Luk 5

Ñantaalibehu Yensa ñanliiho

1Angu afúrumi na, ayikyik bísiba, Yensa adék ba a jakaamo n'aretuhne Genesaret.#5.1 Gúduk anyéj jakanku Genesaret, gúduk anyéj jakanku Galile. Maŋ jakaamo amánduko ganlóbumohne. Bapúti a bakaranku jakaamo, jamaŋo antifem andak anlahunam na anrumun tip. Angu, Yensa awonn a gúmeero k'akawandineh jamaŋo. Angu, ampádayeh ba búteejahu Yensa k'ampiren anyennehin hóbun Gúloku Díino. 2-3Angu Yensa, bafégi ni jamaŋo ampádayehne ba bujantenku kawandhánam, anuurula, te banuurulay, afég múndeen munnak a gubilhu jakaamo. Agida ni ñambaalo ankuc a múndeeno k'aŋŋay buwokihu jambaalankánin. Angu, ubaalo úduko gurethinem Simon. Angu, Yensa adék baman maŋ na a sídenkinem. Bapúti, alób ingi Simon ki immereŋ inako anyifa a sídeeno. Banyifay, ayéj Simon:

- Inini, ímpádulahoŋ ba naŋan ka jakaamo afaŋunumne n'adooŋ!

Angu bampádulay, Yensa anooh a sídeeno k'aŋay bukawandinku m'angune a gubilhu jakaamo.

4Angu babollay kawando, ayéj ummu sídeeno m'aretuhne Simon:

- Inini! Índokoŋ ba beŋen bi jakaamo afaŋunumne n'adooŋ k'uworoŋ bim jambaalankánan.

5Angu, úmár ayéjem:

- Arafaŋ, ingah! Káriman déegen giguyminne nanka, kongurimiŋ haman kokat. Kanda inini, ni f'úyejne mint índokoŋ, índokoonuŋ angu k'ídek ibaalmiŋ bim.

6K'angu andék bi jakaamo afaŋunumne n'adooŋ. Bampút bim ampad jambaalo. Jambaalo alah jakato fo jambaalo arumun tip, f'ásiiba guhal. 7Angu, banfégi mara jambaalhánin ba buhal gadékehne, anhuy índinenkinin m'angune beŋen k'andéker ba búkááñinahinkinin jambááho. Angu, bambááhári jambaalo, anwakul jakato a múndeeno munnako, fo múndeeno aŋay bulim. 8Angu Simon Piyer, bafégi hómár, adék aruŋa a jannoku Yensa k'ayéjem:

- Arafaŋ! Ingah! Fi wúur urenni fet. Me, dipiren sinkokayo ingi fi. Me ilabunlabun júnuboŋo. Angu, bonkerer k'úbenneem k'údek.

9Úpájuleŋ, fo Simon alóbne nim, úmár n'ajuhula dáde. Ñambaalo índukoŋo mees anjuhulajuhula dáde a gubaarhu jakato j'anlahne fanfaŋ. 10Índinenku Simon m'anretuhne Jak ingi Saŋ imberenku Sebedi, banfégi h'ayikne, immereŋ mees anjuhulajuhula.

Angu na Yensa ayéj Simon:

- Simon! Ingah! Buku ubenuh. Afúrumi bísibaŋo bi gub fi uguyhuneh ubaalhu jamaŋo k'andéker ba a binaam.

11Angu Yensa balóbi nim, Simon ingi índinenkinem anjonna ba a gúmeero. Bampút a gúmeero, ankuc a múndeeno. Bankuci ambénn na múndeeno ingi hogurumaareŋ h'anyikne nip k'antifilin Yensa k'anguy ñantaalibehinem.

Ka Yensa ajébunne ñanjébireŋo índukoŋo

12Angu ayikyik bísiba, Yensa adék ba a saari adúk, úmár ingi ñantaalibehinem. Bapúti a saariŋo nómár, údiigeen mu kafaño alah adéker ba a binaanam. Agida wúuro úmár, kafaño ayikyik sembe dáde a arinkinem. Arinkinem nip anoonooh kafañ. Angu údiigeeno, bafégi Yensa, aŋoya baman a réeŋo ayéjem:

- Arafaŋ! Me ísiibáásiib k'újebineem. Afeereemfeer maro agi asúumi fi, upiren újebineem ki kafaño afúr arinkum nip.

13Angu, maŋ ni ayéjne ki Yensa ajébinem, Yensa adooh silakánam k'alóbund újebireŋo, ayéjem:

- Ingah! Me ísiibáásiib k’újeb! Jéber k'urenn!

Angu balóbi nim, kafaño afúr imbi údiigeeno. Údiigeeno ajéb kaŋ. 14Angu, údiigeeno bajébi, Yensa ayéjem:

- Ingah! Dahu úduk úteekin haani wúur k'úyejem me íjebinenne. Inini gúdekehne ba bukaano: Wúuhor údek ba imbi alimaamo, kanda guŋay hadéko, utohun leeyaŋo no Luwahu Musa amiihulne. Úputdir na ujellihin alimaamo n'újebne, k'aninginkin arinken ki nim aseediya mara kafaño afúrfur a binankan. Ukandir nim mees, úfunn leeyaŋo no Luwahu Musa amiihulne. Angu, aji ukaani nim, hómár ajellihinkineh jamaŋo maro újebjeb kaŋ.#5.14 Aññaaññaañ a injileŋo adúkoŋo mara údiigeeno búuñaaraŋ ho Yensa alóbemne. Adék asinar imbi jamaŋo nip mara Yensa ajébinemne.

15Angu , afúrumi na, gurethu Yensa afaŋunum n'ayéega dáde. Beŋen beŋen apaspas. Angu jamaŋo andékireh imbi Yensa anrumun tip, ki k'anjanteneh kawandhánam ingi mees ki k'ajébun m'annérne. 16Kanda gúduk ungo na, Yensa adék ba a kantíg k'ayerer k'aŋay na saliŋo. Nim gakaanahne.

17Angu afúrumi na, ayikyik bísiba Yensa aŋayŋay gukawandinku jamaŋo. Angu dam, m'antohne a dayrahu ñanfarasiyaŋo imme na ingi ñankeekihu Hañaañeno mees. Agida immereŋ ñanfarasiyaŋo ingi ñankeekihu Hañaañeno, a saariyeŋ alabayeŋ ganfúruntne k'andéker ba imbi Yensa. Anfúruntifurunt beŋen beŋen a didiirahu Galile. Índukoŋo anfúrumor a didiirahu Júde ingi a bukooro b'ayéjuhne Jerusalem mees. Dam immereŋ ñanfarasiyaŋo ingi ñankeekihu Hañaañeno andékirne anrumun tip k'annooh na ingi índukoŋo mees m'andékerne ba bujantenku Yensa. Jamaŋo nip anféfeg dam sembeŋo no Umuyhintor anahne Yensa ba bújebunku jamaŋo. 18Agida bísibaŋo bímár, Yensa a gufac gagune k'aŋay bukawandinku jamaŋo. Angu, ayikyik índiigeen índukoŋ m'andoohor údiigeen a yindayindo. Agida údiigeeno úmár, arinkinem afoyne fo pirendeŋ hadék. Angu, anyongorom a yindayindo f'andék ampút a dígo ka Yensa aŋane bukawandinku jamaŋo. Bampúturi, anlahun jamaŋo n'anrumunne na tip. 19Angu, pirendeŋeŋ k'aŋŋan a gufaco k'anfég Yensa. K’angu anyéj:

- Inini, mintoroŋ k'inkaanoonuŋ neeraŋ?

- Ingah! Inini, iŋŋafoŋ a teraaso k'innuhoŋ teraaso k’impirenoŋ inkucunoŋ újebireŋo imbi Yensa.#5.19 Agida hádigenkinin furiiraa. Akolenaakolen bareŋ.

K'angu aŋŋaf a raafo k'annuh teraaso anliihay ingi ka Yensa agune, k'ankucun mu arinkinem afoyne a yindayindo baman maŋ na a jégenenku jamaŋo a jannoku Yensa. Immereŋ nim gankanne.

20Angu, Yensa bafégi n'ankucuntne újebireŋo inini, apájul mara immi m'andootemne újebireŋo anfiyumemfiyum. Angu, ayéj újebireŋo:

- Uñankum ingah! Fi, jínubonkon nip akafariyaakafari.

21Angu balóbem nim, ñankeekihu Hañaañeno ingi m'anyéjuhne Ñanfarasiyaŋo ammiihorah a jamméejenkinin k'anyéjeh:

- Jeh! Ummu, kantaŋ ganinkne bigokunom? Budoku bunoohunku Díino gasíibane maro Díino ba bareŋ apirenne akafari jínubonku uraagofoŋo.

22Angu, Yensa apájul hóbun ho immi anlahne a jamméejenkinin. Ayéjeeniŋ:

- Ii ninkinan ! Horaŋ akanne k'uwoseneŋ ineeŋ? 23Ingah! Horaŋ asúumne balób? Karo íyejem: «Jínubonkon akafariyaakafari», karo nuko íyejem: «Kenger k'údek!» ?Ingah! A binaam, búyejo nim lédum, hómár nip ínhonduko.

24Aŋoolin ayéjeeniŋ:

- Iyoo! Ninkinan túyoreŋ baŋ! May k'úfegeŋ mara Údiigeeno M'acaabenaane, ayikyik binaal a duniyaŋo ba bukafarihu jínubonkánan.

Nim gayéjne ñankeekihu Hañaañeno ingi ñanfarasiyaŋo. Angu babollay, ayéj mu arinkinem afoyne:

- Ingah! Kenger, k'udooh yindayindhen k’úŋuñ!

25Údiigeeno akeng puc, awonn a sígihu jamaŋo nip, k'adooh yindayindhinem n'awaanamerne k'atuŋul hadéko. Maŋ ni adékehne, maŋ nim garamunahne Díino.

26Angu, immereŋ nip, banfégi hómár, alaaleeniŋ piw k'antoŋ buramunku Díino. Kanda andéwundewun mees k'anyéjeh:

- Mintoroŋ gub, ífegoonuŋfeg honj hóde ho fégahadoŋne a duniya!

Ka Yensa ambabayne guyaahálaŋo ingi ñammi júnuboŋo

27Angu afúrumi na, Yensa bafúri a dígo, maŋ ni aŋayne hadéko, afég ujutiŋo m’anoone a taabálo k’aŋay bujaku jutiŋo. Ujutiŋo úmár, gurethinem Lefi. Angu, Yensa bafégem na ayéjem:

- Fi! Tifireem baŋ!

28Angu, údiigeeno abénn dohoŋo n'aŋane ingi h'ayikne nip k'atif Yensa.

29Angu afúrumi na, ujutiŋo úmár m'aretuhne Lefi, asíiba bújogunku jamaŋo a díkinem ba gúbuuñahu Yensa. Angu, ahuy ñanlabahi ba guyaahálaŋo dam. Agida m'antohne a dayrahu ñanfarasiyaŋo imme na, ñankeekihu Hañaañeno imme na ingi índinenku Lefi ñanjutiŋo mees imme na. Angu, f'aŋŋane na guyaahálaŋo, Yensa ingi ñantaalibehinem ambabay guyaahálaŋo ingi ñanjutiŋo#5.29 Ñanyahudo anlahlah mara Díino apahunkuneh immereŋ Ñanyahudo nip f'adék afalla m'anfaŋumune n'anlápur. Anlahlah mara ñanjutiŋo anlápurlápur fanfaŋ, angu Díino dapahuneeniŋ. Angu, a gubaarhu hómár, Ñanyahudo m'ambúuñahne Luwahu Díino ñanlabahi daŋŋanahar díku ujuti. Faka dambab guyaahála ingi ujuti. Nim Ñanyahudo mi jamaanihu Yensa ammíirne. ingi ñankanku hójondoŋo índukoŋo. 30Angu ñanfarasiyaŋo ingi ñankeekihu Hañaañeno, banfégi hómár, hómár súumáreeniŋ, k'angu andék ba imbi ñantaalibehu Yensa, anyéjeeniŋ:

- Horaŋ akanne ki ninkinan ingi arafankánan ubabayeŋ guyaahálaŋo ingi ñanjóndoŋo immi, ñanjutiŋo ingi ñankanku hójondoŋo índukoŋo?

31Yensa ayennehin k'ayéjeeniŋ:

- Ingah! Eke, aji jéburo údekhineh imbi usaajumo? Kanda, aji honj lahuro, dúdek ba a binaanam?

32Abocin ayéj:

- Angu, maŋ nim gamíirne a binaam. Ingah! Me, ii, mi wúuhuroŋoŋne gídekuntne guhuyo, ki nim ankúbul jamméejenkinin imbi Díino. Kanda wúuro m'awúuhne mungu, jadaŋ búyejhinem akúbul jamméejhinem imbi Díino.

Nim Yensa aŋoyindeeniŋne dam.

Gudeemayo ingi guwunkulo

33Angu, ayikyik jamaŋ m'andéker ba bumiku Yensa honj a gubaarhu sumo. Angu, anyéjem:

- Ingah! Ñantaalibehu Yaya gansumosum, gansaliyesali mees. Ñanfarasiyaŋo mees gansumosum gansaliyesali waatowaat. Kanda n'ífegminne, taalibenken gara ansumoh. Ganyaahálayaahála, ganruuhoruuh. Horaŋ akanne?

34Aŋoyindeeniŋ ayéjeeniŋ:

- Ingah! Ninkinan aji uyikeŋ bajah, hóge usumhunoŋ? Ningeŋ baŋ na! Damanta údiigeeno ummo na, ninkinan dusumoŋ. 35Kanda ayikhineh bísiba bi índukoŋo andék anfúnnhunehne údiigeeno a binanin. Dam gansumhánehne angu.

36Balóbi nim, afak abocindeeniŋ funaare fúduk ayéjeeniŋ:

- Ingah! Gusolhon gudefinno, aji anuhi, hóge udookuneh píso awunkulo k’úduk uleeŋ na k’anuhne? Wówo! Dukaan nim maro dandékay deh! Eke píso awunkulo abompenaháneh k’afaŋunum n’afac akuuro?#5.36 Imbi inini, Yensa atéekinteekin jamaŋo maro dajóon k'ambabahin kawandhánam ingi hakankánin ha hadeemayo.

37Abocin ayéjeeniŋ:

- Ingah! Uraagofoŋo dadooh baaruku reseŋo bawunkulo akaan a jíbáágo akúuro k'arok. Eke aji úbenni baaruku reseŋo f'amiñ, abokuneh? Angu, aji abohi na a jíbáágo akúuro, jíbáágo afilhineh. Angu, kunnohu reseŋo #5.37 Kunnohu reseŋo ganruhohne ayehyeh. Kasáraŋ bukanilinku wúur. Na gamburayumne ingi kunnohu sibekelo k'akasne bukanilinku wúuro. Immereŋ gúduk ungo na gandoohodooh kunnohu reseŋo k'angaasahin ingi baaruku koloŋo k'apiren abuj tañoŋo n'agune a baaruku koloŋo. ahupaháneh. Angu, ufootaháneh kunnohu reseŋo ingi jíbáágo mees.

38Abocin ayéj:

- Eke, uñantay ukaan baaruku reseŋo bawunkulo a jíbáág awúnkul k'aboh na. Jíbáágo nómár dafil. Angu, baaruŋo bámár abohdir aguyhuneh kunnohu reseŋ te dafili mees jíbáágo. 39Kanda ingah! Aji uruuhi kunnohu reseŋo, dúsiiba buruku kuwunkulo. Úyejhineh kunnohu reseŋo n'amiñne kúmár akohne.#5.39 A funaareŋo unfu jíbáágo akuurinno, jímár agune coosananku Ñanyahudo. Agida, immereŋ Ñanyahudo ambocinbocin holabahi a luwaŋaŋo no Díino awonnundeeniŋne. Angu, baaruku reseŋo bawunkulo, bámár agune kawandhu Yensa, te dupiren k'udooh hómár ubabahin ingi cosaanaŋo no famo. Imbi inini Yensa aŋay búteekinkinin mara aññantay ambénn coosanankinin k'anlah kawandhánam.

Nim Yensa ajaabine jamaŋo m'ammiihemne a gubaarhu ni ñantaalibehinem gara antifilinehne coosananku ñanfarasiyaŋo ingi ho ñantaalibehu Yaya ankaanahne.

Currently Selected:

Luk 5: GD

Highlight

Copy

Compare