Thlǝr 5
5
Hananiya Ənga Mala Nyi Safiratu
1Vanyi ndǝ aˈyi thlǝmǝ nyi Hananiya ǝnga mala nyi Safiratu. Nanda tsu ndǝ ɗǝlna far nda. 2Ji shili ǝnga batitiya gǝnna nyi a shili anǝ cama sǝsǝ ˈyar, ju na abǝr, “Patǝkura sǝra yi uya a gwa ngau.” Ənga sǝni mala nyi nga ji piyari batitiya gǝnna nyi anǝ kǝrnyi.
3Kǝ Biturusu na, “Hananiya, mi ngǝ ɗa gǝ piyari Shatan nyana ɗǝfuwa ga? Kǝ gǝ thlar fati anǝ Mambǝl Cicau, kǝ gǝ piyari batitiya gǝnna nyi anǝ kǝrngau a ndu ki. 4Aˈyi nǝ ngǝ kadivira gǝ ɗǝlna wa? Ayukuɗa gǝ ɗǝlna, gǝnna nyi aˈyi nǝ ngǝ wa? Ya, mi ɗa gǝ ɗǝnga mǝl culi sǝ abanga? Anǝ ˈya nga gǝ thla fati mai ama anǝ Hyal ngau.”
5Ənggǝra Hananiya nggari abangau, ba ji dla a gyi wu ˈyi ba ji tau. Ba sǝ kǝ ɗa kǝ nǝ nyi hivǝr anǝ nji patǝ kǝra nggari. 6Kǝ wazha baduwari shili, ndǝ pǝɗǝwa nyi wu zhaɓi, ba ndǝ hǝr nyi a biya, ndǝ biya haɗǝna nyi.
7Ayukuɗa saka makǝr tǝrabiya, kǝ mala nyi shili, naju sǝni sǝra ɗarkǝr mai. 8Biturusu yiwa nyi, “Nar ɗa, abangǝ ngǝ gǝnna kǝra nagǝ ǝnga sal ngǝ uya sara wu vira hyi ɗǝlna ta ya?
“Angǝ,” ji shaɗǝwa, “Ca ngǝ sǝra ˈyi uya a gwa.”
9Biturusu na anǝ nyi, “Abari nga hyi sǝni hǝnggǝri hya dzǝ Mambǝl Thlagǝ ya? Lari! Kǝja njira shili sara vir haɗǝ sal ngǝ a biya miya umbwa, ndu maˈyi ǝnga gǝ tsu.”
10Əna, ba ji dla gya ba ji tau. Ənggǝra wazha baduwari kǝ sha shili, ndǝ thlǝwa tǝtǝkura ja, ba ndǝ hǝr nyi ndǝ maˈyi ǝnga ja, ndǝ nda haɗǝna nyi wu dzǝr sal nyi. 11Kǝ hivǝr mbari daɓǝ dzǝ njir nu gagaɗau ǝnga patǝkura njira nggari sǝ kǝ ɗa kau.
Cama Sǝsǝ ˈYar Shilǝgǝbiya Nji Gangǝu
12Cama sǝsǝ ˈyar a vǝr mǝl mǝtsamǝˈyar ǝnga sǝ dǝdǝgurˈyar gangǝ wu pama nji. Patǝkura njir nu ndǝ daɓǝ ar vira nju ngga ǝnga dalaɓagǝu nǝ Solomanu wu ki Hyal. 13Ama wu pama alenyi nji, ndǝr mbiya ɗǝfu ja gwu wu pama nda aˈyi mai, alaga kǝ nja vǝr tsamǝ nda ar viya nji tsapǝ gagaɗǝ kau.
14Alaga abangau, kalar pǝci nju uya shili ǝkkǝˈyi mathlǝkǝˈyi gangǝ kǝra wu hǝnggǝri ǝnga Thlagǝu, kǝ gangǝkura njir nu cakau. 15Ariya thlǝr kǝra cama sǝsǝ ˈyar mǝlna, nga nji faˈari nji gǝra ngga gangǝ a biya miya lagu ar sǝr pidar nda aga ma Biturusu a vǝr tǝrabiya alaga shangguɗa ja a tǝrabiya ar nda ba ja shilǝgǝbiya nda. 16Dlamir nji kaɓǝ sara wu mǝlmǝ kǝra zǝwar Urshalima, ndu shili ǝnga nji gǝra ngga ǝnga njira ǝnga mambǝl ɗǝmwaˈyu, ba nja shilǝgǝbiya nda patǝu.
Nji Lǝr Ɓwaɓwatǝu Anǝ Cama Sǝsǝ ˈYar
17Kǝ pubu kǝra a ndiya ǝnga dǝgalǝu ǝnga patǝkura njir Sadusi kǝra a vǝr mǝl thlǝr ǝnga ja, ndǝ nyabiya dzǝ ǝnga shishikur. 18Ndǝ mbari cama sǝsǝ ˈyar ndǝ puwa nda wu fursǝna nǝ nji patǝu. 19Ama a ndu vuˈyi kǝ waladi gǝ Thlagǝ shida, ba ji sa pahǝna miya fursǝna ba ji faˈabiya nda a biya. 20Əngwar ja, “Maˈya mau a gwu ki Hyal, hya gwa nar nyi anǝ nji, cama nǝ pi mafǝliyangǝ kau.” 21Ənggǝra ndǝ nggari abangau, ba ndǝ maˈyi a gwu ki Hyal kaɗǝ mudlau, ndǝ gwa dzǝguya highiɓǝ anǝ nji.
Wu pǝci kǝra pubu kǝra a ndiya ǝnga dǝgalǝ ǝnga njir dza ja shili ar vi zǝmǝu, kǝ ndǝ nggar patǝr njir pathla njir Izirayila a shili, kǝ ndǝ sǝwa a ndu fursǝna aga nja shili ǝnga cama sǝsǝ ˈyar. 22Ama ǝnggǝra njir ɓǝla ki Hyal shili wu fursǝna, nandǝ thlǝwa cama sǝsǝ ˈyar mai. Kǝ ndǝ sha, ndǝ nda nar nyi anǝ njir pathla abǝr, 23“ˈYi nda thlǝwa miya fursǝna hahaɗǝ cipǝu ǝnga njir ɓǝla fursǝna tataˈyi ar miya ki. Ama ǝnggǝra ˈyi pahǝna umbwa ka gwa, naˈyi gwa thlǝwa alaga ndǝ zǝmǝ a gwuna mai.” 24Ənggǝra pubu dǝdǝgalˈyar ǝnga dǝgalǝr njir ɓǝla ki Hyal nggari abangau, ba ndǝ gwu ɗǝnga tara mi ngǝ sǝra sǝ kǝ wu nda shili ǝni.
25Kǝ vanyi ndǝ shili, ji na anǝ nda, “Sǝya mǝ himi mǝnahǝu! Nji ta hyi fuwa wu fursǝna ta, a gwu ki Hyal nga nda, nda vǝr highiɓǝ anǝ nji.” 26Kǝ dǝgalǝr njir ɓǝla ki Hyal ǝnga alenyi njir ɓǝla maˈyi, ndǝ nda mbari cama sǝsǝ ˈyar. Ama nandǝ tǝɗǝ nda ǝnga hathlǝ mai, ara hivǝr nja sara vavaka nda ǝnga tsǝka nda tsǝya nda.
27Ənggǝra nji shili ǝnga cama sǝsǝ ˈyar wu mwar pathla, pubu kǝra a ndiya ǝnga dǝgalǝ yiwa nda, 28ji na, “ˈYi kughiya hyi, abǝr hya sara highiɓǝ wu thlǝmǝ kǝ mai. Ama kǝja hya nyanari Urshalima ǝnga highiɓǝr hyi, hyu yiwu hya fǝri bikǝ nǝ tsa nyi ar tsa ˈya.”
29Biturusu ǝnga alenyi cama sǝsǝ ˈyar shaɗǝwa, ndǝ na, “A ɗar tsaˈa ˈya mǝl thlǝr ǝnga ndǝr Hyal tsǝtsǝfau, ama aˈyi ndǝr nji mai! 30Hyal nǝ dǝrmǝn hyaˈana Yesu sara vir tau, naja ndǝra hyi tsǝya ar wu dladlakau. 31Hyal hyaˈana nyi a dar tsi mazǝma ja, ar viya Yirima ǝnga Ndǝr Mbǝɗa Nji, aga ja canǝ nyi anǝ njir Izirayila lagur tubi ǝnga nda uya tǝfǝbiya dzǝ sara ara bikǝr nda. 32Naˈya ngǝ sakida nǝ sǝˈyar kǝ patǝu, abangǝ tsu ngǝ Mambǝl Cici kǝra Hyal sǝwa anǝ njira wu mǝl thlǝr ǝnga ndǝr nyi.”
33Ənggǝra njir lǝbiya nggari abangau, ba ndǝr kǝ ndzana huɗa nda gagaɗau, ndu gal lagur tsǝya cama sǝsǝ ˈyar kau. 34Ama vanyi ndǝ aˈyi, ndǝr Farisi kǝra nju ngga ǝnga Gamaliyalu, pathlǝ wu pama njir pathla. Naja malǝmǝ dlaɗǝ ngau, ndǝra nji patǝ wu gǝnggǝr nyi sǝli. Ji hyaˈari wu pama nji, ji nar nda abǝr, cama sǝsǝ ˈyar kau, nda biya kwatahǝu. 35Kǝ ji dzǝgwa ndǝr anǝ nda, ji na, “Shili, njir Izirayila, hya hangǝkal ǝnga sǝra hyu yiwu hya mǝl anǝ nji kau.
36Hya ɗǝngari wu faˈyar kǝra tǝrabiya kau, vanyi ndǝ aˈyi kǝra nju ngga ǝnga Tudasu, ji hyaˈari, ji na abǝr naja vanyi sau. Nji a ɗa gharu foɗǝ ngǝ nu lagu nyi. Ama ǝnggǝra nji tsǝya nyi, ba ndǝ tǝtǝlnakǝr, abangǝ ngǝ nǝnyi kuɗau. 37Ayukuɗa ja, ngǝ vanyi ndǝr Galili nja ngga ǝnga Yahuda. Wu pǝcir jiga nji ji hyaˈari tsu, nji gangǝ nu nyi. Ama ǝnggǝra nji tsǝya nyi tsu, abangǝ ngǝ njir nu nyi tǝtǝlnakǝr tsu.
38Agabangau, sǝra yu na anǝ hyi kabangǝkau, ca ngǝ hya biya wu lagu nji kau, hya piyari nda aga nda maˈyi sǝr nda. Ma sǝ kǝ ndu ɗǝnga ǝnga ndu mǝl kǝ nǝ kǝrnda ngau, abangǝ nga nyi wu nda kuɗau. 39Ama ma nǝ Hyal ngau, nahyu sǝni kari mai. Tara ma, ba hya thlǝwa kǝrhyi a vǝr pa ǝnga Hyal ɗǝma.”
Kǝ ndǝ hǝnggǝri ǝnga ndǝr nyi.
40Ndǝ nggar cama sǝsǝ ˈyar a gwa, kǝ ndǝ dǝgǝ nda ǝnga wuɗa, ndǝ nar nda, nda sara ɓǝra ndǝr anǝ nji wu thlǝmǝr Yesu mai. Kǝ ndǝ siya nda aga nda maˈyi.
41Kǝ cama sǝsǝ ˈyar piyari nda ndu caguli, ara ndǝ lari abǝr a ɗar tsaˈa nda lari ɓwaɓwatǝ nǝ hǝ sǝli ariya thlǝmǝr Yesu. 42Kalar pǝci nga nda wu ki Hyal ǝnga ndu nu ki ki, nda vǝr highiɓau ǝnga tǝtǝlna ndǝshigu abǝr Yesu ngǝ Kǝrsiti.
©2024 Initiative for the Translation and Development of African Languages and Margi Tiwi Nga Təm