3; Yes 35:5; 42:7,16; HST 20:32; Ef 2:2; Kol 1:13 Akui nyihu ika' tei, ja ika' meting matan daha' atih, ja daha' nepulet men alem lidem tei pala alah, dahin men tingan Iblis tei pala Tuhan Allah, ja daha' atih jam sala daha' pebet, dahin ala lim aleng seng en daha' sengayan dahin daha' aleng uh telesen avin kinah daha' té' Akui.’
Paulus bara marung tuk dengah ngelisah kenep
19 #
Gal 1:16
“Avin ha' nunan, u Amei Laja' Agripa, nusi' kui muau ket aleng ek nyineng men Surga atih, 20#Mat 3:8; HST 9:20,28-29 bi akui pedengah una' men kelunan ha' Damsyik, dahin ha' Yerusalem dahin alem lim-lim daléh Yudea, dahin men daha' aleng alem adet ha' béh lahuh, marung tekep daha' nei ngelisah kenep dahin nepulet pala Allah, dahin na hadui aleng tekep men kelisah kenep atih. 21#HST 21:30-31 Avin kenan tavit daho' atih nah kelunan Yahudi mapuh akui té' alem Uma Allah dahin seng pesek lematei akui. 22#Lk 24:44-47 Avin kui uh ala asi men Allah akui té' loh nekring ateng dau anih, ateng akui deng bara men daha' aleng da'uk dahin men daha' aleng dekaya'. Nusi' kui nira ket aleng ha' béh, bi akui nira ket aleng kurin daha' nabi dahin Musa marung ket aleng seng nei ateng, aleng hu'uh nei la'ung arei dih, 23#Yes 42:6; 49:6; 1 Kor 15:20 iha' tih, Kristus adang ga' katé', Iha' pah aleng una'-una' peju murip men hang kelunan matei, Iha' pah lahuh petula alah men daha' pahu anih dahin men daha' aleng bengsa' ha' béh lahuh.”
24Alem iha' bara' hu'ei na' nunan, Festus kuma' dahin medéng aya', “Ika' buling anan Paulus, avin kahun lelan ket im pekalei nan pa!” 25Bi ken Paulus nyu'ei, “Nusi' kui buling, u Festus aleng kelalau sayu. Adang akui teneng kah anih pa'en petira daho' aleng teneng anan dih! 26#Yoh 18:20 Avin laja' pah uh jam lim-lim tuk daho' anih lahuh, iha' kah akui makang petira aleng betut tua men ika' nih, nusi' kui mahuk na'. Adang lim-lim tuk anih uh kitam men'a lahuh, avin daho' anih, nusi' ha' ket sihuk. 27U Amei Laja' Agripa, nginah kah ika' té' daha' nabi atih iah? Akui jam ika' nginah.” 28#HST 11:26; 1 Pet 4:16 Agripa pah kuma' men Paulus, “Té' kanya dahum nunan ika' seng na akui kelunan Kristen kurim iah?” 29Ken Paulus, “Akui akei té' Allah, awi ha' té' kanya daho', awi té' kahum daho', akui sebayang men ika' nurei kah men lim kelunan aleng uh kelenghi dahuk dau anih, ja si' daha' nei piah awi akui nih, bi meng tua daha' alem pesung nunih.”
30Peju nah laja' atih dahin gabnur dahin Bernike dahin lim kelunan aleng melo' dahin dalo' atih. 31Alem daha' atih musang kuma' nah daha' pedeng daha', “Nusi' té' nun-nun hadui laké' anih aleng tekep avin na' ga' ukum patei, nusi' pah tekep iha' jin lahuh,” ken daha'. 32#HST 25:11 Iha' nah Laja Agripa kuma' men Festus, “Aleng lan na', awi laké' anih em akei tei na tengaran na' ha' unan Kaisar, uh deng musang nah iha',” ken Agripa.
Currently Selected:
HADUI DAHA' SIHU TUHAN 26: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
