Thlǝr 24
24
Nji Wulana Bulusu Wu Mwar Felekǝsu
1Ayukuɗa pida tǝfu, kǝ Hananiya pubu kǝra a ndiya ǝnga dǝgalǝu, shida ǝkkǝˈyi alenyi njira nggurǝm ǝnga vanyi lawuya kǝra thlǝmǝ nyi Tartulusu, aga nda sa wulana Bulusu a ndu mwar gwamna. 2Ənggǝra nji nggar Bulusu a gwa. Tartulusu dzǝguya wula Bulusu anǝ gwamna, ji na, “Ndǝ dǝgalǝu, wu tǝlkur ngau, a uyar ˈya nggya jamǝ nǝ pǝci gangǝ gagaɗǝ ara tsamǝ ndu mwa ngau, a shilir ǝnga nggyabiya mǝnahǝ wu ˈyiˈyi kau. 3Ənga barka ngau, Gwamna, patǝr njir ˈya baˈamani ǝnga ar kalar pǝci nda vǝr usa ngǝ gagaɗau. 4Ama ara nayu yiwu ya hǝri pǝci ngǝ mai, yu kǝdi ngau ǝnga kyiˈwakur ngau, ga sǝya ˈya himi nǝ pǝci kushu aga ˈya nar ngǝ sau.
5“Naˈya ngǝ thlǝwa ndǝ kǝ ndǝr dza sau, ji dla ǝnga hyaˈa hangǝkal wu pama njir Yahudiya kǝra ar kalar vi wu duniya. Naja tsu ngǝ ndǝr tǝɗǝmwa nǝ nji batal kǝra a vǝr nu ndǝr Nazǝratu. 6Abangǝ tsu ju yiwu ja diɗana ki Hyal, ama kǝ ˈyi mbari nyi, ˈyu yiwu ˈya mǝliya nyi numa ǝnggǝr kǝra dlaɗǝr ˈya cabiya. 7Ama kǝ soja kǝra a ndiya ǝnga dǝgalǝu, Lisiyasu shili ka sa ɓǝliya nyi wu tsa ˈya ǝnga dǝnama. 8Kǝ ji cuwa njir vazǝ nyi nda shili ǝnga ja wu mwa ngau. Ma gǝ sǝni hwaɗǝbiya sǝˈyar kǝ ǝnga kǝrngǝ sara ara ja, gu nda sǝnibiya jirkura sǝra ˈyu vazǝ nyi ar kǝri kau.”
9Njir Yahudiya ma dlǝwunggǝri, ǝnga ndǝ hǝnggǝri abǝr sǝra ndu vazǝ nyi ar kǝri kau, jiri nga nyi.
Bulusu Kǝtiya Kǝrnyi Wu Mwar Felekǝsu
10Ənggǝra gwamna nǝ nyi pǝci anǝ Bulusu aga ja ndǝr, kǝ Bulusu shaɗǝwa, ji na, “A sǝni yi wu fa gangǝˈyar kǝra tǝrabiya kau, a nggyar gǝ ndǝr mǝl pathla wu ˈyiˈyi kau. Agabangau, ǝnga huɗǝ pǝrtǝ nga yu kǝtǝ kǝrɗa. 11Ma gu yiwu, gu sǝni yiwabiya abǝr aˈyi a ndiya pida kumo apǝ mǝthlǝ mai, nga yi maˈyi a dǝ wu Urshalima aga da dlǝvǝ Hyal. 12Njir vazǝ ɗa aˈyi thlǝwa ɗa ya vǝr shasha ndǝr wu pamǝ ǝnga nda wu ki Hyal mai. Nanda tsu aˈyi thlǝwa ɗa a vǝr hyaˈa hangǝkala dlami wu umbwa daɓǝ dzǝˈyar nǝ njir Yahudiya ǝnga wu kalar mǝlmǝ mai.
13Sǝra ndu na ar kǝra yau, kabangǝkǝ tsu, nandu sǝni cabiya ngǝ jirkura nyi mai. 14Alaga abangau, a hǝnggǝri yi abǝr nayi ndǝr dlǝvǝ Hyal nǝ ǝjir ˈya ˈyar lagu Kǝrsiti kǝra nji kǝ wu na abǝr lagu nji batal ngau. Nayi tsu a hǝnggǝri yau ǝnga kalar sǝra tsǝtsǝfǝ wu dlaɗau ǝnga wu lǝkakaɗǝ nǝ nabiˈyar. 15Yu fǝrkǝr ǝnga Hyal, ǝnggǝra nji kǝ a vǝr mǝl, abǝr Hyal wu nda hyaˈana nji tǝtau sara vir tau, nji tsapǝu ǝnga nji shishi patǝu. 16Ca ngǝ ɗa cumu yu nǝrdzǝ wu ɗǝfuwa yau aga ya nggya ǝnga ɗahǝ ɗǝfu camǝu wu mwar Hyal ǝnga nji.
17“Ayukuɗa fa yiɗawu, kǝ yi sha shili wu Urshalima aga ya shili ǝnga dlǝwa dzǝ anǝ njir ˈya kǝra wu yiwu dlǝwa dzau ǝnga tsu ya lǝr sǝr lau. 18Ənggǝra ya vǝr mǝl abangau, nga ndǝ thlǝwa ɗa wu ki Hyal. A cinar nyi kǝrɗa camǝu, nayi aˈyi ǝkkǝˈyi nji tsu mai ǝnga nayi aˈyi hyaˈana hangǝkala nji mai.
19Ama alenyi njir Yahudiya aˈyi sara wu ˈyiˈyir Asǝya, nanda nga kyaga shili wu mwa ngau nda shili ǝnga wula ma vanyi ndǝr aˈyi ara nda ar kǝra yau. 20Ta nji ta aˈyi shili mai, bǝgǝ njira aˈyi ǝnggau nda nana bikǝ kǝra ndǝ thlǝwa ɗa ǝni wu pǝci kǝra yi taˈyi wu mwar njir pathla. 21Sǝ aˈyi yi na mai, kǝl ma ar kǝra ndǝr zǝmǝ kau, kǝra yi nana ar pǝci kǝra ˈyi taˈyi a ndu mwar nda yi hyaˈana ɗahǝ yi na, ‘Ar kǝra hyaˈari sara vir tau nga nja vǝr mǝl numa wu mwar hyi anǝ ɗa ǝshina.’ ”
22Felekǝsu ndǝ ngau kǝra wu sǝnibiya sau ar kǝra lagu Yesu, kǝ ji taˈyina ndǝra nyi, ji na, “Kǝl ma Lisiyasu soja kǝra a ndiya ǝnga dǝgalǝ shili kwatahǝu, ya dzǝgwa mǝlna hyi numa.” 23Felekǝsu nar nyi anǝ midala soja aga ja ɓǝla Bulusu, ama ja nǝ nyi lagur sa yambaɗǝu ǝnga ja piyari bazhi nyi ˈyar nda shili ǝgya ja aga nda sa nǝ nyi sǝra ju cimǝ.
24Ayukuɗa pida kushu, kǝ Felekǝsu ǝnga mala nyi Durusilasu, kwar njir Yahudiya shili. Kǝ ji sǝwa aga nja dla ǝnga Bulusu ǝnga ji sa sǝya nyi himi ar kǝra ndǝr nǝ mbǝrsa wu Kǝrsiti Yesu kǝra ji na. 25Ənggǝra Bulusu a vǝr ndǝr ar kǝra tsapǝkur ǝnga ɓǝlar dzau ǝnga tsu pǝcir pathla kǝra a vǝr shili, ta Felekǝsu nggari abangǝ, kǝ hivǝr mbari nyi. Kǝ ji na anǝ Bulusu, “Kabangǝkǝ gu sǝni maˈyi. Ma yi ɓǝra uya lagu vanyi pǝci, ba ya sǝwa nja nggar ngau.” 26Ar pǝci ta Felekǝsu wu fǝrkǝr abǝr Bulusu wu nda nǝ nyi gǝnna, ca ngǝ ɗa ju ngga nyi ar kǝr ar kǝr ju ndǝr ǝnga ja.
27Ənggǝra fa mǝthlǝ tǝrabiya kǝ Porciyasu Fesǝtusu ɗa aga gwamna ar viya Felekǝsu. Ama Felekǝsu a piyari ja Bulusu wu fursǝna ariya ju yiwu ja uya mayiwakur ara njir Yahudiya.
©2024 Initiative for the Translation and Development of African Languages and Margi Tiwi Nga Təm