Thlǝr 9
9
Suwalu Sha Ji Ɗa Ndǝr Nu Yesu
(Thlǝr 22:6-16; 26:12-18)
1Tsu abangau, Suwalu a vǝr dumwa ǝnga gǝrahǝ njir nu Thlagǝu, ju na abǝr nju tsǝya nda. Kǝ ji maˈyi a ndǝgya pubu kǝra a ndiya ǝnga dǝgalǝu. 2Ji nda kǝdi nyi ja tsǝfǝr nyi cama tsǝtsǝfǝ nǝ nǝ nyi dǝnama a dǝ wu umbwa daɓǝ dzǝ nǝ njir Yahudiya wu Damasǝkasu. Nja nǝ nyi dǝnama aga ma ji sǝni uya njir nu lagu kau, shili ǝnga mathlǝkǝˈyi, ba ja hǝr nda a shili wu Urshalima mbamba. 3Ma tsu ja ar lagu, lǝhǝ ja thlǝwa Damasǝkasu, kukuthlǝu, kǝja vanyi mbǝmbǝl sara dǝmǝlmau mbǝl a gyar kǝra ja ka gya zǝwar nyi. 4Kǝ ji dla a gyi wu ˈyi, ba ji nggari vanyi ɗahǝ a vǝr na anǝ nyi abǝr, “Suwalu, Suwalu, ara mi nga gǝ wu ɗa ɗa ka?”
5“Wa nga ga Thlagǝu?” ǝngwar Suwalu.
Kǝ ɗahǝ kǝ shaɗǝwa, ji na, “Nayi ngǝ Yesu kǝra ga vǝr ɗa nyi kau. 6Ga hyaˈari ga maˈyi a vwu mǝlmau, a vwuna nju vwa nar ngǝ sǝra ga mǝl.”
7Bazhi ɓǝ nyi ˈyar ghar sǝr na. Ndu nggari ɗahǝu, ama nandǝ lar ndǝra wu ndǝr mai. 8Kǝ Suwalu hyaˈari, ama ta ji pahǝna li naju lari sǝ mai. Kǝ ndǝ mbar tsa ja ndǝ ca lagu anǝ nyi, kǝ ndǝ maˈyi a vwu mǝlmǝ Damasǝkasu. 9Ji mǝliya pida makǝr naju lar sǝ mai, naji sǝm ǝnga sa mai.
10Wu Damasǝkasu vanyi ndǝr nu aˈyi thlǝmǝ nyi Hananiya. Thlagǝ ndǝr anǝ nyi wu mǝtakǝr ji na, “Hananiya!” Kǝ ji shaɗǝwa nyi, ji na, “Kǝja yau, Thlagǝu.”
11Kǝ Thlagǝ na anǝ nyi, “Hyaˈari ga maˈyi a ndar lagu kǝra nja ngga ǝnga Tataˈyi Pir, ga yiwari ki ndǝra nja ngga ǝnga Yahuda, ga yiwar tara ndǝra nja ngga ǝnga Suwalu sara wu Tarsusu aˈyi ja vǝr kǝdi Hyal a ndǝna. 12Wu mǝtakǝr kǝ ma, a lar ja vanyi ndau kǝra nja ngga ǝnga Hananiya ji vwau, ji sa fǝnggǝr nyi tsi nǝ barka aga ja ɓǝra lar sau.” 13Ama Hananiya shaɗǝwa, ji na, “Thlagǝu, a nggari yi ndǝr pampamǝ wu miya nji gangǝu, ar kǝra ndǝ kau ǝnga sǝ ɗǝmwaˈyi ˈyar gangǝ gagaɗǝ kǝra ji mǝliya anǝ nji cici ngau wu Urshalima. 14Kǝja tsu pubu dǝdǝgalˈyar a nǝ nyi ri dǝnama tǝlkur nǝ mba kalar ndǝra wu dlǝvǝ thlǝmǝ ngau.”
15Ama Thlagǝ na anǝ nyi, “Nagau, ga maˈyi, ariya naja kar mǝl thlǝr ɗa ngau, kǝra yi caɗǝbiya, aga ja tǝtǝlna ndǝr ɗa anǝ nji kǝra aˈyi njir Yahudiya mai, ǝnga tǝltǝlǝr nda ǝnga tsu njir Izirayila. 16Nayi ǝnga kǝrɗa yu nda cabiya nyi ɓwaɓwatǝ kǝra ja kyaga ɗahari ariya thlǝmǝ ɗa.”
17Kǝ Hananiya hyaˈari ji maˈyi a vwu kiya nyi. Ji vwa fǝr tsa ja ar Suwalu ji na, “Suwalu, zamǝ ɗa, Thlagǝ Yesu ngǝ sǝwa ɗa, ndǝra canǝ ngǝ kǝr pǝci kǝra ga ar lagur shili. Ju yiwu ga ɓǝra lar sau ǝnga nja nyabiya ngǝ ǝnga Mambǝl Cicau.” 18Ənggau, kǝ vanyi sǝ ǝnggǝr thlǝthlǝm tǝɗau sara wu liya Suwalu, kǝ ji ɓǝra lar sau. Ənggau ba ji hyaˈari, ba nji hǝri nyi baɓǝtizǝma. 19Kǝ ji sǝmku sǝr sǝm, ba dǝnama ɓǝra shili.
Suwalu Tǝtǝlna Ndǝr Hyal Wu Damasǝkasu
Suwalu pida nǝ pǝci kushu ǝkkǝˈyi njir nu kǝra wu Damasǝkasu. 20Aˈyi sǝkari mai, kǝ Suwalu dzǝguya tǝtǝlna ndǝr ar kǝra Yesu wu umbwa daɓǝ dzǝ nǝ njir Yahudiya abǝr Yesu ngǝ zǝr Hyal. 21Patǝr njira nggari nyi, ba ɗa sǝ dǝdǝgur anǝ nda, ndu na, “Kariya, aˈyi ndǝ kǝ ngǝ tsǝtsiya nji ta wa? Ənga tsu ji hyaˈana hangǝkala njir ngga thlǝmǝ kǝ wu Urshalima ta wa? Aˈyi ji shili ǝnggau aga sa maˈyi ǝnga njir nu a ndu mwar pubu dǝdǝgalˈyar mbamba wa?”
22Ama kǝ Suwalu cakǝ dumwa ǝnga dǝnama, ju ɓǝra hyaˈa hangǝkala njir Yahudiya kǝra a vǝr nggya a vwu Damasǝkasu, ǝnggǝra ju ca anǝ nda abǝr Yesu ngǝ Kǝrsiti.
23Ayukuɗa pida gangǝ tǝrabiya, njir Yahudiya mbiya miya abǝr nda tsǝya Suwalu. 24Ama Suwalu a nggari ja sǝra nda vǝr mba ar kǝra ja. Vuˈyi ǝnga pǝci ndu tsamǝ lagur vwu mǝlmǝ aga nda uya lagur tsǝya nyi. 25Ama ǝvuˈyi kǝ zǝmbǝlma nyi ˈyar hǝr nyi, ndǝ fuwa nyi a gya lagu dza mahwala mǝlmau wu tsǝla dǝgalǝu.
Suwalu Wu Urshalima
26Ənggǝra Suwalu shili wu Urshalima, ji nǝrdzǝ aga ja vwu pama njir nu, ama kǝ hivǝr mbar nda ara ja, ara nandǝ hǝnggǝri ǝnga jiri abǝr naja ndǝr nu mai. 27Ama kǝ Barnabasu hǝr nyi ji maˈyi ǝnga ja a ndǝgya cama sǝsǝ ˈyar. Ji nar nda ǝnggǝra Suwalu lari Thlagǝ ar lagu, ba ǝnggǝra Thlagǝ ndǝr anǝ nyi, ǝnga tsu ǝnggǝra Suwalu tǝtǝlna ndǝr Hyal wu thlǝmǝr Yesu wu Damasǝkasu gǝra ǝnga hivǝr.
28Ənggau ji nggya ǝnga ji ɓǝ wu pama nda wu Urshalima, 29ja vǝr tǝtǝlna ndǝr Hyal wu thlǝmǝr Yesu gǝra ǝnga hivǝr. Ji ɓǝra dumwa ǝnga ndǝr ǝnga kǝpal ǝnga njir Yahudiya kǝra wu nggar miya njir Gǝrikǝu. Ama kǝl lagu kǝra nda daɓaga tsǝya nyi nga ndu gal. 30Ta wazha ama sǝnibiya abangǝ, kǝ ndǝ lǝbiya nyi baˈa vwu Kayisariya, ndǝ dzǝgwa sǝwa nyi a vwu Tarsusu. 31Lagu kǝ ngǝ daɓǝ dzǝ njir nu patǝ nǝ ˈyiˈyir Yahudi ǝnga Galili ǝnga Samariya, uya nggya jamǝu. Daɓǝ dzǝ njir nu tsu, uya dǝnama ǝnga gangǝkura nda cakǝr dzǝ lagur tsǝtsǝkuri dzǝ nǝ Mambǝl Cicau, ndu nggya wu hivǝr Thlagǝu.
Biturusu Shilǝgǝbiya Iniyasu
32Ənggǝra Biturusu ɓǝbiya ɓǝ wu mǝlma nyi ˈyar patǝu, kǝ ji maˈyi a ndǝgya nji cici gǝ Hyal kǝra wu Lidda. 33A ndǝna ba ji thlǝwa vanyi ndǝ kǝra nja ngga ǝnga Iniyasu, ndǝr tǝsǝkǝnu, fa cisu naja sǝni hyaˈari ar sǝr pida mai. 34Kǝ Biturusu na anǝ nyi, “Iniyasu, Yesu Kǝrsiti a shilǝgǝbiya ngǝ ri. Hyaˈari ga hǝri sǝr pida ngau.” Maɗu, kǝ Iniyasu hyaˈari. 35Patǝr njir Lidda ǝnga njir Sharonu ǝtsu lari ndǝ kǝ nji shilǝgǝbiya kau, agabangau, ba ndǝ sha shili ǝgya Thlagǝu.
Biturusu Shilǝgǝbiya Tabithla
36Wu Yafa vanyi mala nu aˈyi thlǝmǝ nyi Tabithla, kǝra ca ngǝ Dokasu, naja cumu ju mǝl thlǝr mǝnahǝu, daɓǝ ǝnga dlǝwa nji ɗaɗali. 37Wu pǝci ta, ba shilǝgǝ mbar nyi ba ji tau. Ta nji pǝrana nyi, ba nji pina dza ja wu umbwa kǝra a dar kǝra umbwa. 38Ta ɗa, Lidda lǝhǝ wu dzǝr Yafa, ǝnggǝra ndǝ nggari abǝr Biturusu wu Lidda, ba ndǝ sǝwa nji mǝthlǝ a ndǝgya ja aga nda kǝdi nyi ja shili ǝnga kusa.
39Kǝ Biturusu nu nda. Ənggǝra ji shili, ndǝ hǝr nyi a dar umbwa kǝra a dar kǝra umbwa nyi. Patǝr mathlǝkǝˈyi tǝsal kǝra a ndǝna hyaˈari ndǝ zǝwari nyi, ndu tiwi ǝnga ndu ca anǝ nyi kar ha pampamǝ kǝra Dokasu mbǝr nda pǝci kǝra ja tsu ǝnga nda.
40Biturusu sǝwa nda a biya patǝu, ji ɓǝliya undi ji kǝdi Hyal. Kǝ ji shabiya dzǝ a ndǝgya ndǝ tǝtǝ kǝ ji na, “Tabithla hyaˈari.” Ba ji pahǝna li. Ənggǝra ji lari Biturusu, ba ji hyaˈari ji nggya gya. 41Biturusu mbar tsa ja, ba ji dlǝwari nyi ji hyaˈari. Kǝ ji nggar njir nu ǝnga mathlǝkǝˈyi tǝsal ˈyar kau, ba ji nǝ nda nyi ǝnga pi. 42Ndǝr kǝ tǝtǝlnakǝr baˈamani wu Yafa, ba mǝliya nji gangǝ hǝnggǝri ǝnga Thlagǝu. 43Biturusu ɓǝra ɓǝliya sar kushu wu Yafa, wu ki ndǝr mǝl thlǝr ci thlǝmǝ nyi Simanu.
©2024 Initiative for the Translation and Development of African Languages and Margi Tiwi Nga Təm