Thlǝr 20
20
Bulusu Sha A Vwu Masidoniya Ənga Gǝrisu
1Ar pǝci kǝra gwaɗǝvi ta tathlau, kǝ Bulusu nggǝya njir nu. Ayukuɗa ji sǝsǝkuya ɗǝfuwa nda, kǝ ji nar nda kǝl vanyi pǝci. Ba ji maˈyi a vwu ˈyiˈyir Masidoniya. 2Ji ɓǝbiya ɓǝ wu mǝlmǝ pampamǝ kǝra ar ˈyiˈyi ta, ju tsǝtsǝku ɗǝfuwa njir nu wu kalar mǝlmǝ kǝra ji vwu a gwa, kadivira ji thlǝwa ˈyiˈyi Gǝrisu. 3A ndǝna ji nggya nǝ hya makǝru. Ta ju yiwu ja maˈyi a vwu ˈyiˈyir Sǝriya ǝnga kwambwal, ba ji nggari abǝr njir Yahudiya mbiya ɗǝmwaˈyikur ar kǝra ja. Ba ji na ju sha lagu Masidoniya.
4Nji gangǝ maˈyi ǝkkǝˈyi ja. Nanda ngǝ Supatarisu zǝr Parisu sara wu mǝlmǝ Beriya, ba Aristakusu ǝnga Sǝkundusu sara wu mǝlmǝ Tasalonika, ba Gayisu sara wu mǝlmǝ Darbi, ba Timathlawusu ǝnga tsu Tikikusu ǝnga Tǝrafimusu sara wu ˈyiˈyir Asǝya. 5Nji kǝ maˈyi wu mwar ˈya ba ndǝ sǝkǝ ˈya wu mǝlmǝ Turuwasu. 6Ama naˈya ayukuɗa Lardur Macikǝl Gǝra Thlǝlam, kǝ ˈyi dǝ wu kwambwal kǝra hyaˈari wu Fǝlipi, kǝ ˈyi sa thlǝwa nda wu Turuwasu ayukuɗa pida tǝfu. Wu Turuwasu ˈyi nggya nǝ pida mǝɗǝfǝ.
Bulusu Hyaˈana Yutikusu A Vwu Turuwasu
7Ar pǝci nǝ tanggǝrma nǝ sugu, naˈya njir nu ˈyi kaɓiya dzǝ aga sǝm sǝr sǝm nǝ yiwukur. Kǝ Bulusu ndǝr anǝ nda, ariya ju yiwu ja sa hyaˈari ǝzǝgǝkura nyi, ba ji dumwa ǝnga ndǝr anǝ nda baˈanǝ hadala vuˈyi. 8Pitǝllaˈyar aˈyi gangǝ a dǝ wu umbwa kǝra a dar kǝra umbwa kǝra ˈyi kaɓǝ a gwa. 9Ənggǝra Bulusu a vǝr dumwa ǝnga highiɓau, vanyi zǝr baduwari aˈyi kǝra nja ngga ǝnga Yutikusu, kǝra a vǝr nggya a dǝ wu liya umbwa, kǝ ghanyi hǝna nyi. Ba ji tǝɗǝ a gyi wu ˈyi sara dar umbwa kǝra a dar kǝra umbwa nǝ makǝrkura nyi. Kǝ nji nda hǝr nyi tǝtau.
10Ama kǝ Bulusu maˈyi a gya, ji gya mbunggǝr nyi dzau, ba ji kwaɓǝr nyi ar mbǝlta ja, ju na anǝ nda, “Hya sara tal mai, ǝnga pi nga ja.” 11Kǝ ji ɓǝra sha a dǝ wu umbwa kǝra a dar kǝra umbwa, ji tǝkǝna nda sǝr sǝm nǝ yiwukur ba ndǝ sǝmku. Bulusu dumwa ǝnga ndǝr kǝl ta wacikal vi, ǝnggau, ba ji maˈyi. 12Kǝ ndǝ maˈyi ǝnga zǝr baduwara nyi a ndu ki ǝnga pi, ba mǝliya huɗa nda pida gagaɗau.
Ɓǝ Nǝ Bulusu Sara Wu Turuwasu A Vwu Miletusu
13Kǝ ˈyi maˈyi a dumwa wu kwambwal a vwu mǝlmǝ Asusu, a vwuna nga ˈyi wu vwa hǝ Bulusu. Tsu kaɗǝ nga ji fuwa wu lagu abangǝ ara a mbiyar ja, ju maˈyi a vwuna ǝnga hi. 14Ar pǝci kǝra ji thlǝwa ˈya wu Asusu, kǝ ˈyi hǝr nyi wu kwambwal kǝ ˈyi dzǝgwa shili ǝnga ja wu mǝlmǝ Mitilinu. 15Sara ǝnggǝ tsu ˈyi dumwa ǝnga ɓǝ wu kwambwal kǝl ta ˈyi shili wu dzǝgu tsadǝ nǝ Kiyosu ǝzǝgǝkura nyi. Ma ǝzǝgǝkura nyi tsu kǝ ˈyi vǝlǝbiya a vwu dzǝgu tsadǝ nǝ Samosu, ma thlalǝbiya ara vuˈyi tsu kǝja ˈya wu mǝlmǝ Miletusu.
16Tsu kaɗǝ Bulusu mbiya abǝr naja aˈyi wu taˈyi wu Afisa mai, ariya ja sara sana pǝci wu ˈyiˈyir Asǝya, ara ju kusa ja thlǝwa Urshalima kadivira pǝcir lardur nǝ Pentikosu maja bǝr wu sǝni ɗa. 17Sara wu Miletusu ngǝ Bulusu sǝwa nja nggǝya nyi njira nggurǝm nǝ daɓǝ dzǝ njir nu nǝ Afisa. 18Ta ndǝ shili ǝgya ja, kǝ ji nar nda, “Nahyi ǝnga kǝrhyi hyu sǝni ǝnggǝra yi nggya wu pama hyi, mbari pǝci kǝra yi fiya hiya yi ar ˈyiˈyir Asǝya. 19Yi mǝl thlǝr anǝ Thlagǝ ǝnga hǝya kǝr gagaɗau ba nga sǝlǝm wu li. Yi sǝsǝˈwuri ɓwaɓwatǝ pampamǝ kǝra njir Yahudiya mbiya ba ndǝ fǝnggǝr ɗa.
20Hyu sǝni abǝr nayi saya piyari nar hyi sǝra wu daɓaga dlǝwari hyi mai, ama yi tǝtǝlna ndǝr Hyal ǝnga yi highiɓǝ anǝ hyi ar babal ǝnga wu ki ki. 21A kughir yau anǝ njir Yahudiya ǝnga njira aˈyi njir Yahudiya mai patǝu, aga nda tubi nda sha shili ara Hyal ǝnga tsu nda hǝnggǝri ǝnga Thlagǝr mǝn Yesu.
22“Kabangǝkau, maˈyi nga yau a vwu Urshalima ǝnggǝr ndǝra ǝgya kiɗa Mambǝl, alaga kǝ yi gǝra sǝni sǝra wu vwa ɗa anǝ ɗa a vwuna. 23Sǝ zǝmǝ kǝra yu sǝni, Mambǝl Cici wu ca anǝ ɗa wu kalar mǝlmǝ abǝr mba wu fursǝna ǝnga ɓwaɓwatǝ ngǝ a vǝr sǝkǝ ɗa. 24Alaga abangau, nayi fiya piya yi ar viya vanyi sǝ mai. Cimǝ ɗa ya kuɗǝna pǝrapǝra#20:24 Pǝrapǝra ǝnggǝ ngǝ cabiya nggyabiya nǝ ndǝr nu Kǝrsiti. kǝra wu mwa ɗa ǝnga ya mǝlna thlǝr kǝra Thlagǝ Yesu nǝ ɗa aga ya mǝl, naja ngǝ tǝtǝlna ndǝshigu ar kǝra mayiwakur nǝ Hyal.
25“Kabangǝkau, a sǝnǝr yi abǝr patǝkura hyi, nahyu ɓǝra nda lar ɗa mai, nahyi kǝra yi ɓǝbiya ɓǝ wu pama hyi ya vǝr tǝtǝlna ndǝshigu nǝ tǝlkur Hyal. 26Agabangau, yu nar hyi ǝshina abǝr ma ndǝra sanakǝr wu pama hyi patǝu, sa hya vazǝ ɗa mai. 27Ariya nayi haɗiya miya yi ara nar hyi patǝr sǝra Hyal wu yiwu hya sǝni mai.
28“Agabangǝ hya ɓǝla kǝrhyi ǝnga tsu njira Mambǝl Cici fǝnggǝr hyi a dar kǝra nda. Hya ɗa njir ɓǝla daɓǝ dzǝ njir nu Hyal, njira ji ɗǝlbiya ǝnga mashi Zǝr kǝrnyi. 29Yu sǝni abǝr ma a maˈyiri yau, alenyi nji ɗǝmwaˈyi ǝnggǝr hya tagǝ ˈyar wu nda shili wu pama hyi, nandu nda piyari daɓǝ dzǝ njir nu a nggya jamǝ mai. 30Alaga sara wu pama hyi ma, alenyi nji wu nda hyaˈari ǝnga ndǝr fati aga nda uya njir nu anǝ kǝrnda. 31Agabangau, hya nggya ǝnga hangǝkal! Hya ɗǝngari wu fa makǝr kǝra tǝrabiya kau, vuˈyi ǝnga pǝci nayi saya piyari kughi daɓǝ ǝnga sǝlǝm anǝ kalar ndǝ wu pama hyi mai.
32“Kabangǝkau, a fuwa hyir yi wu tsa Hyal ǝnga anǝ mayiwakur ndǝr nyi aga hya hau ǝnga ja nǝ hyi sǝr faˈaki wu pama patǝr njira ji cina casu. 33Nayi saya suna gǝnna ndau ǝnga kar ha ndǝ mai. 34Nahyi ǝnga kǝrhyi hyu sǝni abǝr a mǝlǝr yi thlǝr ǝnga tsa yi kau, aga ya uya sǝra tuku anǝ ɗa ǝnga sǝra tuku anǝ njira ǝnga yau. 35Wu kalar sǝra yi mǝlna, a cabiya hyir yi abǝr tsaˈa nga nyi nda mǝl thlǝr ǝnga dǝnama aga dlǝwa nji tǝtǝ dǝnama. Hya ɗǝngari ndǝr kǝra Thlagǝ Yesu ǝnga kǝrnyi na, abǝr ‘A ndiya ǝnga barka anǝ ndǝr lǝ a mwara ndǝr dlǝwu.’ ”
36Ənggǝra ji kuɗǝna na abangau, kǝ ji ɓǝliya undi ju kǝdi Hyal ǝkkǝˈyi nda patǝu. 37Kǝ patǝkura nda gwu tiwi, ndǝ mbar nyi ndu bǝrpǝ dza ja. 38Sǝra ndzana huɗa nda gagaɗǝ ca ngǝ ndǝr kǝra ji na abǝr tsu ndu ɓǝra lari nyi mai. Kǝ ndǝ lǝbiya nyi a gwar vir kwambwal.
©2024 Initiative for the Translation and Development of African Languages and Margi Tiwi Nga Təm