Thlǝr 28
28
Bulusu Ar Dzǝgu Tsadǝ Nǝ Malita
1Ayukuɗa ˈyi gya jamǝu, kǝ ˈyi nggari abǝr thlǝmǝr dzǝgu tsadǝ kǝ Malita ngau. 2Njir nggya ar dzǝgu dǝla nyi canǝ ˈya yiwukur gagaɗau. Ndǝ dlǝwur ˈya patǝ ǝnga ɗǝfu zǝmǝu, ndǝ mbǝbiya ˈya uˈu ara par a vǝr tǝɗau ǝnga tsu viya nyi shishiˈwu nga nyi. 3Bulusu tsǝtsǝmiya shilu aga ja puwa a gwu uˈu, kǝ pabǝ biya sara wu uˈuwa nyi ara kwakwaɗǝkura nyi, ba ji nggaliya tsa Bulusu.
4Ənggǝra njir nggya ar dzǝgu tsadǝ kǝ lari paba nyi a vǝr shikkǝzhal ar tsa Bulusu, kǝ ndǝ na anǝ kǝrnda, “Ənga jiri ndǝ kau, ndǝr tsa ndǝ ngau. Alaga kǝ ji mbǝɗǝ sara a gwar tsadǝ kau, ama kǝja katǝ a mbar nyi ri, kǝl ja tau.” 5Ama kǝ Bulusu kukulna paba nyi a gwu uˈu gǝra ǝnga sǝ uya nyi. 6Ma ndu nggani ju thlǝthlau, ma aˈyi mai, ba ja dlanakǝr ba ja tau. Ama ayukuɗa ndǝ ɓǝliya sar gagaɗau, kǝja sǝ aˈyi uya nyi tsu mai. Ba ndǝ bǝlar ɗǝnga ndǝ na, abǝr, ndǝ kau, vanyi hyal ngau.
7Ar dzǝgu tsadǝ kau, lǝha dzǝr nda, vanyi babal aˈyi, nǝ dǝgalǝr mǝlmǝ kau, thlǝmǝ nyi Pǝbiliyusu. Naja ngǝ dlǝwur ˈya a vwu ki nyi ǝnga ji nǝ ˈya vir nggya kǝra mǝnahǝ nǝ pida makǝru. 8Dǝya Pǝbiliyusu tsu aˈyi ja ngga mai. Gǝvǝ nga ja ǝnga gyangǝ ba ǝnga ǝtǝmashi. Kǝ Bulusu gwa thlǝwa nyi, ji kǝdi Hyal ar kǝra ja, kǝ ji fǝr tsa ja ar ja ba ji shilǝgǝbiya nyi. 9Ənggǝra sǝ kǝ ɗa abangau, kǝ patǝr njira gǝra ngga ar dzǝgu tsadǝ kǝ shili ba ji sa shilǝgǝbiya nda. 10Ndǝ hana kǝra ˈya lagu pampamǝ gangǝu. Ənggǝra ˈyi gwu kwambwal ˈyu maˈyi, kǝ ndǝ tsǝmiya ˈya kar gangǝu, kǝra ˈyu ghari.
Bulusu Thlǝwa Mǝlmǝ Roma
11Ayukuɗa hya makǝru, ˈyi hyaˈari wu kwambwal sara wu Malita wu kwambwal Alegǝzandǝriya kǝra hǝna vuya ar dzǝgu tsadǝ kau. Ar kwambwal kǝ ndǝ ndaɓǝya ɗǝdlǝ nǝ ɓǝli hyalˈyar kǝra nja ngga ǝnga Kasturo ǝnga Polluksu ar bama nyi. 12Ənggǝra ˈyi shili wu mǝlmǝ Sǝrakusu, kǝ ˈyi hǝna pida makǝr ǝna.
13Sara ǝnggau ba ˈyi ɓau, ba ˈyi shili wu mǝlmǝ Rigyiyamu. Ayukuɗa pida pathlǝu, kǝ yambaɗǝ hyaˈari sara wu shidar vuya. Ma ǝzǝgǝkura nyi, ba ˈyi thlǝwa mǝlmǝ Putiyoli. 14A ndǝna ˈyi thlǝwa alenyi njir nu, ndǝ kǝdi ˈya aga ˈya nggya ǝkkǝˈyi nda nǝ sugu pathlǝu. Abangau, nga ˈyi shili wu ˈyiˈyir Roma. 15Ənggǝra njir nu nǝ Roma nggari ar kǝra shilir ˈya, kǝ ndǝ shili ar sugu Apiyesu ǝnga vira nja ngga ǝnga Vi Dlǝwu Mǝthlǝpi Makǝru, aga nda sa dlǝwuri ˈya. Ta Bulusu lari nji kau, ba ji usar Hyal, ba ji uya fǝ ɗǝfu.
16Ta ˈyi vwu mǝlmǝ Roma, kǝ nji piyari Bulusu ja nggya ar kǝrnyi zhizhi nyi, ǝnga soja a vǝr ɓǝla ki kǝra ja a gwa.
Bulusu Tǝtǝlna Ndǝr Hyal Wu Roma
17Ayukuɗa pida makǝru, Bulusu nggari njira nggurǝm nǝ Yahudiya. Ənggǝra ndǝ tsǝmiya dzau, kǝ ji na anǝ nda, “Zamǝ ɗa ˈyar, alaga kǝ nayi aˈyi ndzana sǝ anǝ nji gǝ mǝn kǝ mai, ǝnga sǝ ɗǝmwaˈyi aˈyi kǝra yi mǝliya ar kǝra sǝr ǝjir mǝn mai. Sǝ aˈyi yi ndzana mai, alaga abangau, kǝ ndǝ mbar ɗa wu Urshalima kǝ ndǝ lǝr ɗa anǝ njir Roma mbamba.
18Nanda tsu ǝnggǝra ndǝ tsambiya ɗa, ndu yiwu nda siya ɗa ara nandǝ lari sǝra yi mǝliya kǝra ɗa tsaˈa nja tsǝya ɗa mai.
19Ama ǝnggǝra njir Yahudiya nggǝl ara hǝnggǝri, a ɗar tsaˈa anǝ ɗa ya hǝr wula a shili wu mwar Kayisaru. Ama aˈyi cabiya abǝr yi wulana njir mǝn mai. 20Ca ngǝ ɗa yu yiwu ya lar hyi ǝnga mǝna ndǝr wu pamǝu. Ariya sǝra wu daɓaga nǝ nyi fǝrkǝr anǝ njir Izirayila nga nji mbiya ɗa ar ǝpa liyangǝ kau.”
21Kǝ ndǝ shaɗǝwa nyi, “Naˈyi uya cama tsǝtsǝfǝ sara wu ˈyiˈyir Yahudi ariya gǝ mai. Wu pama zamǝˈyar kǝra shili, ndǝ aˈyi kǝra ndǝr ar kǝra gǝ mai, ǝnga nar ˈya sǝ ɗǝmwaˈyi ar kǝra gǝ mai. 22Ama ˈyu yiwu ˈya nggari sǝra gu na, ara ˈyu sǝni abǝr patǝr nji a vǝr ndǝr ɗǝmwaˈyi ar kǝra lagur nu mafǝliyangǝ kau.”
23Ənggǝra ndǝ thlana pǝci kǝra nda thlǝwa Bulusu ari, kǝ ndǝ shili ar vira ja ari ǝnga nji gangǝ gagaɗau. Mbari mudlau baˈanǝ wagǝu, ji dumwa ǝnga ndǝr anǝ nda ar kǝra tǝlkur Hyal. Ju yiwu ja hǝr hangǝkala nda a shili wu lagu Yesu, lagur highiɓǝ anǝ nda ar kǝra dlaɗǝ Musa ǝnga nǝ nabiˈyar. 24Alenyi nji hǝnggǝri ǝnga sǝra ji na, ama alenyi nji tsu aˈyi hǝnggǝri mai. 25Agabangau, nandǝ hǝnggǝri ǝnga kuvwar nda mai. Kadivira nda piyari viya nyi, kǝ Bulusu nar nda naja ka ndǝr nǝ haɗiya, ji na, “Mambǝl Cici a nabiyar jiri, ǝnggǝra ji nar nyi anǝ ǝjir hyi lagu miya nabi Əshaya. Ji nar nda abǝr,
26“ ‘Ga maˈyi a ndǝra nji kau,
ga nda na,
“Nggar sau,
hyu nda nggari,
ama nahyu
nda nggabiya mai,
tsamǝ sau,
hyu nda tsamǝ,
ama nahyu
nda tsambiya mai.”
27Ara ɗǝfuwa nji kau,
a ɗar ɓaɓalu,
a danar nda himiya nda,
a haɗiyar nda liya nda,
ara nda sara lari
ǝnga liya nda,
nda sara nggari
ǝnga himiya nda,
nda sara sǝnibiya
ǝnga ɗǝfuwa nda,
ǝnga nda sara sha shili ara yau,
aga ya sa shilǝgǝbiya nda.’ ”
28“Agabangau, yu yiwu hya sǝni, abǝr Hyal a sǝwar ndǝr nyi nǝ mbǝɗa nji a nda anǝ njira aˈyi njir Yahudiya mai. Nanda nǝr nda ndu nda siya nyi himi.”
29Ayukuɗa ji nana abangau, kǝ njir Yahudiya maˈyi, ndu kǝpal gagaɗǝ wu pama nda. 30Bulusu nggya nǝ fa mǝthlǝ wu ki kǝra ji dlǝwuri ja vǝr ki kau. Ju dlǝwu patǝr njira wu shili ǝgya ja. 31Ta ɗa nji kar nyi tǝtǝlna ndǝr Hyal mai, kǝ ji dumwa ǝnga tǝtǝlna ndǝr Hyal ar kǝra tǝlkur Hyal ǝnga highiɓǝ ar kǝra Thlagǝ Yesu Kǝrsiti gǝra ǝnga hivǝr.
©2024 Initiative for the Translation and Development of African Languages and Margi Tiwi Nga Təm