Thlǝr 12
12
Nji Tsǝya Yakubu Ənga Nji Mbiya Biturusu Wu Fursǝna
1Wu pǝci kǝ ngǝ Tǝl Hirudusu mbari nji sara wu daɓǝ dzǝ njir nu, ji dzǝgwa ɗa nda. 2Ji mǝliya nji tsǝya Yakubu, zamǝya Yahwana ǝnga katsakǝr. 3Ta Hirudusu lari abǝr sǝ kǝ a pinari huɗa njir Yahudiya, kǝ ji mǝliya nji mbari Biturusu tsu. Sǝ kǝ ɗa ar pǝcir mini nǝ Lardur Macikǝl Gǝra Thlǝlam. 4Ayukuɗa ji mbari nyi, ba ji fuwa nyi wu fursǝna, wu tsa bwata sojaˈyar kumo apǝ kwa. Wu ɗǝnga nyi abǝr ju hǝr nyi a shili wu mwar pathla ayukuɗa Lardur Vǝlna.
5Pǝcira Biturusu tsu wu fursǝna, daɓǝ dzǝ njir nu tsu dumwa ǝnga kǝdi Hyal ǝnga jirkur anǝ nyi.
6Vuˈyi kǝra ma vi sa kuɗǝ ngǝ Hirudusu wu ɗǝnga nja sa hǝbiya nyi nja mǝliya nyi numa, ǝvuˈyi ta Biturusu wu ghanyi wu pama soja mǝthlǝu, mbamba ar ǝpa liyangǝ mǝthlǝu, ǝnga alenyi sojaˈyar a vǝr ɓǝla miya fursǝna. 7Kukuthlǝu, kǝja waladi Thlagǝ taˈyi ǝnga mbǝmbǝl a gwu huɗa zǝr umbwa fursǝna kǝra Biturusu a gwa. Kǝ ji tsatsari Biturusu ar thlǝrpa ja, ji hyaˈana nyi wu ghanyi ji na, “Hyaˈari ǝnga kusa!” Ba ǝpa liyangǝ kǝ zǝɗǝbiya dzǝ ar tsa ja.
8Kǝ waladi kǝ na anǝ nyi, “Har kar ngau ǝnga ɓiɓi ngau.” Ba ji mǝliya abangau. “Bakǝri gwada ngau ga nu ɗa,” ǝngwar waladi anǝ nyi. 9Kǝ Biturusu piyari huɗa fursǝna, ju nu waladiya nyi. Ama sǝ kǝ patǝ ju nggani mǝtakǝr nga ju lari. Naji tsamǝri abǝr jiri ngǝ sǝ kǝ a vǝr ɗa kǝ mai. 10Ta ndǝ tǝrabiya vir njir ɓǝla nǝ tanggǝrma ǝnga nǝ mǝthlǝkura nyi, ba ndǝ shili ar miyar gwa nǝ liyangǝ kǝra wu vwu huɗa mǝlmau, ba ji pahau anǝ nda ǝnga kǝrnyi. Kǝ ndǝ tǝrabiya a gwa gwa nda vǝr ɓau ar kataraku. Aga zǝmǝ ba waladi sa wu liya ja.
11Kǝ Biturusu shili wu hangǝkal nyi, ji na, “Kabangǝkau, a sǝnǝr yi abǝr Thlagǝ ngǝ sǝwa waladi nyi aga ja mbǝɗana ɗa sara wu tsa Hirudusu ǝnga sǝ ɗǝmwaˈyi kǝra njir Yahudiya wu ɗǝnga.”
12Ənggǝra ji tsamǝri abangau, ba ji maˈyi a nda miya ki Maryamu mǝya Yahwana ndǝra nja ngga ǝnga Markusu, vira nji gangǝ kaɓǝ nda vǝr kǝdi Hyal ari. 13Ta Biturusu tsatsari miya ki, ba kwar ki kǝ kǝra nja ngga ǝnga Roda shili aga sa pahau. 14Ta ji nggabiya ɗaha Biturusu ngau, kǝ huɗa ja pida gagaɗau. Naji ɓǝra sǝni pahǝna miya kiya nyi mai. Ba ji sha a vwu ki ǝnga hwi, ji vwa nar nyi anǝ patǝr nji abǝr, “Biturusu ngǝ taˈyi a biya miya ki!”
15Kǝ ndǝ na anǝ nyi, “Kariya, thlǝkǝ wu tǝ ngǝ ya?” Ənggǝra ji dumwa ǝnga na abangau, ba ndǝ na, “Ma abangǝ ja waladi nyi ngau.”
16Ama kǝ Biturusu dumwa ǝnga tsa miya kiya nyi. Ənggǝra ndǝ pahǝna, ba ndǝ lari nyi, ba ɗa sǝ dǝdǝgur anǝ nda gagaɗau. 17Kǝ ji ndǝr anǝ nda ǝnga tsi aga nda nggya zǝmǝu. Ba ji nar nda ǝnggǝra Thlagǝ hǝbiya nyi sara wu fursǝna. “Hya nar nyi anǝ Yakubu ǝnga alenyi zamǝˈyar sǝ kǝ ɗa kau,” ǝngwar ja. Ba ji hyaˈari ba ji maˈyi a ndar vanyi vi.
18Ənggǝra vi sa kuɗau, ba ndǝr gwaɗǝvi gangǝ hyaˈari wu pama sojaˈyar ar kǝra sǝ kǝ ɗa ǝnga Biturusu. 19Ayukuɗa Hirudusu sǝwa nja gal nyi ǝnga jirkur, ama nji nǝr nyi mai, ba ji nǝ nyi vazau anǝ njir ɓǝla, kǝ ji na nja dlǝna nda.
Tǝr Hirudusu
Ayukuɗa nyi kǝ tǝl Hirudusu piyari ˈyiˈyir Yahudi ba ji maˈyi a vwu Kayisariya nǝ pǝci kushu. 20Kabangǝkǝ huɗa ja a ndzǝri ǝnga njir Taya ǝnga njir Sidonu gagaɗau. Ndǝ kaɓau ndǝ maˈyi a ndǝgya ja, ama kǝl ta ndǝ thlǝwa Bǝlastusu gaga nǝ tǝl aga ja dlǝwari nda. Ndu yiwa lagu kǝra nda daɓaga nggya jamǝu ǝnga ja, ara naja ngǝ lagu kǝra ndu uya sǝr sǝm ari. 21Ar pǝci kǝra Hirudusu hǝnggǝri nda ɓau nǝ ɓasǝwa, kǝ ji har kar nyi nǝ tǝlkur ǝnga ji nggya ar tsǝkafǝ nyi nǝ tǝlkur, kǝ ji pahǝna miya ji ndǝr anǝ nda. 22Ndǝ pǝnggǝr nyi kǝrawu, ndu na, “Ɗahǝ kǝ ɗaha vanyi hyal ngau, aˈyi ɗaha ndǝ mai.”
23Ənggǝrna, kǝ waladi Thlagǝ nǝ nyi dǝgau, ara naja aˈyi lǝr kadakadarkur anǝ Hyal mai. Kǝ hyamǝɗiˈyar sǝmku nyi ba ji tǝnakǝr.
24Ama kǝ ndǝr Hyal dumwa ǝnga cakau ba tǝtǝlnakǝr baˈamani.
25Ar pǝci kǝra Barnabasu ǝnga Suwalu kuɗǝna sǝra nji sǝwa nda aga mǝl a vwu Urshalima, kǝ ndǝ sha sara wu Urshalima a vwu Antakiya. Ndǝ hǝri Yahwana ndǝra nja ngga ǝnga Markusu.
©2024 Initiative for the Translation and Development of African Languages and Margi Tiwi Nga Təm