Thlǝr 26
26
Bulusu Wu Mwar Tǝl Agǝripa
1Kǝ tǝl Agǝripa na anǝ Bulusu, “A nǝ ngǝr yi lagu aga ga kǝtǝ kǝrngau.” Abangau, kǝ Bulusu hyaˈana tsa ja a dǝmǝlmau, ji dzǝgwa ndǝr ju na, 2“Tǝl Agǝripa, anǝ ɗa sǝr caguli ngau, ta yi uya kǝrɗa yi taˈyi wu mwa ngǝ ǝshina. Agabangau, ya kǝtǝ kǝrɗa ar kǝra sǝra njir Yahudiya wu vazǝ ɗa patǝ ar kǝri. 3Yu sǝni abǝr nagau, gu sǝni sǝ gagaɗǝ gangǝu ar kǝra sǝr ciji nǝ njir Yahudiya patǝu ǝnga sǝra ndu shasha ndǝr wu pamǝ ar kǝri. Agabangau, yu kǝdi ngau, ga mǝliya ɗa munya ga sǝya ɗa himi.
4“Patǝkura njir Yahudiya wu sǝni culi nggyabiya kǝra yi mǝl pǝci kǝra yi tsu zǝr, dzǝguya ar nggyabiya ɗa wu ˈyiˈyir ˈya ba ǝnga wu Urshalima tsu. 5A sǝni ɗa nda tsu kaɗǝu, ma ndǝ hǝnggǝri, a sǝni lǝr sakida nda, abǝr nayi ndǝr Farisi ngau. Njir Farisi ngǝ njira a ndiya ǝnga kwakwaɗǝ wu nu sǝra ndu nu.
6Kabangǝkau, kǝja yi taˈyi wu mwar hyi, hyu mǝl numa anǝ ɗa ara fǝrkǝr ɗa wu nyabiya dzǝ wu alkawal kǝra Hyal mǝliya anǝ ǝjir mǝn ˈyar. 7Alkawal kǝ ca ngǝ culi nǝ njir Yahudiya kumo apǝ mǝthlǝ fǝrkǝr aga nda lari nyabiya dzǝ nyi, ǝnggǝra nda vǝr sǝkau, ndu nǝrdzǝ ǝnga dlǝvǝ Hyal vuˈyi ǝnga pǝci ǝnga jirkur. Alvari tǝl, ariya yi fǝrkǝr ǝnga alkawal nǝ barka kau, ca ngǝ njir Yahudiya wu vazǝ ɗa. 8Mi ngǝ ɗa hyu nggani abǝr sǝ dzadzau ngǝ Hyal a hyaˈana ndǝ sara vir tǝ ya?
9“Nayi ǝnga kǝrɗa, ɗǝɗǝmǝ yi mǝl sǝ pampamǝ gangǝu kǝra yi nggani kakalǝ nga nyi aga ya kari thlǝmǝr Yesu ndǝr Nazǝratu ara ɓǝ a dumwa. 10Ya, naja kǝ ngǝ sǝra yi mǝlna wu Urshalima. Pubu dǝdǝgalˈyar nǝ ɗa lagu aga ya puwa nji cici gǝ Hyal gangǝu, a gwu fursǝna. Ar kalar pǝci kǝra nju yiwu nja tsa nda yu lǝri hǝnggǝr ɗa. 11Yu maˈyi tsu a ndu patǝr umbwa daɓǝ dzǝ nǝ njir Yahudiya pampamǝ aga ɗa nda ǝnga yu nǝrdzǝ aga ya cuwa nda nda diɗana thlǝmǝr Yesu. Ənga huɗǝ ndzǝndzǝ ar kǝra nda, yu nu nda tsaˈa a biyar ya ˈyiˈyi pampamǝ aga ya nda ɗa nda.
12“Wu pathlǝkura ɓǝˈyar kau, ya vǝr maˈyi a vwu Damasǝkasu ǝnga cama tsǝtsǝfǝ sara ara pubu dǝdǝgalˈyar wu tsa yau. 13Əpuci taˈyikǝr, Alvari tǝl, ǝnggǝra ya ar lagu, ba yi lari mbǝmbǝl sara dǝmǝlmau, a ndiya pǝci ǝnga mbǝl, zǝwar ɗa ǝnga njir ɓǝ ɗa. 14Patǝkura ˈya dlanakǝr a gyi wu ˈyi, ba yi nggari ɗahǝ sara dǝmǝlmǝ wu na anǝ ɗa wu miya njir Yahudiya, ‘Suwalu, Suwalu, mi ngǝ ɗa gu ɗa ɗa ka? Ɓwaɓwatǝ nga gu nǝ nyi anǝ kǝrngau ma gu ɗa ɗa.’
15“Kǝ yi na, ‘Wa nga ga, Thlagǝu?’
“ ‘Nayi ngǝ Yesu ndǝra gu ɗa,’ Thlagǝ shaɗǝwa. 16‘Ama hyaˈari aˈyi taˈyau. Yi canǝ ngǝ kǝrɗa aga ya nǝ ngǝ thlǝr mǝl anǝ ɗa, ǝnga aga ga ɗa sakida ar kǝra sǝra gǝ lari ar kǝra yau ǝnga tsu ar kǝra sǝra yu nda ca anǝ ngau, a ndu mwa. 17Yu nda kǝtiya ngǝ ara njir Yahudiya ǝnga njira aˈyi njir Yahudiya mai, njira yu nda sǝ ngǝ a ndǝra nda. 18Nagu nda pahǝna liya nda, aga nda sha sara wu kuthlǝu, a shili wu mbǝmbǝl, aga tsu nda sha sara wu dǝnama tǝlkur nǝ Shatan a shili wu tǝlkur nǝ Hyal. Lagu kǝ nga ndu uya nja tǝfǝbiya nda bikǝr nda ǝnga nda ɗa wu pama njira wu uya cicikur lagur mbǝrsa wu yau.’
19“Agabangau, tǝl Agǝripa, nayi piyari mǝl thlǝr ǝnga mǝtakǝr kǝ sara dǝmǝlmǝ mai. 20Tanggǝrma yi dzǝguya tǝtǝlna ndǝr Hyal anǝ njir Damasǝkasu. Ba nga tsu yi tǝtǝlna ndǝr Hyal anǝ njir Urshalima ǝnga patǝr ˈyiˈyir Yahudi. Ayukuɗa nyi yi ɓǝra tǝtǝlna ndǝr Hyal anǝ njira aˈyi njir Yahudiya mai. Ya vǝr na, abǝr nda tubi ǝnga nda sha shili ǝgya Hyal ǝnga tsu nda mǝl sǝra wu cabiya abǝr a tubir nda.
21Ca ngǝ sǝra ɗa njir Yahudiya mbar ɗa wu ki Hyal ndǝ nǝrdzǝ aga nda tsǝya ɗa. 22Ama baˈanǝ ǝshina kǝ a uyari yi dlǝwa dzǝ ara Hyal, ca ngǝ mǝliya kǝja yi taˈyi ǝnggau yu na ndǝr Hyal anǝ nji nggunggurǝm ǝnga nji kukushu. Sǝ mafǝliyangǝ nga yu na mai, ama sǝra Musa ǝnga nabiˈyar na wu nda ɗa, 23abǝr Kǝrsiti wu lar ɓwaɓwatǝu, ja ɗa ndǝ tanggǝrma kǝra wu hyaˈari sara vir tau. Lagu kǝ nga ju shili ǝnga mbǝmbǝl anǝ nji patǝu, njir Yahudiya ǝnga njira aˈyi njir Yahudiya mai.”
24Ar pǝci kǝ ngǝ Fesǝtusu hyaˈana ɗahǝu, ji na ǝnga dǝnama anǝ Bulusu, “Gǝ biya wu hangǝkal ya, Bulusu? Gangǝkur jiga ngau a fuwa ngǝr wu thlǝkau!”
25Ama kǝ Bulusu shaɗǝwa, ji na, “Fesǝtusu ndǝ dǝgalǝu, thlǝkǝ ngǝ wu tǝ ɗa mai. Sǝra tsaˈa ǝnga jiri nga yu na kau. 26Jiri, tǝl wu sǝni sǝˈyar kau, ǝnga yu ndǝr anǝ nyi gǝra ǝnga hivǝr. A hǝnggǝr yi abǝr sǝˈyar kǝ ar babal nga nyi anǝ nyi, ara sǝˈyar kǝ kǝra aˈyi nji mǝl ar ɗǝwa mai. 27Tǝl Agǝripa, a hǝnggǝri gǝ ǝnga nabiˈyar ya? A sǝni yi abǝr a hǝnggǝr gau.”
28Kǝ Agǝripa nar nyi anǝ Bulusu, “Ma gǝ nggani wu pǝci kushu kǝ gu sǝni shabiya ɗa aga ya ɗa Kǝrsita ya?”
29Kǝ Bulusu shaɗǝwa, ji na, “Tara pǝci kushu ǝnga tara pǝci dzǝgamǝu, sǝra yu kǝdiyau ara Hyal ca ngǝ aˈyi nagǝ wacu mai ama patǝr njira a vǝr sǝ himi ɗa ǝshina, nda ɗa ǝnggǝr nayau, ama aˈyi ǝnggǝr nǝɗa kau, ar ǝpa liyangǝ kǝ mai.”
30Kǝ tǝl hyaˈari, abangǝ tsu gwamna ǝnga Banisu ba njira a vǝr nggya ǝkkǝˈyi nda. 31Ənggǝra ndǝ biya sara ar vi numa, kǝ ndǝ ndǝr wu pamǝu, ndǝ na, “Ənga jiri, ndǝ kǝ aˈyi ndzana sǝra tsaˈa nja mbiya nyi wu fursǝna ǝndǝga nja tsǝya nyi mai.”
32Kǝ Agǝripa nar nyi anǝ Fesǝtusu, “Maja bǝr ndǝ kǝ aˈyi hǝri wula nyi kǝ a ndu mwa Kayisaru mai, ba nja piyari nyi ja maˈyi.”
©2024 Initiative for the Translation and Development of African Languages and Margi Tiwi Nga Təm