Roma 15
15
Nggyabiya Nǝ Pina Ɗǝfuwa Alenyi Nji
1Namǝn kǝra ǝnga dǝnama wu mbǝrsar mǝn, a ɗar tsaˈa mǝna hǝr hǝɗar njira gǝra ǝnga dǝnama, aga mǝna dlǝwar nda wu tǝtǝwakurǝr nda. A sara mǝna pina huɗa kǝrmǝn mai. 2Bǝgǝ kalar ndǝ wu pama mǝn ja pina huɗa kuvwa nyi, aga ja dlǝwar nda, ba hǝna mbǝrsar nda.
3Ariya alaga Kǝrsiti ǝnga kǝrnyi aˈyi pina huɗa kǝrnyi mai. Ənggǝr kǝra ja tsǝtsǝfau, abǝr, “Nggǝl kǝra nji nggǝl ngau, a shari a shidar kǝra yau.” 4Ara patǝr sǝra nji tsǝfǝri tsu kaɗǝu wu ndǝr Hyal tsǝtsǝfǝ nji tsǝfǝr aga ja highiɓǝr mǝn, aga lagu sǝsǝˈwu sau, ǝnga tsǝtsǝku ɗǝfu nǝ ndǝr Hyal tsǝtsǝfǝ ja nǝr mǝn fǝrkǝr. 5Bǝgǝ Hyal ndǝra lǝr sǝsǝˈwu sau ǝnga tsǝtsǝku ɗǝfu ja nǝ hyi mambǝl nǝ nggya wu cir zǝmǝu, ǝnggǝr kǝra ja tsatsaˈa aga njir nu Kǝrsiti Yesu.
6Lagu kǝ ngǝ patǝkura hyu nda nggya ǝnga miya zǝmǝu, ǝnga ɗǝnga zǝmǝ tsu, hyu lǝ kadakadarkur anǝ Hyal ndǝra naja ngǝ Dǝya Thlagǝr mǝn Yesu Kǝrsiti. 7Hya dlǝwuri kuvwar hyi ǝnggǝr kǝra Kǝrsiti dlǝwuri hyi aga ja shili ǝnga kadakadarkur anǝ Hyal. 8Ara yu na anǝ hyi abǝr Kǝrsiti a ɗar ja ndǝr mǝl thlǝr anǝ njir Yahudiya, aga ja cabiya jirkur nǝ ndǝr Hyal tsǝtsǝfǝ ba tsu aga ja mǝliya nja sǝnibiya alkawal kǝra nji mǝliya anǝ ǝjiya ǝjir nda. 9Ji mǝl aga tsu njira aˈyi njir Yahudiya mai nda lǝr kadakadarkur anǝ Hyal ara tǝhuɗǝ nyi. Ənggǝr kǝra ja tsǝtsǝfau, abǝr,
“Agabangau, yu nda fal ngau wu pama njira aˈyi njir Yahudiya mai,
yu nda thlǝ na nǝ fal anǝ thlǝmǝ ngau.”
10Tsǝfǝ ndǝr Hyal ɓǝra na, abǝr,
“Nahyi njira aˈyi njir Yahudiya mai,
hya caguli ǝnga nji gǝ Hyal.”
11Ja ɓǝra na abǝr,
“Hya fal Thlagǝu,
nahyi njira aˈyi njir Yahudiya mai patǝu,
hya fal nyi,
nahyi culi nji patǝu.”
12Ətsu Əshaya ɓǝra nana,
“Vanyi ndu nda shili sara wu culi Jesi,
Ju sa hyaˈari ju sǝm tǝlkur ar kǝra njira aˈyi njir Yahudiya mai,
ǝnga wu ja ngǝ njira aˈyi njir Yahudiya mai wu nda fǝrkǝr wu ja.”
13Bǝgǝ Hyal nǝ fǝrkǝr ja nyabiya hyi ǝnga caguli nyinyau, ǝnga huɗǝ pǝrtǝu ǝnggǝr kǝra hyi hǝnggǝri ǝnga ja, aga hya nyabiya dzǝ ǝnga fǝrkǝr lagu dǝnama nǝ Mambǝl Cicau.
Mǝl Thlǝr Bulusu Anǝ Njira Aˈyi Njir Yahudiya Mai
14Wazha ama, nayi ǝnga kǝrɗa a hǝnggǝr yi abǝr nahyi ǝnga kǝrhyi nyinyi nga hyi ǝnga mǝnahǝkur, nahyi tsu a nyabiyar hyi dzǝ ǝnga sǝnibiya sau, kǝra tǝkǝri hyu sǝni highiɓǝr nyi sǝ anǝ kuvwar hyi. 15A tsǝfǝr hyir yi alenyi sǝ ar babal gagaɗau aga ya ɓǝra ɗǝngar hyi nda, ariya mayiwakur kǝra Hyal nǝ ɗa, 16kǝra mǝliya yi ɗa ndǝr mǝl thlǝr Kǝrsiti Yesu anǝ njira aˈyi njir Yahudiya mai. Ya vǝr mǝl thlǝr nǝ pubu lagur tǝtǝlna ndǝshigu nǝ Hyal anǝ njira aˈyi njir Yahudiya mai aga nda ɗa sǝ lǝlǝ kǝra dlǝdlǝwu anǝ Hyal, kǝra thlǝthlau lagu Mambǝl Cicau.
17Agabangǝ a sǝni ɓwasǝ yau wu Kǝrsiti Yesu ar kǝra thlǝr kǝra ya vǝr mǝl anǝ Hyal. 18Naya sǝni uya ɗǝfu nǝ ndǝr ar kǝra vanyi sǝ mai, kǝl sǝra Kǝrsiti mǝliya lagu ɗa. Naja ka sǝ tsu ca ngǝ yi shabiya njira aˈyi njir Yahudiya mai aga nda ɓǝlar ndǝr Hyal lagur ndǝr ɗa ǝnga sǝr mǝla yau. 19Patǝ sǝˈyar kǝ ɗarkǝr lagur dǝnama nǝ mǝtsamǝ ǝnga sǝ dǝdǝgur lagur dǝnama Mambǝl Cici ngau. Ca ngǝ sǝra ɗa yi tǝtǝlna ndǝshigu nǝ Kǝrsiti papatǝu, mbari wu Urshalima baˈanǝ mǝlmǝ Ilirikumu.
20Kalar pǝci cimǝ ɗa ca ngǝ ya tǝtǝlna ndǝshigu anǝ patǝr vira nji gǝra sǝnibiya Kǝrsiti ari, ara ja sara ɗa abǝr ya vǝr hǝr a dar kǝra fǝhi kǝra vanyi ndǝ pamǝ ngǝ fiya. 21Ar viya kau, ǝnggǝr kǝra ja tsǝtsǝfau, abǝr,
“Njira nji gǝra nar nda ar kǝra ja ndu nda lari sau,
ǝtsu njira gǝra nggari, ndu nda nggabiya.”
22Naja kǝ ngǝ ɗa sǝ kar ɗa ara shili ǝgya hyi ar pǝcira yu yiwu ya shili.
Bulusu Pabǝr Dzǝ Aga Ja Vwu Roma
23Kabangǝkau, a kuɗǝnar yi thlǝr ɗa ar vira yi ari kau. Ta ɗa tsu kaɗǝu nga yu cimǝ ya nda ǝgya hyi aga ya sa lar hyi, 24a pabǝr yi dzǝ aga ya shili ǝgya hyi kabangǝkau. Yu fǝrkǝr abǝr yu nda shili ǝgya hyi ma yu tǝrabiya a vwu ˈyiˈyir Sǝpenu, aga ya sa usar hyi. Yu fǝrkǝr tsu ayukuɗa yi nggar nggya mǝsahǝu ǝnga hyi nǝ pǝci kushu, yu nda dumwa ǝnga ɓǝ ɗa a ndar vi ta daɓǝ ǝnga dlǝwa dzǝr hyi.
25Kabangǝkau, yu maˈyi a vwu Urshalima aga ya hǝr dlǝwa dzau, a vwa nǝ nji cici gǝ Hyal kǝra a vwuna. 26Njir nu kǝra wu Masidoniya ǝnga njir nu kǝra wu Akaya wu nggar mǝsahǝkura lǝ sǝ lǝlau aga dlǝwa njira gǝra ǝni wu pama nji cici gǝ Hyal kǝra wu Urshalima.
27A nggar nda mǝsahǝkura mǝl abangau, ǝnga a ɗari mǝl ngǝ wu dza nda. Ara nji kǝra aˈyi njir Yahudiya mai a ɗar nda wu cir zǝmǝ wu barka nǝ mambǝl ǝkkǝˈyi njir Yahudiya. Agabangau, nanda tsu nda kyaga lǝri barka nǝ bǝrbakur nda anǝ njir Yahudiya, ca ngǝ sǝra ndu nu nda. 28Ma ya kuɗǝnar thlǝr kau, ǝnga tsu a lar yi abǝr a nǝ ndar yi sǝra nji lǝri aga dlǝwa nda, yu nda maˈyi a vwu Sǝpenu, nayi tsu yu shili ya sa usar hyi ma yu nda tǝrabiya. 29A sǝni yi abǝr ar pǝcira yu shili ǝgya hyi, yu shili ǝnga barka nǝ Kǝrsiti kǝra a nyabiyar dzau.
30Wazha ama, ya vǝr kǝdi hyi lagu Thlagǝr mǝn Yesu Kǝrsiti ǝnga tsu lagur yiwukur nǝ Mambǝl aga hya kǝdi Hyal anǝ ɗa ǝnggǝr kǝra ya vǝr kǝdi Hyal ariya ɓwaɓwatǝ kǝra yi a gwa. 31Hya kǝdi Hyal anǝ ɗa aga ya uya biya sara wu tsa njira aˈyi njir nu mai wu ˈyiˈyir Yahudi, ǝnga aga thlǝr dlǝwa dzǝ ɗa tsu a uya dlǝwu wu Urshalima anǝ nji cici gǝ Hyal kǝra a ndǝna. 32Ənggǝr kǝ tsu, ma yiwur huɗa Hyal ngau, yu shili ǝgya hyi ǝnga caguli, nayi tsu yu uya sǝhǝɗa daɓǝ ǝnga hyi. 33Hyal nǝ jamǝkur ja nggya ǝnga hyi patǝu. Amina.
©2024 Initiative for the Translation and Development of African Languages and Margi Tiwi Nga Təm