Thlǝr 8
8
1Ar pǝci kǝ Suwalu aˈyi ja ar viya nyi, naja tsu a hǝnggǝri ja nja tsǝya Sitivinu.
Ɓwaɓwatǝ Tǝtǝlna Kǝra Njir Nu
Ar pǝci kǝ ngǝ ɓwaɓwatǝ gagaɗǝ hyaˈari ar kǝra daɓǝ dzǝ njir nu wu Urshalima. Ba mǝliya njir nu tǝtǝlnakǝr a ndu ˈyiˈyir Yahudi ǝnga Samariya. Kǝl cama sǝsǝ ˈyar wacu ngǝ hiyau. 2Kǝ alenyi njir nu Hyal haɗǝna Sitivinu, ba ndǝ dzǝgwa nggya wu hundǝl nyi, ndǝ tiwi nyi nǝ pida gangǝu. 3Ama ar pǝci kǝ ngǝ Suwalu a vǝr lǝ ɓwaɓwatǝ gagaɗǝ anǝ daɓǝ dzǝ njir nu. Ju nu nda a ndu ki ki, ju mba shili ǝnga mathlǝkǝˈyi, ju tǝɗǝ nda a ndu fursǝna.
Fǝlipǝu Tǝtǝlna Ndǝr Hyal Wu Samariya
4Njira nji tǝtǝlna kau, kalar vira ndǝ maˈyi a ndari ndu dumwa ǝnga tǝtǝlna ndǝr Hyal anǝ nji. 5Fǝlipǝu nǝnyi ji maˈyi a ndu vanyi mǝlmǝ wu Samariya, a ndǝna ji tǝtǝlna ndǝr ar kǝra Kǝrsiti. 6Ənggǝra ndǝ nggari Fǝlipǝu a vǝr ndǝr ǝnga ndǝ lari mǝtsamǝ kǝra ja vǝr mǝl, ba ndǝ lǝr hangǝkala nda anǝ sǝra ju na. 7Mambǝl ɗǝmwaˈyi ˈyar gangǝ biya ǝnga wau sara wu dza nji gangǝu. Nji tǝsǝkǝnu ǝnga nji kukurɓǝ gangǝ ji shilǝgǝbiya nda. 8Agabangau, kǝ nji gangǝ gwu caguli wu mǝlmǝ kau.
Simanu Ndǝr Pipitǝma
9Vanyi ndǝ aˈyi nju ngga ǝnga Simanu, naja ndǝra ɓǝliya sar a vǝr mǝl pipitǝma wu mǝlma nyi, ju mǝl sǝ dǝdǝgur gangǝ pampamǝ wu Samariya, ju fǝkǝr nyi ar viya madiya ndau. 10Patǝkura nji, njira nggurǝm ǝnga nji yiɗǝɗǝ sǝya nyi himi ndu na, “Ndǝ kǝ nja ngga nyi ǝnga madiya dǝnama nǝ Hyal.” 11Ndǝ sǝya nyi himi ǝnga jirkur ara sǝ dǝdǝgur kǝra ji ɓǝliya sar a vǝr mǝl anǝ nda lagu pipitǝma nyi.
12Ama ǝnggǝra ndǝ hǝnggǝri ǝnga ndǝr mǝsahǝu kǝra Fǝlipǝu nar nda ar kǝra tǝlkur Hyal ǝnga thlǝmǝr Yesu Kǝrsiti, nji mǝliya nda baɓǝtizǝma patǝu, shili ǝnga mathlǝkǝˈyi. 13Simanu ǝnga kǝrnyi ma hǝnggǝri, ba nji mǝliya nyi baɓǝtizǝma, ji dumwa ǝnga nu Fǝlipǝu baˈamani. Ənggǝra ji lari mǝtsamǝˈyar ǝnga sǝ dǝdǝgurˈyar kǝra Fǝlipǝu wu mǝl, ba ɗa sǝ dǝdǝgur anǝ nyi gagaɗau.
14Ənggǝra cama sǝsǝ ˈyar kǝra wu Urshalima nggari abǝr njir Samariya a dlǝwuri ndǝr Hyal tsǝtsǝfau, ba ndǝ sǝwa nda Biturusu ǝnga Yahwana. 15Ənggǝra ndǝ shili, kǝ ndǝ kǝdi Hyal anǝ nda aga nda dlǝwuri Mambǝl Cicau, 16ariya Mambǝl Cicau aˈyi shida ar kǝra zǝma nda kwatahǝ mai, kǝl baɓǝtizǝma nga nji mǝliya nda wacu wu thlǝmǝr Thlagǝ Yesu. 17Kǝ Biturusu ǝnga Yahwana fǝr nda tsi nǝ barka ba ndǝ dlǝwuri Mambǝl Cicau.
18Ta Simanu lari abǝr lagur fǝ tsi nǝ cama sǝsǝ ˈyar nga ndǝ dlǝwuri Mambǝla nyi, ba ji yiwu ja nǝ nda gǝnna, 19ji na, “Nayi ma, nǝ ɗa mǝ naja ka dǝnama tǝlkur, aga kalar ndǝra yi fǝr nyi tsi, ja dlǝwuri Mambǝl Cicau.”
20Ama kǝ Biturusu na anǝ nyi, “Nagǝ ǝnga gǝnna ngau, hya kuɗau! Kǝ gǝ nggani ǝnga gǝnna nga nju ɗǝlbiya sǝ lǝlǝ nǝ Hyal ya? 21Sǝ aˈyi ɓwanǝ ngǝ kǝr ǝnga sǝ kǝ alaga kushu mai, ara ɗǝfuwa gǝ aˈyi tsaˈa wu mwar Hyal mai. 22Kǝl ga tubi sara ara sǝ ɗǝmwaˈyi kǝ wu ɗǝfuwa gǝ kau, ga kǝdi Thlagǝu tara ba ja tǝfǝbiya ngǝ sǝra gu ɗǝnga wu ɗǝfuwa gǝ kau. 23Ara a lari yi abǝr nyinyi nga gau ǝnga shishikur ǝnga mafa nǝ bikǝ nga gau.”
24Əngwar Simanu anǝ nda, “Kǝdiya mau Thlagǝ anǝ ɗa, a sara zǝma sǝˈyar kǝ hyi na kǝ a ɗa ǝnga yau.”
25Ayukuɗa ndǝ lǝri sakida ǝnga tǝtǝlna ndǝshigu nǝ Thlagǝu, kǝ Biturusu ǝnga Yahwana sha a vwu Urshalima, ndu tǝtǝlna ndǝr Hyal wu mǝlmǝ gangǝ nǝ ˈyiˈyir Samariya.
Fǝlipǝu Ənga Ndǝr Ithlopiya
26Vanyi pǝci ba waladi gǝ Thlagǝ nar nyi anǝ Fǝlipǝu, “Hyaˈari ga nu lagu shidar vuya, ga nu lagu tagǝ mashi kǝra hyaˈari sara wu Urshalima a gyi wu Gaza.” 27Kǝ ji hyaˈari ja vǝr maˈyi ar lagu. Ba ji thlǝwa vanyi ndǝ dǝgalǝu, ndǝr Ithlopiya. Ndǝ kau, mǝciˈu sal ngau, naja ndǝr fǝ gǝnna anǝ kwatam ˈyiˈyir Ithlopiya kǝra nju ngga ǝnga Kandise. Ji shili wu Urshalima aga sa dlǝvǝ Hyal.
28Ənggǝra ja vǝr sha a ndu ki, nggashi ja aˈyi nggya wu muli, kǝ ji pahǝna lǝkakaɗǝ nǝ nabi Əshaya ja vǝr jiga. 29Kǝ Mambǝl na anǝ Fǝlipǝu, “Lǝhǝri muli kau ba ga ɗa lǝhǝ a dzǝr nyi.” 30Kǝ Fǝlipǝu nda ǝnga hwi, ba ji nggari ja vǝr jiga sara wu lǝkakaɗǝ nabi Əshaya. Kǝ Fǝlipǝu yiwa nyi, “Kariya, a nggabiyar gǝ sǝra gu jiga kǝ nga nyi ya?”
31Kǝ ji shaɗǝwa, “Əman de? Kǝl ma yi uya vanyi ndǝ kǝra cabiya ɗa.” Kǝ ji nar nyi anǝ Fǝlipǝu, “Ɓa shida wu muli kǝ ma nggya.”
32Kǝja sǝra tsǝtsǝfǝ wu ndǝr Hyal tsǝtsǝfǝ kǝra ja vǝr jiga,
“Ənggǝr kǝra nju maˈyi
ǝnga tǝmahǝ a ndar
vir tsa gǝra pahǝ miya,
ǝnga ǝnggǝr kǝra zǝr gamǝ
wu nggya ɗiyu
wu tsa njir thla shisha ja,
abangǝ tsu naju
pahǝna miya ja mai.
33Nji hǝna sǝli nyi
kǝl ta nji kar nyi jirkura numa nyi.
Wa ngǝ wu nda
ndǝr ar kǝra culi nya?
Ara nji hǝbiya
piya ja sara wu duniya.”
34Kǝ mǝciˈu sal kǝ na anǝ Fǝlipǝu, “Usi nar ɗa, ar kǝra wa ngǝ nabi kǝ wu ndǝr ka? Ar kǝra kǝrnyi ǝndǝga ar kǝra vanyi ndau?” 35Kǝ Fǝlipǝu dzǝguya ndǝr anǝ nyi ar kǝra sǝra tsǝtsǝfǝ wu lǝkakaɗau, ba shili ar ndǝshigu ar kǝra Yesu. 36Ənggǝra nda vǝr maˈyi ar lagu, ba ndǝ dla ar vira ǝnga ˈyimi. Kǝ mǝciˈu sal kǝ na anǝ nyi, “Kǝja ˈyimi! Mi ngǝ wu kar nja mǝliya ɗa baɓǝtizǝma?” 37Kǝ Fǝlipǝu na, “Ma ga hǝnggǝri ǝnga huɗǝ zǝmǝu, ba nja mǝliya ngau.” Kǝ mǝciˈu sal kǝ na, “A hǝnggǝri yau, abǝr Yesu Kǝrsiti Zǝr Hyal ngau.”
38Kǝ ji na nja taˈyina muli kau, kǝ nanda gyapǝ gya ndǝ maˈyi a gwu ˈyimiya nyi, kǝ Fǝlipǝu hǝri nyi baɓǝtizǝma anǝ nda nyi. 39Ənggǝra ndǝ biya sara wu ˈyimiya nyi, ba Mambǝl Thlagǝ hǝna Fǝlipǝu. Mǝciˈu sal ta ɓǝra lari nyi mai. Kǝ ji maˈyi a ndu ki ǝnga caguli. 40Kǝ Fǝlipǝu thlǝwa kǝrnyi wu mǝlmǝ Azotusu. Kǝ ji dumwa ǝnga ɓǝɓau a ndu patǝr mǝlmau, ju lǝ ndǝshigu anǝ nji kǝl ta ji shili wu mǝlmǝ Kayisariya.
©2024 Initiative for the Translation and Development of African Languages and Margi Tiwi Nga Təm