Roma 9
9
Hyal Caɗǝbiya Izirayila
1Yu na jirkur ɗa wu Kǝrsiti, nayu thla fati mai. Ɗǝngar ɗǝfuwa yau ǝnga Mambǝl Cicau a lǝr sakida abǝr 2aˈyi yi ǝnga huɗǝ ndzǝndzǝ gagaɗau, ba wu ɗǝnga sǝ nga yi cumu wu ɗǝfuwa yau. 3Ara maja bǝr yiwu ɗa ngau, yu cimǝ nja shiˈwuna ɗa ariya zamǝ ɗa ˈyar, ǝnga nja tǝkǝbiya ɗa ǝnga Kǝrsiti aga zamǝ ɗa ˈyar a uya mbǝɗau, nanda kǝra dur ɗa!
4Nanda njir Izirayila ngau, njira Hyal mǝliya nda ndǝ ɗa wazha nyi. Nǝr nda ngǝ kadakadarkur, ǝnga alkawal mbamba, ǝnga dlǝwu dlaɗau, ǝnga dlǝvǝ Hyal nǝ jijiri, ba alkawal nyi ˈyar. 5Nanda tsu sara wu culi ǝjiya ǝjir mǝn ˈyar nga nda, njira lagu ndǝndǝkur ngǝ Kǝrsiti tsu biya sara wu culir nda. Bǝgǝ Hyal ndǝr sǝm tǝlkur ar kǝra kalar sǝ ja dlǝwur fal baˈanuwa. Amina.
6Ama aˈyi abǝr ndǝr Hyal tǝwa ara nyabiya dzǝ anǝ nji ɗa njir Izirayila mai. Ara aˈyi patǝr njira biya sara wu culi Izirayila ngǝ njir Izirayila mai. 7Ətsu aˈyi patǝr njira biya sara wu culi Ibrahimu ngǝ wazha Ibrahimu mai, ama ǝnggǝr kǝra ndǝr Hyal nana, abǝr, “Kǝl njira biya sara wu Ishaku nga yu nda ngga thlǝmǝr nda ar viya culi ngau.”
8Agabangǝ aˈyi wazha kǝra nji ya lagur kumǝr dzǝ ngǝ wazha Hyal mai, ama wazha kǝra nji ya lagur nyabiya alkawal, nanda nga nji ngga ǝnga wazha jijiri nǝ Ibrahimu. 9Ara kǝja sǝra Hyal nana ar pǝcira ji mǝliya nyi alkawal anǝ Ibrahimu, “Ma pǝci kǝ nggura ɗa yu ɓǝra sha shili, Saratu tsu ju nda yabiya zǝsal.”
10Ənga aˈyi kǝ waci mai, ama wazha Rubeka dǝrnda zǝmǝ nga nyi, naja ngǝ dǝrmǝn Ishaku. 11Ama kadivira nja ya wazha ɓǝli kau, tsu ndaliya nda gǝra mǝliya sǝ mǝnahǝu ǝnga sǝ didiɗi, ama aga sǝra Hyal wu ɗǝnga lagu caɗǝ ja nyabiya dzau. 12Nyabiya dzau, aˈyi lagu thlǝr mai ama lagur ndǝra wu ngga, ǝnggǝr kǝra Hyal na anǝ nyi, abǝr “Gau ngǝ wu nda mǝl thlǝr anǝ mǝshikǝr nyi.” 13Ənggǝr kǝra ja tsǝtsǝfǝ wu ndǝr Hyal tsǝtsǝfǝ abǝr, “Yakubu nga yu yiwu, ama Isuwa shishir dza yi a piyari nyi ri.”
14Mi nga mǝnu sǝni na? Kariya, Hyal aˈyi ndǝ tsapǝ wa? Awau! Alaga kushu! 15Ara Hyal na anǝ Musa,
“Yu tǝhuɗǝ ǝgya ndǝra yu yiwu ca tǝhuɗǝu anǝ nyi,
ǝnga yu ca dlǝwa dzau anǝ ndǝra yu yiwu ca dlǝwa dzau anǝ nyi.”
16Agabangau, kǝ aˈyi ɗarkǝr ara sǝra ndǝ wu yiwu, alaga nǝrdzǝ nǝ ndǝ mai, ama ar kǝra tǝhuɗǝ dzǝ nǝ Hyal ngau. 17Ariya ndǝr Hyal tsǝtsǝfǝ na anǝ Firaˈauna, “Yi mǝliya ngǝ gǝ ɗa tǝl aga kǝ nga nyi wacu, aga ya cabiya dǝnama ɗa lagu ngau, ǝnga aga nja tǝtǝlna thlǝmǝ ɗa wu duniya patǝu.” 18Agabangau, Hyal wu ca tǝhuɗǝu anǝ ndǝra ju yiwu ja cabiya nyi tǝhuɗǝu, ǝnga ju mǝliya ɗǝfuwa ndǝra ju yiwu ja ɗa ɓaɓal ja ɗa ɓaɓalu.
Ndzǝ Huɗǝ Hyal Ənga Tǝhuɗǝ Nyi
19Gu nda na anǝ ɗa ja, “Ya, mi ngǝ ɗa, baˈanǝ kabangǝ tsu Hyal a vǝr vazǝ mǝn ǝnga mǝl sǝ ɗǝmwaˈya? Ara wa ngǝ wu sǝni nggǝl ara mǝl sǝra Hyal wu yiwa?” 20Ama nagǝ ndau, wa nga gǝ, ga sǝni kǝpal ǝnga Hyala? Sǝra nji hǝriya a sǝni na anǝ ndǝra hǝriya nyi, “Mi ngǝ ɗa gǝ hǝriya ɗa abanga?” 21Kariya, aˈyi ndǝr hǝr tǝm ˈyiˈyi ngǝ ǝnga dǝnama tǝlkur nǝ mǝl thlǝr ǝnga tsǝkwaɓǝu, ǝnggǝr kǝra ju yiwu wa? A sǝni mǝliya ja thlǝr ǝnga tsǝkwaɓǝ kakaɓǝ zǝmǝu, aga ja mǝliya tǝm nǝ thlǝr dlǝdlǝvǝ, ǝnga kǝra aˈyi nǝ thlǝr dlǝdlǝvǝ mai.
22Agabangau, Hyal wu yiwu ja cabiya huɗǝ ndzǝndzǝ nyi ǝnga dǝnama nyi ar babal, ama tsu, wu sǝsǝˈu sǝ nyi ba ji sǝsǝˈwuri njira a kyi ǝnga huɗǝ ndzǝndzǝ nyi, njira ji pabǝri aga ja dlǝna nda. 23Abangǝ nga ji yiwu tsu aga ja cabiya gangǝkur kadakadarkur nyi anǝ njira ji canǝ nda tǝhuɗǝu, njira ji pabǝri aga kadakadarkur nyi tsu kaɗǝu. 24Nji kǝ namǝn ngau, njira Hyal ngga, aˈyi sara wu njir Yahudiya waci mai, ama ǝkkǝˈyi njira aˈyi njir Yahudiya mai. 25Ənggǝr kǝra nji nana wu Lǝkakaɗǝ nǝ Uziya abǝr,
“Yu nda ngga njira aˈyi nji ɗa mai, kabangǝkau, ‘nji ɗa’ nga nda.
Ənga yu nda ngga, njira yi gǝra yiwu, kabangǝkau, ‘njira yu canǝ nda yiwukur’ ngau.”
26Ənga tsu,
“kakalǝ ǝnga vira nji na anǝ nda,
‘Nahyi aˈyi nji ɗa mai,’
nju nda ngga nda ǝnga ‘wazha Hyal mbǝmbǝɗau.’ ”
27Ar kǝra njir Izirayila tsu ǝngwar nabi Əshaya,
“Alaga abari ngǝ gangǝkura njir Izirayila kǝra wu sǝni ɗa ǝnggǝr mǝshiˈwa nǝ miya dǝl,
nji yiɗawu ngǝ wu nda uya mbǝɗǝ wacu.
28Ara Thlagǝu wu nda mǝlna
sǝra ji nana ar kǝra duniya cicipǝu ba ǝnga kusa.”
29Ənggǝr kǝra Əshaya nana tsu kaɗǝu, abǝr,
“Maja bǝr Thlagǝu Ndǝr Taguˈyi Dlǝɗau
aˈyi piyari nji sara wu culir mǝn mai,
a ɗar mǝn ǝnggǝr nji sasa nǝ njir Sodomu,
ba ǝnggǝr njir Gwamwara.”
Gǝra Mbǝrsa Nǝ Njir Izirayila
30Agabangau, a ɗar tsaˈa nja na, kǝja njira aˈyi njir Yahudiya mai, njira gǝra gal tsapǝkur ǝnga Hyal, a uyar nda tsapǝkur kǝra wu shili lagur mbǝrsa. 31Ama njir Izirayila, njira gal tsapǝkur lagur dlaɗau, nandǝ uya mai. 32Mi ngǝ ɗa abanga? Ara nandǝ gal ǝnga mbǝrsa mai, ama ǝnggǝr lagu mǝl thlǝr nǝ uya akkǝri. Ba ndǝ thlǝr hi ar “tsǝka nǝ thlǝ hi.”
33Ənggǝr kǝra ja tsǝtsǝfǝ wu ndǝr Hyal tsǝtsǝfǝ abǝr,
“Kǝja ya fiyari tsǝka wu Sǝhiyona,
tsǝka nǝ thlǝ hi,
tsǝka kǝra wu mǝliya nja dla.
Ama kalar ndǝra hǝnggǝri ǝnga ja
aˈyi ju gwu sǝli mai.”
©2024 Initiative for the Translation and Development of African Languages and Margi Tiwi Nga Təm