Thlǝr 14
14
Bulusu Ənga Barnabasu Wu Ikoniyamu
1Wu mǝlmǝ Ikoniyamu, Bulusu ǝnga Barnabasu maˈyi ǝnggǝra ndǝ tsǝliya a gwu umbwa daɓǝ dzǝ nǝ njir Yahudiya. A gwuna ndǝ tǝtǝlna ndǝr Hyal tsǝtsǝfǝ kǝra mǝliya nji gangǝ njir Yahudiya ǝnga njira aˈyi njir Yahudiya mai hǝnggǝri. 2Ama njir Yahudiya kǝra nggǝl ara hǝnggǝri tsǝtsǝkuri njira aˈyi njir Yahudiya mai, aga nda ɗa dawa njir nu.
3Alaga abangau, Bulusu ǝnga Barnabasu ndǝ ɓǝliya sar a ndǝna gagaɗau, nda vǝr tǝtǝlna ndǝr Thlagǝ gǝra ǝnga hivǝr. Thlagǝ cabiya nda abǝr sǝra ndu na ar kǝra mayiwakur nyi kau, jiri nga nyi, lagur nǝ nda dǝnama nǝ mǝl mǝtsamǝˈyar ǝnga sǝ dǝdǝgurˈyar. 4Ama njir mǝlmǝ kǝ a tǝkǝbiya dzǝ bwata mǝthlǝu. Alenyi nji ndǝ nu njir Yahudiya, alenyi nji tsu ndǝ nu cama sǝsǝ ˈyar. 5Ka ɗa njira gǝra njir Yahudiya ǝnga njir Yahudiya ǝnga njira nggurǝmǝr nda mbiya miya aga nda lǝr ɓwaɓwatǝ anǝ cama sǝsǝ ˈyar ǝnga nda vavaka nda ǝnga tsǝka aga nda tsǝya nda.
6Ənggǝra cama sǝsǝ ˈyar nggari abangau, kǝ ndǝ hwi a ndu huɗa ˈyiˈyir Likoniya, kǝra ca ngǝ mǝlmǝ Lisǝtǝra ǝnga Darba ǝnga ˈyiˈyi kǝra zǝwuya nda. 7Əna ndǝ dumwa ǝnga tǝtǝlna ndǝshigu.
Bulusu Tǝtǝlna Ndǝr Hyal Wu Lisǝtǝra Ənga Darba
8Wu Lisǝtǝra tsu a vǝr nggya a ndǝna vanyi ndǝ kukurɓǝ aˈyi. Ənggǝra nji ya nyi, naji saya ɓǝ mai. 9Ji sǝya himi anǝ Bulusu ǝnggǝra ju ndǝr. Kǝ Bulusu pǝnggǝr nyi li, ji lari abǝr mbǝrsa nyi a daɓaga shilǝgǝbiya nyi. 10Kǝ ji hyaˈana ɗahǝu ǝnga dǝnama, ji na, “Hyaˈari ga taˈyi ar hiya gau.” Nda nyi tsu ji hyaˈari maɗu ba ji mbar ɓau.
11Ənggǝra dlami lari sǝra Bulusu mǝliya, ndǝ hyaˈana ɗahǝ patǝ nda, ndu na ǝnga miya njir Likoniya, “Ənga jiri hyalˈyar a shidari ar kǝra mǝn a papa nji!” 12Kǝ ndǝ nǝ nyi thlǝmǝ anǝ Barnabasu, Zayasu. Bulusu tsu ndǝ ngga nyi ǝnga Hamisu, ariya naja ngǝ thlalǝˈwa ndǝr. 13Kǝ pubu nǝ Zayasu, kǝra ǝnga umbwa katǝ nyi a biyar ya mǝlmau, shili ǝnga thlaˈyar ba sǝr hǝ saɗaka ar miyar gwa mǝlma nyi. Ji mǝl abangau ara naja ǝnga njir mǝlmǝ ndu yiwu nda kǝbǝ kwatǝ anǝ cama sǝsǝ ˈyar.
14Ama ǝnggǝra cama sǝsǝ ˈyar Barnabasu ǝnga Bulusu nggari sǝ kau, ba ndǝ tǝtǝwa lǝgutǝr nda ǝnggǝra hangǝkalǝr nda hyaˈari, ba ndǝ vwu wu pama nji ǝnga hwi, nda vǝr hyaˈa ɗahǝu, ndu na, 15“Ara mi nga hyu mǝl abanga? Naˈya ma nji ngau ǝnggǝr nahyi. Naˈya ngǝ shili ǝnga ndǝshigu, aga hya piyari sǝ gǝra kǝr ˈyar kau, aga hya sha shili ǝgya Hyal mbǝmbǝɗau, ndǝra mǝliya dǝmǝlmau ǝnga gyi wu ˈyi ǝnga tsadau ǝnga tsu patǝr sǝra a gwu nda.
16Wu pǝci kǝra tǝrabiya, ji piyari nji patǝ nda mǝl sǝra ndu yiwu. 17Alaga abangǝ tsu naji saya nggya gǝra ǝnga sakida mai. Wu mǝl mǝnahǝkur nyi nga ja vǝr tǝɗǝ par anǝ hyi sara dǝmǝlmau, ju nǝ hyi vuya nǝ barka. Ju sǝmǝna hyi ǝnga sǝr sǝm ǝnga ju nǝ hyi nggya ǝnga caguli.” 18Ənga sǝˈyar kǝ ndǝ na kǝ patǝu, kǝ ɗa dzadzau anǝ nda, nda kari nda ara kǝbǝ kwatǝ anǝ nda.
19Ama alenyi njir Yahudiya shili sara wu Antakiya ǝnga Ikoniyamu. Ba ndǝ sa shabiya hangǝkala nda, ba ndǝ vavakǝya Bulusu ǝnga tsǝka aga nda tsǝya nyi, ba ndǝ tǝɗǝbiya nyi a biyar ya mǝlmau, ma ndu nggani abǝr a tǝri ja. 20Ama ǝnggǝra njir nu kaɓiya dzǝ ndǝ zǝwar nyi, ba ji hyaˈari ji sha a vwu mǝlmau. Əzǝgǝkura nyi naja ǝnga Barnabasu maˈyi a vwu Darba.
Sha A Vwu Antakiya Nǝ ˈYiˈyir Suriya
21Ayukuɗa Bulusu ǝnga Barnabasu tǝtǝlna ndǝshigu wu Darba, nanda tsu, ba ndǝ uya njir nu gangǝu. Ba ndǝ dzǝgwa sha a vwu Lisǝtǝra, ǝnga Ikoniyamu, ǝnga Antakiya nǝ ˈyiˈyir Pisidiya. 22Ndu tsǝtsǝku njir nu ǝnga ndu fǝ ɗǝfu anǝ nda aga nda taˈyau ǝnga dǝnama wu mbǝrsar nda. Ndu na, “Kǝl ǝnga sa ɓwaɓwatǝ gangǝ nga mǝna sǝni gwu tǝlkur Hyal.” 23Ayukuɗa nyi tsu ba ndǝ caɗǝbiya njira nggurǝm wu kalar daɓǝ dzǝ njir nu lagur kǝdi Hyal ǝnga hǝ zǝmǝtsini, ǝnga kǝ ndǝ fuwa nda wu tsa Thlagǝ kǝra ndǝ hǝnggǝri ǝni.
24Kǝ ndǝ nu lagu ˈyiˈyir Pisidiya a vwu ˈyiˈyir Pamǝfiliya. 25A ndǝna ndǝ tǝtǝlna ndǝr Hyal wu mǝlmǝ Parga, ba ndǝ dzǝgwa maˈyi a gyi wu mǝlmǝ Ataliya. 26Sara wu Ataliya nga ndǝ gwu kwambwal, ba ndǝ sha a dǝ wu Antakiya, vira nji fǝnggǝr nda barka nǝ mayiwakur nǝ Hyal tsu kaɗǝ ta, aga ja ɓǝlar nda wu thlǝr kǝra ndǝ kuɗǝna kau.
27Ənggǝra ndǝ shili, kǝ ndǝ kaɓiya daɓǝ dzǝ njir nu ndǝ nar nda patǝr sǝra Hyal mǝlna lagur nda, ǝnga tsu ǝnggǝra ji pahǝna nda lagur mbǝrsa anǝ njira aˈyi njir Yahudiya mai. 28A ndǝna ba ndǝ tǝɗari pǝci ǝkkǝˈyi njir nu.
©2024 Initiative for the Translation and Development of African Languages and Margi Tiwi Nga Təm