Thlǝr 11
11
Biturusu Nana Sǝra Ɗa Ji Mǝl Sǝra Ji Mǝl
1Cama Sǝsǝ ˈYar ǝnga njir nu kǝra wu ˈyiˈyir Yahudi nggari abǝr njira aˈyi njir Yahudiya mai a dlǝwuri nda ndǝr Hyal tsu. 2Ənggǝra Biturusu ɓǝra sha a vwu Urshalima, njir nu njira njir Yahudiya, vazǝya nyi, 3ndǝ na, “Mi ngǝ ɗa gǝ vwu ki njira aˈyi njir Yahudiya mai ya, kǝl ta gǝ sǝm sǝr sǝm ǝnga nda?”
4Biturusu dzǝgwa nar nda ǝnggǝra sǝˈyar kǝ patǝ ɗarkǝr, ji na, 5“Nayi wu mǝlmǝ Yafa ya vǝr kǝdi Hyal. Wu mǝtakǝr kǝ yi lari sǝ ǝnggǝr gwada dlaɓǝ sara dǝmǝlmǝ shida ǝnga sǝ mbamba ar thlǝrpa nyi foɗǝu. Ba ji shida tǝkǝɗǝ aga yau. 6Ənggǝra yi tsamǝ a gwu gwada kau, ba yi lari maˈwi kǝra ǝnga hi fofoɗǝ nǝ duniya, ǝnga ǝfwa tagǝu, ǝnga sǝr tǝɗǝ ǝnga ta, ba ˈyagǝˈyar a gwa. 7Ba yi nggari ɗahǝ a vǝr na anǝ ɗa, ‘Biturusu, hyaˈari, ga tsǝya ga sǝm.’
8“Kǝ yi shaɗǝwa, ‘Wu ɗa mai, Thlagǝu! Nayi saya sǝmku sǝra diyadiyaɓǝu alaga sǝra gǝra cici mai.’
9“Ama ɗahǝ sara dǝmǝlmǝ ɓǝra ndǝr wayu, ‘Ga sara ngga sǝra Hyal mǝliya cici gǝra cici mai.’ 10Sǝ kǝ ɗarkǝr aga makǝru, kadivira gwada ta ǝnga patǝr sǝra a gwa ɓǝra sha a dǝmǝlmau.
11“Ar pǝca nyi, kǝja nji makǝr tataˈyu a miya ki kǝra ˈya a gwa, njira nji sǝwa ɗa sara wu Kayisariya. 12Kǝ Mambǝl na anǝ ɗa, ya maˈyi ǝkkǝˈyi nda ya sara tal mai, abǝr nanda aˈyi njir Yahudiya mai. Zamǝˈyar kǝ kwa ngǝ maˈyi ǝnga yau, ndǝ lǝbiya ɗa, kǝ ˈyi shili wu ki ndǝ kǝ sǝwa ɗa ya shili kau. 13Ji nar ˈya ǝnggǝra waladi canǝ nyi kǝr wu ki nyi ka dzǝgwa nar nyi, ‘Sǝwa cama a vwu Yafa, nja nggari Simanu ndǝra nju ngga ǝnga Biturusu. 14Ju shili ǝnga ndǝshigu anǝ ngau, ǝnggǝra nagǝ ǝnga ki ngǝ patǝ wu uya mbǝɗau.’
15“Ənggǝra yi dzǝguya ndǝr, kǝ Mambǝl Cici shida a dar kǝra nda, ǝnggǝra ji shida a dar kǝra mǝn tanggǝrma ta. 16Kǝ yi ɗǝngari sǝra Thlagǝ na, ‘Yahwana mǝliya hyi baɓǝtizǝma ǝnga ˈyimi, ama ǝnga Mambǝl Cici nga nju nda mǝl baɓǝtizǝma anǝ hyi.’ 17Ma Hyal lǝri Mambǝl Cici anǝ njira aˈyi njir Yahudiya mai, ǝnggǝr kǝra ji nǝ mǝn ta pǝci kǝra mǝn hǝnggǝri ǝnga Thlagǝ Yesu Kǝrsiti, wa nga ya, ya taˈyi ar lagu nǝ Hyala?”
18Ənggǝra ndǝ nggari abangau, nandǝ ɓǝra dumwa ǝnga kǝpal mai. Ama kǝ ndǝ mbar fal Hyal, ndu na, “ˈYu lari abǝr Hyal a dlari ǝnga lagu anǝ njira aˈyi njir Yahudiya mai aga nda tubi nda uya pi gǝra kuɗau.”
Daɓǝ Njir Nu Wu Antakiya
19Kabangǝkau, njir nu kǝra tǝtǝlnakǝr ara ǝnggǝra nja vǝr ɗa nda, ayukuɗa tǝr Sitivinu, ndǝ maˈyi baˈa wu ˈyiˈyir Fonishiya, ba dzǝgu tsadǝ Sayipurusu ǝnga mǝlmǝ Antakiya, ndu tǝtǝlna ndǝr Hyal anǝ njir Yahudiya wacu. 20Alaga abangau, kǝ alenyi njir nu kǝra shili wu Antakiya sara wu Sayipurusu ǝnga Sayirini dzǝguya ǝnga tǝtǝlna ndǝshigu anǝ njir Gǝrikǝu ar kǝra Thlagǝ Yesu. 21Dǝnama nǝ Thlagǝ aˈyi ǝnga nda, ba nji gangǝ hǝnggǝri ba ndǝ sha a shili ǝgya Thlagǝu.
22Ənggǝra daɓǝ dzǝ njir nu kǝra wu Urshalima nggari abangau, ba ndǝ sǝwa Barnabasu a vwu Antakiya. 23Ənggǝra ji shili, kǝ ji sa lari mayiwakur nǝ Hyal a dar kǝra nda, kǝ ji nyabiya dzǝ ǝnga huɗǝ pipida, kǝ ji tsǝtsǝkuri nda, aga nda nu Thlagǝ ǝnga ɗǝfuwa nda patǝu. 24Naja Barnabasu ndǝ mǝnahǝ ngau, nyinyau ǝnga Mambǝl Cicau ba nǝnǝkur wu mbǝrsa. Lagu nyi tsu, ngǝ nji gangǝ shili ǝgya Thlagǝu.
25Kǝ Barnabasu maˈyi a vwu Tarsusu aga ja vwa gal Suwalu. 26Ənggǝra ji thlǝwa nyi, ba ji shili ǝnga ja a shili wu Antakiya. Gyapǝ nda ndǝ nggya ǝkkǝˈyi daɓǝ dzǝ njir nu a ndǝna nǝ fa pathlǝu, ndu highiɓǝ anǝ nji gangǝu. A ndǝna nga nji ngga njir nu ǝnga thlǝmǝ Kǝrsita tanggǝrma.
27Wu pǝci kǝ ngǝ alenyi nabiˈyar shili sara wu Urshalima a shili wu Antakiya. 28Pathlǝ wu pama nda kǝra nja ngga ǝnga Agabusu hyaˈari ji taˈyi wu pama daɓǝr nji, ji na lagu Mambǝl, abǝr nju nda gwu wuɓǝ thlakǝr gagaɗǝ ar patǝr ˈyiˈyir Roma. (Sǝ kǝ ɗarkǝr ar pǝcir tǝlkur nǝ Kǝladiyasu.) 29Njir nu kǝra wu Antakiya mbiya miya aga nda sǝwa sǝr dlǝwa dzǝ anǝ zamǝˈyar kǝra wu ˈyiˈyir Yahudi, kalar ndau, ja lǝri sǝra ju sǝni lǝri. 30Ba ndǝ tsǝmiya sǝra ndu lau anǝ Barnabasu ǝnga Suwalu aga nda hǝr nyi a nda nǝ njira nggurǝm nǝ njir nu kǝra wu Urshalima.
©2024 Initiative for the Translation and Development of African Languages and Margi Tiwi Nga Təm