Thlǝr 22
22
1“Nahyi zamǝˈyar ǝkkǝˈyi tadaˈyar, sǝya ɗa mǝ himi aga ya nar hyi sǝra ɗa, aga ya cabiya hyi abǝr vazǝ aˈyi ara yi mai.”
2Ta ndǝ nggari ji ndǝr anǝ nda ǝnga miya njir Aramikǝu, kǝ ndǝ ɓǝra bǝgǝ zǝmǝu. Kǝ Bulusu na, 3“Nayi ndǝr Yahudiya ngau, nji yabiya ɗa wu Tarsusu nǝ ˈyiˈyir Silisiya, ama wu Urshalima kǝ nga yi hau. Yi uya hwathlǝ wu tsa Gamaliyalu ar kǝra dlaɗǝ nǝ dǝrmǝn ˈyar. Ənga huɗǝ hamǝ nga yi mǝl thlǝr Hyal ǝnggǝr kǝra hya vǝr mǝl ǝshina kau. 4Nayi ma a lǝr yi ɓwaɓwatǝ anǝ njir nu Lagu Kǝrsiti kau, kǝl ta ji tǝkǝri yi tsǝya alenyi nji wu nda. Yi mbar nda, shili ǝkkǝˈyi mathlǝkǝˈyi ba yi fuwa nda wu fursǝna.
5Pubu kǝra a ndiya ǝnga dǝgalǝ ǝnga njir pathla patǝ ndu sǝni lǝr sakida ar kǝra yau. Nanda ma, ngǝ nǝ ɗa cama tsǝtsǝfǝ a nda nǝ zamǝr ndaˈyar kǝra a vwu Damasǝkasu. Kǝ yi maˈyi a vwuna, yi vwa mbari njir Yahudiya njir nu Lagu Kǝrsiti kǝ a shili wu fursǝna wu Urshalima aga nja sa nǝ nda ɓwaɓwatǝu. 6“Tsu ˈya ar lagu, lǝhǝ yu vwu Damasǝkasu, pǝci taˈyi kǝr, kukuthlǝ kǝ mbǝmbǝl sara dǝmǝlmǝ mbǝl a gyar kǝra yau ba zǝwar ɗa. 7Kǝ yi dla a gyi wu ˈyi ba yi nggari ɗahǝ a vǝr na anǝ ɗa, ‘Suwalu! Suwalu! Mi ngǝ ɗa gu ɗa ɗa abanga?’
8“Kǝ yi yiwa nyi, ‘Wa nga ga, Thlagǝu?’ “Kǝ ɗahǝ shaɗǝwa, ‘Nayi ngǝ Yesu ndǝr Nazǝratu, ndǝra ga vǝr ɗa nyi kau.’ 9Bazhi ɓǝ ɗa ˈyar lari mbǝmbǝl kau, ama nandǝ nggabiya sǝra ɗahǝ kǝ wu na anǝ ɗa mai.
10“Kǝ yi yiwa, yi na, ‘Ya, mi nga ya mǝla, Thlagǝu?’
“Əngwar Thlagǝu, ‘Hyaˈari ga maˈyi a vwu Damasǝkasu. A vwuna nju vwa nar ngǝ sǝra yi fuwa wu lagu aga ga nda mǝl.’ 11Ənggǝra mbǝmbǝl ta lǝfǝna liya yau, kǝ bazhi ɓǝ ɗa ˈyar mbar tsa yi ndǝ lǝbiya ɗa a vwu Damasǝkasu, ara tsu yu lar sǝ mai.
12“Vanyi ndǝ thlǝmǝ nyi Hananiya shili aga sa tula ɗa. Naja ndǝr nu Hyal ǝnggǝra dlaɗǝr mǝn na, ndǝra patǝr njir Yahudiya kǝra a vǝr nggya a vwuna ndu gǝnggǝr nyi sǝli gagaɗau. 13Ji shili ji sa na anǝ ɗa, ‘Zamǝ ɗa Suwalu, ga ɓǝra lar sau!’ Ənggǝrna ba liya yi pahǝnakǝr, ba yi lar nyi.
14“Kǝ ji na, ‘Hyal nǝ dǝrmǝn ngǝ caɗǝbiya ngau aga ga sǝni sǝr yiwu huɗa ja. Ji caɗǝbiya ngǝ tsu aga ga lari ndǝ tsapǝ kau ǝnga ga nggar ndǝr sara wu miya ja. 15Ariya gu nda ɗa ndǝr lǝ sakida ar kǝra ja anǝ nji patǝ sǝra gǝ lari ǝnga gǝ nggari. 16Kabangǝkau, mi nga gu sǝka? Hyaˈari, nja mǝliya ngǝ baɓǝtizǝma ǝnga taˈyi Hyal a cina ngǝ bikǝ ngǝ patǝ lagur ngga thlǝmǝr Thlagǝu.’
17“Ayukuɗa yi sha shili wu Urshalima ǝnga ya vǝr kǝdi Hyal wu ki Hyal, kǝ yi gwu mǝtakǝr. 18Wu mǝtakǝr kau, kǝ yi lari Thlagǝ a vǝr ndǝr anǝ ɗa, ji na, ‘Ənga kusa ga kwaya wu Urshalima kabangǝkau, ara nandu nda hǝnggǝri ǝnga sakida kǝra gu nda na ar kǝra yi mai.’
19“ ‘Thlagǝu,’ yi shaɗǝwa, ‘nji kǝ patǝ ndu sǝni abǝr a ɓǝɓǝr yau, a ndu umbwa daɓǝ dzǝ nǝ njir Yahudiya pampamǝ aga ya nda dǝgǝ njira ǝnga mbǝrsa ǝnga gau ǝnga ya fuwa nda wu fursǝna. 20Ar pǝci kǝra nji pǝna mashi Sitivinu ndǝr lǝ sakida ar kǝra gau, aˈyi yi taˈyi a ndǝna, ya vǝr ca hǝnggǝr ɗa ǝnga sǝra nja vǝr mǝl, nayi ngǝ ɓǝla kari nǝ njira a vǝr tsa nyi.’
21“Kǝ Thlagǝ na anǝ ɗa, ‘Maˈyi, yu sǝwa ngǝ a ndar vi naɗǝu, a nda nǝ njira aˈyi njir Yahudiya mai.’ ”
Bulusu Ndǝr ˈYiˈyir Roma
22Dlamir nji sǝya nyi himi anǝ Bulusu, kǝl ta ji nda shili ar ndǝr kau. Kǝ ndǝ hyaˈana ɗahǝu, ndǝ na, “Tsǝya mǝ ndǝ kau! Aˈyi ɗa tsaˈa nja piyari nyi ǝnga pi mai!”
23Ənggǝra ndǝ dumwa ǝnga wau, ndu vavaka lǝgutǝr nda ǝnga ndu ɗǝzǝ bǝbǝr a dǝmǝlmau. 24Kǝ dǝgalǝr soja sǝwa nja hǝna Bulusu a vwu barakǝu. Ji sǝwa aga nja dǝgǝ nyi ǝnga wuɗa, ba nja yiwabiya nyi tara mi ngǝ ɗa nji kǝ wu wau ar kǝra ja abangau. 25Ta ndǝ pina nyi aga nda dǝgǝ nyi, kǝ Bulusu nar nyi anǝ midala soja kǝra taˈyi a ndǝna, “Kariya, tsaˈa nga nyi wu dlaɗau nja dǝgǝna ndǝr Roma gǝra nja thlǝwa nyi ǝnga vazǝ ya?”
26Ta midala soja ta nggari abangau, kǝ ji maˈyi ka nda nar nyi anǝ soja kǝra a ndiya nyi ǝnga dǝgalǝu. “Mi nga gu mǝla?” Ji yiwa nyi. “Kǝja ndǝ kǝ ndǝr Roma ngau.”
27Kǝ soja kǝra a ndiya ǝnga dǝgalǝ kǝ shili ji sa yiwa Bulusu, “Nar ɗa jirkura nyi, ndǝr Roma nga gǝ ya?”
“Angǝ, abangǝ nga nyi,” ji shaɗǝwa.
28Kǝ soja kǝra a ndiya ǝnga dǝgalǝ kǝ na, “Nayi nǝɗa ǝnga gǝnna gangǝ nga yi ɗǝlbiya yi ɗa ndǝr Roma.”
Ama kǝ Bulusu na, “Nayi nǝɗa, abangǝ nga nji yabiya ɗa ndǝr Roma.”
29Agabangau, njira wu yiwu nda yiwa nyi sau ba ndǝ faˈabiya dzǝ ǝnga kusa. Soja kǝra a ndiya ǝnga dǝgalǝ ǝnga kǝrnyi gǝrahǝ ta ji nggabiya abǝr Bulusu, ndǝr Roma ngau, ya kǝja a mbiya nyir ja ar calalau.
Bulusu Wu Mwar Njir Pathla
30Əzǝgǝkura nyi, soja kǝra a ndiya ǝnga dǝgalǝ wu yiwu ja sǝnibiya mi ngǝ ɗa njir Yahudiya wu vazǝ Bulusu. Kǝ ji pǝlna nyi, kǝ ji sǝwa pubu dǝdǝgalˈyar ǝnga njir pathla aga nda kaɓau. Kǝ ji shili ǝnga Bulusu ji sa taˈyina nyi wu mwar nda patǝu.
©2024 Initiative for the Translation and Development of African Languages and Margi Tiwi Nga Təm