Thlǝr 13
13
Nji Sǝwa Barnabasu Ənga Suwalu
1Wu pama daɓǝ dzǝ njir nu kǝra aˈyi wu Antakiya, nabiˈyar ǝnga malǝmǝˈyar aˈyi kǝra nja ngga nda ǝnga Barnabasu, ǝnga Simiyanu kǝra nja ngga “Ndǝ kyakyaru,” ba Lushiyusu sara wu Sayirini, ǝnga Manayanu (ndǝra ghakǝr ǝnga Tǝl Hirudusu), ba ǝnga Suwalu. 2Ənggǝra nda vǝr dlǝvǝ Thlagǝ daɓǝ ǝnga hǝ zǝmǝtsini, kǝ Mambǝl Cici na, “Hya fiya Barnabasu ǝnga Suwalu aga thlǝr kǝra yi ngga nda aga nyi.” 3Ayukuɗa nyi ndǝ ɓǝra cakǝri hǝ zǝmǝtsini ǝnga kǝdi Hyal, ba ndǝ fǝr tsa nda ar nda, ba ndǝ sǝwa nda aga nda maˈyi.
Barnabasu Ənga Suwalu Ar Dzǝgu Tsadǝ Sayipurusu
4Mambǝl Cici sǝwa Barnabasu ǝnga Suwalu a biya, ndǝ maˈyi a gyi wu mǝlmǝ Salusiya. Sara gyina ndǝ gwu kwambwal ndǝ ɓar ˈyimi kǝl ta ndǝ shili ar dzǝgu tsadǝ Sayipurusu. 5Ənggǝra ndǝ shili wu mǝlmǝ Salamisu, ndǝ tǝtǝlna ndǝr Hyal wu umbwa daɓǝ dzǝˈyar nǝ njir Yahudiya. Yahwana Markusu maˈyi ǝnga nda aga ja ɗa ndǝr dlǝwa nda.
6Ndǝ ɓǝɓau wu huɗa mǝlmǝ pampamǝ ar dzǝgu tsadǝ kǝl ta ndǝ shili wu Pafusu, vira ndǝ thlǝwa ndǝr Yahudiya ndǝr pipitǝma, nabi nǝ fati, kǝra nju ngga ǝnga Zǝr Yesu. 7Ndǝr hǝ mbǝl anǝ gwamna Sarjiyusu Bulusu ngau, ndǝr sǝni sǝ gagaɗau. Gwamna nggari Barnabasu ǝnga Suwalu a shili wu ki nyi, ara ju yiwu ja nggari ndǝr Hyal. 8Ama Ilimasu ndǝr pipitǝma, kǝra ca ngǝ thlǝmǝ nyi ǝnga miya Gǝrikǝu, aˈyi piyari nyi lagu anǝ Barnabasu ǝnga Suwalu, aga nda ndǝr anǝ gwamna mai, ara ja sara sǝ himi sǝra ndu na ba ja mbǝrsa.
9Ama Suwalu, ndǝra nju ngga ǝnga Bulusu, nyinyi ǝnga Mambǝl Cicau, ji tsamǝ vwu liya ndǝr pipitǝma kau, 10kǝ ji na, “Nagǝ zǝr Shatan nga gau, ǝnga dawa nǝ kalar sǝra tsatsaˈa! Nagǝ nyinyi nga gǝ ǝnga fati ba ngguta vi. Ga piyari kaka nji ara sǝni lagu jiri nǝ Thlagǝu! 11Kabangǝkǝ huɗa Thlagǝ a ndzǝri ǝnga gǝ gagaɗau. Gu ɗa lǝfau, nǝ pǝci kushu tsu gu lari mbǝmbǝl nǝ pǝci mai.”
Ənggǝrna, kǝ sǝ ǝnggǝr pǝrɗǝ ǝnga kuthlǝ sa haɗiya nyi, ju ɓǝ ju tǝtǝm sau, ju gal ndǝr sǝ tsi anǝ nyi. 12Ənggǝra gwamna lari sǝ kǝ ɗa kau, ba ji hǝnggǝri, ara ǝnggǝra highiɓǝ ar kǝra Thlagǝ ɗa sǝ dǝdǝgur anǝ nyi.
Bulusu A Vǝr Tǝtǝlna Ndǝr Hyal Wu Antakiya Nǝ ˈYiˈyir Pisidiya
13Bulusu ǝnga bazhi ɓǝ nyi ˈyar piyari mǝlmǝ Pafusu wu kwambwal ndu nu ˈyiˈyir Pamǝfiliya, ndǝ taˈyi wu mǝlmǝ Parga. A ndǝna kǝ Yahwana Markusu piyari nda ji sha a vwu Urshalima. 14Sara wu Parga ndǝ maˈyi a vwu Antakiya nǝ ˈyiˈyir Pisidiya. Ar Pǝcir Ɓǝlsar ndǝ maˈyi a gwu umbwa daɓǝ dzǝ nǝ njir Yahudiya, ndǝ gwa nggya a gwuna. 15Ayukuɗa nji jigana lǝkakaɗǝ nǝ dlaɗǝ Musa ǝnga nabiˈyar, njir tǝɗǝmwa nǝ umbwa daɓǝ dzǝ nǝ njir Yahudiya sǝwa nda ndǝr, ndǝ na, “Zamǝˈyar, ma sǝr tsǝtsǝku ɗǝfu aˈyi ara hyi, hya nar ˈya.”
16Kǝ Bulusu hyaˈari, ji hyaˈana tsi aga ja bǝgǝya nda, ji na, “Shili, njir Izirayila ǝnga nahyi nji kǝra gǝra njir Yahudiya njir hivǝr Hyal, hya sǝya ɗa himi!
17“Hyal nǝ njir Izirayila caɗǝbiya ǝjir mǝn ˈyar, ji mǝliya gangǝkura nda cakau ǝnga dǝnama wu pǝci kǝra nda wu Masaru. Ənga dǝnama nyi nga ji hǝbiya nda sara wu mafakur wu ˈyiˈyi ta. 18Ji sǝsu sǝr mǝla nda lǝha dzǝr fa foɗǝ kumo nyi pǝci kǝra nda vǝr ɓǝ wu tagǝu. 19Ji dlǝdlǝna nji nǝ culi pampamǝ mǝɗǝfau, wu ˈyiˈyir Kanaˈana, ba ji lǝr ˈyiˈyir nda anǝ njir Izirayila sǝr faˈaki. 20Patǝ sǝˈyar kǝ hǝr fa gharu foɗǝ ǝnga tǝfǝkumunyi.
“Ayukuɗa kau, ji nǝ nda njir numa baˈanǝ shili ar pǝcir nabi Samuyalu. 21Kǝ nji kǝ yiwa aga Hyal a nǝ nda tǝl. Kǝ ji nǝ nda Suwalu zǝr Kishu, sara wu culi Benjamenu. Ji sǝm tǝlkur a dar kǝra nda nǝ fa foɗǝ kumo nyi. 22Ayukuɗa ji hǝya Suwalu sara wu tǝlkur, ba ji fiya Dawuda, ndǝra ji na ar kǝri abǝr, ‘A uyari yi Dawuda zǝr Jesi, ndǝra ɗǝfuwa ja aga yau. Ju nda mǝl thlǝr ǝnga patǝr yiwur huɗa yau.’
23“Sara wu culi gǝ ndǝ kǝ ngǝ Hyal shili ǝnga ndǝr mbǝɗa njir Izirayila, ǝnggǝra ji hǝr alkawal, kǝra nju ngga ǝnga Yesu. 24Kadivira Yesu shili, Yahwana ndǝr mǝl Baɓǝtizǝma tǝtǝlna ndǝr Hyal nǝ tubi ǝnga mǝl baɓǝtizǝma anǝ patǝr njir Izirayila. 25Ənggǝra Yahwana wu kuɗǝna thlǝr nyi, ji yiwa, ‘Hyu nggani nayi ngǝ Kǝrsiti ya? Awau, nayi ngǝ mai! Ama ju shili wu yukuɗǝ ɗa, nayi tsu, aˈyi ɗa tsaˈa aga ya ɗa alaga mafa nǝ pǝl ɓiɓi nyi mai.’
26“Taguˈyi, wazha Ibrahimu ǝnga njira aˈyi njir Yahudiya mai, njir hivǝr Hyal, anǝ ˈya nga nji sǝwa ndǝr ar kǝra mbǝɗǝ kau. 27Njir Urshalima ǝnga nji dǝdǝgalǝr nda, nandǝ nggabiya abǝr Yesu ngǝ ndǝr mbǝɗa kǝ mai ǝnga tsu ndǝr nabiˈyar ar kǝra ja kǝra ndu jiga kalar Pǝcir Ɓǝlsar ta mai. Agabangau, ba ndǝ mǝliya nyi numa nǝ tau, a vǝr mǝl abangǝ ba ndǝ nyabiya ndǝr nabiˈyar.
28Alaga ta nandǝ uya sǝr vazǝ kǝra nda daɓaga tsǝya nyi ariya nyi mai, abangau, kǝ ndǝ kǝdi Bilatusu aga ja thla numa tǝ anǝ nyi. 29Ayukuɗa ndǝ nyabiya patǝr sǝra tsǝtsǝfǝ ar kǝra ja, kǝ ndǝ hǝya nyi sara dar wu dladlakau, ba ndǝ dzǝgwa fuwa nyi a gwu hu. 30Ama kǝ Hyal hyaˈana nyi sara vir tau! 31Nǝ pida gangǝ nga ji cabiya kǝrnyi anǝ njira nu nyi sara wu Galili a vwu Urshalima. Nanda ngǝ sakida nyi kabangǝkǝ anǝ njir Izirayila.
32“Kabangǝkǝ a shilǝr ˈya ǝnga ndǝshigwa nyi anǝ hyi, sǝra Hyal hǝr alkawala nyi anǝ ǝjir mǝn 33a nyabiyar dzǝ anǝ mǝn, namǝn wazhar nda, lagu kǝra ji hyaˈana Yesu sara vir tau. Kǝja sǝra Zabura nǝ mǝthlǝkura nyi na ar kǝra Yesu,
“ ‘Nagǝ zǝr ɗa ngau.
Əshina nga yi ɗa dǝngau.’
34Hyal hyaˈana Yesu sara vir tau, abǝr tsu Yesu ɓǝra tǝ mai ǝnga naju ɗiya mai. Ənggǝr kǝra ji na wu lǝkakaɗǝ nyi, ‘Yu nǝ ngǝ barka cicau ǝnga jijiri kǝra yi hǝr alkawal anǝ Dawuda.’
35Vanyi Zabura cabiya abǝr,
“ ‘Nagu piyari
ndǝ cici ngǝ
ja ɗiya wu hu mai.’
36“Ayukuɗa Dawuda mǝlna thlǝr nyi kǝra Hyal wu yiwu ja mǝl wu pǝci nyi, ba ji tau ba nji haɗǝna nyi ǝkkǝˈyi ǝji nyi ˈyar, ba dza ja ɗiyanakǝr. 37Ama Yesu kǝra Hyal hyaˈana sara vir tau, dza ja aˈyi ɗiya wu hu mai.
38“Agabangau, taguˈyi, hya kyaga sǝnibiya abǝr lagur highiɓǝ nǝ thlǝmǝr Yesu nga hyu uya tǝfǝbiya bikǝr hyi. 39Kalar ndǝra hǝnggǝri ǝnga ja, ju ɗa pǝpǝl sara ara patǝr bikǝ kǝra dlaɗǝ Musa gǝra sǝni pǝlna. 40Hya nggya ǝnga hangǝkal, ariya sǝra nabiˈyar nar nda a sara nyabiya dzǝ ǝnga hyi. Ara ndǝ na,
41“ ‘Hya sǝya himi,
nahyi njir diɗa Hyal,
hya gwu gwazhivi
ara sǝ dǝdǝgur
ǝnga hya kuɗau,
ara yu nda mǝl
sǝ wu pǝcir hyi
kǝra nahyu
hǝnggǝri ǝni mai,
alaga ma vanyi ndǝ nar hyi.’ ”
42Ənggǝra Bulusu ǝnga Barnabasu a vǝr piyari umbwa daɓǝ dzǝ nǝ njir Yahudiya, nja nyi kǝdi nda aga nda ɓǝra sha shili nda sa nar nda ar kǝra sǝˈyar kau, ma Pǝcir Ɓǝlsar nǝ sugu ɓǝra shili. 43Ənggǝra nji tǝtǝl, njir Yahudiya gangǝu ǝnga njira sha shili wu mbǝrsa nǝ njir Yahudiya nu Bulusu ǝnga Barnabasu. Kǝ nji mǝthlǝ kǝ dumwa ǝnga tsǝtsǝku nda aga nda nggya wu mayiwakur nǝ Hyal.
44Ayukuɗa sugu pathlǝu Pǝcir Ɓǝlsar zada mǝlmǝ patǝ ngǝ daɓǝ aga nda sǝ himi ndǝr Thlagǝu. 45Ta njir Yahudiya lari dlami kǝra kaɓau, kǝ shishikur nyana ɗǝfuwa nda, ba ndǝ kǝpalna sǝra Bulusu a vǝr na ǝnga ndǝ nggǝnggǝlna nyi.
46Kǝ Bulusu ǝnga Barnabasu shaɗǝwa nda gǝra ǝnga hivǝr, “A ɗar tsaˈa ˈya nar hyi ndǝr Hyal tanggǝrma. Ama ta hyi nggǝl ara dlǝwu ǝnga hyi tsamǝ kǝrhyi gǝra kyau hya uya pi gǝra kuɗau, kabangǝkǝ ˈyu shabiya dzǝ a ndǝgya njira aˈyi njir Yahudiya mai. 47Ara Thlagǝ ngǝ nǝ ˈya ndǝr kǝ pǝci kǝra ji na,
“ ‘Nayi ngǝ mǝliya hyi
mbǝmbǝl anǝ njira
aˈyi njir Yahudiya mai,
aga hya shili ǝnga mbǝɗǝ
anǝ patǝr kuɗiyar duniya.’ ”
48Ənggǝra njira aˈyi njir Yahudiya mai nggari abangau, kǝ ndǝ ɗa ǝnga caguli ǝnga ndǝ fal ndǝr Thlagǝ ara naja ka ndǝr. Ənga patǝr njira Hyal caɗǝbiya aga nda uya pi gǝra kuɗau ndǝ hǝnggǝri. 49Ndǝr nǝ Thlagǝ tsu ɓǝra dumwa ǝnga cakǝ wu ˈyiˈya nyi baˈamani.
50Ama njir Yahudiya tsǝtsǝkuri alenyi mathlǝkǝˈyi kǝra wu hivǝr Hyal, ǝnga njira nju gǝnggǝr nda sǝli, ba shili kǝra nji nggunggurǝm wu mǝlmau, aga nda hyaˈana hangǝkala nji wu dǝrbǝ Bulusu ǝnga Barnabasu. Ndǝ kǝdlǝbiya nda sara wu ˈyiˈyir nda. 51Kǝ ndǝ dlǝdlǝɗǝna bǝbǝr kǝra ar hiya nda, kǝra cabiya abǝr sǝ kǝ ndǝ mǝl kǝ aˈyi tsaˈa mai. Ba ndǝ tǝrabiya a vwu mǝlmǝ Ikoniyamu. 52Njir nu wu Antakiya nyabiya dzǝ ǝnga caguli ba ǝnga Mambǝl Cicau.
©2024 Initiative for the Translation and Development of African Languages and Margi Tiwi Nga Təm