Roma 12
12
Saɗaka Kǝra Ənga Pi
1Agabangau, yu kǝdi hyi zamǝˈyar, lagur tǝhuɗǝ nǝ Hyal, aga hya lǝr dza hyi sǝr saɗaka kǝra ǝnga pi, kǝra cicau, ba tsu kǝra wu pina huɗa Hyal. Lagu kǝ nga hyu nda dlǝvǝ Hyal ǝnga jijiri sara wu ɗǝfuwa hyi. 2A sara ɗǝngar hyi ja sha ǝnggǝr nǝ culi njir zamanǝ kabangǝkǝ mai, ama hya uya bǝla dzau, lagur shabiya ɗǝngar hyi ja ɗa mafǝliyangǝu. Lagu kǝ nga hya sǝni dzǝgabiya ǝnga hya sǝni sǝra ca ngǝ yiwur huɗa Hyal, ca ngǝ sǝra mǝnahǝu, sǝra wu pina huɗa ja, ǝnga tsu sǝra cicipǝu.
3Ara lagu mayiwakur kǝra nji nǝ ɗa, nga yu na anǝ kalar ndǝ wu pama hyi, abǝr ja sara hǝr kǝrnyi dǝgalǝ a ndiya kǝra ja kyaga ɗa mai. Ama kuji ga ɗǝnga kǝrngau ǝnga ɗǝnga kǝra tsatsaˈa, mǝtsaˈa ga gangǝkura mbǝrsa kǝra Hyal nǝ nyi anǝ kalar ndau. 4Ara ǝnggǝr kǝra mǝn ǝnga dzǝ zǝmǝu, aˈyi mǝn ǝnga gashal pampamǝ gangǝ ar dza mǝn, ǝtsu wu gashal pampamǝ kau, sǝr mǝla nda pampamǝ nga nyi.
5Abangǝ tsu, wu Kǝrsiti namǝn kǝra nji gangǝu, a ɗar mǝn dzǝ zǝmǝu, ǝnga kalar ndǝ tsu nǝ kalar ndǝ ngau. 6Lagur mayiwakur kǝra mǝn uya ara Hyal, aˈyi mǝn ǝnga sǝ lǝlǝ pampamǝu. Ma ndǝra nǝ nyi nǝ lǝ ndǝrhaha, bǝgǝ ja mǝl thlǝr ǝni tsaˈa aga mbǝrsa nyi. 7Ma nǝ mǝl thlǝr ngau, bǝgǝ ja mǝl thlǝr ǝni. Ma nǝ highiɓǝ ngau, bǝgǝ ja highiɓau. 8Ma nǝ tsǝtsǝku dzau, bǝgǝ ja tsǝtsǝku nji ǝni. Ma nǝ lǝ sǝ anǝ njira gǝra ǝnga sau, bǝgǝ ja lǝ ǝnga tsi papahau. Ma nǝ lǝbiya nji ngau, bǝgǝ ja lǝr kǝrnyi aga lǝ nji. Ma nǝ ca tǝhuɗǝ ngau, bǝgǝ ja mǝl ǝnga caguli.
Yiwudzau
9Bǝgǝ yiwudzǝr hyi ja ɗa nǝ jijiri. Hya tǝkǝbiya dzǝ ǝnga kalar sǝra ɗǝmwaˈyu, ama ba hya sǝɓǝya sǝra mǝnahǝu. 10Hya lǝr kǝrhyi anǝ kuvwar hyi ǝnga yiwudzǝ nǝ culi wazha ama. Mǝna ɗa njir hana kǝra kuvwar nda a ndiya kǝrnda. 11Hya sara ɗa nji gǝra huɗǝ hamǝ mai, wu mǝl thlǝr Hyal, ama hya nggya ǝnga huɗǝ hamǝ wu ɗǝfuwa hyi, wu mǝl thlǝr nǝ Thlagǝu. 12Hya nggya ǝnga caguli wu fǝrkǝrǝr hyi, ǝnga sǝsǝˈu sau wu ɓwaɓwatǝr hyi, ǝnga hya dumwa ǝnga kǝdi Hyal cumu. 13Hya dumwa ǝnga tǝkǝ sǝra ara hyi ǝnga njir nu kǝra gǝra ǝnga sau. Hya ɗa njir dlǝwu mǝthlǝpi ǝnga tsi mǝmǝthlǝu.
14Hya fǝnggǝr nyi barka anǝ njira a vǝr ɗa hyi. Hya fǝnggǝr nda barka, aˈyi hya shiˈwa nda mai. 15Hya caguli ǝnga njira wu caguli, hya tiwi ǝnga njira wu tiwi. 16Hya nggya jamǝ ǝnga kuvwar hyi. Hya sara ɗǝnga abǝr nahya a ndiya kuvwar hyi mai, ama hya ɗa bazhiya njira gǝra ǝnga sau. Hya sara hǝ kǝrhyi ǝnggǝr njira a ndiya ǝnga hahangǝ mai.
17Ma ndǝ mǝliya hyi ɗǝmwaˈyikur, a sara hya ki nda ǝnga ɗǝmwaˈyikur mai. Hya hangǝkal hya mǝl sǝra tsaˈa, kǝra kalar ndu sǝni lari abǝr tsatsaˈa nga nyi. 18Ma sǝni ɗa anǝ hyi, hya nǝrdzǝ aga hya nggya jamǝ ǝnga kalar ndau.
19Bazhi shafa ɗa ˈyar, hya sara ɗa njir kibiya sǝra nji mǝliya hyi mai, ama hya piyari nyi lagu anǝ Hyal aga ja kibiya hyi ǝnga huɗǝ ndzǝndzǝ nyi. Ara tsǝtsǝfǝ nga nyi,
“Ki sau nǝɗa ngau,
yu nda kibiya,” ǝngwar Thlagǝu.
20Sǝra pamǝu ca ngǝ,
“Ma wuɓu mbar dawa ngau,
ga nǝ nyi sǝr sǝm.
Ma hili ngǝ wu tǝ nyi,
ga nǝ nyi ˈyimir sa.
Ma gǝ mǝl abangau,
ba ga kaɓiya nyi hakil
uˈu a dar kǝra ja.”
21Hya sara piyari ɗǝmwaˈyikur ja sǝm tǝlkur ar kǝra hyi mai, ama hya sǝmku tǝlkur ar kǝra ɗǝmwaˈyikur, lagur mǝl sǝra mǝnahǝu.
©2024 Initiative for the Translation and Development of African Languages and Margi Tiwi Nga Təm