Roma 16
16
Usa Dzau
1Yu yiwu ya nar hyi sǝ ar kǝra kwamǝr mǝn Fibi, abǝr naja ndǝra yu sǝni lǝr sakida ar kǝra ja abǝr naja ndǝ tsapǝ ngau. Naja tsu ndǝr mǝl thlǝr anǝ daɓǝ dzǝ njir nu kǝra a vwu mǝlmǝ Kankǝriya. 2Hya dlǝwur nyi wu Thlagǝu wu lagu kǝra tsaˈa nja dlǝwu nji cici gǝ Hyal. Nahyi tsu, hya nǝ nyi kalar dlǝwa dzǝ kǝra ju yiwu sara ara hyi, ara naja ǝnga kǝrnyi a dlǝwar ja nji gangǝu, daɓǝ ǝnga yau.
3Hya usar Pǝrsila ǝnga Akwila, bazhi mǝl thlǝr ɗa ˈyar wu Kǝrsiti Yesu. 4Nanda tsu a lǝri nda piya nda, kǝra tǝkǝri lǝhǝ a dzǝr tau, ariya yau. Aˈyi nayi zhizhi ɗa ngǝ a vǝr lǝ usaku anǝ nda mai, ama patǝr daɓǝ dzǝ njir nu njira aˈyi njir Yahudiya mai.
5Hya usar daɓǝ dzǝ njir nu kǝra wu daɓǝ dzǝ wu kir nda.
Hya usar Ifinitusu, bazhi shafa ɗa, kǝra naja ngǝ ndǝ tanggǝrma kǝra ɗa ndǝr nu Kǝrsiti wu ˈyiˈyir Asǝya.
6Hya usar Maryamu ndǝra mǝl thlǝr gagaɗǝ ariya hyi.
7Hya usar Andǝranikusu ǝnga Juniyasu, njir Yahudiya njira nji mbiya nda wu fursǝna ǝnga yau. Nanda tsu thlǝrǝr nda mǝnahǝ gagaɗau wu pama cama sǝsǝ ˈyar, nanda tsu wu Kǝrsiti nda kadivira ya ɗa.
8Hya usar Amfǝliyatusu, bazhi shafa ɗa wu Thlagǝu.
9Hya usar Urbanusu ndǝr mǝl thlǝrǝr kuvar ˈya wu Kǝrsiti, ǝnga tsu bazhi shafa ɗa Sǝtakisu.
10Hya usar Apilisu ndǝra a dlǝwunggǝr nyir nji ǝnga mbǝrsa nyi wu Kǝrsiti. Hya usar njir ki Aristobulusu.
11Hya usari Hirudiyanu ndǝra naja ma ndǝr Yahudiya ngau. Hya usar njira wu nu Thlagǝu wu ki Nakisǝsu.
12Hya usar Tǝrayafinasu ǝnga Tǝrayafusa, mathlǝkǝˈyi kǝra mǝl thlǝr gagaɗau wu Thlagǝu.
Hya usar Pasisu bazhi shafa ɗa, vanyi mala tsu kǝra mǝl thlǝr gagaɗau wu Thlagǝu.
13Hya usar Rufusu ndǝra Thlagǝu ngǝ caɗǝbiya, ba hya usar mǝ nyi tsu ndǝra hǝr ɗa ar viya zǝr nyi.
14Hya usar Asǝnkiritusu, ǝnga Fǝligona, ǝnga Harmasu, ǝnga Paturobasu, ǝnga Hamisu, ǝnga tsu patǝkura zamǝˈyar kǝra ǝnga nda.
15Hya usar Filologusu, ǝnga Juliya, ǝnga Nerisu ba kwamǝ nyi, ǝnga Olimpasu, ǝnga patǝr nji cici gǝ Hyal kǝra ǝnga nda.
16Hya usar dzau ǝnga bǝrpǝ dzau nǝ yiwukur kǝra cicau.
Patǝkura daɓǝ dzǝ njir nu Kǝrsiti a vǝr usa hyi.
17Yu kǝdi hyi ǝnga jiri, wazha ama, hya tsam ǝnga hangǝkal njira wu dla ǝnga tǝtǝkǝ dzǝ wu pama hyi, njira wu mǝliya hyi hya thlǝ hi, kǝra pamǝ nga nyi ǝnga highiɓǝ kǝra hyi dlǝwuri. Hya kwaya naɗu ara nda. 18Ara culi nji kau, aˈyi Kǝrsiti Thlagǝr mǝn nga ndu mǝl thlǝr anǝ nyi mai, awau ama aga sǝr cimǝr nda. Lagur ndǝr mǝsahǝu ǝnga fal nǝ fati nga ndu ngguta nji. Njir sǝhimir nda tsu njira ǝnga ɗǝngar nda nǝ wazha wazha ngau.
19Kalar ndǝ a nggari ǝnggǝra hyu ɓǝlar ndǝr kǝra nju nar hyi, agabangau nyinyi nga yi ǝnga caguli ar kǝra hyi. Ama hya ɗa nji hahangǝ lagu sǝra mǝnahǝu, ǝnga njira gǝra ǝnga vazǝ lagu sǝra ɗǝmwaˈyu. 20Hyal ndǝr lǝ huɗǝ pǝrtǝu, aˈyi ǝnga sǝkar mai ju nda cicina Shatan ǝgya kiɗa hiya hyi. Mayiwakur nǝ Thlagǝr mǝn Yesu ja nggya ǝnga hyi.
21Timathlawusu, bazhi mǝl thlǝr ɗa, ja vǝr usa hyi. Abangǝ tsu ngǝ Lushasu, ǝnga Jasǝnu, ǝnga Sosipata, njira nanda ma njir Yahudiya ngau. 22Nayi Tartiyusu, ndǝr tsǝfǝ cama nǝ Bulusu kau, yu usa hyi wu Thlagǝu. 23Gayisu, ndǝra dlǝwur ɗa wu ki nyi, ǝtsu ndǝra dlǝwuri patǝr daɓǝ dzǝ njir nu wu ki nyi, ju usa hyi. Irastusu, ndǝr sǝɓǝ pǝrki nǝ mǝlmau, ǝnga zamǝr mǝn Kwartusu nda vǝr usa hyi. 24Bǝgǝ mayiwakur nǝ Thlagǝr mǝn Yesu Kǝrsiti a nggya ǝnga hyi patǝu. Amina.
Kǝdi Hyal Nǝ Jomǝ Ndǝl
25Bǝgǝ kadakadarkur a nggya anǝ ndǝra ǝnga dǝnama nǝ mǝliya mbǝrsar hyi wu ndǝshigu kau a ciya dzau, ndǝshigu kǝra ya vǝr tǝtǝlna ar kǝra Yesu Kǝrsiti. Ndǝshigu kǝ tsu, sǝ ngǝ kǝra ɗǝɗǝwa ɗǝɗǝmǝu, 26ama kabangǝkau a cabiyar dzau ǝnga a hǝbiyar nji ar babal lagu tsǝfǝ nǝ nabiˈyar. Ji ɗa ǝnggǝr kǝra Hyal nǝ baˈanuwa cuwa aga jirkura nyi a cabiya dzau anǝ kalar ndapi kǝra baˈamani, aga nda hǝnggǝri ǝnga nda ɓǝlar nyi tsu. 27Bǝgǝ kadakadarkur a nggya anǝ Hyal, ndǝra naja zhizhi nyi ngǝ ndǝ hahangǝu, lagur Yesu Kǝrsiti baˈanuwa! Amina.
©2024 Initiative for the Translation and Development of African Languages and Margi Tiwi Nga Təm