Roma 11
11
Hyal Aˈyi Piyari Njir Izirayila Papatǝ Mai
1Kǝja yu yiwa sau, kariya, Hyal a piyar ja nji nyi ya? Awau! Alaga kushu! Nayi ǝnga kǝrɗa ndǝr Izirayila ngau, sara wu culi Ibrahimu, ǝnga sara wu miya umbwa gǝ Benjamenu. 2Hyal aˈyi piyari nji nyi mai, njira ji caɗǝbiya tsu kaɗǝ mai. Aˈyi hyu sǝni sǝra tsǝtsǝfǝ wu Ndǝr Hyal tsǝtsǝfǝ ar kǝra Iliyasu, ǝnga ǝnggǝra Iliyasu hǝri nyi tiwi anǝ Hyal ariya sǝr mǝla njir Izirayila wa? Ji na, 3“Thlagǝu, a dlǝnar nda nabi ngǝ ˈyar, ǝtsu a dladlanar nda bagadi ngǝ ˈyar. Nayi zhizhi ɗa ngǝ hiyau, ǝnga tsu ndu gal aga nda tsǝya ɗa.”
4Mi ngǝ Hyal shaɗǝwa nya? Ji shaɗǝwa, ji na, abǝr, “Aˈyi yi ǝnga nji dubu mǝɗǝfǝ kǝra yi fiya anǝ kǝrɗa, njira nggǝl ara ɓǝl undi anǝ hyal kǝra nju ngga ǝnga Baˈalu hyal nǝ fati.” 5Abangǝ nga nyi tsu, kabangǝkau. Nji hyihyi aˈyi kǝra Hyal ngǝ caɗǝbiya nda lagu mayiwakur nyi. 6Caɗǝ kǝra Hyal mǝliya kau, lagu mayiwakur nyi ngau, aˈyi lagu thlǝr kǝra nju mǝl mai. Ara maja bǝr abangǝ nga nyi, mayiwakur aˈyi nggya ar viya mayiwakur nǝ jijiri mai.
7Ya, abar ja? Kǝja, njir Izirayila a tǝwar nda ara uya sǝra ndu gal. Kǝl njira nji caɗǝbiya wu pama nda ngǝ wu uya, ama alenyi nji tsu, a ɗar nda nji ɓaɓal kǝr. 8Ənggǝr kǝra ja tsǝtsǝfau,
“Hyal nǝ nda mambǝl nǝ gǝra sǝnibiya sau,
ǝnga ji nǝ nda li kǝra gǝra tsamiya sau,
ba himi kǝra gǝra nggabiya sau.
Abangǝ nga nyi baˈanǝ kabangǝkau.”
9Ətsu Dawuda na,
“Bǝgǝ vir sǝmǝr nda a ɗa lǝbam anǝ nda,
sǝr thlǝ hi anǝ nda,
ǝnga ja shili ǝnga ɓwaɓwatǝ anǝ nda.
10Bǝgǝ liya nda a ɗa kuthlǝu aga nda tini lar sau,
ɓwaɓwatǝr nda wu nda nggya tǝdǝɓǝ ǝnga nda baˈanuwa.”
Mbǝɗǝ Anǝ Njira Aˈyi Njir Yahudiya Mai
11Agabangau, yu ɓǝra yiwa sau. Kariya, ǝnggǝra njir Izirayila thlǝr hi, ba ndǝ dlanakǝr, tsu nda aˈyi ɓǝra sǝni hyaˈari mai ya? Awau! Alaga kushu! Ariya ndǝ mǝliya bikau, ca ngǝ ɗa mbǝɗǝ shili anǝ njira aˈyi njir Yahudiya mai, aga ja mǝliya njir Izirayila a ɗa shishir nda. 12Ta ɗa, bikǝ kǝra ndǝ mǝliya ca ngǝ shili ǝnga barka anǝ njir duniya, ǝnga tsu tǝtǝwakur nda ca ngǝ shili ǝnga barka anǝ njira aˈyi njir Yahudiya mai. Ma abangǝ ya, abari ngǝ gangǝkura barka kǝra wu shili ma gangǝkur nda a nyabiya dza?
13Anǝ hyi njira aˈyi njir Yahudiya mai nga ya vǝr ndǝr kau. Ta ɗa nayi cama sǝsǝ ngau, anǝ njira aˈyi njir Yahudiya mai, yu ɓwasǝ ǝnga mǝnahǝkur thlǝr ɗa kau. 14Lagu kǝ nga yu fǝrkǝr abǝr yu nda mǝliya njir Izirayila nda ɗa shishi, aga tara ba alenyi nji wu pama nda nda uya mbǝɗau. 15Ara ma piyari kǝra ndǝ piyari kǝ ngǝ shili ǝnga ɓasǝwa dzau anǝ njir duniya, mi ngǝ dlǝwunggǝrir nda wu shili ǝna, kariya, aˈyi uya pi mafǝliyangǝ ǝnggǝr hyaˈari sara vir tǝ wa? 16Ma ɗaramwa nǝ sǝ zǝzǝwa kǝra nji lǝri anǝ Hyal cici nga nyi, patǝkura nyi wu ɗa cicau. Ma tsu nggyilanga nyi cicau, abangǝ ngǝ tsa nyi ˈyar tsu.
17Nahyi njira aˈyi njir Yahudiya mai, ǝnggǝr tsa wur zayitunu nǝ tagǝ nga hyi, kǝra nji mbabiya ǝnga nǝ ki. Nahyi a hǝr hyi vir nggya nǝ tsi kǝra nji gǝgǝmna. Ariya kau, nga hyi ɗa wu cir zǝmǝ nǝ barka sara wu nggyilanga wu kǝ daɓǝ ǝkkǝˈyi alenyi tsi. 18Agabangau, a sara hya ɓwasǝ abǝr a ndiyar hyi tsa wuˈyar ta nji gǝgǝmna ta mai. Ma tsu, hyu ɓwasau, kǝl hya ɗǝngari abǝr aˈyi tsa wu ngǝ wu sǝɓǝ nggyilangǝ mai, ama nggyilangǝ ngǝ wu sǝɓǝ tsi.
19Ama hyu sǝni na, abǝr, “Nji gǝgǝmna tsa nyi ˈyar aga nja uya lagur mbabiya ɗa ǝnga nggyilanga wa nyi.” 20Pakatǝu! Ariya gǝra mbǝrsar nda nga nji gǝgǝmna nda. Ama nahyi tsu ariya mbǝrsar hyi nga hyi uya nji mbabiya hyi. Agabangau, a sara hya ɗa njir fǝkǝr mai, ama njira ǝnga hivǝr. 21Ara ma Hyal aˈyi tuliya tsa wu dudur kǝ mai, naju tuliya hyi tsu mai.
22Ənggau mǝnu sǝni lari ǝnggǝra Hyal wu cabiya kyiˈwakur nyi, ǝnga ɓaɓalkur nyi tsu. Ji cabiya ɓaɓalkur nyi anǝ njira dla, ama ji cabiya kyiˈwakur nyi anǝ hyi, ma hyi dumwa ǝnga nggya wu kyiˈwakur nyi. Ma tsu nahyi aˈyi dumwa ǝnga nggya wu kyiˈwakur nyi mai, nju nda gǝmna hyi tsu. 23Ma tsu njir Izirayila aˈyi dumwa ǝnga gǝra mbǝrsar nda mai, nju ɓǝra sǝni mbabiya nda ǝnga wa nyi, ara Hyal wu sǝni ɓǝra mbabiya nda a ndar wa nyi wayu.
24Nahyi kǝra aˈyi njir Yahudiya mai, ǝnggǝr tsa wur Zayitunu kǝra a gwa tagǝ nga hyi, kǝra ayukuɗa nji gǝmna, kǝ nji mbabiya nda ǝnga wur zaitunu kǝra wu ki. Naja ka mba pamǝ nga ja a mwara kǝra nji tsǝliya. Ta ɗa njir Izirayila nanda ngǝ ǝnggǝr wur zaitunu kǝra wu ki, ju ɗa ɓatsu anǝ Hyal gagaɗau, ju ɓǝra sǝni mbabiya tsa wur zaitunu nǝ duduru kǝra nji gǝgǝmna kau, a ndar mamar wa nyi.
Njir Izirayila Patǝu Wu Nda Uya Mbǝɗau
25Nayu yiwu hya nggya ǝnga gǝra sǝnibiya naja ka sǝ jijiri kǝra ɗǝɗǝwa kǝ zamǝˈyar mai, ara hya sara hǝr kǝrhyi ar viya nji hahangǝ mai. Njir Izirayila a nggyar nda ǝnga ɗǝfu ɓaɓalu kǝl ta gangǝkura njira aˈyi njir Yahudiya mai kǝra wu gwa uya nyabiya dzau. 26Lagu kǝ ngǝ patǝr njir Izirayila wu nda uya mbǝɗau. Ənggǝr kǝra ja tsǝtsǝfau, abǝr,
“Ndǝr kǝtiya nji wu nda shili sara wu Sǝhiyona.
Ju sa hǝna nggyabiya nǝ gǝra sǝni Hyal sara wu Yakubu.
27Naja kǝ ngǝ alkawal mbamba ɗa ǝnga nda,
ar pǝcira yi hǝna nda bikǝr nda.”
28Ariya njir Yahudiya nggǝl ara dlǝwu ndǝshigu, ba ndǝ ɗa dawa ǝnga Hyal ariya hyi. Ama ariya caɗau, ba ndǝ ɗa njira Hyal cabiya nda yiwukur ariya cijicijir nda. 29Ariya lǝ sǝ lǝlǝˈyar nǝ kurthlǝ Hyal ǝnga ngga nyi aˈyi sǝra Hyal wu nda ɓǝlna ngǝ mai. 30Ɗǝɗǝm nahyi njira aˈyi njir Yahudiya mai, njira gǝra ɓǝlar ndǝr Hyal nga hyi. Ama kabangǝkau, a uyar hyi tǝhuɗǝu ariya gǝra ɓǝlar ndǝr Hyalǝr nda.
31Abangǝ tsu nanda njir Yahudiya a ɗar nda njira gǝra ɓǝlar ndǝr Hyal kabangǝkau, aga nanda tsu nda uya tǝhuɗǝu ariya tǝhuɗǝu kǝra Hyal cabiya hyi. 32Ara Hyal a shabiyar patǝr nji ǝnggǝr njir fursǝna ariya gǝra ɓǝlar ndǝr Hyal nǝr nda aga ja daɓaga cabiya tǝhuɗǝ nyi anǝ kalar ndau.
Dlǝvau Anǝ Hyal
33Pakatǝu, kuɗiyar dzǝgamkura ǝnga gangǝkura hahangǝkur nǝ Hyal ǝnga sǝnibiya sǝ nyi aˈyi mai!
Numa nyi tsu sǝra nji gǝra sǝni walbiya ngau.
Lagu nǝ sǝr mǝla ja a ndiyari sǝra nju nubiya!
34“Wa ngǝ ndǝra saya sǝnibiya ɗǝnga nǝ Thlagǝ ka?
Əndǝga wa ngǝ saya nggya bazhi lǝ sawara nya?”
35“Wa ngǝ saya nǝ nyi vanyi sǝ anǝ Hyala,
kǝra tǝkǝri a ɗar tsaˈa Hyal a shabiya nya?”
36Ariya naja ngǝ mǝliya patǝr sau,
ǝtsu sǝˈyar kǝ patǝ ndu nggya lagu nyi,
ǝnga tsu sǝˈyar kǝ patǝu ariya ja.
Bǝgǝ kadakadarkur ja nggya anǝ Hyal baˈanuwa. Amina.
©2024 Initiative for the Translation and Development of African Languages and Margi Tiwi Nga Təm