Roma 1
1
Usa Dzau
1Cama tsǝtsǝfǝ kǝ sara ara Bulusu mafa Kǝrsiti Yesu, ndǝra nji ngga aga ja ɗa cama sǝsǝ nyi, ǝnga tsu nji fiya nyi aga tǝtǝlna ndǝshigu nǝ Hyal. 2Ndǝshigu kau, ngǝ Hyal mǝlna alkawala nyi ɗǝɗǝmǝu lagu nabi nyi ˈyar, ǝnggǝr kǝra tsǝtsǝfǝ wu ndǝr Hyal tsǝtsǝfǝ cicau. 3Naja ka ndǝshigu, ar kǝra Zǝr nyi Yesu Kǝrsiti Thlagǝr mǝn ngau, ndǝra lagu ndǝndǝkur sara wu culi Dawuda nga ja, 4ama Mambǝl Cici ngǝ cabiya, ǝnga madiya dǝnama abǝr naja Zǝr Hyal ngau, lagur hyaˈari nyi sara vir tau. Naja Yesu Kǝrsiti kǝ Thlagǝr mǝn ngau.
5Lagu Kǝrsiti Yesu ǝnga tsu ariya barkar kǝra thlǝmǝ nyi nga mǝn uya mayiwakur nǝ ngga aga mǝna ɗa cama sǝsǝ nyi. Mǝn ɗa njir ngga nji sara wu pama nji pampamǝ patǝu, aga nda hǝnggǝri ǝnga ǝtsu nda ɓǝlari. 6Naja kǝ tsu a tsǝkwar hyi ri, nahyi kǝra Hyal ngga hyi, aga hya ɗa nǝ Yesu Kǝrsiti.
7Cama tsǝtsǝfǝ kau, anǝ hyi patǝ hyi njira wu Roma, njira Hyal cabiya nda yiwukur, ǝnga tsu ji ngga hyi hya nggya nji cici gǝ Hyal. Bǝgǝ mayiwakur ǝnga huɗǝ pǝrtǝu sara ara Hyal Dǝrmǝn ǝnga Thlagǝ Yesu Kǝrsiti nda nggya ǝnga hyi.
Bulusu Wu Cimǝ Ja Vwu Roma
8Nǝ tanggǝrma, yu usaku anǝ Hyal ɗa lagur Yesu Kǝrsiti ariya hyi papatǝu, ariya nju ndǝr ar kǝra mbǝrsar hyi baˈamani wu duniya. 9Ariya Hyal kǝra ya vǝr mǝl thlǝr nyi ǝnga ɗǝfu zǝmǝu, lagur tǝtǝlna ndǝshigu nǝ Zǝr nyi, naja ngǝ sakida abǝr ya vǝr ɗǝngari ǝnga hyi cumu, 10wu kalar pǝcir kǝdi Hyal ɗa. Yu kǝdi Hyal abǝr, ma yiwur huɗa ja ngau, alaga abari ya gal lagu aga ya ndǝgya hyi. 11Ariya yu cimǝ aga ya lari hyi aga ya nǝ hyi vanyi lǝ sǝ nǝ mambǝl kǝra wu nda tsǝtsǝkur ɗǝfuwa hyi. 12Ɗǝnga ɗa ca ngǝ, aga mǝna tsǝtsǝkur ɗǝfuwa kǝrmǝn, aga mbǝrsar hyi a tsǝtsǝkur ɗǝfuwa yau, ǝtsu mbǝrsar ɗa a tsǝtsǝkur ɗǝfuwa hyi.
13Zamǝˈyar, yu yiwu hya sǝni abǝr aga gangǝ yi pabǝ dzau aga ya shili ǝgya hyi, ama ba nji kar ɗa baˈanǝ kabangǝkau. Sǝra ɗa yu yiwu ya shili ca ngǝ aga ya sa nggǝya nji a shili anǝ Thlagǝu wu pama hyi, ǝnggǝr kǝra yi nggǝya alenyi njira aˈyi njir Yahudiya mai.
14Ara a mbari ya tǝtǝlna ndǝshigu anǝ kalar ndau, njir Gǝrikǝu, ǝnga njira aˈyi njir Gǝrikǝ mai, ǝnga nji hahangǝ ǝnga nji dza. 15Ca ngǝ ɗa yu cimǝ gagaɗau, aga ya sa nǝ hyi ndǝshigu kǝ tsu, nahyi kǝra wu mǝlmǝ Roma.
Dǝnama Nǝ Ndǝshigu
16Ndǝshigu aˈyi sǝ sǝsǝli anǝ ɗa mai, ariya naja ngǝ dǝnamar Hyal kǝra wu lǝr mbǝɗǝ anǝ kalar ndǝra ǝnga mbǝrsa, tanggǝrma anǝ njir Yahudiya, ǝnga tsu anǝ njira aˈyi njir Yahudiya mai. 17Ara ndǝshigu ngǝ wu cabiya nju uya tsapǝkur nǝ Hyal lagur mbǝrsa, mbar ar dzǝguya baˈanǝ shili ar jomǝya. Ənggǝr kǝra ja tsǝtsǝfau, abǝr, “Ndǝ tsapǝu, lagur mbǝrsa nga ju nggya.”
Huɗǝ Ndzǝndzǝ Hyal Ar Kǝra Bikǝr Ndapi
18Hyal a cabiyar huɗǝ ndzǝndzǝ nyi sara dǝmǝlmau ar kǝra gǝra hivǝr Hyalǝr nji ǝnga shishikur nji, njira wu par jirkur lagur thlǝr ɗǝmwaˈyir nda. 19Ara sǝra tsaˈa aga nja sǝni ar kǝra Hyal aˈyi ar babal anǝ nda, ariya Hyal ǝnga kǝrnyi ngǝ cabiya nda. 20Nggyabiya hyalkur nǝ Hyal ǝnga dǝnama gǝra kuɗǝkur nyi aˈyi sǝra nja sǝni tsamiya ǝnga li ngǝ mai. Ama mbar dzǝguya duniya baˈanǝ shili ar ǝshina, a cabiyar nda sǝˈyar kǝ ar babal, ǝtsu a sǝni tsamǝr ndar nji lagu sǝra ji mǝliya. Agabangǝ nji a sara ɗa ǝnga sǝr fǝ miya.
21Alaga kǝ ndu sǝni Hyal, ama nanda aˈyi nǝ nyi kadakadarkur ar viya Hyal mai, ǝnga nanda aˈyi cabiya nyi usaku mai. Ar viya kau, kǝ ɗǝngar nda ɗa mǝmǝlamǝu, ɗǝfuwa nda kǝra gǝra ɗǝngabiya sau, a shari aga kuthlǝu. 22Alaga kǝ ndu ngga kǝrnda nji hahangǝu, ama nji dza nga nda. 23Kǝ ndǝ bǝlabiya kadakadarkur nǝ Hyal kǝra gǝra sǝni tau anǝ katǝ kǝra a papa ndǝ kǝra wu tau, ba tsu katǝ kǝra a papa ˈyagǝˈyar, ǝnga maˈwi ǝnga sǝr tǝɗǝ ǝnga ta.
24Agabangau, kǝ Hyal lǝr nda a ndu tsa mǝl sǝsukur lagur suna pampamǝ wu ɗǝfuwa nda, ǝnga mǝl sǝ sǝsǝli ǝnga kuvwar nda. 25Ndǝ bǝlari jirkur nǝ Hyal ǝnga fati. Ndu dlǝvǝ ǝnga nu sǝra Hyal mǝliya, ar viya Hyal ndǝra mǝliya sǝ patǝu, ndǝra nja kyaga fal nyi baˈanuwa. Amina.
26Ariya kǝ ngǝ Hyal lǝr nda a gwu tsa nggyabiya nǝ suna nǝ gǝra sǝli pampamǝu. Mathlǝkǝˈyir nda bǝlabiya nggya nǝ sal ǝnga mala kǝra tsaˈa a ndu nggya kǝra gǝra tsaˈa. 27Abangǝ tsu kǝ shili piyari nggya mala ǝnga sal kǝra ca ngǝ tsaˈa, kǝ ndǝ gwu suna nǝ mǝl sǝsukur ǝnga kuvwar nda. Shili gwu mǝl sǝ gǝra sǝli, lagur pida ǝnga shili. Kǝ nggyabiyar nda kǝ shili ǝnga akkǝri kǝra tsaˈa aga thlǝrǝr nda.
28Ta ɗa ndǝ nggǝl ara sǝnibiya Hyal ar viya vanyi sǝ wu ɗǝfuwa nda, kǝ Hyal lǝr nda a ndu tsa nggya gǝra kǝr, aga nda mǝl sǝra gǝra kyau nja mǝl. 29Nyinyi nga nda ǝnga kalar gǝra tsapǝkur, ǝnga ɗǝmwaˈyikur, ǝnga suna, ǝnga nggya kyakyar huɗǝu. Nyinyi nga nda ǝnga ɗa shishi, ǝnga tsa ndau, ba ǝnga hyaˈa hangǝkal, ǝnga ngguta vi, ba ǝnga sǝɓǝ ndǝ wu huɗǝu. Nanda njir na ndǝ nga nda, 30ǝnga njir gǝm nji, ǝnga njira piyari shishir dza Hyal, ǝnga njir nggǝl nji, ǝnga njir ɓwadzau, ǝnga njir fal kǝrnda, ǝnga njir mba ɗǝmwaˈyikur, ǝnga njira gǝra gǝnggǝri sǝli anǝ njir ya.
31Nanda nji gǝra kǝr, ǝnga njira gǝra sǝɓǝ alkawal, ǝnga njira gǝra ca yiwukur, ba njira gǝra ǝnga tǝhuɗǝu. 32Alaga kǝ ndu sǝnibiya tsapǝkura dlaɗǝ Hyal abǝr kalar ndǝra wu mǝl culi sǝˈyar kau, ja kyaga tau, ama aˈyi sǝˈyar kǝ nga nda vǝr mǝl waci mai, ama ndu cicikǝɗǝr nyi hi anǝ njira a vǝr mǝl.
©2024 Initiative for the Translation and Development of African Languages and Margi Tiwi Nga Təm