Thlǝr 23
23
1Kǝ Bulusu pǝnggǝr nyi li anǝ njir pathla, ji na, “Zamǝ ɗa ˈyar, a nyabiyar yi thlǝr ɗa anǝ Hyal tsatsaˈa ǝnga huɗǝ zǝmǝu baˈanǝ shili ar ǝshina kau.” 2Ənggǝra Hananiya, pubu kǝra a ndiya ǝnga dǝgalǝ nggari abangau, kǝ ji nar nyi anǝ njira tataˈyi wu dzǝr Bulusu aga nda pǝthlǝwa nyi dǝgǝ wu miya ja. 3Kǝ Bulusu na anǝ nyi, “Hyal wu nda dǝgǝna ngǝ tsu, nagǝ mahwal kǝra nji ɓǝsǝya pǝrtǝ pwahǝu, ndǝ batal! Gǝ nggya a ndǝna aga numa anǝ ɗa lagu dlaɗau, ama kǝl ta gǝ sǝwa aga nja dǝgǝ ɗa, kǝra aˈyi kakalǝ ǝnga dlaɗǝr mǝn mai!”
4Njira tataˈyi lǝhǝ wu dzǝr Bulusu na anǝ nyi, “Pubu nǝ Hyal kǝra a ndiya ǝnga dǝgalǝ nga gu nggǝl ya?”
5Kǝ Bulusu shaɗǝwa, ji na, “Zamǝ ɗa ˈyar, nayi sǝnibiya abǝr naja ngǝ pubu kǝra a ndiya ǝnga dǝgalǝ mai, ara tsǝtsǝfǝ nga nyi, ‘Ga sara ndǝr ɗǝmwaˈyi ar kǝra ndǝr tǝɗǝmwa anǝ nji mai.’ ”
6Ta Bulusu sǝnibiya abǝr alenyi nji njir Sadusi ngau, ǝnga alenyi nji njir Farisi, kǝ ji ngga njir pathla ǝnga dǝnama, ji na, “Zamǝ ɗa ˈyar, nayi ndǝr Farisi ngau, zǝr ndǝr Farisi. Yi taˈyi wu mwar hyi, hyu numa anǝ ɗa ariya fǝrkǝr ɗa ǝnga hyaˈari sara vir tau.” 7Ənggǝra ji nana abangau, kǝ kǝpal hyaˈari wu pama njir Farisi ǝnga njir Sadusi, kǝl ta daɓǝ dzǝ tǝkǝbiya dzǝ bwata mǝthlǝu. 8(Alaga kǝ njir Sadusi na abǝr hyaˈari sara vir tǝ aˈyi mai, ǝnga waladi ba mambǝlˈyar aˈyi mai. Ama njir Farisi nǝr nda a hǝnggǝri nda patǝu.)
9Kǝ sǝ kǝ hyaˈana hangǝkala nji, kǝ alenyi malǝmǝ dlaɗǝ ˈyar kǝra njir Farisi hyaˈari ǝnga madiya kǝpal, ndu na, “Naˈyi thlǝwa ndǝ kǝ ǝnga vazǝ mai. Wa nga sǝni ɗǝma tara mambǝl ǝndǝga waladi ngǝ ndǝr anǝ nya?”
10Ta kǝpal ɗa kwakwaɗǝ gagaɗau, kǝ hivǝr mbari soja kǝra a ndiya ǝnga dǝgalǝ ara nda sara tsǝya Bulusu. Kǝ ji sǝwa bwata sojaˈyar aga nda gya mbǝliya Bulusu ara nda ǝnga dǝnama aga nda shili ǝnga ja wu barakǝu.
11Ta vuˈyi ɗa kǝ Thlagǝ sa taˈyi lǝhǝ wu dzǝr Bulusu, kǝ ji na anǝ nyi, “Mbiya ɗǝfu! Ənggǝra gǝ ɗa sakida ɗa wu Urshalima, abangǝ tsu nga gu nda ɗa sakida ɗa wu Roma.”
Nji Mba Miya Aga Tsa Bulusu
12Ənggǝra vi sa kuɗau, kǝ njir Yahudiya mbiya miya daɓǝ ǝnga sǝm fǝla abǝr nandu sǝm sǝr sǝm ǝnga sa ˈyimi mai, kǝl ndǝ tsǝya Bulusu. 13Njira mba naja ka sau, ndu a ndiya nji foɗǝ kumo nyi. 14Kǝ ndǝ maˈyi a ndǝgya pubu dǝdǝgalˈyar ǝnga njira nggurǝm, ndǝ nda na, “A sǝmkur ˈya fǝla abǝr naˈyu sǝm sǝr sǝm mai, kǝl ma ˈyi tsǝya Bulusu. 15Kabangǝkau, nahyi ǝnga njir pathla hya nar nyi anǝ soja kǝra a ndiya ǝnga dǝgalǝ ja hǝr nyi a shili wu mwar hyi, aga ja ɗa ǝnggǝr hyu yiwu hya ɓǝra yiwabiya ar kǝra ndǝr nyi mǝnahǝu. Naˈya tsu a pabǝr ˈya kǝrˈya aga ˈya tsǝya nyi kadivira ja shili ǝnggau.”
16Ama ǝnggǝra sǝgǝya Bulusu nggari sǝra ndu mba kau, ba ji maˈyi a vwu barakǝu, kǝ ji vwa nar nyi anǝ Bulusu.
17Kǝ Bulusu nggari vanyi midala soja, ji nar nyi, “Hǝri zǝr baduwari kau, a ndǝgya soja kǝra a ndiya ǝnga dǝgalǝu, sǝr na anǝ nyi aˈyi ara ja.” 18Kǝ ji hǝr nyi a ndǝgya soja kǝra a ndiya ǝnga dǝgalǝu.
Kǝ soja kǝra a ndiya ǝnga dǝgalǝ kǝ na, “Bulusu, ndǝr fursǝna, ngǝ sǝwa ɗa aga ya shili ǝnga zǝr baduwari kau, a shili ara gau, ara sǝr na anǝ ngǝ aˈyi ara ja.”
19Kǝ soja kǝra a ndiya ǝnga dǝgalǝ kǝ mbari zǝra nyi ar tsa ja, kǝ ji tǝɗǝr nyi a ndar batiti, kǝ ji yiwa, “Kariya, mi nga gu yiwu ga na anǝ ɗa ka?”
20Kǝ ji na, “Njir Yahudiya ngǝ mbiya miya aga nda yiwa ga shili ǝnga Bulusu wu mwar pathla ǝzǝgǝu, abǝr ǝnggǝr aga nda ɓǝra yiwabiya nyi mǝnahǝ gagaɗau, ar kǝra ndǝr nyi. 21Ama ga sara hǝnggǝri ǝnga nda mai, ara nji kǝra a ndiya foɗǝ kumo nyi ngǝ mbuya lagu aga ja. Ndǝ sǝmku fǝla abǝr nandu sǝm sǝr sǝm mai ǝnga nandu sa ˈyimi mai, kǝl ndǝ tsǝya nyi. Kabangǝkau, a pabǝr nda dzǝ ndu sǝkǝ ga hǝnggǝri ǝnga sǝra ndu kǝdiyau.”
22Kǝ soja kǝra a ndiya ǝnga dǝgalǝ kǝ kughiya zǝr kau, ji na, “Ga sara na anǝ kalar ndǝ abǝr gǝ nar ɗa ndǝr kǝ mai.” Maˈyi sǝ ngau.
Nji Sǝwa Bulusu A Ndǝgya Gwamna Felekǝsu Wu Kayisariya
23Kǝ soja kǝra a ndiya ǝnga dǝgalǝ nggar midala soja mǝthlǝu, kǝ ji nar nda, “Hya pabǝr dzau, hyu sa maˈyi a vwu Kayisariya. Hyu sa hyaˈari saka ǝdlau nǝ vuˈyi, nahyi ǝnga sojaˈyar gharu mǝthlǝu, ǝnga sojaˈyar nǝ ɓar tagu mǝɗǝfǝkumunyi, ba ǝnga sojaˈyar nǝ pa ǝnga katsakǝr gharu mǝthlǝu. 24Nahyi tsu hya uya nyi tagu anǝ Bulusu kǝra ju nda dari. Hya hǝr nyi jamǝ a vwu gya gwamna Felekǝsu.”
25Soja kǝra a ndiya ǝnga dǝgalǝ kǝ tsǝfǝr cama tsǝtsǝfǝ abangau,
26Usa dzǝ anǝ ngau, sara ara Kǝladiyasu Lisiyasu,
Anǝ ndǝra dǝgalǝu, gwamna Felekǝsu.
27Ndǝ kau, njir Yahudiya mbar nyi ndu yiwu nda tsǝya nyi. Ama kǝ yi shili ǝnga soja ɗa ˈyar kǝ ˈyi sa kǝtiya nyi, ara yi nggari abǝr naja ndǝr Roma ngau. 28Yu yiwu ya sǝnibiya sǝra ɗa ndu vazǝ nyi, ca nga yi hǝr nyi a ndǝgya njir pathlar nda. 29Yi nggabiya abǝr sǝra ndu vazǝ nyi ar kǝri kǝ lagur dlaɗǝr nda ngau. Ama sǝ kǝ ndu vazǝ nyi ǝni kǝ aˈyi tǝkǝri nja tsǝya nyi ǝndǝga nja mbiya nyi wu fursǝna mai. 30Ənggǝra yi nggari abǝr ndǝ ɓǝra mbiya miya ar kǝra ja, ca ngǝ mǝliya yi sǝwa nyi a ndǝgya gǝ ǝnga kusa. Nayi tsu a nar nyir yi anǝ njir vazǝ nyi aga nda sa cabiya ngǝ bikǝ nyi.
31Agabangau, sojaˈyar kǝ mǝl thlǝrǝr nda ǝnggǝr kǝra nji nar nda, ndǝ hǝri Bulusu ǝnga nda ǝvuˈyi kǝ ndǝ shili ǝnga ja a shili wu mǝlmǝ Antipatǝrisu. 32Əzǝgǝkura nyi kǝ ndǝ piyari sojaˈyar nǝ ɓar tagu ndǝ maˈyi ǝnga ja, ama nanda nǝr nda ba ndǝ sha a vwu barakǝu.
33Ənggǝra sojaˈyar nǝ ɓar tagu thlǝwa Kayisariya, kǝ ndǝ nǝ nyi cama tsǝtsǝfa nyi anǝ gwamna, ba ndǝ piyari Bulusu wu tsa ja.
34Ənggǝra gwamna jigana cama tsǝtsǝfa nyi, kǝ ji yiwa Bulusu tara sara wu ˈyiˈyi mani nga ja. Ta ji nggari abǝr sara wu ˈyiˈyir Silisiya nga ja, 35kǝ gwamna na, “Yu nda nggar sǝra gu na, ma njir vazǝ ngǝ a shiliri ǝnggau.” Kǝ ji sǝwa njir ɓǝla aga nda sǝɓǝya nyi ar pathla tǝl Hirudusu.
©2024 Initiative for the Translation and Development of African Languages and Margi Tiwi Nga Təm