Thlǝr 19
19
Bulusu Wu Afisa
1Ar pǝci kǝra Apolusu wu Kwaranthli, Bulusu ɓǝbiya ɓǝ wu ˈyiˈya nyi, kǝl ta ji shili wu Afisa. A ndǝna kǝ ji thlǝwa alenyi njir nu. 2Kǝ ji na anǝ nda, “Kariya, ar pǝci kǝra hyi hǝnggǝri ari, a dlǝwuri hyi Mambǝl Cici ya?”
Kǝ ndǝ na anǝ nyi, “Awau, naˈya ma saya nggari abǝr Mambǝl Cici aˈyi mai.”
3Kǝ ji yiwa, “Wa thlǝmǝ culi baɓǝtizǝma kǝra hyi dlǝwura?” Kǝ ndǝ shaɗǝwa, “Culi nǝ gǝ Yahwana.”
4Bulusu na, “Baɓǝtizǝma nǝ Yahwana baɓǝtizǝma nǝ tubi ngau. Ji nar nyi anǝ nji, aga nda hǝnggǝri ǝnga ndǝra wu nda shili wu yukuɗǝ nyi, naja ngǝ Yesu.” 5Ənggǝra ndǝ nggari abangǝ, kǝ nji mǝliya nda baɓǝtizǝma wu thlǝmǝr Thlagǝ Yesu. 6Ta Bulusu fǝr tsa ja ar nda, kǝ Mambǝl Cici shida ar kǝra nda, kǝ ndǝ gwu ndǝr ǝnga miya ɗahǝ pampamǝu, ndu na ndǝrhaha. 7Patǝkura nda a kari nda nji kumo apǝ mǝthlǝu.
8Kǝ Bulusu gwu umbwa daɓǝ dzǝ nǝ njir Yahudiya. Ji tǝtǝlna ndǝr Hyal anǝ nda gǝra ǝnga hivǝr nǝ hya makǝru. Ndu shasha ndǝr wu pamǝ nǝ sha kǝra nda ar kǝra tǝlkur Hyal. 9Ama kǝ alenyi nji ɓaɓal kǝr wu pama nda nggǝl ara hǝnggǝri, ndu ndǝr ar babal nǝ diɗa lagu kǝ anǝ nji. Kǝ Bulusu piyari nda umbwa daɓǝ dzǝr nda, ba ji maˈyi ǝnga njir nu. Wu umbwa highiɓǝ nǝ Tiranusu nga ndǝ dumwa ǝnga ndǝr wu pamǝ wu kalar pǝci. 10Ji dumwa ǝnga mǝl abangǝ nǝ fa mǝthlǝu, kǝl ta patǝr njir Yahudiya ǝnga njira aˈyi njir Yahudiya mai kǝra wu ˈyiˈyir Asǝya nggari ndǝr Thlagǝu.
11Hyal mǝliya sǝ dǝdǝgur sǝra nji gǝra tsǝliya lari lagu Bulusu. 12Ka ɗa ma sǝ ǝnggǝr sǝr ɗa vitǝku ǝnga alaga kukuzhal kǝra tsǝkwari dza ja, ma nji hǝr nyi a nda nǝ njira gǝra ngga, ba nda uya jamǝkur. Njira ǝnga mambǝl ɗǝmwaˈyi ˈyar wu dza nda, mambǝla nyi wu biya sara wu dza nda.
13Alenyi njir Yahudiya kǝra thlǝr nda ngǝ ɓǝ a ndu mǝlmǝ pampamǝ ndu kǝdlǝ mambǝl ɗǝmwaˈyi ˈyar a biya sara wu dza nji. Ndǝ nǝrdzǝ aga mǝl thlǝr ǝnga thlǝmǝr Thlagǝ Yesu aga nda kǝdlǝbiya mambǝl ɗǝmwaˈyi ˈyar sara wu dza nji, ndu na, “Yu na anǝ ngǝ wu thlǝmǝr Yesu kǝra Bulusu a vǝr tǝtǝlna ndǝr Hyal ǝni, ga biya sara wu dza ndǝ kau!” 14Wazha Sǝkiva mǝɗǝfau, ndǝra pubu kǝra a ndiya ǝnga dǝgalǝ nǝ njir Yahudiya ngǝ a vǝr mǝl sǝ kau.
15Ta ndǝ na abangau, kǝ mambǝl ɗǝmwaˈya nyi shaɗǝwa nda, “Yu sǝni Yesu ǝnga tsu yu sǝni wa ngǝ Bulusu, ama nahyi, wa nga hya?”
16Kǝ ndǝ kǝ ǝnga mambǝl ɗǝmwaˈyi kǝ vǝl ji ndzim a dar kǝra nda, ji kukurɓiya nda patǝu. Ji takasǝya nda ǝnga dǝgau gagaɗǝ kǝl ta ndǝ biya ǝnga hwi a vwu kir nda turusu ǝnga dza nda patǝ ǝnga mbǝlgǝu.
17Ənggǝra njir Yahudiya ǝnga njira aˈyi njir Yahudiya mai wu Afisa nggari ar kǝra sǝ kǝ ɗa kau, kǝ hivǝr mbar njir mǝlma nyi ˈyar patǝu, kǝ ndǝ dzǝgwa gǝnggǝr sǝli anǝ thlǝmǝr Thlagǝ Yesu gagaɗau. 18Gangǝ wu pama nda tsu wu njira hǝnggǝri tǝwa ˈyiˈyi wu kǝra nda ar babal ariya sǝ ɗǝmwaˈyi ˈyar kǝra ndǝ mǝlna. 19Njir mǝl thlǝr pipitǝma gangǝu, kwafǝri lǝkakaɗǝˈyar nǝ mǝl thlǝr nda patǝ ndǝ sa nggyina ar babal. Ma nji jigabiya gǝnna nǝ lǝkakaɗa kǝra nji nggyina kau, a kari ja gǝnna pǝkǝ nǝ ndǝr mǝl thlǝr nǝ pǝci dubu tǝfǝkumunyi. 20Wu lagu kǝ ngǝ ndǝr Thlagǝ tǝtǝlnakǝr baˈamani, ba ji mǝliya nji gangǝ gagaɗǝ hǝ wu mbǝrsa.
21Ayukuɗa sǝˈyar kǝ patǝu, kǝ Bulusu mbiya wu ɗǝfuwa ja, abǝr, “Ayukuɗa yi ɓǝbiya ɓǝ wu ˈyiˈyir Masidoniya ba Akaya, ba ya dzǝgwa maˈyi a vwu Urshalima.” Kǝ ji ɓǝra na, “Ayukuɗa yi vwu na, ba ya dzǝgwa maˈyi a vwu Roma tsu.” 22Kǝ ji sǝwa njir dlǝwa nyi mǝthlǝu, nanda ngǝ Timathlawusu ǝnga Irastusu, a vwu Masidoniya. Ama kǝ ji sǝkari nǝnyi kushu wu ˈyiˈyir Asǝya.
Hyaˈa Hangǝkal Nji Wu Afisa
23Ar pǝci ta ngǝ hyaˈa hangǝkal tǝdǝɓǝ hyaˈari wu Afisa ariya lagu Kǝrsiti kau. 24Naja ka hyaˈa hangǝkal dzǝguya dzǝ ǝnga vanyi ndǝr dlau, kǝra nja ngga ǝnga Dimetirusu. Naja ndǝr dlǝ sǝr pa ki hyal nǝ Aritimisu ǝnga thladla. Naja ǝnga njir mǝl thlǝr nyi ndu uya gǝnna gangǝ gagaɗǝ lagu thlǝr kau.
25Kǝ ji kaɓiya nda patǝu, ǝkkǝˈyi njir mǝl culi thlǝr nyi kau, kǝ ji na anǝ nda, “Shili, hyu sǝni abǝr lagu thlǝr kau, nga mǝn uya gǝnnar mǝn. 26Ya kǝja hyu nggari ǝnga hyu lari ǝnggǝra ndǝ kau, Bulusu a tsǝtsǝkuri ǝnga ji shabiya nji gangǝ ara nu hyal wu Afisa ǝnga patǝr ˈyiˈyir Asǝya. Ji na, abǝr hyalˈyar kǝra nji hǝriya ǝnga tsi aˈyi hyalˈyar nǝ jiri ngǝ mai. 27Ənga jiri, ɓwaɓwatǝ aˈyi. Aˈyi kǝ waci mai, thlǝr mǝn wu nda tini thlǝmǝ mǝnahǝu. Ki hyal mala dǝgalǝ Aritimisu wu nda ɗa didiɗa, hyal Aritimisu ǝnga kǝrnyi tsu, kǝra nji patǝ wu dlǝvau wu patǝr ˈyiˈyir Asǝya ǝnga duniya patǝu, nju nda shini nyi yi anǝ hyalkur nyi tsu.”
28Ənggǝra ndǝ nggari sǝ kau, kǝ ɗǝfuwa nda hwa, kǝ ndǝ dzǝguya wau, ndu fal, “Dǝgalkur nǝ ngǝ ngau, Aritimisu nǝ njir Afisa!” 29Ənggǝrna ngǝ mǝlmǝ patǝ gwaɗǝr dzau. Njir mǝlmǝ patǝ ndǝ mbari Gayisu ǝnga Aristakusu, njir ɓǝ Bulusu sara wu ˈyiˈyir Masidoniya. Ndu tǝɗǝ nda a ndar vir kaɓau ǝnga hwi. 30Bulusu wu yiwu ja vwu pama dlami, ama kǝ njir nu kar nyi. 31Alenyi njir tǝɗǝmwa nǝ ˈyiˈyir Asǝya, njira bazhiya Bulusu ngǝ ˈyar, nanda ma ndǝ sǝwa nyi cama anǝ Bulusu, nda vǝr kǝdi nyi, abǝr ja sara shili ar vir kaɓǝ kǝ mai.
32Patǝkura njira daɓǝ kǝ hangǝkalǝr nda hyaˈari. Alenyi nju wau ndu na vanyi sau. Alenyi nji tsu ndu na sǝ pamǝu. Badǝgala nda, nandǝ sǝni sǝra ndǝ kaɓǝ aga nyi mai. 33Alenyi njir Yahudiya jahǝri vanyi ndǝ nja ngga ǝnga Alegǝzanda a dumwa. Naja tsu ji hyaˈana tsi aga nda bǝgǝ zǝmǝ aga ja dǝgabiya nda ar kǝra sǝra aˈyi. 34Ama ta ndǝ nggabiya abǝr naja ndǝr Yahudiya ngau, kǝ ndǝ hyaˈana ɗahǝ aga zǝmǝ ndu na, “Dǝgalkur nǝ ngǝ ngau, Aritimisu nǝ njir Afisa!” Ndǝ dumwa ǝnga mǝl abangau nǝ saka mǝthlǝu.
35Ayukuɗa nyi patǝu, kǝ ndǝr tsǝfǝ nǝ mǝlmǝ bǝgǝya dlami, ji na, “Njir Afisa, kalar ndǝ wu sǝni abǝr Afisa ngǝ njir ɓǝla ki hyal nǝ Aritimisu, ǝnga tsǝka cici kau, kǝra tǝɗǝ sara dǝmǝlmau. 36Agabangau, jirkura sǝˈyar kǝ ar babal nga nyi, hya kyaga nggya zǝmǝ ǝnga hangǝkal, hya sara mǝl sǝ ǝnga kusa mai. 37Kǝja a shilǝr hyi ǝnga nji kǝ ǝnggau, nandǝ hǝlǝri sǝra a gwu vi katǝ mai, ǝnga nanda aˈyi diɗana hyalǝr mǝn ǝtsu mai.
38“Ma Dimetirusu ǝnga bazhi mǝl thlǝr tsi nyi ˈyar aˈyi ǝnga sǝr na a miya ndǝla nda, kǝja umbwa pathlaˈyar bangǝu ǝnga njir pathla aˈyi a miya thlǝr, bǝgǝ nda wulana nda. 39Ama ma vanyi sǝ pamǝ aˈyi kǝra hyu yiwu hya shili ǝni, ba nja nǝ hyi lagu wu daɓǝ dzǝ nǝ njir huɗa mǝlmau. 40Ənga jiri, hivǝr wu tǝ ɗa ara hyaˈa hangǝkal kǝ ɗa ǝshina kau, ara nja sara nǝ mǝn vazau, ariya sǝra wu daɓaga dla ǝnga hyaˈa hangǝkal kǝ aˈyi mai.” 41Ayukuɗa ji nana abangǝ, ba ji tǝtǝlna daɓa nyi.
©2024 Initiative for the Translation and Development of African Languages and Margi Tiwi Nga Təm