Thlǝr 10
10
Biturusu Ənga Kaniliyasu
1Wu Kayisariya vanyi ndǝ aˈyi kǝra nja ngga ǝnga Kaniliyasu. Naja midala soja ar kǝra soja kǝra nja ngga ǝnga bwata nǝ Italiya. 2Naja ǝnga njir ki nyi njir yiwu Hyal nga nda, njir hivǝr Hyal tsu. Naja, tsa ja papahǝ anǝ nji tǝtǝ dǝnama nǝ Yahudiya, ǝnga ju kǝdi Hyal parangǝu. 3Vanyi pǝci, ǝnggǝr saka makǝr nǝ wagǝu, ba ji lari ar babal vanyi waladi gǝ Hyal wu mǝtakǝr, ji shili ara ja, ji sa na, “Kaniliyasu!”
4Kaniliyasu pǝnggǝr nyi li nǝ hivǝr ji na, “Thlagǝu, mi ya?”
Waladiya nyi na anǝ nyi, “Kǝdi Hyal ngau ǝnga dlǝwa nji tǝtǝ dǝnama kǝra gu mǝl a dǝri wu mwar Hyal, sǝ dlǝdlǝwu ngǝ anǝ nyi. 5Ga sǝwa nji kabangǝkau a vwu Yafa, nda shabiya Simanu, ndǝra nju ngga ǝnga Biturusu a shili. 6Ja vǝr nggya wu ki Simanu ndǝr mǝl thlǝr ci, ndǝra ǝnga ki a gwa miya tsadau.” 7Ənggǝra waladi ta ndǝr anǝ nyi ta maˈyi, kǝ Kaniliyasu nggari mafa nyi ˈyar mǝthlǝu, ǝnga vanyi soja ndǝr yiwu Hyal, kǝra pathlǝ wu pama njir mǝl thlǝr anǝ nyi. 8Ayukuɗa ji nar nda patǝr sǝra ɗa, kǝ ji sǝwa nda a vwu Yafa.
Mǝtakǝr Nǝ Biturusu
9Əzǝgǝkura nyi, nda vǝr ɓau, ndǝ shili lǝha dzǝr mǝlmau, kǝ Biturusu maˈyi a dar kǝra umbwa aga da kǝdi Hyal ar pǝci taˈyi kǝr. 10Ta wuɓu mbar nyi, ju yiwu ja sǝm sǝr sǝm. Ənggǝra nja vǝr mǝl sǝr sǝm anǝ nyi, ba mǝtakǝr shili anǝ nyi. 11Kǝ ji lari dǝmǝlmǝ paha anǝ nyi ǝnga vanyi sǝ wu shida ǝnggǝr gwada ǝnga thlǝrpa nyi foɗǝ mbamba wu hǝ nyi a gya. 12A gwu sǝ kǝ ngǝ kalar culi maˈwi kǝra ǝnga hi foɗǝu ǝnga kǝra wu tǝɗǝ ǝnga ta ba ˈyagǝˈyar. 13Kǝ ɗahǝ na anǝ nyi, “Hyaˈari, Biturusu, ga tsǝya ga sǝm.”
14“Sǝ kǝ wu ɗa mai, Thlagǝu,” Biturusu shaɗǝwa. “Nayi saya sǝmku sǝra diyadiyaɓǝu alaga gǝra cici mai.”
15Ama kǝ ɗahǝ kǝ ɓǝra ndǝr anǝ nyi nǝ mǝthlǝkura nyi, “Ga sara ngga sǝra Hyal mǝliya cici gǝra cici mai.” 16Sǝ kǝ ɗarkǝr anǝ nyi ar kǝr ar kǝr makǝru. Ənggǝrna ba sǝ ta ɓǝra shabiya dzǝ a dǝmǝlmau.
17Tsu Biturusu a vǝr ɗǝnga wathlǝm naja ka sau, kǝ njira Kaniliyasu sǝwa a shiliri taˈyi nda a biya miya ki, ara a yiwar nda ki kǝra Simanu a gwa. 18Nda vǝr ngga ndu yiwa, tara Simanu ndǝra nju ngga ǝnga Biturusu a vǝr nggya wu kiya nyi.
19Tsu Biturusu a vǝr ɗǝnga sǝ kǝ ji lari kau, kǝ Mambǝl Cici na anǝ nyi, “Nji makǝr a biya ndu yiwa ngau. 20Hyaˈari, ga maˈyi a gya, ga gya maˈyi ǝnga nda gǝra ǝnga tǝkǝ kǝr, ara nayi ngǝ sǝwa nda.”
21Kǝ Biturusu maˈyi a gya ara nda, ji gya na, “Nayi ngǝ ndǝ kǝ hyu yiwa kau. Mi ngǝ ɗa hyi shila?”
22Kǝ ndǝ na, “Kaniliyasu midala soja ngǝ sǝwa ˈya. Naja ndǝ tsapǝu, ndǝr hivǝr Hyal, ndǝra patǝr njir Yahudiya wu gǝnggǝr nyi sǝli. Waladi cici ngǝ nar nyi aga ja sǝwa ngǝ ga shili wu ki nyi aga ja sa nggar sǝra aˈyi ara gau.” 23Kǝ Biturusu nggar nda a vwu ki, ba ji nǝ nda vir pida.
Biturusu Wu Ki Kaniliyasu
Əzǝgǝkura nyi, kǝ Biturusu ǝkkǝˈyi nda ǝnga alenyi njir nu sara wu Yafa mbar lagu. 24Kaniliyasu nggari njir ki nyi ǝnga bazhi nyi ˈyar kǝra lǝhǝ nda vǝr sǝkǝ shilir nda wu Kayisariya. Əzǝgǝkura nyi ngǝ Biturusu ˈyar dzǝgwa shili wu Kayisariya. 25Ənggǝra Biturusu vwu kiya nyi, ba Kaniliyasu dlǝwuri nyi ba ji ɓǝliya undi ji gǝnggǝr nyi sǝli. 26Ama kǝ Biturusu hyaˈana nyi ji na, “Hyaˈari! Nayi ma ndǝ ngǝ ǝnggǝr nagau.” 27Nda vǝr ndǝr wu pamǝ ba ndǝ vwu ki. A vwuna ba ji thlǝwa nji gangǝ kaɓiya dzau.
28Biturusu nar nda, “Nahyi ǝnga kǝrhyi hyu sǝni abǝr dlaɗǝr mǝn a kanari ndǝr Yahudiya ja vwu ki ǝnga ja daɓǝr kǝr ǝnga alenyi nji kǝra aˈyi njir Yahudiya mai. Ama kǝ Hyal cabiya ɗa abǝr ya sara ngga ǝnga ya ɗǝnga abǝr vanyi ndǝ aˈyi gǝra cicau alaga diyadiyaɓǝ mai. 29Ənggǝra gǝ sǝwa ɗa aga ya shili, ca nga yi shili gǝra ǝnga tǝkǝ kǝr. Kabangǝkǝ nar ɗa sǝra gǝ ngga ɗa aga nyi.”
30Kǝ Kaniliyasu shaɗǝwa, ji na, “Pida foɗǝ kǝra tǝrabiya pǝci ǝnggǝr kǝ ya vǝr kǝdi Hyal wu ki ɗa, saka makǝr nǝ puci. Kukuthlǝu, kǝja ndǝ wu kar kǝra wu mbǝl wilwilu taˈyu wu mwa ɗa. 31Ji na anǝ ɗa, ‘Kaniliyasu, Hyal a nggar kǝdi ngau ǝnga a ɗǝngar ja sǝra gǝ mǝl anǝ nji tǝtǝ dǝnama. 32Kabangǝkau, sǝwa cama a vwu Yafa anǝ Simanu kǝra nja ngga ǝnga Biturusu. Naja vǝr nggya wu ki Simanu ndǝr mǝl thlǝr ci, kǝra ǝnga ki a gwa miya tsadau.’ 33Ca ngǝ ɗa yi sǝwa ngǝ ǝnga kusa aga ga shili, ǝnga a mǝliyar gǝ mǝnahǝu, kǝ gǝ shili kau. Kǝja ˈya patǝ ǝnggau a dumwar Hyal, ˈyu sǝ himi kalar sǝra Thlagǝ nǝ ngǝ aga ga nar ˈya.”
Ndǝr Biturusu Wu Ki Kaniliyasu
34Kǝ Biturusu dzǝguya ndǝr, ji na, “A nggabiyar yi ǝnga jiri abǝr Hyal wu tazhira mai. 35Wu kalar ˈyiˈyi ju dlǝwuri njira wu hivǝr nyi ǝnga ndu mǝl sǝra tsatsaˈa. 36Wu sǝni hyi ndǝshigu kǝra Hyal sǝwa anǝ njir Izirayila, abǝr nggya jamǝ aˈyi anǝ nji lagur Kǝrsiti Yesu, naja ngǝ Thlagǝr nji patǝu.
37A sǝni hyi sǝra ɗarkǝr wu patǝr ˈyiˈyir Yahudi, dzǝgwar ˈyiˈyir Galili, ayukuɗa Yahwana dzǝguya tǝtǝlna ndǝr Hyal ar kǝra baɓǝtizǝma. 38Ənga hyu sǝni ǝnggǝra Hyal nyabiya Yesu ndǝr Nazǝratu ǝnga Mambǝl Cicau ba ǝnga dǝnama. Hyu sǝni tsu ǝnggǝra Yesu ɓǝbiya ɓau ju mǝl thlǝr mǝnahǝu ǝnga shilǝgǝbiya njira Shatan fǝnggǝr nda ɓwaɓwatǝu, ara Hyal aˈyi ja ǝnga ja.
39“Naˈya ngǝ sakida ar kǝra kalar sǝra ji mǝl wu ˈyiˈyir Yahudiya ǝnga Urshalima. Ndǝ tsǝya nyi lagu dlakǝya nyi ar wu dladlakau. 40Ama kǝ Hyal hyaˈana nyi sara vir tau, pǝcir pida makǝrkura nyi, ǝnga Hyal mǝliya ji cabiya kǝrnyi anǝ nji.
41Naja aˈyi cabiya kǝr nyi anǝ nji patǝ mai, ama anǝ ˈya njira sakida nyi ˈyar kǝra Hyal ɗǝmbiya, naˈya kǝra sǝm ǝnga sa ǝkkǝˈyi ja ayukuɗa ji hyaˈari sara vir tau. 42Ənga ji sǝwa ˈya aga ˈya tǝtǝlna ndǝr Hyal anǝ nji, ǝnga ˈya nar nda abǝr Yesu ngǝ ndǝra Hyal fiya aga sa numa anǝ njira ǝnga pi ǝnga nji tǝtau. 43Nabiˈyar patǝ ndǝr ar kǝra ja, abǝr kalar ndǝra hǝnggǝri ǝnga ja, ju uya nja tǝfǝbiya nyi bikǝ nyi wu thlǝmǝ nyi.”
Njira Aˈyi Njir Yahudiya Mai Dlǝwuri Mambǝl Cicau
44Ma tsu Biturusu a vǝr na ndǝrˈyar kau, kǝ Mambǝl Cici shida a dar kǝra patǝr njira a vǝr sǝ himi ndǝshigu kau. 45Ba sǝ kǝ ɗa sǝ dǝdǝgur anǝ njir nu kǝra njir Yahudiya, njira dla ǝnga Biturusu, ǝnggǝra Mambǝl Cici shida a dar kǝra njira aˈyi njir Yahudiya mai. 46Ara ndu nggar nda, nda vǝr ndǝr ǝnga ɗahǝ miya pampamǝu, ndu fal Hyal.
Kǝ Biturusu na, 47“Ndǝr sǝni kar nji kǝ nja mǝliya nda baɓǝtizǝma nǝ ˈyimi aˈyi ya? Kǝja nanda tsu, a dlǝwuri nda Mambǝl Cici ǝnggǝr kǝra mǝn dlǝwuri.” 48Kǝ ji sǝwa nja mǝliya nda baɓǝtizǝma wu thlǝmǝr Yesu Kǝrsiti. Ayukuɗa kau, kǝ ndǝ kǝdi Biturusu aga ja nggya ǝnga nda nǝ pida ɗiyawu.
©2024 Initiative for the Translation and Development of African Languages and Margi Tiwi Nga Təm