Thlǝr 17
17
Bulusu Ənga Silasu Wu Mǝlmǝ Tasalonika
1Ənggǝra Bulusu ǝnga Silasu maˈyi lagu mǝlmǝ Ampipolisu ǝnga Apoloniya, kǝ ndǝ vwu Tasalonika, vira umbwa daɓǝ dzǝ nǝ njir Yahudiya aˈyi ǝna. 2Ənggǝra Bulusu tsǝliya, ba ji maˈyi a gwu umbwa daɓǝ dzǝ nǝ njir Yahudiya. Pǝcir Ɓǝlsar nda pampamǝ makǝr ar kǝr ar kǝr ndu shasha ndǝr Hyal tsǝtsǝfǝ wu pama nda. 3Ja vǝr dǝga anǝ nda ǝnga ju ca anǝ nda abǝr a mbari anǝ Kǝrsiti ja lar ɓwaɓwatǝu ǝnga ja ɓǝra hyaˈari sara vir tau. Kǝ Bulusu ɓǝra na, “Yesu kau, kǝra ya vǝr ndǝr ar kǝr kau, naja ngǝ Kǝrsiti.”
4Kǝ alenyi njir Yahudiya ǝnga tsu njir yiwu Hyal njir Gǝrikǝ gangǝ daɓǝ ǝnga mathlǝkǝˈyi nggunggurǝm gangǝ hǝnggǝri ǝnga ndǝr Bulusu ǝnga Silasu, ba ndǝ daɓǝr kǝr ǝnga nda. 5Ama kǝ shishikur gwu ta njir Yahudiya, kǝ ndǝ tsǝmiya nji papatagǝ ar sugu. Ənggǝra patǝkura nda daɓau, ba ndǝ hyaˈana hangǝkala njir mǝlmau. Ndǝ hyaˈari ǝnga hwi a vwu ki Jasǝnu nda vǝr gal Bulusu ǝnga Silasu aga nda shili ǝnga nda wu mwar dlamir nji.
6Ama ta nandǝ thlǝwa nda mai, kǝ ndǝ tǝɗǝri Jasǝnu ǝnga alenyi njir nu a shili wu mwar njir tǝɗǝmwa nǝ mǝlmau. Nda vǝr hyaˈa ɗahǝ ndu na, “Nji kau, njir hyaˈa hangǝkala nji wu kalar vi wu duniya, kǝja nda dlari ǝnggau, 7ba Jasǝnu dlǝwuri nda wu ki nyi. Patǝkura nda nandǝ ɓǝlari dlaɗǝ nǝ Kayisaru mai, ndu na abǝr vanyi tǝl aˈyi abǝr thlǝmǝ nyi ca ngǝ Yesu.”
8Ənggǝra njir mǝlmǝ ǝnga njir tǝɗǝmwa nggari abangau, ba hangǝkala nda hyaˈari. 9Kǝ ndǝ fuwa Jasǝnu ǝnga alenyi nji ta ndǝ kina gǝnna nǝ bǝla kǝra nda ba ndǝ maˈyi.
Bulusu Ənga Silasu Wu Beriya
10Ənggǝra vi ɗa dlǝru, kǝ njir nu sǝwa Bulusu ǝnga Silasu nda maˈyi a ndu mǝlmǝ Beriya. Ənggǝra ndǝ thlǝwa viya nyi, kǝ ndǝ gwu umbwa daɓǝ dzǝ nǝ njir Yahudiya. 11Naja ka njir Yahudiya ndu a ndiya njir Yahudiya nǝ Tasalonika ǝnga hangǝkal, ara ndǝ dlǝwuri ndǝr Hyal ǝnga huɗǝ zǝmǝu. Nda vǝr tsatsamǝ ndǝr Hyal tsǝtsǝfǝ kǝ kalar pǝci, aga nda sǝnibiya tara ndǝr kǝra Bulusu wu na kǝ jiri nga nyi. 12Ariya kau, njir Yahudiya gangǝ hǝnggǝri, daɓǝ ǝkkǝˈyi mathlǝkǝˈyi Gǝrikǝu gangǝ kǝra a vǝr nggari ǝnga kǝrnda ǝkkǝˈyi shili Gǝrikǝu gangǝu.
13Ənggǝra njir Yahudiya kǝra wu Tasalonika nggari abǝr Bulusu a vǝr tǝtǝlna ndǝshigu nǝ Hyal wu Beriya, ba ndǝ maˈyi a ndǝna ndǝ nda tsǝtsǝkuri dlami aga nda hyaˈana hangǝkala nji. 14Ənggǝrna kǝ njir nu sǝwa Bulusu a gwa miya tsadau aga ja maˈyi, ama kǝ Silasu ǝnga Timathlawusu ɓǝra taˈyi kwatahǝ wu Beriya. 15Njira lǝbiya Bulusu maˈyi ǝnga ja baˈa a vwu mǝlmǝ Athlinu. Ənggǝra nda vǝr sha shili, kǝ Bulusu nar nda abǝr, Silasu ǝnga Timathlawusu nda thlǝwa nyi ǝnga kusa. Ba ndǝ maˈyi.
Bulusu Wu Athlinu
16Ar pǝci kǝra Bulusu wu sǝkǝ Silasu ǝnga Timathlawusu wu Athlinu, kǝ huɗa ja ɗa kyakyar sitǝ gagaɗǝ ara ǝnggǝra ji lari mǝlma nyi nyinyi ǝnga katǝ pampamǝu. 17Ariya kau, kǝ ji gwu shasha ndǝr wu pamǝ ǝkkǝˈyi njir Yahudiya wu umbwa daɓǝ dzǝ nǝ njir Yahudiya, ǝkkǝˈyi alenyi njir Gǝrikǝu, njira wu yiwu Hyal. Kalar pǝci tsu, ju shasha ndǝr wu pamǝ ǝkkǝˈyi njira ji thlǝwa ar sugu. 18Abangǝ tsu, alenyi malǝmǝ hihimi nǝ bwata kǝra nju ngga ǝnga Abikurya ǝnga Sitokiya, ndu shasha ndǝr wu pamǝ ǝnga ja. Alenyi nji wu pama nda wu na, “Kariya, mi ngǝ ndǝr miya gǝra kǝr kǝ wu na?”
Alenyi nji wu na, “Ənggǝr ndǝra a vǝr tǝtǝlna ndǝr hyalˈyar kǝra mǝn gǝra sǝni nga ja.” Ndǝ na abangau ara Bulusu a vǝr tǝtǝlna ndǝshigu ar kǝra Yesu, ǝnga hyaˈari sara vir tau. 19Agabangau, kǝ ndǝ hǝr nyi a ndar vir daɓǝ dzǝ Malǝmǝ Hihimi ˈyar, kǝ ndǝ na anǝ nyi, “A sǝni nar ˈya gǝ sǝra naja ka highiɓǝ mafǝliyangǝ kǝra ga vǝr highiɓǝ kǝ ya? 20Ara ga vǝr shili anǝ ˈya ǝnga sǝ mafǝliyangǝ sǝra ˈyi gǝra saya nggari. ˈYu yiwu ˈya sǝni sǝra nda aga nyi.” 21Patǝr njir Athlinu ǝnga mǝthlǝpi kǝra a gwa, ndu yiwu sǝ himi ǝnga ndǝr ar kǝra kalar sǝ mafǝliyangǝ a ndiya kalar sau.
22Kǝ Bulusu hyaˈari aˈyi taˈyau, wu vir daɓǝ dzǝ Malǝmǝ Hihimi ˈyar, ji na, “Nahyi njir Athlinu, yi lari abǝr nahyi njir yiwu hya nu hyal pampamǝ ǝnga jiri wu kalar lagu. 23Ariya ar pǝci kǝra ya vǝr ɓǝɓǝ a ndu huɗa mǝlmau, kǝ yi tsamǝ ǝnga hangǝkal sǝˈyar kǝra hya vǝr dlǝvǝ kau. Nayi ma yi lari bagadi vira hyu kǝbǝ kwatǝ ari, kǝra nji tsǝfǝri ari, ‘anǝ hyal kǝra nji gǝra sǝni’. Hyal kǝra hya vǝr dlǝvǝ kǝra hyi gǝra sǝni kau, ca nga yu yiwu ya nda nar hyi ar kǝri kau.
24“Hyal kǝra mǝliya duniya ǝnga sǝra a gwa patǝu, naja ngǝ Thlagǝr dǝmǝlmau ǝnga gyi wu ˈyi, naju nggya wu umbwa kǝra ndǝ ngǝ hǝriya mai. 25Abangǝ tsu naju yiwu dlǝwa dzǝ sara ara ndǝ mai, sǝ aˈyi ju tini mai, ariya naja ngǝ wu lǝ pi anǝ nji patǝu, ǝnga sǝpi, ǝnga patǝr sǝra ndǝ wu yiwu.
26Naja tsu ngǝ mǝliya culi ndapi sara wu dza ndǝ zǝmǝu, aga nda nggya wu kalar vi wu duniya. Naja ngǝ jigar nyi pǝci anǝ kalar njira ji mǝliya ǝnga tsu ji tabiya kǝl ˈyiˈyi anǝ kalar culi nji ar vira ndu nggya ari. 27Hyal ngǝ mǝliya abangau, aga nja gal nyi, wu gal nyi, tara ba nda uya nyi, alaga kǝ naja aˈyi naɗǝ wu dzǝr kalar ndaliya mǝn mai. 28‘Ara wu ja nga mǝnu uya nggyabiyar mǝn ǝnga mǝnu ɓau ǝnga mǝn tsu uya nggyar mǝn,’ ǝnggǝra alenyi njir thlǝ na kǝr nǝr hyi na, ‘Ənga jirkur, naˈya ma culi nyi ngau.’
29“Ta a ɗar namǝn culi nǝ Hyal ngau, aˈyi kyau mǝna ɗǝnga abǝr Hyal a papa katǝ kǝra ndǝ nga sǝni dlǝya sara wu liyangǝ ǝnga tsǝka wilwilu ǝnga tsa ja mai. Naja aˈyi sǝra ndu mǝliya ǝnga hahangǝkur nyi mai. 30Ɗǝɗǝmǝu, Hyal aˈyi mǝlna nyi numa anǝ nji tsaˈa aga bikǝr nda mai, ara gǝra sǝnkur nda. Ama kabangǝkau, ji nar nyi anǝ nji patǝ wu kalar vi nda tubi. 31Ariya a fiyar ja pǝci kǝra ju sa mǝl numa anǝ duniya ǝnga jirkur lagur ndǝra ji caɗǝbiya. Hyal cabiya anǝ nji patǝ abǝr sǝ kǝ ji na kǝ ngǝ wu ɗa lagur hyaˈana nda nyi sara vir tau.”
32Ənggǝra ndǝ nggar ndǝr ar kǝra hyaˈari sara vir tau, kǝ alenyi nji ndǝr nǝ diɗa nyi. Ama alenyi nji na, “ˈYu yiwu ˈya ɓǝra nggari sǝra gu na ar kǝra ndǝr kau.” 33Ənggau ngǝ Bulusu tǝkǝ ǝnga nda. 34Ama alenyi nji kushu wu pama nda nu Bulusu, ndǝ hǝnggǝri. Wu pama nda ca ngǝ Diyonisu, pathlǝ wu pama malǝmǝ hihimi, ǝnga vanyi mala kǝra nju ngga ǝnga Damarisu ǝnga alenyi nji tsu.
©2024 Initiative for the Translation and Development of African Languages and Margi Tiwi Nga Təm