Thlǝr 18
18
Bulusu Wu Kwaranthli
1Ayukuɗa kau, kǝ Bulusu piyari Athlinu, ji maˈyi a vwu mǝlmǝ Kwaranthli. 2A ndǝna kǝ ji thlǝwa vanyi ndǝr Yahudiya thlǝmǝ nyi Akwila, ndǝr ˈyiˈyir Pontusu. Naja ǝnga mala nyi Pǝrsila nandǝ sǝkari ǝnga shili sara wu ˈyiˈyir Italiya mai, ara Kǝladiyasu tǝl dǝgalǝ nǝ Roma mǝliya dlaɗau abǝr patǝr njir Yahudiya nda piyari mǝlmǝ nyi. Kǝ Bulusu maˈyi a ndǝgya nda.
3Ta ɗa sǝr mǝla nda lagu zǝmǝ nga nyi, mǝl thlǝr nǝ kwapatǝu, kǝ ji nggya ǝnga nda, ndǝ mǝl thlǝr daɓǝu. 4Kalar Pǝcir Ɓǝlsar tsu, Bulusu wu dumwa ǝnga shasha ndǝr wu pamǝ wu umbwa daɓǝ dzǝ nǝ njir Yahudiya, ju nǝrdzǝ nǝ sha kǝra njir Yahudiya ǝnga njira aˈyi njir Yahudiya mai, nda hǝnggǝri ǝnga Yesu.
5Ar pǝci kǝra Silasu ǝnga Timathlawusu shili sara wu ˈyiˈyir Masidoniya, Bulusu hǝri pǝci nyi patǝ aga tǝtǝlna ndǝr Hyal tsǝtsǝfǝ ju na ǝnga huɗǝ hamǝ anǝ njir Yahudiya abǝr Yesu ngǝ Kǝrsiti. 6Ama ba ndǝ kǝpalna Bulusu, ndu nggǝl nǝ diɗa nyi. Agabangau, kǝ ji dlǝdlǝɗǝna lǝgutǝ nyi ba ji na anǝ nda, “Bikǝr hyi ǝgya gyiwuliya hyi! Nayi nǝɗa, bikǝ ɗa aˈyi mai. Mbari ǝshina maˈyi nga yi a ndǝgya njira aˈyi njir Yahudiya mai.”
7Kǝ ji hyaˈari ǝna ji maˈyi a ndu ki vanyi ndǝ kǝra nju ngga ǝnga Tayitusu Jastusu, ndǝr dlǝvǝ Hyal. Ki nyi tsu dlǝdlǝɓǝ ǝnga umbwa daɓǝ dzǝ nǝ njir Yahudiya. 8Vanyi ndǝr tǝɗǝmwa aˈyi thlǝmǝ nyi Kǝrispusu ndǝr tǝɗǝmwa nǝ umbwa daɓǝ dzǝ nǝ njir Yahudiya kǝra hǝnggǝri ǝnga Thlagǝu, naja ǝnga njir ki nyi papatǝu. Alenyi njir Kwaranthli gangǝ tsu nggari sǝra Bulusu wu na ba ndǝ hǝnggǝri, ba nji hǝri nda baɓǝtizǝma.
9Vanyi vuˈyi, kǝ Thlagǝ canǝ nyi kǝr anǝ Bulusu lagu mǝtakǝr ji na, “A sara ga hivǝr mai. Ga dumwa ǝnga tǝtǝlna ndǝr Hyal tsǝtsǝfau, a sara ga bǝgǝ zǝmǝ mai, 10ara aˈyi yi ǝnga ngau. Ndǝr sǝni fǝr tsi ar dza gǝ aˈyi mai, ara nji gangǝ aˈyi ara yi wu mǝlmǝ kau.” 11Kǝ Bulusu nggya wu mǝlmǝ kǝ nǝ fa ǝnga hya kwa, ja vǝr highiɓǝ ndǝr Hyal anǝ nji.
12Ama wu pǝci kau, vanyi tǝl aˈyi nja ngga ǝnga Galiyo. Ənggǝra ja vǝr sǝm tǝlkur wu ˈyiˈyir Akaya, njir Yahudiya daɓǝr kǝr aga par Bulusu, ndǝ hǝri nyi a dumwar njir pathla. 13Kǝ ndǝ na, “Ndǝ kau, ju yiwu ja shabiya kǝra nji nja dlǝvǝ Hyal lagu kǝra dlaɗǝ kar nji.” 14Ənggǝra Bulusu a vǝr yiwu ja ndǝr, kǝ Galiyo na anǝ njir Yahudiya, “Maja bǝr ji ɓǝlna sǝr ɓǝla, alaga sǝr ɓǝla kǝra tǝdǝɓǝu, ba ja ɗa tsaˈa ya sǝ himi hyi ɗǝm njir Yahudiya. 15Ama ta tsǝkwari shasha ndǝr wu pama hyi ar kǝra ɗahǝu ǝnga thlǝmˈyar ba nga tsu dlaɗǝr hyi, kǝja kǝ hya ɓasǝwa sǝr hyi wu pama hyi, ara nayu mǝl pathla anǝ culi sǝˈyar kǝ mai.”
16Kǝ ji kǝdlǝna nda sara wu umbwa pathla. 17Kǝ patǝkura nda mbari vanyi ndǝra nju ngga ǝnga Sostenusu ndǝr tǝɗǝmwa nǝ umbwa daɓǝ dzǝ nǝ njir Yahudiya, ndǝ dǝgǝ nyi mwar umbwar pathla. Ama tǝl Galiyo naji tal mai.
Bulusu Sha A Vwu Antakiya
18Ayukuɗa kau, kǝ Bulusu sǝkari pǝci wu Kwaranthli. Ənggau kǝ ji piyari zamǝˈyar, kǝ ji gwu kwambwal ǝnga Pǝrsila ba Akwila, ba ndǝ maˈyi a vwu ˈyiˈyir Sǝriya. Ama kadivira ndǝ hyaˈari a vwuna, kǝ nji sǝna kǝra Bulusu a vwu Kankǝriya ariya sǝm fǝla kǝra ji hǝri tsu kaɗǝu. 19Ndǝ shili wu mǝlmǝ Afisa, ǝnggǝ ngǝ Bulusu piyari Pǝrsila ǝnga Akwila, naja ǝnga kǝrnyi tsu gwu umbwa daɓǝ dzǝ nǝ njir Yahudiya ji shasha ndǝr ǝnga nda. 20Kǝ ndǝ kǝdi nyi aga ja ɓǝra ɓǝliya sar kushu ǝnga nda, ama ba ji nggǝl. 21Ama ǝnggǝra ju piyari nda, ji na, “Yu ɓǝra shili ǝgya hyi ma Hyal hǝnggǝri.” Ənggau kǝ ji hyaˈari sara wu Afisa wu kwambwal.
22Ta ji shili wu mǝlmǝ Kayisariya, kǝ ji maˈyi a dǝ wu Urshalima, ji nda usar daɓǝ dzǝ njir nu, ba ji maˈyi a gyi wu Antakiya. 23Ayukuɗa ji sǝkari pǝci a ndǝna, kǝ ji hyaˈari ji ɓǝbiya ɓau, wu ˈyiˈyir Galatiya ǝnga ˈyiˈyir Fǝrjiya, ju nu mǝlmǝ a ndu mǝlmau, ju tsǝtsǝku ɗǝfuwa njir nu patǝ aga nda uya dǝnama.
24Ɓǝliya sar kushu, vanyi ndǝr Yahudiya thlǝmǝ nyi Apolusu shili wu Afisa. Naja tsu ndǝr mǝlmǝ Alegǝzandǝriya ngau, ndǝra wu sǝn ndǝr gagaɗau, a sǝni ja sǝ ar kǝra tsǝfǝ nǝ ndǝr Hyal tsǝtsǝfǝ gagaɗau. 25A highiɓǝr nyir nji wu lagur Thlagǝu. Ju ca tsatsapǝkur wu ndǝr nyi, ja vǝr highiɓǝ patǝkura jirkur ar kǝra Yesu. Ama tsu kǝl baɓǝtizǝma nǝ Yahwana nga ju sǝni wacu. 26Kǝ ji dzǝguya tǝtǝlna ndǝr Hyal gǝra ǝnga hivǝr wu umbwa daɓǝ dzǝ nǝ njir Yahudiya. Ənggǝra Pǝrsila ǝnga Akwila nggar ndǝr nyi, kǝ ndǝ nggar nyi a ndu kir nda, aga nda ɓǝra cakǝri nyi sǝni lagu Hyal gagaɗau.
27Ənggǝra Apolusu wu yiwu ja tǝrabiya a ndu ˈyiˈyir Akaya, njir nu tsǝtsǝkuri ɗǝfuwa ja ǝnga ndǝ tsǝfǝri nyi cama tsǝtsǝfǝ anǝ njir nu kǝra wu Akaya aga nda dlǝwuri nyi ǝnga huɗǝ zǝmǝu. Ta ji thlǝwa vi ta ba shili nyi ɗa ǝnga dlǝwa dzǝ gagaɗǝ anǝ njira hǝnggǝri lagur mayiwakur Hyal. 28Ariya ji kar nyi kǝr anǝ njir Yahudiya gagaɗǝ wu mwar nji, ja vǝr cabiya nda sara wu ndǝr Hyal tsǝtsǝfǝ abǝr Yesu naja ngǝ Kǝrsiti.
©2024 Initiative for the Translation and Development of African Languages and Margi Tiwi Nga Təm