Luk 6

Fo Yensa ajellihinne jamaŋo a gubaarhu bísibaŋo bi guyohálaŋo

1Angu, afúrumi na, babári bísibaŋo bi guyohálaŋo, Yensa ingi ñantaalibehinem aŋŋay hadék anwusunam a guraaho g'alááfálaane. Agida h'alááfálaane n'aboh. Angu f'aŋŋane guwusunaŋo, ñantaalibehinem ammuñoh agofonku h'alááfálaane a guraaho k'ammorohineh ankábáh andékeh. Maŋ nim gankaanahne a bísibaŋo bi guyohálaŋo. 2Angu ñanfarasiyaŋo, banfégi h'aŋŋane bukaano, anyéjeeniŋ:

- Angu, ninkinan! Horaŋ akanne k'ukankaŋ ineeŋ a bísibaŋo bi guyohálaŋo? Ingah! Adiigumaadiigum! Bísibaŋo bi gub, wúur ñantaaraŋ adóol.#6.2 Marigen, a Luwahu Musa ayéjyej maro jamaŋo ñantaaraŋaŋ andék ba dohoŋo bísibaŋo bi guyohálaŋo. Kanda Luwahu Musa afak ayéj mara jamaŋo mi kúugo alahne anyikyik binaal ba bufathu jafoolaŋo j'awaalne a bakaranku guraho.

3Ki Yensa ayéjeeniŋ:

- Ninkinan! Hóge karaŋuroŋ a Hañaañeno ho Umaasaŋo Dawuda akanne? 4Dawuda ingi ñankokaykinem ii, f'aŋŋane hadéko a binaalo, kúugo alaheeniŋ. Angu, anfég na búkáso burenninno b’antúyohne Díino. Na gaŋŋanne. Baŋŋani na a búkáso, Dawuda adak alahun úmbuuro arenninno n'ambúuñane Díino. Adooh úmbuuro nómár k'ankibay ingi ñankokaykinem k'ankáb. Agida úmbuuro nómár, mu guyroŋ alimaam, dakáb. Kanda dam, Dawuda ingi ñankokaykinem, guyroŋoŋ alimaamaŋ, kanda maŋ nim gandoone úmbuuro nómár k'ankáb.

Yensa abocin amiiheeniŋ, ayéjeeniŋ:

-Inini ninkinan, hóge hómár karaŋároŋ a Hañaañeno? Ingah! Fo Dawuda akanne nim, Díino yéjahadaŋ ayúulenyuulen. Angu, horaŋ akanne ki ninkinan úsiibááhaŋ búneku ñantaalibehum kayúulen?

5Angu, Yensa aŋoolin ayéj ñanfarasiyaŋo:

- Ingah! Údiigeeno M’acaabenaane, ayikyik binaal k'ayéj jamaŋo, «Kanteŋ inini a bísibaŋo bi guyohálaŋo!» wola, «Dahu ukaanaŋ inini a bísibaŋo bímár.»

Nim Yensa ajaabine ñanfarasiyaŋo bísibaŋo bímár.

Ka Yensa ajébunne údiigeeno mu silakánam afoyne

6Afúrumi na, bísiba bi guyohálaŋo bíduk apútor. Angu fo bísibaŋo bímár apúturne, Yensa adék ba a jaameŋo. Bapúti aŋay bukawandinku jamaŋo. Agida, dam ayikyik na údiigeen úduk mu silakánam siyaaho afoyne. 7Angu ñanfoyhu Yensa, ñankeekihu Hañaañeno ingi ñanfarasiyaŋo, immereŋ imme na dam. Kanda immereŋ anningeh Yensa karo adék akankáneh honj h'ópájulne anneninkinem k'andékirem a binaal. Angu, anningeh karo ajébunkuneh údiigeeno a bísibaŋo bi guyohálaŋo. Fégeŋ baŋ, immereŋ anyéjyej, aji Yensa ajébuni údiigeeno dam, immereŋ ampirenkineh andékirem a binaal maro adohodoho a bísibaŋo bi guyohálaŋo.

8Agida Yensa mungu, apápájul ho jamméejenkinin alahne ba bukaano. Angu, ayéj údiigeeno mu silaho afoyne:

- Dókulo k'uwonn a jégeneŋo baŋ!

Údiigeeno akenger k'awonn maŋ na a bájegenenku jamaŋo. 9Angu f'awonnáne a bájegeneŋo, Yensa ayéj ñankeekihu Hañaañeno ingi ñanfarasiyaŋo:

- Ninkinan, túyomuŋ baŋ k'imiihoonuŋ honj. Luwahu Díino, neeraŋ gamiihulne? Karo ukaanaŋ hójooni a bísibaŋo bi guyohálaŋo, karo ukaanaŋ hójondoŋ? Karo upahun wúuro m'agune a hóleeri? Karo úbennem maŋ na k'aniiro? Angu, binaalo neeraŋ gayéjne na?

10Nim gamiiheeniŋne. Angu balóbi nim, aningilin immereŋ nip m'angune na ayéj mu silakánam afoyne:

- Inini, tukir silakan!

Údiigeeno atukul. Batukuli silaho, silaho ajéb ammíir ingi sídinem. 11Angu, banfégi hómár, ñankeekihu Hañaañeno ingi ñanfarasiyaŋo aññuumul fanfaŋ k'aŋŋay sinwocayhu jamméej n'ankankánehne k'anyikinaam Yensa.

Fo Yensa acaabenne ñambúuñurankánam

12Angu, fo hómár ayikne dam a jaameŋo, miñireŋ ayik bísiba bíduk Yensa adék ba a montaañ adúk. Bapúti a montaaño nómár, atoŋ saliŋo. Jaketo nómár nip Yensa sali bareŋ gakanne. 13Angu, asalisali f'adék arenn. Barenni, ahuy ñantaalibehinem k'andék anjóg a binaanam. Angu banjógi na, imbi immereŋ afúnn índiigeen haala ingi inak. Angu, índiigeeno immereŋ Yensa areteeniŋne ñambúuñuraaŋo. Moŋon moŋon uguyhuneh ukokaykinem.

14Inini, túyomuŋ baŋ k'íteekinoonuŋ harethinin: Simon, mu Yensa aŋanáne Piyer, ummo na, ingi údonku Piyer m’aretuhne Andáre, ingi Jak ingi Saŋ, ingi Filip ingi Batelemi, 15ingi Matiya, ingi Toma ingi úbáku Alfiyus m’aretuhne Jak, ingi Simon m’atoherne fam imbi m'aŋŋane buñaamálinku jamanku Rom. Agida jamanku Rom gammarahne didiirahu Israyel a waato nómár. 16Ingi Judas úbáku Jak ingi Judas Iskariyot m’alabaŋne ajuliya bigoku Yensa.

Immi, immereŋ angune ñambúuñuraaŋo mi Yensa afúnnáne.

Fo Yensa akucurne a montaaño k'ajébun ñanjébireŋo

17Angu afúrumi na, Yensa bafúnni ñambúuñuraaŋo, immereŋ haalaŋo ingi inako, angu ankucor a montaaño ingi immereŋ. Angu, bampútri ka didiiraŋo akanne meelmeel, anlahun na ñantaalibehu Yensa índukoŋo jup ingi jamaŋo n'aŋŋane bútuyhunom anrumun na tip. Agida immereŋ beŋen beŋen ganfúruntne. Ayikyik m'anfúrumor a kapitalo Jerusalem ingi m'anfúrumor a saariyeŋ alabayeŋ no didiirahu Júde, ingi m'anfúrumor a akooreneŋo n'antéejane fankaaso. Maŋ ni alahumne Tir ingi Sidon ingi didiiraŋo dímár nip, immereŋ nip andékerne bísibaŋo bímár ba bulahunku Yensa. 18Angu, immereŋ nip Yensa alahunne f'ankucurne a montaaño ingi ñambúuñuraaŋo. Agida bujantenku kawando gandékuntne ingi mees ki Yensa ajébuneeniŋ. Angu dam, ñanjébireŋo imme na. Mi fáguhoŋo aŋŋane arinenkinin, imme na mees. Angu mi jébireŋeŋne, Yensa ajébuneeniŋjebun. Mi fáguhoŋo aŋŋane arinenkinin, afúnndáreeniŋ fáguhoŋo arenn fet. Immereŋ nip anjébunaajebun dam. 19Angu Yensa, gadoohi silakánam k'alóbund újebireŋo, újebireŋo úmár ahar ajéb maŋ fam. Angu, banfégi hómár, jamaŋo ampájul mara sembehu Díino inno na a binaanam. K'angu, f'anfégne hómár ampádayeh ba bumapunkánam.

Ka Yensa alóbne a nintiku wúuro mu Díino afaŋunumne n'aningeh k'adooh barakehinem akandáram.

20Angu, afúrumi hómár, Yensa anuurula imbi ñantaalibehinem k'akomb bukawandinkinin, ayéjeeniŋ:

- Ninkinan! Janteneŋ baŋ k'íteekinoonuŋ a gubaarhu wúuro mu Díino afaŋunumne n'aningeh k'adooh barakehinem akandáram:

Fi, m'ugune a balaalo, fi m'uŋaaybene, Díino, fi gafaŋunumne n'aningeh k'adooh barakehinem akandáro. Ingah! Fi utohtoh a maasayahánam.

21Yensa abocin ayéjeeniŋ:

- Fi mu kúugo alahne, Díino, fi gafaŋunumne n'aningeh k'adooh barakehinem akandáro. Ingah! Bísiba apútokuneh, Díino akankáneh k'uhay.

Afak aŋoolin ayéjeeniŋ:

- Ingah! Fi m'ukulohne, Díino, fi gafaŋunumne n'aningeh k'adooh barakehinem akandáro. Ingah! Bísiba apútokuneh ukiilhineh, usewohuneh.

22Abocin ayéjeeniŋ:

- Ingah! Fi mees, fi m'ugune ingi me, fi mu jamaŋo anfoyne, fi, mu jamaŋo anhunamne, fi mu jamaŋo antibarne, fi mu jamaŋo ansutunne, fi, mu jamaŋo anjodamahne, te hómáráŋ nip a gubaarhu n'ufiyumne me Údiigeeno M'acaabenaane, Díino, fi gafaŋunumne n'aningeh k'adooh barakehinem akandáro. Ingah! Bísiba apútokuneh, fi useewohuneh fanfaŋ. 23Ingah! Aji nim gankankoone, añantay asúumo dáde fo uñaŋ búsewo, mara baraaj báde imba na arjanna n'atúyuho. Ingah! Maŋ ni immereŋ anfégunkoonuŋne, maŋ nim maamaamankánin mees anfégunne fam anabiyoŋoŋo.

Ka Yensa alóbne gu wúuro m'afékinehne kunyoku Díino ingi baléero

24Abocin ayéjeeniŋ:

- Kanda ingah! Hantaŋ afékinehne kunyoku Díino ingi baléero?

Ingah! Fi ummu kunyiko. Ingah! Ujahjah básuumo mees a duniyaŋo. Bísiba apútokuneh fi uyokuneh deh.

25Fi, m'uyaahálane guyaahála gúsuumi, fo uhay diŋ. Ingah! Bísiba apútokuneh kúugo alakuno!

Fi m'úseewone k'ukiileh. Ingah! Bísiba apútokuneh úfekineh baléer k'ukuloh.

26Ingah! Aji jamaŋo nip gandankahne gurethen, bísiba apútokuneh fi uyokuneh deh. Fégeŋ baŋ, maamaamankánan anyoofunyoofun haretenku anabiyoŋoŋo m'aŋŋoosunohne Gúloku Díino k'anjodoh jamaŋo. Ingah! Anabiyoŋo ámáráŋ, ii, buruhu k'anlób balób b'ópájul b'asúumhunehne Díino, ganlóbolob h'asúumhuneh ilahu jamaŋo. Gara antéekineh jamaŋo ho Díino alóbne. Angu, Díino ayeheneeniŋyehen. Gúmár akanne íyejoonuŋ, aji jamaŋo nip gandankahne gurethen, maŋ ni andankahne hananin, fo úkáánum na dáde!

Impokunoŋ índinenkintor ñanraagofoŋo

27Yensa aŋoolin ayéj:

- Kanda ninkinan nip m'uŋayeŋne bujantendukum, túyomuŋ baŋ k'íteekinoonuŋ: Fi, pokunt wúuro m'afoyenne, kantem hójooni. 28Aji adankahen, fi duwatem hójooni. Aji afégunen, kiinatem Díino duwa ajóoni! 29Ingah! Aji wúuro aleehen a gutok, buku uwaaña! Aji aleehen a gutok, béntem k'afak aleeho a gutoko gúdinem. Aji wúur adoohi sabadóorhon, béntem k'afak adooh gusolhon.

30Abocin ayéjeeniŋ:

- Ninkinan! Aji wúur akiinahen honj, naharem! Aji wúur adohi honjhon, dahu úyejem, aŋoyindito! 31Ingi faka, hójooninno h'ósiibane a bigokon, kant nim údinhen! Ingi faka mees, fi, h'ópájulne dukaanora fi bigokon, dahu ukaan údinhen hómár!

32Yensa afak ayéjeeniŋ:

- Ninkinan! Uñantaheŋ upokunoŋ jamaŋo nip, te bupoko búmár sínkááñinayo ingi sinkandárayo atohtoh na. Ingah! Angu, aji upokuni m'ampokunenne ba bareŋ k'ukandáreeniŋ hójooni k'umuk imbi immereŋ bareŋ, hóge na ukankaan honj hóde? Wówo! Hómár ledeŋ bukaan. Ingah! Aji umuki imbi m'ampokunenne, fi jado buramun. Haani ñanjóndoŋo faŋ, gampokunopokun k'ankandur hójooni imbi índinenkinin m'ampokuneeniŋne. 33Ingi faka, aji ukanduri hójooni imbi m'ankandurenne hójooni k'umuk na, hóge fi úbábár buramun? Bádo buramun baŋ! Ingah! Haman ñanjóndoŋo, immereŋ mees gankandurakandur hójooni imbi m'ankandáreeniŋne hójooni. 34Ingi mees, aji úmááguni jamaŋo m'anferenne ancaamhuno, k'umuk imbi immereŋ bareŋ, hóge hómár abábár buramun? Ingah! Fi na bádo buramun! Ingah! Haani ñanjóndoŋo faŋo gammáágánayemáágánay. Fi ñantaaro ucaaben imbi m'ankiinahenne k'úmááguneeniŋ.

35Yensa abocin ayéjeeniŋ:

- Ingah! Ninkinan! Ñantaaroŋ úmiireŋ ingi índukoŋo. Úpájuleŋ, immereŋ gara ampokunoh m'anfoyeeniŋne. Angu, ninkinan mungu, aji wúur afoyen, pokuntem k'ukanduram hójooni! Aji wúur asíibay k'úmáágánám, mááguntem! Kanda buku uŋan a jamméejhen mara añantañanta aŋoyindo. Dahu útifem. Máágunteeniŋ! Ingah! Aji ukaani nim, uyikhineh baraaj bádé. Faka na ukankaan ho jáberenku M'alahne Sembeŋo Nip aññantane ankaan. Agida, Díino fankánam nim gakaanahne. Ingah! Haani jamaŋo mi gara antúyohne ámár Díino, ingi jamaŋo m'anlápurne, Díino fankánam gakandukeeniŋkandur hójooni. Bayundaŋ bukandukánin hójooni. 36Bááhánan m'agune arjanna bankabankánam afufuuh. Inini, ninkinan mees, uñantaheŋñanta uyikeŋ bankabaŋ imbi índinenkinan ñanraagofoŋo, maŋ ni Díino ayikne bankabaŋo a binanin.

Biki inkaanorahoŋ bompenku ñankitiŋo k'inkasoŋ búneku índinenkintor ñanraagofoŋo kayúulen.

37Yensa abocin ayéjeeniŋ:

Ninkinan! Dahu ukaanorahaŋ bompenku ñankitiŋo k'ukasaŋ búneku índinenkinan ñanraagofoŋo kayúulen. Maro aji ukasi búneku wúur kayúuleno, jamaŋo ankasháneh búneken kayúulen.

Aŋoolinkin ayéjeeniŋ:

- Ninkinan dahu ukasaŋ búyejo mara údinhinan añantay ayehenaa a gubaarhu hójondoŋo h'akanne! Nim mees Díino dakas buyehenken a gubaarhu hójondoŋo ho fi ukanne. Ninkinan moŋon moŋon uñantañanta ubonker údinhen, ki nim fi mees ubonkeraa.

38Yensa afak abocin ayéjeeniŋ:

- Ninkinan! Aji údinhen ayiki haaj, naharem. Ingah! Maŋ ni unahne wúuro úmár, maŋ nim Díino gadékehne bunakan. Aji uliihi gúlandáro arumun, úlobunahin fo awusuna gubilihinem, Díino aŋoyindukuno gúlandáro arumun alóbunahin fo awusuna gubilihinem. Ingah! Guliihamo gu fi udoone ba búnéku údinhen, maŋ guliihamo gúmár Díino adokunehne k'aŋoyindo h'óneerne.

Nim Yensa akawandinne jamaŋo.

39Agida, Yensa a kawandhánam dam afúnnduteeniŋfunndut funaareŋo unfu. Ayéjeeniŋ:

- Ninkinan! Hóge ñanraagof inak m'ampím, aji ankokay, hóge ampirenpiren antuulenay? Wówo! Aji antuulenay, immereŋ inako ampiren anen a gusuno úngonduko.

40Yensa abocin ayéjeeniŋ:

- Ninkinan! Ingah! Ukaraŋo dapiren k'afaŋ ukarandinkinem lóndo. Kanda aji ukaraŋo akaraŋi f'adék adétun, apirenpiren ammur ingi ukarandinkinem lóndo.

41-42Yensa abocin ayéjeeniŋ:

- Ingah! Buku úneer údinhen uraagofo kayúulen, mara hómár akankaan ininkaman f’úyejyej ba bufunnhu kopoñ k'aŋan a sígihu údinhen, agida fi a sígihen daleŋaar agune na, kanda fi korosuro. Angu, k’úfunnur moŋon neeraŋ kopoño a sígihinem, agida fi daleŋaaro inda na a sígihen?! K'úfegoorum neeraŋ? Jeh! Kanda ninkinan ñoperej! Ingah! Fo unohum úfunn guleŋaaro g’agune a sígihen, nim ukur upiren úfeg kopoño k’agune a sígihu údinhen k'upiren úfunnorom.

Nim galóbeeniŋne.

Gúpájuloorunku wúuro a hakaanankánam ingi a balókunom gaguyuntne

43-44Aŋoolin ayéjeeniŋ:

Eke sinoŋo, úpájuloorunkunom a gubaarhu bídimerenkinem? Aji sino síjooni, bídimerenkinem ajónkáneh. Kanda aji sino síjondoŋ, bídimerenkinem dajóon. Inini, maŋ ni úpájuloorunkunehne sinoŋo a bídimerenkinem, maŋ nim nuko gúpájuloorunkunehne uraagofoŋo a níndekorunkunom, karo wúur újooni, wola karo wúur újondoŋ. Ingah! Sinoŋo síjooninno dadím bídimeren bíjondoŋ. Angu, maŋ nim ganik agune imbi sinoŋo síjondoŋo. Símár mees dapiren k'adím bídimeren bíjooni. Maŋ ni sinoŋo amíirne, maŋ nim bídimerenkinem amíirhinehne. Sino seŋen seŋen a bídimerenkinem gúpájuloorunkunomne. Ingah! Dupiren k'ufat bugoyab a sínlind. Maŋ nim ganik agune a nintiku direseŋo. Dúduk ufat reseŋo a sínlind. 45Maŋ nim gamíirne imbi ñanraagofoŋo. Aji fi wúur m'ajóon, hójooninno afúrumokuneh a hafithen k'ukaan hójooni. Kanda aji fi wúur újondoŋ, hójondoŋo afúrumokuneh a hafithen k'ukaan hójondoŋ. Ingah! Balóbo mees amíirhineh ingi h'agune a hafithen, karo hójooni, karo hójondoŋ. H'agune a hafithen, afeero hómár gadékehne gúfurumo a buruhon k'úloboh.

Ka Yensa ayéjne bujantenku kawandhánam bádáŋ; uraagofoŋo añantay adék akaan maŋ ni Yensa alóbne a kawandhánam

46Inini, ninkinan horaŋ akanne k'úyejehumuŋ «Umuyhum! Umuyhum!»? te dukaanaŋ h'éyejoonuŋne? 47Túyomuŋ baŋ k'íteekinoonuŋ ni wúuro m'ayennehindeemne amíirhinehne. 48Úmár ii, amímiir ingi údiigeen m'alód díg. Angu, údiigeeno úmár, baŋay kalódo, awój didiiraŋo, awój awój f'adék apút a bawaalo. Angu, bapúti a bawaalo akaan fondamaŋo ajóoni. Bakaani fondamaŋo mees, alód hotir hotir f'adék abolla kalódo. Angu dígo nómár aliŋliŋ tiw. Angu, údiigeeno, f'abollane kalódo, díino alúb, baaru báde, k'agírum maŋ na a dígo. Kanda maŋ ni baaruŋo agírehne ingi sembe, aloŋunoh sínlodo, pirendeŋ buyindinku dígo, haman hotir. Sínlodo awonnunaawonnun aliŋ mara alódaalod hóbun, fondamaŋo mees aliŋliŋ. Angu, wúuro m'ajantenne kawandhum hóbun k'akaan maŋ n'ílobne, amírmiir ingi údiigeeno m'alódne dígo hóbun. Honj dayindin údiigeeno úmár a duniyaŋo inno.#6.48 Uraagofoŋo úmár, wúur dapiren k'aruurom, wúur dapiren k'aŋanam a hójondoŋ, wúur dapiren k'aŋoosunom. Ingi mees, a waathu baléero jamméejhinem dagulumbina.

49Abocin ayéjeeniŋ:

- Kanda wúuro m'ajantenne kawandhum ki gabollay kandaŋ ho me ílobne, wúuro úmár akankaan ininkaman údiigeeno m'adékne alód a dikiñaŋo ki kandaŋ fondamaŋo. Angu, balódi dígo, babollay, díino alúb baaru báde, k'agírum maŋ na a dígo. Baaruŋo agírgir ingi sembe, aloŋunoh sínlodo, angu maŋ fam dígo anen, k'ayebyebina nip. Angu, wúuro m'ajantenne kawandhum ki kandaŋ h'élobne na, wúuro úmár amírmiir ingi údiigeeno m'alódne díkinem a dikiñaŋo ki kandaŋ fondamaŋo.

Currently Selected:

Luk 6: GD

Highlight

Copy

Compare