Thlǝr 6
6
Nji Ɗǝmbiya Njir Mǝl Thlǝr Hyal Mǝɗǝfau
1Ənggǝra njir nu Yesu gwu cakau, kǝ njir Yahudiya, njir ndǝr ǝnga miya Gǝrikǝu, ndǝ vazǝ njir Yahudiya, njir ndǝr ǝnga miya Ibrani, abǝr ndu tazhira ǝnga tǝkǝ sǝr sǝm anǝ mathlǝkǝˈyi tǝsal. 2Kǝ nanda kumo apǝ mǝthlǝ kau, ngga patǝr njir nu a shili ar vi zǝmǝu, ndǝ sa na anǝ nda, “Aˈyi ɗa tsaˈa mǝna piyari tǝtǝlna ndǝr Hyal mǝna dzǝgwa dumwa ǝnga tǝkǝ sǝr sǝm mai. 3Agabangau, zamǝ ɗa ˈyar, hya ɗǝmǝri nji mǝɗǝfǝ wu pama hyi, nji tsapǝu, njira nyinyau ǝnga Mambǝl ǝnga njira ǝnga ɗǝnga tsapǝu, aga ˈya nǝ nda thlǝr kau. 4Naˈya tsu ˈya dumwa ǝnga kǝdi Hyal ǝnga tǝtǝlna ndǝr Hyal.”
5Kǝ patǝr nji dlǝwunggǝri ǝnga sǝ kǝ ndǝ na kau. Kǝ ndǝ hǝbiya Sitivinu, ndǝra nyinyau ǝnga mbǝrsa, ǝnga Mambǝl Cicau, ba Fǝlipǝu, ǝnga Purokorosu, ba Nikanu, ǝnga Tayimonu, ba Barminasu, ǝnga Nikolasu ndǝr Antakiya, ndǝra sha shili wu mbǝrsa njir Yahudiya. 6Nji kau, nji taˈyina nda wu mwar cama sǝsǝ ˈyar. Kǝ ndǝ dzǝgwa kǝdi Hyal ar kǝra nda, ndǝ dzǝgwa fǝr nda tsi nǝ fǝnggǝr barka.
7Kǝl dumwa ngǝ ndǝr Hyal wu dumwa. Gangǝkura njir nu tsu kǝl cakǝ nga ndu cakau wu Urshalima. Pubuˈyar gangǝ gagaɗǝ fuwa mbǝrsar nda wu Thlagǝu.
Nji Mbar Sitivinu
8Hyal canǝ nyi mayiwakur anǝ Sitivinu ǝnga ji nǝ nyi dǝnama nǝ mǝl sǝ dǝdǝgur ǝnga mǝtsamǝ gangǝ wu pama nji. 9Ama kǝ alenyi nji sara wu umbwa daɓǝ dzǝ nǝ njir Yahudiya kǝra nja ngga ǝnga njira uya kǝrnda mbar kǝpal ǝnga Sitivinu. Nanda njir Yahudiya sara wu Sayirini ǝnga Alegǝzandǝriya ba ǝnga tsu njir Yahudiya sara wu Silisiya ǝnga Asǝya. 10Ama sǝ aˈyi ndǝ sǝni mǝliya nyi anǝ Sitivinu mai, ara sǝnibiya sǝ nyi kǝra Mambǝl Hyal nǝ nyi ma ju ndǝr.
11Ar ɗǝwa kǝ ndǝ tsǝtsǝkuri alenyi shili aga nda na abǝr, “A nggar ˈya Sitivinu a vǝr ndǝr nǝ diɗa nabi Musa ǝnga Hyal ǝnga kǝrnyi.”
12Lagu kǝ nga ndǝ tsǝtsǝkuri nji ǝnga njira nggurǝm nǝ mǝlmǝ ǝnga malǝmǝ dlaɗǝ ˈyar ndǝ mbari Sitivinu ndǝ shili ǝnga ja wu mwar njir pathla. 13Ndǝ dla ǝnga njir sakida nǝ fati, ndǝ na, “Ndǝ kau, cumu nga ju ndǝr nǝ diɗa ar kǝra ki Hyal cicau ǝnga dlaɗǝ nǝ Musa. 14A nggar nyir ˈya ja vǝr na abǝr Yesu ndǝr Nazǝratu wu sǝni dlana ki Hyal kau ǝnga ba ja bǝlana sǝr ciji kǝra nabi Musa nǝr mǝn.”
15Ar pǝci kǝ patǝr njir pathla pǝnggǝr nyi li anǝ Sitivinu, ba ndǝ lari bama ja a bǝlar dzǝ ǝnggǝr bama waladi.
©2024 Initiative for the Translation and Development of African Languages and Margi Tiwi Nga Təm