Thlǝr 16
16
Timathlawusu Nu Bulusu Ənga Silasu
1Kǝ Bulusu maˈyi a ndu mǝlmǝ Darba ǝnga Lisǝtǝra. Vanyi ndǝr nu aˈyi wu Lisǝtǝra nja ngga ǝnga Timathlawusu, zǝr mala kwar njir Yahudiya ndǝr nu. Dǝnyi tsu ndǝr Gǝrikǝu. 2Njir nu kǝra wu Lisǝtǝra ǝnga wu mǝlmǝ Ikoniyamu tsu ndǝ fal Timathlawusu.
3Bulusu wu yiwu ja hǝri Timathlawusu wu ɓǝ kau, kǝ ji thlana nyi pǝlzha ara njir Yahudiya kǝra a vǝr nggya ar viˈyar ta, ara ndu sǝni patǝ abǝr dǝnyi ndǝr Gǝrikǝ ngau. 4Ənggǝra nda vǝr ɓǝ sara wu mǝlmǝ a ndu mǝlmau, ndu lǝ ndǝr kǝra cama sǝsǝ ˈyar ǝnga njira nggurǝm nǝ Urshalima mbiya aga nda ɓǝlari. 5Agabangǝ daɓǝ dzǝ njir nu ɓǝra cakǝ ǝnga dǝnama wu mbǝrsa, nda vǝr cakǝ wu gangǝkur wu kalar pǝci.
Mǝtakǝr Nǝ Bulusu Ar Kǝra Ndǝr Masidoniya
6Kǝ Bulusu ǝnga bazhi nyi ˈyar ɓǝbiya ɓǝ wu ˈyiˈyir Fǝrjiya ǝnga Galatiya, ara Mambǝl Cici kar nda ara lǝ ndǝr Thlagǝ wu ˈyiˈyir Asǝya. 7Ənggǝra ndǝ shili wu kǝla ˈyiˈyir Mayisiya, ndu yiwu nda vwu ˈyiˈyir Bethlǝniya, ama kǝ Mambǝl Yesu kar nda. 8Kǝ ndǝ maˈyi lagu dza ˈyiˈyir Mayisiya, kǝ ndǝ tǝrabiya a gyi wu mǝlmǝ Turuwasu. 9Əvuˈyi kǝ Bulusu lar mǝtakǝr ar kǝra ndǝr ˈyiˈyir Masidoniya taˈyau, ja vǝr kǝdi nyi, ju na, “Ɓa shili wu Masidoniya ga sa dlǝwari ˈya.” 10Ayukuɗa Bulusu lar mǝtakǝr kau, ǝnggǝrna kǝ ˈyi mǝliya dzǝ aga ˈya maˈyi a vwu Masidoniya, ariya a hǝnggǝri ˈya abǝr Hyal ngǝ ngga ˈya aga ˈya tǝtǝlna nda ndǝshigu.
Mbǝrsa Nǝ Lidiya
11Kǝ ˈyi hyaˈari sara wu Turuwasu wu kwambwal turu a ndu tsadau ba ndǝ maˈyi a vwu dzǝgu tsadǝ Samutarkiya. Ma ǝzǝgǝkura nyi tsu kǝ ˈyi maˈyi a vwu mǝlmǝ Niyapolisu. 12Sara ndǝna, kǝ ˈyi maˈyi a ndu Fǝlipi kǝra wu ˈyiˈyir tǝlkur nǝ Roma, naja tsu ngǝ mǝlmǝ kǝra a ndiya ǝnga dǝgalǝ wu ˈyiˈyir Masidoniya. A ndǝna kǝ ˈyi pida nǝ pǝci kushu.
13Ar Pǝcir Ɓǝlsar, kǝ ˈyi biya a biya miyar gwa nǝ mǝlmau, kǝ ˈyi maˈyi a gwa miya dǝl, vira ˈyu nggani abǝr vir kǝdi Hyal nǝ njir Yahudiya aˈyi a ndǝna. Kǝ ˈyi nggya gya ˈyi wu ndǝr anǝ mathlǝkǝˈyi kǝra daɓǝ a ndǝna. 14Pathlǝ wu pama njira a vǝr sǝ himi ndǝr kau, ca ngǝ vanyi mala kǝra nja ngga ǝnga Lidiya, ndǝr dlǝvǝ Hyal. Naja tsu sara wu mǝlmǝ Tayatǝra, ju ɗǝlna kar ha kǝra dǝdǝzǝ ǝnggǝr galura nǝ gǝnna gangǝu. Kǝ Thlagǝ pahǝna ɗǝfuwa ja, aga ja hǝri hangǝkala ja a ndǝgya sǝra Bulusu wu na aga ja hǝnggǝri.
15Ənggǝra nji mǝliya nyi baɓǝtizǝma ǝkkǝˈyi njir ki nyi, kǝ ji kǝdi ˈya, ji na, “Ma hyi hǝnggǝri abǝr nayi ndǝr nu Thlagǝ ngau, hya shili wu ki ɗa hya sa nggya.” Kǝ ndǝr kǝ sǝmku hangǝkala ˈya, kǝ ˈyi hǝnggǝri.
Bulusu Ənga Silasu Wu Fursǝna
16Vanyi pǝci ǝnggǝra ˈya vǝr maˈyi a ndu vir kǝdi Hyal, kǝ ˈyi ɓǝ ǝnga vanyi kwa kǝra ǝnga mambǝl nǝ ha mǝlanga. Njira thlagǝr kwa kǝ ndu uya gǝnna gagaɗau lagur ha mǝlanga kau. 17Kwa kǝ kǝl nu nga ju nu ˈya, naˈya ǝkkǝˈyi Bulusu, ju wau, ju na, “Nji kǝ mafa nǝ Hyala Dǝ ngau, nda vǝr na anǝ hyi lagur mbǝɗau.” 18Ji dumwa ǝnga na abangau nǝ pida gangǝu. Ayukuɗa nyi kǝ sǝ ɓwanǝ nyi kǝr anǝ Bulusu gagaɗau, kǝ ji shabiya dzǝ ji na anǝ mambǝl ɗǝmwaˈya nyi, “Wu thlǝmǝr Yesu Kǝrsiti yu kǝdlǝ ngau, biya sara wu kwa kau!” Ənggǝrna kǝ mambǝl kǝ tǝkǝ ǝnga ja.
19Ənggǝra njira thlagǝr kwa kǝ lari abǝr lagur uya gǝnnar nda a danar dzau, ba ndǝ mbari Bulusu ǝnga Silasu ndǝ tǝɗǝr nda a ndar sugu a ndu mwar njir tǝɗǝmwa. 20Ayukuɗa ndǝ shili ǝnga nda wu mwar njir pathla ndǝ na, “Njir Yahudiya kǝ nda vǝr dza mǝlmǝr ˈya. 21Nda vǝr highiɓǝ sǝra dlaɗǝ kari mǝna dlǝwu ǝnga alaga nu, ariya namǝn njir Roma ngau.”
22Kǝ dlami daɓǝ ǝkkǝˈyi nda ndǝ mbiya miya nǝ par Bulusu ǝnga Silasu. Njir pathla tsu sǝwa nja tatana lǝgutǝr nda ǝnga nda zǝzǝɗǝna nda turusu ǝnga nja dǝdǝgǝna nda. 23Ayukuɗa nji dǝdǝgǝna nda gagaɗau, kǝ nji fuwa nda wu fursǝna, nji nar nyi anǝ ndǝr ɓǝla fursǝna ja tsamǝ nda mǝnahǝu. 24Naja tsu, ǝnggǝra ji nggari naja ka ndǝr, kǝ ji fuwa nda a gwu huɗa fursǝna, ji mbiya hiya nda ar gangǝ.
25Ənggǝr hathlǝr vuˈyi, Bulusu ǝnga Silasu nda vǝr kǝdi Hyal ǝnga nda vǝr thlǝ na nǝ fal Hyal. Alenyi njir fursǝna tsu nda vǝr sǝ himi nda. 26Kukuthlǝ kǝ ˈyiˈyi kǝnggǝɗǝr dzǝ gagaɗau, kǝl ta fǝhiya hǝr nǝ fursǝna kǝnggǝɗǝr dzau. Ənggǝrna miya umbwa ˈyar a pahǝnari dzau, ǝpa liyangǝ nǝ kalar ndǝr fursǝna pǝlnakǝr. 27Ta ndǝr ɓǝla fursǝna hyaˈari sara wu ghanyi, kǝ ji lari miya umbwa ˈyar nǝ fursǝna abangǝ papahau, kǝ ji tsǝbiya hǝnggya nyi, ju yiwu ja tsǝya kǝrnyi, ara ju nggani abǝr njir fursǝna patǝ a hwinar nda kǝr. 28Ama Bulusu hyaˈana ɗahǝu ǝnga dǝnama ji na, “A sara ga uya kǝrngau ǝnga shilǝgǝ mai! Ənggǝ nga ˈya patǝu!”
29Kǝ ndǝr ɓǝla njir fursǝna yiwa nja dla ǝnga pitǝlla. Kǝ ji gwa ǝnga kusa, ji gwa ɓǝliya undi wu mwar Bulusu ǝnga Silasu, ja vǝr tsǝdzau ara hivǝr. 30Kǝ ji hǝbiya nda a biya, ji biya yiwa nda, “Amaya, malǝmǝ, mi nga ya mǝl aga ya uya mbǝɗa?”
31Kǝ ndǝ shaɗǝwa, “Hǝnggǝri ǝnga Thlagǝ Yesu, gu uya mbǝɗau, nagau ǝnga njir ki ngau.” 32Ənggau kǝ ndǝ nar nyi ndǝshigu Thlagǝu, naja ǝnga njir ki nyi patǝu. 33Wu vuˈyi kǝ ji hǝri nda, kǝ ji nda cina nda mbǝlgǝr nda. Ənggǝrna kǝ nji hǝri nyi baɓǝtizǝma ǝnga patǝr njir ki nyi. 34Kǝ ji nggar nda a vwu ki nyi, ji vwa nǝ nda sǝr sǝm. Naja ǝnga njir ki nyi nyau ǝnga caguli ariya ndǝ hǝnggǝri ǝnga Hyal papatǝkura nda.
35Ma sǝbiya ǝmudlǝkura nyi, kǝ njir pathla sǝwa njir nda ǝnga ɗahǝ abǝr, “Ga sǝya nji kau.” 36Kǝ ndǝr ɓǝla na anǝ Bulusu, “Njir pathla sǝwa ya sǝya ngau ǝnga Silasu. Agabangau, hya biya hya maˈyi sǝr hyi wu jamǝkur.”
37Ama Bulusu nar nda, “Ar babal nga ndǝ dǝgǝna ˈya, gǝra nji mǝliya ˈya numa, alaga kǝ naˈya njir Roma ngau, ndǝ jahuwa ˈya a vwu fursǝna. Ya, kǝja kǝ tsu nda hǝbiya ˈya a biya ɗǝɗǝwa ya? Awau! Bǝgǝ nda shili ǝnga kǝrnda nda sa hǝbiya ˈya.”
38Kǝ njira nji sǝwa nda nar nyi anǝ njir pathla ndǝr kau. Njir pathla tsu ba hivǝr mbar nda ara ndǝ nggari abǝr Bulusu ǝnga Silasu njir Roma ngau. 39Ndǝ shili ndǝ sa gal Bulusu ǝnga Silasu aga nda tǝfǝbiya nda. Ayukuɗa kau, kǝ ndǝ hǝbiya nda, ndu kǝdi nda aga nda piyari nda mǝlmau. 40Ayukuɗa Bulusu ǝnga Silasu biya sara wu fursǝna, kǝ ndǝ maˈyi a ndu ki Lidiya, vira ndǝ nda thlǝwa njir nu ari. Kǝ ndǝ sǝsǝkuya nda ɗǝfu, ba ndǝ dzǝgwa maˈyi.
©2024 Initiative for the Translation and Development of African Languages and Margi Tiwi Nga Təm