Roma 14
14
Hya Sara Diɗa Kuvwar Hyi Njir Nu Mai
1Hya dlǝwuri ndǝra ǝnga mbǝrsa nyi tǝtǝwa, ama hya sara gal lagur diɗa nyi mai, ma ɗǝngar hyi aˈyi tǝkǝbiya dzau. 2Mbǝrsa nǝ vanyi ndǝ wu piyari nyi ja sǝm kalar sǝra ju yiwu. Ama ndǝra mbǝrsa nyi tǝtǝwa, ju sǝm sǝra biya sara wu masǝm wacu. 3Ndǝr nu kǝra wu sǝm kalar sǝr sǝm kǝra ju yiwu, ja sara diɗa ndǝra gǝra sǝm mai. Ətsu ndǝr nu kǝra gǝra sǝm kalar sǝr sǝm, ja sara diɗa ndǝra wu sǝm mai, ariya Hyal a dlǝwuri nyi ri. 4Wa nga ga, ga mǝl numa anǝ mafa nǝ vanyi nda? Alaga mafa ta mǝl thlǝr mǝnahǝu ǝndǝga thlǝr didiɗi, naja kau nǝ thlagǝr ki nyi ngau. Ənga ju nda taˈyau, ara Thlagǝ ngǝ wu sǝni mǝliya nyi ju taˈyau.
5Vanyi ndau, ju hǝri vanyi pǝci a ndiya kalar pǝci. Vanyi ndǝ tsu ju hǝri kalar pǝci kakalǝu. Bǝgǝ kalar ndǝ ja hǝri wu ɗǝfuwa ja abǝr sǝ kǝ ju ɗǝnga kǝ ca ngǝ tsatsaˈa. 6Ndǝra hǝr vanyi pǝci a ndiya kalar pǝci, ju mǝl abangǝ aga lǝ dlǝvǝ anǝ Thlagǝu. Ndǝr sǝm kalar sǝr sǝm, ju mǝl abangǝ aga lǝ dlǝvǝ anǝ Thlagǝu, ara ju lǝr usaku anǝ Hyal ariya sǝr sǝma nyi. Ndǝra gǝra sǝm kalar sǝr sǝm, naja ma ju mǝl abangǝ aga lǝ dlǝvǝ anǝ Thlagǝu, ara naja ma ju lǝr usaku anǝ Hyal.
7Ara ndǝ aˈyi wu pama mǝn kǝra wu nggya aga nggyabiya nǝ kǝrnyi waci mai. Ənga tsu ndǝ aˈyi kǝra wu tau aga nggyabiya nǝ kǝrnyi waci mai. 8Ma mǝnu nggya ǝnga pi, nggyar mǝn anǝ Thlagǝ nga nyi. Ma tsu tǝ nga mǝnu tau, tǝr mǝn anǝ Thlagǝ nga mǝnu tau. Agabangau, alaga nggya ǝnga pi nga mǝnu nggya, ǝndǝga tǝ nga mǝnu tau, nǝ Thlagǝ nga mǝn.
9Kǝrsiti tau ǝnga ji hyaˈari ǝnga pi sara vir tau aga ja nggya Thlagǝu anǝ nji tǝtau ǝnga njira ǝnga pi.
10Nagau, mi ngǝ ɗa gu mǝl numa anǝ zamǝ nga? Ənga mi ngǝ ɗa gu diɗa kuvwa ngǝ ndǝr nu wa? Ara namǝn patǝu wu nda taˈyau wu mwar Hyal, ba ja mǝliya mǝn numa. 11Ara tsǝtsǝfǝ nga nyi,
“ ‘Ənga jiri, ǝnggǝr kǝra yi aˈyi ǝnga pi,’ ǝngwar Thlagǝu,
‘kalar undi wu nda uzhau wu mwa ɗa,
kalar kyar wu nda na abǝr nayi ngǝ Hyal.’ ”
12Agabangau, kalar zǝma mǝn wu nda lǝri sakida sǝr mǝla ja anǝ Hyal.
Ga Sara Ɗa Sǝr Thlǝ Hi Anǝ Zamǝ Ngǝ Mai
13Agabangau, bǝgǝ mǝna piyari mǝl numa anǝ kuvwar mǝn. Kuji kǝ mǝna ɗǝnga abangau, abǝr aˈyi mǝna sara ɗa sǝr thlǝ hi, alaga sǝr mǝliya zamǝr mǝn ja mǝliya bikǝ mai. 14Thlagǝu Yesu a nǝ ɗar sǝnibiya sau ǝnga a hǝnggǝr yi wu ɗǝfu abǝr sǝ aˈyi kǝra diyadiyaɓǝ ar kǝrnyi wu sǝra Hyal mǝliya mai. Ama ma ndǝ ɗǝnga abǝr vanyi sǝ aˈyi kǝra diyadiyaɓǝ wu sǝra Hyal mǝliya, anǝ nyi a ɗar ja diyadiyaɓǝu.
15Ma sǝra gu sǝm wu hyaˈana hangǝkala zamǝ, aˈyi ga vǝr ca yiwukur mai. A sara sǝr sǝm kǝra gu sǝm a ɗa lagur ndzana zamǝ ngǝ kǝra Kǝrsiti tau ariya ja mai. 16Agabangau, ga sara piyari sǝra gu nggani sǝ mǝnahǝ ngau ja ɗa sǝ didiɗi wu mwar alenyi nji mai. 17Ara tǝlkur Hyal aˈyi ar kǝra sǝm ǝnga sa nga nyi mai, ama ar kǝra tsapǝkur, ǝnga jamǝkur, ba ǝnga caguli wu Mambǝl Cicau. 18Ara kalar ndǝra wu mǝl thlǝr anǝ Kǝrsiti wu lagu kau, naja ndǝr pina huɗa Hyal ngau, ǝnga ju uya dlǝwu dzau ara nji tsu.
19Agabangau, taˈyi mǝna nǝrdzau aga mǝna mǝl thlǝr kǝra wu shili ǝnga nggya jamǝu ǝnga alenyi nji ǝnga ja mǝliya mǝna hǝna kǝrmǝn. 20Ga sara tuzhina thlǝr kǝra Hyal a vǝr mǝl ariya sǝr sǝm mai. Pakatǝu, kalar sǝr sǝm cici nga nyi, ama aˈyi ɗa tsaˈa aga sǝra ndu sǝm ja ɗa sǝr thlǝ hi anǝ vanyi ndǝ mai.
21A ndiya ǝnga mǝnahǝu, ma gǝ piyari sǝm kum, alaga sa padlau, alaga mǝl kalar sǝra wu daɓaga mǝliya zamǝ ngǝ ja dla. 22Bǝgǝ kalar sǝra gu ɗǝnga ar kǝra naja ka sau, ja nggya wu pama gǝ ǝnga Hyal. Ndǝr barka ngǝ ndǝra ɗǝfuwa ja gǝra vazǝya nyi, ar kǝra sǝra naja ǝnga kǝrnyi ngǝ dlǝwuri abǝr kakalǝ nga nyi. 23Ama ndǝra ǝnga tǝkǝ kǝr ar kǝra sǝr sǝm ba ji sǝmku, ju shili ǝnga numa nǝ Hyal anǝ kǝrnyi. Ara kalar sǝra aˈyi hyaˈari sara ara mbǝrsa mai, anǝ nyi bikǝ ngau.
©2024 Initiative for the Translation and Development of African Languages and Margi Tiwi Nga Təm