Roma 10
10
1Wazha ama, yiwur ɗǝfuwa yau ǝnga kǝdi Hyal anǝ njir Izirayila ca ngǝ aga nda uya mbǝɗau. 2Ara a sǝni lǝr yi sakida ar kǝra nda abǝr nanda njir mǝl thlǝr Hyal ǝnga huɗǝ hamǝ ngau, ama huɗǝ hamǝr nda aˈyi nyabiya dzǝ ǝnga sǝnibiya sǝ mai. 3Ta ɗa nandu sǝni lagur uya tsapǝkur nǝ Hyal ari mai, ba ndǝ gwu nǝrdzau aga gal tsapǝkur ǝnga kǝrnda, kǝ sǝ kǝ mǝliya nda, nanda aˈyi lǝr kǝrnda anǝ tsapǝkur nǝ Hyal mai. 4Ariya ar Kǝrsiti ngǝ thlǝr ǝnga dlaɗau taˈyau, aga kalar ndǝra hǝnggǝri ba ja uya tsapǝkur wu mwar Hyal.
5Musa tsǝfǝr sǝ ar kǝra tsapǝkur kǝra wu shili lagu dlaɗau, ji na, “Kalar ndǝra wu mǝl sǝra dlaɗǝ wu na kau, lagur nda nga ju nggya.” 6Ama kǝja sǝra tsǝtsǝfǝ ndǝr Hyal nana ar kǝra tsapǝkur lagur mbǝrsa, “A sara ga na wu ɗǝfuwa gau, ‘Wa ngǝ wu nda maˈyi a dǝmǝlma?’ ” (ca ngǝ, aga da shida ǝnga Kǝrsiti). 7“Əndǝga, ‘Wa ngǝ wu nda maˈyi a gyu ndǝla ˈyiˈyi vir nggya nji tǝta?’ ” (ca ngǝ, aga ja gya shida ǝnga Kǝrsiti).
8Ama mi nga ji na? “Ndǝr Hyal lǝhǝ nga ja a dzǝr ngau, ar miya gǝ nga ja, ǝnga wu ɗǝfuwa gau.” Naja ngǝ ndǝr nǝ mbǝrsa kǝra ˈya vǝr tǝtǝlna kau. 9Ma ga nanari ǝnga miya gau, abǝr “Yesu Thlagǝ ngau,” ba gǝ hǝnggǝri wu ɗǝfuwa gau, abǝr Hyal a hyaˈana nyi ri sara vir tau, gu nda uya mbǝɗau. 10Ara wu ɗǝfu nga nju hǝnggǝri ba nja uya tsapǝr dzau, ǝnga tsu ǝnga miya nga nju nana sakida ba nja uya mbǝɗau.
11Ənggǝr kǝra ndǝr Hyal tsǝtsǝfǝ nana, “Kalar ndǝra hǝnggǝri ǝnga ja, naja wu nda gwu sǝli mai.” 12Ariya pampamǝkur aˈyi mai wu pama njir Yahudiya ǝnga njira aˈyi njir Yahudiya mai. Thlagǝ kau, naja ngǝ Thlagǝ nǝ nji patǝu, ǝnga naja tsu ngǝ ndǝr lǝ barka gangǝ gagaɗau anǝ patǝr njira wu ngga nyi. 13Ənggǝr kǝra ndǝr Hyal kǝra tsǝtsǝfǝ nana, abǝr, “Kalar ndǝra ngga thlǝmǝr Thlagǝu, ju uya mbǝɗau.”
14Ama abari nga ndu sǝni ngga ndǝra ndǝ gǝra hǝnggǝri ǝnga ja? Abari nga ndu sǝni hǝnggǝri ǝnga ndǝra ndǝ gǝra saya nggari ar kǝra? Abari nga ndu sǝni nggari ma ndǝ aˈyi tǝtǝlna nda ndǝr Hyal mai ya? 15Abari tsu nga ndu sǝni tǝtǝlna ndǝr Hyal ma nji aˈyi sǝwa nda mai ya? Ənggǝr kǝra ja tsǝtsǝfau, abǝr, “Sǝ gumaguma ngǝ ma nji shili ǝnga ndǝshigu anǝ nji!”
16Ama aˈyi patǝr njir Yahudiya ngǝ dlǝwuri ndǝshigu kǝ mai. Ariya nabi Əshaya a nanari, “Thlagǝu, wa ngǝ hǝnggǝri ǝnga camar ˈya?” 17Agabangau, mbǝrsa wu shili lagur nggar cama, ǝnga nju nggar cama lagur tǝtǝlna ndǝr nǝ Kǝrsiti. 18Ama yiwa sǝ ɗa ya, abǝr jiri, “Kariya, nandǝ saya nggar mai ya?” Pakatǝu, a nggar nda. Ariya ndǝr Hyal kǝra tsǝtsǝfǝ nana,
“Ɗaha camar nda a maˈyiri a ndu duniya patǝu,
ndǝrǝr nda a maˈyi baˈanǝ ndar ndǝla duniya.” 19Yu ɓǝra yiwa sau. “Ɗǝm ya, njir Izirayila aˈyi ndu nggabiya sǝ wa?” Tanggǝrma, Musa shaɗǝwa, ji na, abǝr, Hyal nana,
“Yu nda mǝliya hyi aga hya ɗa shishi njira aˈyi njira gǝra liya kǝrnda,
ǝnga yu nda mǝliya hyi, hya ɗa ǝnga huɗǝ ndzǝndzau ǝnga njir miya tagǝu.” 20Ənga Əshaya ɓǝra nana gǝra ǝnga hivǝr, abǝr, Hyal na,
“Njira gǝra gal ɗa, ba ndǝ uya ɗa.
Yi cabiya kǝrɗa anǝ njira aˈyi yiwa ɗa mai.” 21Ama ar kǝra njir Izirayila, Hyal na,
“Dlǝm pǝci nga yi pahǝna tsa yau
anǝ nji gǝra ɓǝlari ndǝr ɗa ǝnga nji ɓaɓal kǝr.”
©2024 Initiative for the Translation and Development of African Languages and Margi Tiwi Nga Təm