Thlǝr 27
27
Bulusu Gwu Kwambwal Nǝ Vwu Roma
1Ənggǝra nji mbiya aga ˈya hyaˈari wu kwambwal nǝ vwu ˈyiˈyir Italiya, kǝ nji nǝ nyi Bulusu ǝnga alenyi njir fursǝna anǝ midala soja. Ndǝ kau, nju ngga nyi ǝnga Juliyasu, pathlǝ wu pama sojaˈyar kǝra ǝgya kiɗa Kayisaru. 2ˈYi gwu kwambwal kǝra hyaˈari sara wu mǝlmǝ Adiramitiyumu kǝra wu maˈyi a vwu mǝlmǝ pampamǝ kǝra ar dza ˈyiˈyir Asǝya. Kǝ ˈyi gwu ɓǝ a gwar tsadau. Aristakusu, ndǝr mǝlmǝ Tasalonika sara wu ˈyiˈyir Masidoniya, aˈyi ja ǝnga ˈya.
3Əzǝgǝkura nyi kǝja ˈya a shiliri wu mǝlmǝ Sidonu. Juliyasu midala soja canǝ nyi kyiˈwakur anǝ Bulusu. Ji piyari nyi aga ja maˈyi a ndǝgya bazhi nyi ˈyar aga nda nda sǝɓǝya nyi mǝnahǝu. 4Ənggǝra ˈyi hyaˈari sara ǝnggau ar tsadǝ wayu, kǝja yambaɗǝ a vǝr ka ˈya ara ɓau. Agabangǝ kǝ ˈyi nu lagu ya dzǝgu tsadǝ Sayipurusu lagu kǝra yambaɗǝ aˈyi ǝnga dǝnama mai.
5Ayukuɗa ˈyi tǝrabiya a biyar ya tsadau kǝra lǝhǝ wu dzǝr ˈyiˈyir Silisiya ǝnga Pamǝfiliya, kǝ ˈyi sa taˈyi wu mǝlmǝ Mayira wu ˈyiˈyir Layisiya. 6A ndǝna, kǝ midala soja uya kwambwal kǝra hyaˈari sara wu mǝlmǝ Alegǝzandǝriya a vǝr maˈyi a vwu ˈyiˈyir Italiya. Ba ji fuwa ˈya a gwa gwa.
7ˈYi hǝri pǝci gangǝ a vǝr ɓǝ ar tsadau ǝnga samǝu, kǝl ta ǝnga dzau, ˈyi dla lǝhǝ wu dzǝr mǝlmǝ Kinidusu. Ənggǝra yambaɗǝ kar ˈya ara dumwa, kǝ ˈyi shabiya dzǝ a ndar lagu kǝra gǝra yambaɗǝu, lagu mwa dzǝgu tsadǝ nǝ Kǝretu lǝhǝ wu dzǝr mǝlmǝ Salmoni. 8ˈYi tǝrabiya ǝnga dzau, kǝl ta ˈyi shili ar vira nja ngga ǝnga Vir Ɓǝlsar kǝra Mǝnahǝu, lǝha dzǝr mǝlmǝ nǝ Lasiya.
9Kabangǝkau, a sanar ˈya pǝci gangǝ ǝnggau, kǝja ɓa nyi ma a ɗar dzadzau gagaɗau, ara pǝcir hǝ zǝmǝtsini nǝ ci bikǝ a tǝrabiyari. Kǝ Bulusu nar nda sǝra tsaˈa nda mǝl, ji na, 10“Shili, a lar yi abǝr ɓǝ kǝ wu nda ɗa ǝnga ɓwaɓwatǝ ǝnga asar gagaɗau, asar kar ǝnga kwambwal daɓǝ ǝnga piya mǝn.”
11Ama kǝ Juliyasu midala soja hǝnggǝri ǝnga ndǝr nǝ ndǝr dlǝ kwambwal ǝnga thlagǝr kwambwal a ndiya ǝnga nǝ Bulusu. 12Ta ɗa vir ɓǝlsar kǝra ǝnggau aˈyi mǝnahǝ aga nja hǝbiya vuya a gwa mai, kǝ badǝgala nji mbiya aga nja dumwa ǝnga ɓau, tara ba nja thlǝwa mǝlmǝ Foniksu ba nja hǝbiya vuya a ndǝna. Foniksu kau, vir ɓǝlsar kwambwal nǝ dzǝgu tsadǝ Kǝretu ngau, kǝra wu tsamǝ lagu shidar vuya sara wu shidar fwahǝu, ǝnga gya vwa sara wu shidar fwahǝu.
Majigwal A Gwar Tsadau
13Ənggǝra yambaɗǝ dzǝguya sǝ ǝnga hangǝkal sara wu shidar vuya, kǝ nja nyi nggani abǝr yambaɗǝ kǝra ndu yiwu a ɗari. Kǝ ndǝ hǝna liyangǝ tǝghǝ kwambwala nyi, kǝ ndǝ nu ar dza ˈyiˈyir dzǝgu tsadǝ Kǝretu, kǝra lǝhǝ a miya tsadau. 14Aˈyi ɓǝliya sar mai, kǝ majigwal ǝnga dǝnama sara wu gya vwa nǝ shidar pǝci shili sarar dzǝgu dǝla nyi. 15Ənggǝra majigwal tsari kwambwala nyi, ba kari nyi ara ɓau, kǝ ˈyi piyari majigwala nyi ji jahǝ ˈya.
16Ənggǝra ˈyi tǝrabiya lagur mwa zǝr dzǝgu tsadǝ kǝra nja ngga ǝnga Kawuda, vira yambaɗǝ a gǝnnar dzau, ǝnga dzau kǝ ˈyi tǝɗǝri zǝr kwambwal a shili ar dza dǝgala nyi. 17Ayukuɗa ndǝ tǝɗǝri zǝr kwambwal a dǝ wu dǝgala nyi, kǝ ndǝ pǝɗiya dǝgala kwambwala nyi ǝnga ǝpa kǝ ndǝ mbiya ɓaɓal ja sara pǝthlau. Ndu hivǝr ja sara sa wu kǝgǝɓǝu nǝ Sartisu. Kǝ ndǝ puwa liyangǝ tǝghǝ kwambwal a gyi wu ˈyimi a gwar tsadau, kǝ yambaɗǝ dzǝgwa maˈyi ǝnga kwambwal. 18Ənggǝra yambaɗǝ dumwa ǝnga sau ǝnga dǝnama ju kǝnggǝɗǝ kwambwala nyi, ma ǝzǝgǝkura nyi ba ndǝ faˈabiya alenyi kar sara wu kwambwal ndǝ pǝna a gwar tsadau.
19Ar pǝci nǝ makǝrkura nyi, ba ndǝ faˈabiya alenyi kar mǝl thlǝr nda, ndǝ pǝna a gwar tsadau ǝnga tsa nda. 20Pida gangǝu tǝrabiya, naˈyi lari pǝci mai ǝnga naˈyi lari shashilga tsu mai, ya kǝja yambaɗǝ kǝl sǝ ǝnga dǝnama, kǝ ˈyi nggani abǝr a kuɗǝr ˈya.
21Ayukuɗa pida gangǝu ndǝ aˈyi kǝra sǝmku sǝr sǝm mai, kǝ Bulusu hyaˈari wu pama nji, ji na, “Shili, maja bǝr hyi nggar ndǝr ɗa, nahyi piyari Kǝretu mai, ya, asar kǝ ɗa ǝnga hyi kau, aˈyi wu ɗarkǝr tsu mai. 22Ama kabangǝkau, yu tsǝtsǝkuri hyi hya mbiya ɗǝfu, ara ndǝr tini piya ja aˈyi wu pama hyi mai, kǝl kwambwal ngǝ wu pǝpǝthlǝnakǝr wacu. 23Ariya na ǝvuˈyi waladi nǝ Hyal kǝra nayi nǝnyi ngau, ǝnga naja nga yu mǝl thlǝr anǝ nyi sa taˈyi lǝhǝ wu dzǝr ɗa.
24Ji na, ‘Ga sara hivǝr mai, Bulusu. Ənga jiri, kǝl gǝ nda taˈyi wu mwar Kayisaru nja numa anǝ ngau, ya, kǝja ariya gǝ, yu nda tsǝrpǝri piya njira a vǝr ɓǝ ǝnga gǝ lagu mǝnahǝkur ɗa, ndǝr tǝ aˈyi wu pama nda mai.’ 25Agabangau, hya mbiya ɗǝfu, shili, ara a hǝnggǝri yi ǝnga Hyal abǝr sǝra ji nar ɗa kau, ju mǝliya. 26Ama alaga abangau, kǝl yambaɗǝ kǝ a pǝna mǝn ar vanyi dzǝgu tsadǝ.”
27Ar pǝci nǝ pida kumo apǝ foɗǝu, tsu ˈya vǝr ɓǝ ar kǝra ˈyimi nǝ Tsadǝ Adǝriyatikusu. Hathlǝr vuˈyi kǝ njir dlǝ kwambwal lari ǝnggǝr a ɗar nda lǝha dzǝr ˈyiˈyi. 28Kǝ ndǝ vakuwa sǝˈyi nǝ tǝkǝ tsadǝ a gwar ˈyimi, ba ndǝ lari dzǝgamǝkura nyi a tǝkǝri hi gharu ǝnga mǝthlǝkumunyi. Ənggǝra ˈyi ɓǝra ɓar dzǝ a dumwa kushu, ba ndǝ ɓǝra tǝkǝri dzǝgamǝkura nyi, ba ndǝ lari a ɗar hi ǝdlǝkumunyi.
29Ara hivǝr nda sara tsar kǝrnda ar dza mau, ba ndǝ fuwa liyangǝ tǝghǝ kwambwal pampamǝ foɗǝ a gyi wu ˈyimi ndǝ dzǝgwa kǝdi Hyal aga viya kusa kuɗǝ ar kǝra nda jamǝu. 30Ama njir dlǝ kwambwal wu gal lagu kǝra nda daɓaga hwinakǝr. Kǝ ndǝ hǝya zǝr kwambwal a gyi wu ˈyimi ndu mǝl dabar abǝr liyangǝ tǝghǝ kwambwal nga ndu pǝ sara dǝ wu bama kwambwal a gyi wu ˈyimi.
31Kǝ Bulusu nar nyi anǝ midala soja ǝnga soja nyi ˈyar kǝra aˈyi ǝnga ja, “Ma nji kǝ aˈyi nggya a gwu kwambwal kǝ mai, nahyu mbǝɗǝ mai.” 32Ənggǝra sojaˈyar kǝ nggari abangau, ba ndǝ thlathlana ǝpa kǝra sǝɓǝya zǝr kwambwala nyi, ba ji maˈyi ar ˈyimi.
33Ənggǝra vi lǝhǝ wu kuɗau, kǝ Bulusu kǝdi nda aga nda sǝm sǝr sǝm, ji na, “Əshina pida kumo apǝ foɗǝ nga hya vǝr ɗǝnga kuɗiyar sǝ kau, ǝnga tsu sǝ aˈyi kǝra hyi sǝm mai. 34Agabangau, yu kǝdi hyi, hya sǝm sǝr sǝm aga jamǝkur nǝ dza hyi, kǝja sǝr uya alaga zǝma shishir kǝra ndaliya hyi aˈyi mai.”
35Ayukuɗa ji nana abangau, kǝ ji hǝri macikǝl, ji usar Hyal wu mwar nda patǝu, ji ɓǝɓǝlǝwa, ba ji dzǝguya sǝm. 36Kǝ ndǝ fiya ɗǝfu anǝ kǝrnda patǝu, ba ndǝ sǝmku sǝr sǝm. 37Papatǝkura ˈya a gwu kwambwal kau, naˈya gharu mǝthlǝ ǝnga mǝɗǝfǝ kumunyi apǝ kwa ngau.
38Ayukuɗa ndǝ sǝm ndǝ nyau, kǝ ndǝ pǝna uhi kǝra a gwu kwambwal a gyi wu ˈyimi aga gǝnna tǝdǝɓǝkura nyi. 39Ənggǝra vi sa kuɗau, nandu sǝni vira nda ari mai, ama ba ndǝ lari vira ar tsadǝ kǝra ǝnga mǝshiˈwa. Ənggau ba ndǝ ɗǝnga aga nda taˈyina kwambwal a ndǝna ma wu sǝni ɗa.
40Kǝ ndǝ thlathlana ǝpa kǝra sǝɓǝya liyangǝ tǝghǝ kwambwal ba ndǝ piyari nda a gyi wu ndǝla ˈyimi. Ba ndǝ pǝpǝlna ǝpa nǝ sǝr sha kwambwalˈyar. Kǝ ndǝ dzǝgwa hyaˈana kadǝmbul kwambwal aga yambaɗǝ a hǝ nyi a nda miya mǝshiˈwa tsadau. 41Ama ǝnggǝra ˈyi thlǝwa vira ǝnga kǝgǝɓǝu ba kwambwal tsar mǝshiˈwa, ǝnggau ba kǝra kwambwal vwu mǝshiˈwa ba ji nggǝl ara ɓau. Ənggau ba kwambwal pǝpǝthlǝnakǝr ara sǝra dlǝgwamǝr ˈyimi a vǝr mǝl.
42Ara sojaˈyar kau, ndu hivǝr njir fursǝna nda sara kǝ a gwar ˈyimi ba nda hwinakǝr a biya miya tsadau, ba ndǝ gal lagur dlǝna nda patǝu. 43Ama ara midala soja wu yiwu ja kǝtiya Bulusu, ba ji kar nda ara mǝl sǝra ndu yiwu kau. Kǝ ji dzǝgwa nar nyi anǝ njira wu sǝni kau aga nda vǝl a gwu tsadǝ tanggǝrma, aga nda kǝ nda kar miya tsadǝ aga nda biya. 44Patǝr njira hiyau, ndǝ uya galang ǝnga sǝr hǝr kwambwal kǝra pǝpǝthlǝnakǝr ndǝ mbari. Lagu kǝ nga ndǝ biya, ndǝ biya thlǝwa ˈyiˈyi jamǝu.
©2024 Initiative for the Translation and Development of African Languages and Margi Tiwi Nga Təm