Thlǝr 4
4
Biturusu Ənga Yahwana Wu Mwar Pathla
1Ar pǝci kǝra Biturusu ǝnga Yahwana a vǝr ndǝr anǝ nji, kǝ pubuˈyar ǝnga ndǝ dǝgalǝ nǝ njir ɓǝla ki Hyal ǝnga njir Sadusi shili ǝgya nda. 2Ənggǝra ndǝ thlǝwa Biturusu ǝnga Yahwana a vǝr highiɓǝ anǝ nji, abǝr Yesu a hyaˈari sara vir tau, kǝra cabiya abǝr nji tǝtau wu Yesu wu nda hyaˈari tsu, kǝ hangǝkala njir lǝbiyaˈyar hyaˈari. 3Kǝ ndǝ mbari Biturusu ǝnga Yahwana, ama ara wagǝ a ɗar, kǝ ndǝ fuwa nda wu fursǝna ndu sǝkǝ mudlǝ ǝnga nda. 4Ama nji gangǝ kǝra nggari highiɓǝr nda kau, kǝ ndǝ hǝnggǝri ǝnga sǝra ndu na. Agabangau, gangǝkura njir nu cakau, shili zhizhir nda ma a tǝkǝr nda dubu tǝfu.
5Əzǝgǝkura nyi, njir lǝbiya ǝnga njira nggurǝm ǝnga malǝmǝ dlaɗǝ ˈyar kaɓau wu Urshalima. 6Anasu ndǝra naja ngǝ pubu kǝra a ndiya ǝnga dǝgalǝ aˈyi ja a ndǝna, ǝnga Kayafasu, ǝnga Yahwana, ǝnga Alegǝzanda, ba ǝnga badǝgala njir ki gǝ pubu kǝra a ndiya ǝnga dǝgalǝu. 7Ndǝ shili ǝnga Biturusu ba Yahwana ndǝ sa taˈyina nda wu hada nda, ndu yiwa nda, “Kariya, ǝnga dǝnamar wa ǝndǝga ǝnga thlǝmǝr wa nga hyi mǝl sǝˈyar ka?”
8Kǝ Biturusu, nyinyau ǝnga Mambǝl Cicau, na anǝ nda, “Njir lǝbiya ǝnga njira nggurǝm nǝ mǝlmau, 9ǝshina, hyu yiwa ˈya ar kǝra sǝ mǝnahǝ kǝra ˈyi mǝliya nyi anǝ ndǝ kukurɓǝ kǝ ya? Hyu yiwu hya sǝni ǝnggǝra ji ɗa jamǝ ya? 10Nahyi, ǝkkǝˈyi njir Izirayila patǝu, hya sǝni abǝr ndǝ kǝ taˈyi wu mwar hyi kau, ji uya jamǝkur lagur thlǝmǝr Yesu Kǝrsiti ndǝr Nazǝratu, ndǝra hyi dlakǝya ar wu dladlakau, ama kǝ Hyal hyaˈana nyi sara vir tau. 11Naja ngǝ
“ ‘Tsǝka hǝr kǝra nahyi
njir hǝr piyari,
ama kabangǝkau
a ɗar ja tsǝka shimal.’
12Kǝl Yesu ngǝ ǝnga dǝnama nǝ mbǝɗa ndau, ara Hyal aˈyi nǝ nyi vanyi thlǝmǝ anǝ nji wu duniya kǝra wu dla ǝnga mbǝɗǝ mai.”
13Ənggǝra ndǝ lari salkur nǝ Biturusu ǝnga Yahwana ǝnga ndu sǝni abǝr nanda aˈyi mǝl makaranta mai, ǝnga njira aˈyi ar viya sǝ mai, ba ɗa sǝ dǝdǝgur anǝ nda, ba ndǝ nggabiya abǝr a nggyar nda ǝnga Yesu. 14Ama ara ǝnggǝra ndǝ lari ndǝ kǝ nji shilǝgǝbiya kǝ taˈyi wu pama nda, sǝ aˈyi ndǝ ɓǝra uya ndu na ar kǝra nda mai. 15Kǝ ndǝ nar nyi anǝ Biturusu ǝnga Yahwana nda biya aga nda thla sǝ wu pamǝu.
16Ndǝ yiwa kǝrnda, “Kariya, mi nga mǝna sǝni mǝl anǝ nji ka? Namǝn a sǝni kǝpalna abǝr a mǝliyar nda sǝ dǝdǝgur mai, ariya kalar ndǝ wu Urshalima a sǝnibiyari. 17Ama aga mǝna kar sǝ kǝ ara cakǝ wu pama nji, mǝna kughiya nda abǝr tsu nda ndǝr anǝ nji wu thlǝmǝr ndǝ kǝ mai.” 18Kǝ ndǝ nggar nda a gwa, ba ndǝ kughiya nda abǝr nda sara ndǝr ǝnga highiɓǝ wu thlǝmǝr Yesu mai. 19Ama kǝ Biturusu ǝnga Yahwana shaɗǝwa, “Hyu ɗǝnga abǝr Hyal wu yiwu ˈya ɓǝlar ndǝr nǝr hyi a ndiya nǝnyi ya? 20Ara naˈya sǝni piyari ndǝr ar kǝra sǝra ˈyi lari ǝnga ˈyi nggari mai.”
21Ayukuɗa ndǝ ɓǝra kughiya nda ǝnga dǝnama, ba ndǝ piyari nda ndǝ maˈyi. Nanda aˈyi shili ar lagu kǝra nda sǝni nǝ nda ɓwaɓwatǝ ar mai, ara patǝr nja vǝr fal Hyal ariya sǝ kǝ ɗa kau. 22Ndǝ kǝ sǝ dǝdǝgur ɗa ǝnga ja kau, fa nyi wu duniya a ndiya fa foɗǝ kumunyi.
Kǝdi Hyal Nǝ Njir Nu
23Ənggǝra nji piyari nda ndǝ maˈyi, kǝ Biturusu ǝnga Yahwana sha a ndǝgya alenyi njir nu, ndǝ nda nar nda sǝra pubu dǝdǝgalˈyar ǝnga njira nggurǝm nǝ mǝlmǝ nar nda. 24Ənggǝra ndǝ nggari abangau, ba ndǝ hyaˈana ɗahǝ patǝ nda, ndu kǝdi Hyal. Ju na, “Thlagǝ Ndǝ Dǝgalǝu, ndǝra mǝliya dǝmǝlmau ǝnga duniya ǝnga tsadǝˈyar ǝnga sǝra wu nda patǝu. 25Gǝ ndǝr tsu kaɗǝu, lagu Mambǝl Cicau, lagu miya ǝjir ˈya Dawuda mafa ngau. Gǝ ndǝr abǝr,
“ ‘Mi ngǝ mǝliya
njir duniya patǝ
ǝnga huɗǝ ndzǝndzǝ tǝdǝɓa?
Mi ɗa ndǝ sana pǝci
a vǝr mba sǝ gǝra kǝra?
26Tǝltǝlˈyar nǝ duniya
ndu mba dzǝ aga pa,
ǝnga njir tǝɗǝmwar nda
ndu daɓǝr kǝr
ǝnga ndu ca dawakur
ǝgya Thlagǝu
ǝnga ǝgya Kǝrsiti nyi.’
27“Ənga jiri, sǝ kǝ ɗarkǝr wu mǝlmǝ kau! Tǝl Hirudusu, ǝnga Buntusu Bilatusu gwamna, ǝnga njira gǝra njir Yahudiya, ǝnga njir Izirayila daɓǝr kǝr ar kǝra Yesu, mafa ngǝ kǝra cicau, kǝra gǝ caɗǝbiya. 28Ndǝ kaɓau patǝu, aga nda nyabiya sǝra gǝ fuwa wu lagu tsu mudlau, lagu dǝnama ngau ǝnga yiwur huɗa gau. 29Kabangǝkau, Thlagǝu, nggari ǝnggǝra nda kughi anǝ ˈya aga ˈya piyari thlǝr ngau. Nǝ ˈya, naˈya mafa ngǝ ˈyar dǝnama nǝ tǝtǝlna ndǝr ngǝ gǝra ǝnga hivǝr. 30Ndiɗǝbiya tsa gau aga shilǝgǝbiya nji, ǝnga mǝl mǝtsamǝ ǝnga sǝ dǝdǝgurˈyar lagu thlǝmǝr mafa ngau Yesu kǝra cicau.”
31Ayukuɗa ndǝ kuɗǝna kǝdi Hyal, kǝ vi kǝ ndǝ kaɓǝ ar kǝ kǝnggǝɗau. Patǝ nda ndǝ nyabiya dzǝ ǝnga Mambǝl Cicau, ndǝ dzǝgwa tǝtǝlna ndǝr Hyal gǝra ǝnga hivǝr.
Njir Nu Wu Tǝtǝkǝ Sǝ Wu Pamǝ
32Patǝkura njir nu, miya zǝmǝ nga nda wu ɗǝnga ǝnga sǝra ndu mǝl. Ndǝr ɗǝnga abǝr sǝ nyi ar viya nǝnyi nga nyi aˈyi mai. Agabangau, kalar sǝra ndǝ uya ba nda tǝtǝkǝna wu pamǝu. 33Cama sǝsǝ ˈyar dumwa ǝnga ndǝr ǝnga dǝnama gagaɗau ar kǝra hyaˈari Thlagǝ Yesu sara vir tau. Ənga mayiwakur nǝ Hyal aˈyi ar kǝra nda patǝ gangǝ gagaɗau. 34Wu pama nda patǝu, ndǝ nggudi aˈyi mai, ara kalar pǝci ndǝra aˈyi ǝnga fa ǝnga ki ndu ɗǝlna nda, ba nda shili ǝnga gǝnna nyi, 35ba nda nǝ nyi anǝ cama sǝsǝ ˈyar ba nda tǝtǝkǝna nyi anǝ njira gǝra ǝnga sau.
36Vanyi ndǝ aˈyi thlǝmǝ nyi Yusufu, ndǝr Lawi sara wu ˈyiˈyir Sayipurusu. Cama sǝsǝ ˈyar wu ngga nyi ǝnga Barnabasu (kǝra cabiya Zǝr nǝ fǝ Ɗǝfu). 37Naja ma ji ɗǝlna fa nyi, ji shili ǝnga gǝnna nyi ba ji nǝ nyi anǝ cama sǝsǝ ˈyar.
©2024 Initiative for the Translation and Development of African Languages and Margi Tiwi Nga Təm