Thlǝr 25
25
Bulusu Kǝdiyau Ja Hǝri Wula Nyi A Ndu Mwar Kayisaru
1Ayukuɗa Fesǝtusu ɗa gwamna, pida makǝrkura nyi, kǝ ji hyaˈari sara wu Kayisariya ji maˈyi a dǝ wu Urshalima. 2Kǝ pubu dǝdǝgalˈyar ǝkkǝˈyi njira nggurǝm nǝ Yahudiya wulana Bulusu ara Fesǝtusu. 3Ndǝ kǝdi Fesǝtusu aga ja canǝ nda mayiwakur ja shana Bulusu a vwu Urshalima, ara ndu yiwu nda mbuya nyi lagu aga nda daɓaga tsǝya nyi ar lagu. 4Fesǝtusu shaɗǝwa, ji na, “A sǝɓiyar nji Bulusu wu Kayisariya, nayi ǝnga kǝrɗa maˈyi nga ya vwuna ma sǝkari kushu. 5Agabangau, bǝgǝ njir tǝɗǝ mwar hyi nda shili ǝnga yau, aga nda nda nana vaza nyi a ndǝna, ma tara sǝ aˈyi kǝra ji ndzana.”
6Ayukuɗa ji pida cisu ǝndǝga kumo ǝkkǝˈyi nda, ba ji sha a gyi wu Kayisariya. Ma ǝzǝgǝkura nyi tsu, kǝ ji tsǝmiya njir pathla ba ji sǝwa aga nja shili ǝnga Bulusu a shili wu mwa nyi. 7Ənggǝra Bulusu shili, njir Yahudiya kǝra shida sara wu Urshalima, ndǝ hyaˈari ndǝ zǝwari nyi. Ndǝ dla ǝnga ndǝr pampamǝ gangǝ ar kǝra ja nǝ vazǝ nyi. Alaga abangau, nanda ǝnga kǝrnda aˈyi sǝni cabiya jirkura nyi mai. 8Ama kǝ Bulusu ndǝr nǝ kǝtǝ kǝrnyi ji na, “Sǝ aˈyi yi ndzana ar kǝra dlaɗǝ njir Yahudiya mai, ǝnga nayi mǝliya bikǝ ar kǝra ki Hyal mai, ǝnga sǝ aˈyi yi ndzanǝ nyi anǝ Kayisaru ǝnga kǝrnyi mai.”
9Ama Fesǝtusu ara ju yiwu ja canǝ nyi mayiwakur anǝ njir Yahudiya, ba ji yiwa Bulusu, “Gu yiwu ga maˈyi a vwu Urshalima aga ya vwa mǝliya ngǝ numa ar kǝra sǝˈyar kǝ ndu na ar kǝra gǝ kǝ ya?”
10Ama kǝ Bulusu na, “A dǝ wu mwar pathla nǝ Kayisaru nga yau, ǝnggau nga nja kyaga mǝliya ɗa numa. Sǝ aˈyi kǝra yi ndzana nyi anǝ njir Yahudiya mai, nagǝ ǝnga kǝrngau, gu sǝni abangǝ pakatǝu. 11Ma nayi ndǝr ndza sǝ ngau, ba ǝnga bikǝ ɗa a kari nja tsǝya ɗa tsu, nayu nggǝl ara tǝ mai. Ama ma tsu jirkur aˈyi wu sǝra ndu wula ɗa ar kǝri kǝ mai, ndǝr sǝni lǝr ɗa anǝ nda aˈyi tsu mai. Yu kǝdi ngau aga ya hǝr wula ɗa a ndu mwar Kayisaru.”
12Ayukuɗa Fesǝtusu thlana sǝra ndu thla ǝkkǝˈyi njir pathla nyi, kǝ ji shaɗǝwa, ji na, “Gu kǝdi aga ga maˈyi ǝnga wula ngǝ a ndu mwar Kayisaru. Ya, kǝja ndǝgya Kayisaru nga gu maˈyi.”
Fesǝtusu Yiwa Miya Tǝl Agǝripa
13Ayukuɗa pida kushu, kǝ tǝl Agǝripa ǝnga kwamǝ nyi Banisu shili wu Kayisariya aga nda sa dlǝwu Fesǝtusu. 14Ta Fesǝtusu sǝni abǝr ndu nda ɓǝliya sar kushu a ndǝna, kǝ ji dla ǝnga ndǝr Bulusu anǝ tǝl, ji na, “Vanyi ndǝ aˈyi kǝra Felekǝsu gwamna kǝra tǝrabiya, piyari ɗa nyi wu fursǝna. 15Ar pǝci kǝra yi a vwu Urshalima, kǝ pubu dǝdǝgalˈyar ǝnga njira nggurǝm nǝ njir Yahudiya shili ǝnga wula ndǝ kau, ndǝ kǝdi ɗa aga ya mǝlna nyi numa.
16“Ama kǝ yi nar nda abǝr naˈya njir Roma aˈyi tsǝliya mǝl numa anǝ ndǝra nju vazǝ mai, kǝl ma nji shili ǝnga ja wu mwar njira wula nyi. Ba ǝnga nja nǝ nyi pǝci aga ja kǝtǝ kǝrnyi ar kǝra sǝra nju wula nyi ar kǝri kau. 17Ənggǝra ndǝ shili ǝnggau ǝnga yau, nayi piyari ndǝra nyi sǝkari mai, ama ǝzǝgǝkura nyi kǝ yi nggǝya njir pathla, ba yi sǝwa tsu nja dla ǝnga ndǝ kau.
18Ənggǝra njir wula hyaˈari aga nda ndǝr, nanda aˈyi shili ǝnga sǝr wula nyi kǝra cabiya bikǝ ɗǝmwaˈyi kǝra yu nggani ji mǝliya mai. 19Ama ndǝr aˈyi wu pama nda kǝra ndǝ gǝra hǝnggǝri ǝnga Bulusu ar kǝri. Ndǝr kǝ ar kǝra sǝra ndu nu ǝnga ar kǝra vanyi ndǝ kǝra nju ngga ǝnga Yesu, ndǝra tau, ama kǝra Bulusu wu na abǝr ǝnga pi nga ja.
20Nayi tsu, ǝnggǝra yi tini lagu kǝra ya sǝni hwaɗǝbiya sǝˈyar kau, kǝ yi yiwa Bulusu tara ja sǝni hǝnggǝri ja maˈyi a vwu Urshalima aga nja vwa mǝl numa anǝ nyi ar kǝra sǝˈyar kǝ a vwuna. 21Ama Bulusu yiwa nja taˈyina ndǝr nyi ara ndǝr nyi wu mwar tǝl dǝgalǝ Kayisaru nga nyi. Kǝ yi lǝr ndǝr aga nja ɓǝla nyi baˈanǝ pǝci kǝra yu nda sǝwa nyi a ndǝra Kayisaru.”
22Kǝ tǝl Agǝripa na anǝ Fesǝtusu, “Yu yiwu ya nggari ndǝ kǝ ǝnga kǝrɗa.”
Kǝ Fesǝtusu shaɗǝwa, “Gǝ wu sa nggari nyi ǝzǝgǝu.”
Bulusu Wu Mwar Agǝripa
23Ma ǝzǝgǝkura nyi, kǝ tǝl Agǝripa ǝnga Banisu shili wu kar tǝlkur ǝkkǝˈyi gaga nyi ˈyar, ndǝ shili wu umbwa pathla ǝkkǝˈyi njira nggurǝm nǝ soja ǝnga njira nggurǝm nǝ mǝlmau. Kǝ gwamna Fesǝtusu sǝwa nja shili ǝnga Bulusu. 24Kǝ Fesǝtusu na, “Tǝl Agǝripa ǝnga patǝkura njira aˈyi ǝkkǝˈyi mǝn, kǝja ndǝ kǝ ndǝra patǝr njir Yahudiya wulana nyi anǝ ɗa wu Urshalima ǝnga tsu ǝnggau, ndu wau abǝr aˈyi kyau ja ɗa ǝnga pi mai.
25Ama sǝ aˈyi yi lari sǝra ji mǝliya kǝra ɗa tsaˈa nja tsǝya nyi mai. Ama ara naja ǝnga kǝrnyi ngǝ hǝr wula nyi a dumwar ndǝ dǝgalǝ Kayisaru, ca ngǝ ɗa yi sǝwa nyi a ndǝgya ja. 26Ama nayi aˈyi ǝnga sǝra ya sǝni tsǝfǝri nyi anǝ ndǝ dǝgalǝ tǝl Roma mai. Agabangǝ ca ngǝ ɗa yi shili ǝnga ja wu mwar hyi, nja na ma anǝ ngǝ tǝl Agǝripa, aga ayukuɗa mǝn hwaɗǝbiya sǝ kau, tara ba ya uya sǝra ya sǝni tsǝfǝri. 27Ariya wu ɗǝnga ɗa dzakur ngǝ nja sǝwa ndǝ a ndu fursǝna gǝra nja cabiya nyi bikǝ nyi kǝra ji mǝliya kau.”
©2024 Initiative for the Translation and Development of African Languages and Margi Tiwi Nga Təm