Luk 22
22
Fo Judas ajuliyane bigoku Yensa
1Angu, afúrumi na, Gújunku Úmbuuro no Yikireŋne Láwiiro atéejar. Agida gújuŋo gúmár gafak ahuyuhne Gújunku Guwusunaamo. Angu, a waato nómár immereŋ Ñanyahudo ganlentálalentála gupahuno gu Díino apahunne fam maamaamankánin a didiirahu Esipt.#22.1 A hájuŋo hámáráŋ hanako Ñanyahudo ganlentálalentála waato no Díino apahunne maamaamankánin a halaku jamanku Esipt ingi fo maleekaŋo abujne jaraku Esipt k'awusunam immereŋ jamanku Israyel, ki haani wúur niiroroŋ. Ninger Gúfuro 12.1–27. 2Angu, a waato nómár, ñanlaameku alimaamaŋo ingi ñankeekihu Hañaañeno imme na n'antíbeh n'ankankánehne k'anlah Yensa k'ambujom. Agida, ansíibáásiib k'ambuj Yensa, te jamaŋo dampájul maro immereŋ ambujembuj. Angu, gúmár gansíibane busuturahu bulakánam. Úpájuleŋ, ñanlaameku alimaamaŋo ingi ñankeekihu Hañaañeno ambenuhbenuh ho jamaŋo andék ankankáneeniŋne aji anyennehini maro ambujembuj.
3Kanda imbi ñantaalibehu Yensa, ñantaalibehinem Haalaŋo ingi Inako, ayikyik utaalibe úduk mu gurethinem aguy Judas. Judas Iskariyot ganyéjehne. Angu úmár, a waato nómár Iblisa aŋanne a jamméejhinem. Angu, fo Iblisa aŋanne a jamméejhinem, Judas alah ba gujuliyahu bigoku Yensa. 4-5K'angu, adék alahun ñanlaameku alimaamaŋo ingi ñammarahu Jaameŋo Adénno. Balahuneeniŋ, ayéjeeniŋ mara úmár asíibáásiib bujuliyakánin bigoku Yensa. Angu, fo Judas adantereeniŋne maro úmár asíibáásiib bujuliyakánin bigoku Yensa, asúumeeniŋ fanfaŋ k'anyéj annékinem bakodiŋo. K'angu, anyennehinay ingi Judas n'akanorunkunehne ki k'ajuliyareeniŋ bigoku Yensa. 6Angu banfohuni gúlokunin, Judas acaamaa, k'angu aningeh feereŋo n'akankánehne k'adoteeniŋ Yensa. Agida, a waato nómár jamaŋo n'anrumun tip Jerusalem a gubaarhu gújuŋo. Angu, Judas atíbeh feere n'ankankánehne k'ampiren ansutura bulakánam.
Fo Yensa abúuñáne ñantaalibehinem k'andék anjóonin fam guyaahálahu Gújunku Guwusunaamo
7Angu afúrumi na, bísibahu Gújunku Úmbuuro no Yikireŋne Láwiiro abár. Agida, bísibaŋo bímár Ñanyahudo, díg díg aññantay ambuj saaha.#22.7 Kanda, aji iniman yikireŋeŋ saaha, ampirenpiren ambuj fajaamen. Angu, saahaŋo nómár Saahanku Gújunku Guwusunaamo garetuhne. Nim gankaanahne k'anlentála ni Díino apahunorumne maamaamankánin a halaku jamanku Esipt. 8Angu bísibaŋo bímár babári, Yensa ahuy Piyer ingi Saŋ ayéjeeniŋ:
- Inini ninkinan, ísiibáásiib k'údekeŋ úduk újoonineŋ guyaahálahintor gu Gújunku Guwusunaamo.
9Angu fo Yensa alóbne nim, ñantaalibeŋo aŋŋoyindem anyéjem:
- Inini beeraŋ gúsiibane k'íjooninmiŋ guyaahálaŋo gúmár?
10Úmár ayéjeeniŋ:
- Inini, dékereŋ ba a bukooro. Kanda uŋayaŋdir hadéko urakánaŋ ingi údiigeen m’adohuna bihan b'acuf. Angu úmár gúdekeheŋne ba butifo baman a dígo n’adékehne guŋano. 11Gúputeŋ a dígo nómár, úyejeŋ ummu dígo: «Arafankintor ayéjne ídekermiŋ nanka. Eke Arafaŋo nanka gadékekinehne ingi ñantaalibehinem? Inini, ísiibáámiŋsiib k'ujellihin mint gufaco g'édekehminne ba guyaahálahu Gújunku Guwusunaamo, úmár ingi mint ñantaalibehinem.» Nim guñantaheŋne úyejeŋ ummu dígo.
12Yensa abocin ayéjeeniŋ:
- Angu, aji úlobeŋ nim údiigeeno mees, údiigeeno adékukunoonuŋ ba a raafo k'ajellihinoonuŋ gufac g'away. Angu, a gufaco gúmár ulahunkunaŋ na banoohumo ingi taabálo n'aleefaane ingi jooraŋaŋo nip no bújooninku guyaahálaŋo. Na gúdekheŋne bújooninku guyaahálahintor.
13Angu Yensa balóbeeniŋ nim mees, Piyer ingi Saŋ ankeng k'andék baman Jerusalem. Angu, f'ampútne a dígo nómár, andék ingi údiigeeno gu Yensa alóbeeniŋne k'aŋŋaf a gufaco gu raafo. Na ganlahunne taabálo ingi banoohumo ingi jooraŋaŋo nip maŋ ni Yensa alóbeeniŋne. Angu, na gantopotorne guyaahálahu gújuŋo.
Fo Yensa ajellihinne ñantaalibehinem n'aññantane ankaan ki biki anfiiram n'aniirorumne ba bupahunkánin
14Angu waathu dibugaanigo babári, Yensa ingi ñambúuñuraaŋo m'anfallane andék andak anlahuneeniŋ na. Bampúti annooh a taabálo immereŋ nip ba guyaahálaŋo. Angu, immereŋ haalaŋo ingi inako angune na dam ingi Yensa. 15Angu, bannoohi a taabálo, Yensa ayéjeeniŋ:
- Ingah! Me, ii, ihaamihaami dáde ki mintoroŋ nip imbaboonuŋ guyaahálaŋo kantíg inkanduk guyaahálahu Gujunku Guwusunaamo jandiŋ waathu kunyokum bapútumor. 16Janteneŋ baŋ! Me gub gubiyaamo guyaahálahu Gújunku Guwusunaamo a duniyaŋo inno. Me mungu, afúrumi gub, difak iŋoolinahar iyaah guyaahálaŋo ungu gu gújuŋo fo baman d'eyakánehne imbi Díino a maasayahánam. Beŋen fam kireŋ giyakánehne guyaahálaŋo ungu. Kanda ingah! Jandiŋ bísibaŋo bímár, h'asaababumne Gujunku Guwusunaamo ayiki, hómár añantay ayik.#22.16 Na Yensa ayéjyej úmár faŋo añantane aniiro, maŋ ni saahaŋo añantane aniiro a Gújunku Guwusunaamo, ki nim Díino apiren ayaafuŋ júnubonku jamaŋo. Kanda biniirohu saahaŋaŋo fam a Gújunku Guwusunaamo, bímár tamaseer a nintiku biniirohu Yensa.
17Angu balóbi nim mees, adooh gulandáro g'ankanne kunnohu reseŋo.#22.17 Kunnohu reseŋo k'anruhohne ayehyeh. Kasáraŋ bukanilinku wúur. Na gamburayumne ingi kunnohu sibekelo k'akasne bukanilinku wúuro. Immereŋ Ñanyahudo, gúduk ungo na gandoohodooh kunnohu reseŋo k'angaasahin ingi baaruku koloŋo k'apiren abuj tañoŋo n'agune a baaruku koloŋo. Wola gúduk ungo na gandohodoh kunnohu reseŋo k'ansaj baniyoŋo. Badoohi kunnohu reseŋo aramun Díino maŋ ni anramunkamne.
F'abollane ayéjeeniŋ:
- Ingah! Doohoreŋ kunnohu reseŋo unku k'uruuhayeŋ, moŋon moŋon unihina. 18Ingah! Gúyaahálahu Gujunku Guwusunaamo gu gub, afúrumi gub difak iŋoolinahar iruuh kunnohu reseŋo damanta maasayahu Díino pútururoŋ. Beŋen fam kireŋ girukunehne kunnohu reseŋo unku.
Angu, Yensa balóbi nim mees, anjah k'anruuh. 19Bambollay, Yensa adooh úmbuuro. Badoohi úmbuuro aramun Díino. F'abollane buramunku Díino, afacálahin k'anéer ñantaalibehinem moŋon moŋon kopoculen k'ayéjeeniŋ:
- Aneŋ! Kábáreŋ! Inno agune arinkum. Fégeŋ baŋ, ínekineh Díino arinkum k'aguy leeyahánan imbi ámár Díino ki nim, a gubaarhu leeyaŋo nómár, Díino apiren apahunoonuŋ. Inini, ífurdir a duniyaŋo inno, ísiibáásiib ki, guraheŋ úkábáŋ úmbuuro, moŋon moŋon kopoculen, maŋ ni úkábeŋne gub. Ísiibáásiib ki bukaano nim aguy cosaan a binanan ki nim ulentálahamuŋ ingi h'ekanne ba bupahunkánan.
Angu, Yensa balóbeeniŋ nim mees, babollay, anéereeniŋ úmbuuro k'ankáb. 20Bankábi úmbuuro mees, Yensa ayoof gulandáku kunnohu reseŋo. Badoohi gulandáro ayéjeeniŋ:
- Ingah! Díino ba símbennay ingi ninkinan gúlob guwunkul gadékehne. Angu, kunnohu reseŋo unku k'ófegeŋne n'akenne, kúmár aguyhuneh muhenkum m'édekehne ba buhupo. Ingah! Me ba buhuphu muhenkum gídekehne ki nim ipiren ipahunoonuŋ a kunyoku júnubonkánan. Angu, muhenkum múmár m'édekehne buhupo, múmár akimbihinehne gúlobo guwunkulo gu Díino adékehne ba símbennayo ingi ninkinan ñanraagofoŋo.
Yensa balóbi nim mees, anéereeniŋ gulanduku kunnohu reseŋo k'anruhay ki nim moŋon moŋon anihina iniman n'anihinane úmbuuro. Angu, afúrumi na, f'annoone guyaahálaŋo a taabálo, Yensa ayéjeeniŋ:
21- Ingah! Údiigeeno m'adékehne gujuliyahu bigokum umomiye maŋ nanka guyaahálaŋo ingi me!
Abocin ayéjeeniŋ:
22- Fégeŋ baŋ, biriman fam Díino ayéjyej maro Údiigeeno M'acaabenaane adék aniirohuneh. Hómár Díino alefne, te dabay. Kanda ingah! Wúuro m'ajuliyane bigokum, wúuro úmár ayokuneh fanfaŋ.
23Angu fo Yensa alóbne nim mees, angu ñantaalibeŋo ammiihayeh anyéjeh:
- Imbi mintor! Hantaŋ gadékehne ba gujuliyahu bigoku Yensa?
Angu anlóboh ammiihayeh nim.
A maasayahu Díino buguyum a bigofo fo uguy wúur m'atiirilinoora
24Afúrumi na, bugaanigo ámár, immereŋ ñantaalibeŋo ambááhayeh m'adékehne bunoho k'aguy ulaamekinin. 25-26Angu, Yensa bayennehini n'anlóbohne, atákeeniŋ na ayéjeeniŋ:
- Inini ninkinan! Dahu úduk úmiireŋ maŋ ni ñammaasahu ñansooninkeŋo! Ingah! Ñammaasaŋo ingi índenno ampokunpokun bujellihinku jamaŋo sembehinin. Te faka, immereŋ, gansíibáásiib ki jamaŋo anhuyeeniŋ «Ñankááñinahinku jamaŋo».#22.25-26 Famo, ñammaasaŋo, gúduk ungo na ankaanoora bompen k'anhuyoora «Ñankááñinahinku jamaŋo.» Nim immereŋ gankaanahne k'antíbeh ki jamaŋo ambúuñaheeniŋ. Inini ninkinan, dahu úduk ukaanaŋ nim! Ingah! Ninkinan, m'añantane aguy ulaamekinan añantay aguy ininkaman wúuro m'afaŋunumne n'aguy wol. Oo! M'agune a bigofo añantay alóki k'aguy iniman úsokánan. Nim gañantane aguy a binanan.
27Angu, Yensa balóbi nim mees ayéjeeniŋ:
- Túyomuŋ baŋ k'imiihoonuŋ honj. Ninkinan, wúuro m'anoone a taabálo guyaahálaŋo, karo úmár afaŋunumne n'afuuh wúuro m'afutukomne? Afeero mara wúuro m'anoone a taabálo guyaahálaŋo, úmár afaŋunumne n'afuuh. Kanda ku k'uningeŋ a binaam. Eke me, arafankánan, gídoolukoonuŋdoolur? Angu ninkinan mees, maŋ nim guñantaheŋne ukaanaŋ.
28Ayéjeeniŋ:
- Inini ninkinan, ífefeg maro baléer baŋan baŋan apútorne a binaam, uwonnáremuŋwonnur. Hóobulahadumuŋ. 29Inini, Bááhum Díino anéereemneer bunoohunku maasayahánam. Inini, me nuko ninkinan íneekunoonuŋ moŋon moŋon bunoohum k'immarahoŋ a maasayaŋo nómár. 30Ingah! Maasayahu Díino apútdir, ninkinan haalaŋo ingi inako, innokunoŋ a taabálo amánduko k'inyaahálahoŋ. Faka ninkinan unokunoŋ moŋon moŋon a bunoohum k'umara jamanku Israyel. Ninkinan umarahánaŋ bádiimeŋo haalaŋo ingi banakaŋo b'agune Israyel. Hómár gídekehne bukaano mara ninkinan hóobulahadumuŋ.
Nim Yensa alóbne ñambúuñuraaŋo dam.
Fo Yensa atengane Simon Piyer mara añophuneh k'ayéj pájiirom
31Angu, balóbeeniŋ nim akir ayéj Simon:
- Ho Simon!
Ayéjem:
- Káánunt! Janten baŋ hóbun! Ingah! Iblisa akiinakiina Díino ki k'arifoonuŋ ingi sembe, ninkinan ñantaalibehum. Bakiinahem, Díino anéerem h'akiinahemne. Úfegeŋ, Iblisa asíibáásiib bukanku feereŋo nip k'úbenneŋ bufiyunkum.
Ayéj:
- Ingah! Ba bugulumbinku jamméejenkinan gadékehne deh! Ingah! Maŋ ni wúuro adokunehne gúfeero k'afeh maanoŋo,#22.31 Úpájuleŋ na buleŋo gaññaañne, kanda buwuthu maanoŋo akasne buwuto buleŋo. Gúmár akanne m'añaañne líibáro inno ingi guñaamolo añaañi maanoŋo. k'afeh, afeh f'adék aficilahin bapaasero ingi bajúubelo, maŋ nim Iblisa gatíbehne bukaano a binanan, ninkinan ñantaalibehum. Asíibáásiib k'imbicayoŋ, k'uhoobulahamuŋ. Nim gasíibane bukaano.
32Abocin ayéj Simon:
- Kanda Simon, me mungu, ikiinakiina Díino ki da Iblisa akankánehne nim ulahaŋ aliŋ bufiyunkum. Fi mungu, Simon unenkineh, kanda damiñ úkubihineh jamméejhen a binaam. Inini, úkubuldir jamméejhen ba a binaam, údek imbi índinenken ñantaalibeŋo k'ubocindeeniŋ sembe, ki nim immereŋ mees ampiren antifeem aliŋ tiw.
33Balóbi nim, Simon Piyer aŋoyindem ayéjem:
- Ingah! Arafaŋ! Me me deh, dihoobulaho! Me iparepare ba sinkokay ingi fi, haman baléero imba na n'awonn k'anyéj ba budokon ba a kasoŋo, inkokayhunoŋ ba na a kasoŋo. Haman biniiroŋo mees apútor a binankan, inkokayhunoŋ ingi fi. Me dimuusahar íbenno! CC
34Angu, na Yensa aŋoyindem ayéjem:
- Hee Piyer! Janten baŋ k'íteekino marigeno: Ingah! Fi, jaketo no gub uñophuneh f'abár waasaŋ alallaŋ maro pájiiro me me. Nim gúdekehne bukaano. Angu, uñopdir f'abár waasaŋ alallaŋ maro pájiiro me me, uyennehinkineh rankuluŋ n'ahooŋoh.
Nim Yensa atengane Piyer.
Ka Yensa ajellihinne Ñantaalibehinem maro h'añaañaañe a Hañaañeno gu úmár, hómár nip ayikhineh
35Angu balóbi nim Piyer, Yensa akir ayéj ñantaalibehinem nip:
- Túyomuŋ baŋ k'imiihoonuŋ honj. Inini, ninkinan, f'ébuuñoonuŋne ba gukawandinku jamaŋo, eke íyejoonuŋyej buku utohunoŋ honj? Eke íyejoonuŋyej buku utohunoŋ gukodi, wola boore, wola sapataŋ, wola haani honj? K'angu ninkinan údekeŋdek may ineeŋ. Inini, túyomuŋ baŋ k'imiihoonuŋ honj, hóge f'óputeŋne bim ayikyik h'ohaajahaŋ?
Anyéjem:
- Wówo! Hajaarimiŋ haani honj.
36Ayéjeeniŋ:
- Angu inini, túyomuŋ baŋ k'íteekinoonuŋ! Manini ingi fam mideŋeŋ. Inini, aji uŋayeŋ hadéko ba bukawando gu me, jamaŋo dankááñinahinoonuŋ. Damíir ingi fam deh! Gúmár gíyejoonuŋne, inini aji uyiki gukodi, tohunt. Aji uyiki boore, utohun mees. M'uyikireŋne busandi, ujuliya sabadóorhon k'ugila busandi,#22.36 Afeero mara Yensa síibaaraŋ ki ñantaalibehinem andék ambuj wúur wola anduj wúuro ingi busandiŋo búmár. Úfekineh a verseŋo 49-51 mara Yensa asekursekur Piyer f'afúnnáne busandhinem k'adúj údoolhu alimaamo adénno. Angu, badujem, Yensa ajébinem maŋ fam. Angu, arennrenn mara Yensa lókiireŋ k'andooh busandiŋo ba biñaamo. Kanda a waato nómár mandékaŋo abénkinbenkin. Gúduk upiren urahaŋ ingi abónoŋo asaŋariyeŋo. Karo a gubaarhu hómár gayéjeeniŋne moŋon moŋon adék agila busandi. Índukoŋo anyéj, fo Yensa aretne busandiŋo, na funaare ganéerne ki asíibáásiib ki ñantaalibehinem ampájul mara waato n'adékirehne amburayhineh ingi fam fo jamaŋo anlókine bukucunkinin. Kanda, haman nim, fo Yensa alóbne nim ñantaalibehinem wuturoŋoŋ h'asíibane balóbo a gubaarhu basandiyeŋo. mara waato inno ingi fam mideŋeŋ.
37Yensa abocin ayéjeeniŋ:
Ingah! A Hañaañeno aññaaññaañ gu me ayéj: «Úmár, ii, abénnbenn jamaŋo k'anjodamam. Haani maŋ ni yikireŋne jínub, jamaŋo anyehenemyehen iniman n'anyehenehne ñanrifaŋo.»#22.37 Na Yensa aŋoolininŋoolinkin h'añaañaane a Líibárhu Anabila Esay 53:12
Nim Anabila Esay añaañerne a gubaarhu ni jamaŋo andékehne ba bukankum. Agida, fo Esay añaaññe hómár, amiñmiñ. Kanda, hómár nip añantañanta ayik, te damiñ k'ayik.
38Yensa balóbi nim mees, ñantaalibehinem anyéjem:
- Arafaŋ! Ingah! Ilahmiŋlah nanka isandi inak!
Angu, Yensa f'afégne maro immereŋ wuturoŋoŋ h'asíibane balóbo a gubaarhu basandiŋo, atákeeniŋ k'ayéjeeniŋ:
- Ninkinan bénteŋ balóbo a gubaarhu basandiŋo! Abábár angu!
Fo Yensa akiinane Díino a Montaaño Olifo
39Angu, afúrumi na, Yensa akeng k'afúr a dígo k'aŋŋayerne guyaahálaŋo k'adék ba a Montaaño Olifo. Agida, ásibaŋo nómáráŋ nip, bugaanigo yem, na gadékehne. Angu, ñantaalibeŋo mees ankeng k'antifem ba a montaaño. 40Bampút a Montaaño Olifo, Yensa ayéjeeniŋ:
- Ingah! Iblisa ba burifhánan gadékehne deh. Kengereŋ k'ukiinahaŋ Umuyhintor jandiŋ Iblisa barifum buŋanhánan a hójondoŋo.
41Angu Yensa balóbi nim mees, agohála hotir k'aruŋa k'akiina Báábám Díino, ayéjem:
42- Bááhum! Bonkerer! Me ísiibáásiib bukaano ho fi úsiibane, kanda, bonkerer, pahálineem a kunyoho unku.
Abocin ayéjem:
- Kanda me dikaan h'ésiibane. Ho fi úsiibane bareŋ gídekehne bukaano.
43[Angu, Yensa balóbi nim, Díino abúuñutom maléeka ki ámár abocindem sembe. 44Kanda Yensa, haani maŋ nim, hafithinem bebendeŋ haman hotir. Jamméejhinem nip aguulimbina k'angu akiinah Umuyhintor ingi sembe. Agíf maf ki tígifhinem ayotoh dáde maŋ ni muheen gayotohne.]#22.44 H'agoobaane ñaañiiraa a keyereŋo kándukoŋo.
45Angu Yensa, bakiinay Umuyhintor mees, akenger aŋooliner alahunar ñantaalibehinem. Angu, f'aŋoolintne alahunteeniŋ n'aŋŋay sínduuf. Agida déegen bísiba b'aléer ni Yensa ayéjeeniŋne maro úmár ba biniiro. Aléerumeeniŋleerum dáde angu anyoh fanfaŋ k'andúufoh. Angu Yensa, f'alahunteeniŋne sínduufo, agefiyeeniŋ ayéjeeniŋ:
46- Hey! Horaŋ? Sínduuf? Kengereŋ k'ukiinahaŋ Díino ki hójondoŋo, aji aguy a jannokánan, upireneŋ ufaŋunahamaŋ!
F'anlahne Yensa
47Angu, fo Yensa aŋane balóbo, Judas m'atohne imbi ñantaalibeŋo haalaŋo ingi inako, apútor n'ankokayer ingi jamaŋo jup. Agida, jamaŋo immereŋ, Judas anohálinteeniŋne. Maŋ ni apúturne awaliŋ Yensa k'adék aramam afoonom a gutok maŋ ni immereŋ Ñanyahudo anramayehne.#22.47 Angu, aji úfegi afóonom, hómár tamaseer ki nim m'andékirne ba bulaku Yensa ampiren ampájul hantaŋ agune Yensa. 48Angu, f'afoonemne, Yensa ayéjem:
- Judas! Hom?! Ujuliyajuliya bigoku Údiigeeno M'acaabenaane k'údeker angu ufoonom?
49Angu, ñantaalibeŋo banfégi mara ba bulaku Yensa gandékuntne, anyéjem:
- Arafaŋ! Kara ífunnmiŋ basandiyeŋo k'irahmiŋ ingi immereŋ?
50Angu fo ñantaalibeŋo anlóbne nim, utaalibe úduk afúnn busandihinem k'adék alek bulaaŋo bu jiyaaho bu údoolhu alimaamo adénno. 51F'akanne nim Yensa ayéj ñantaalibehinem:
- Hey! Ninkinan! Buku ukaanaŋ nim!
Balóbi nim mees adék amapun ka bulaaŋo alekaane k'angu ajébun údoolo úmár. 52Fam kireŋ gadékne k'anningay ingi m'andékirne ba bulakánam. Agida ñanlaameku alimaamaŋo imme na, ñammarahu Jaameŋo Adénno imme na, ñanlaameku Ñanyahudo imme na ingi índukoŋo mees m'ankokayirne ba bulakánam.
Ayéjeeniŋ:
- Ninkinan! Horaŋ akanne udooroŋ basandiyeŋo ingi jigoloŋo ba bulakum? Hóge me urifa? 53Eke me gucum gucum me mo na a jaameŋo adénno? Agida upireneŋpiren ulahamuŋ bim! Kanda kandoŋ nim. Kanda gub Díino abénnhunoonuŋ k'ukaanaŋ h'ósiibááheŋne. Fégeŋ baŋ, Díino ba búbennhu Iblisa m'amarahne bumurulo k'akaan h'asíibane. Waathánam apútriput. Angu, dókuloŋ k'ulahamuŋ!
Ka Piyer añopne mara úmár atotoh imbi ñantaalibehu Yensa
54Angu, fo Yensa alóbne nim mees, anlaham k'aŋŋayam búdekuro ba a díku alimaamo adénno. Angu, f'andékne andoona, Piyer atifeeniŋ a mángáár. Angu andék f'andék ampút a buteerehu alimaamo adénno. 55Angu Piyer, bapúti na, afég kuul n'ajákálinaa a bájegenenku buteereŋo ki jamaŋo aŋŋay na bígetaŋo. Angu adék annooh ingi immereŋ. 56Angu f'agune na bígetaŋo, ayik udikaam m'adóoloh na. Angu, udikaamo aningem a jiyanku kuulo, k'ayitem. Bayitem ayéj:
- Kanda ingah! Ummu atohtoh imbi ñankokayku Yensa!
57Piyer añop a gubaarhu kumbenuho, ayéjem:
- Hom?! Me tohári ingi údiigeeno úmár! Me pájiirem.
58Angu miñireŋ ayikyik údiigeen m'anik akorosom mees. Úmár mees ayéjem:
- Kanda fi iyitenyit deh! Fi utohtoh ingi índiigeeno m'ankokilinehne Yensa!
Aŋoyind údiigeeno ayéj:
- Wówo! Me tohuri na!
59Piyer balóbi nim mees, anfant annooh na. Bamiñiimiñ ayik m'afak akorosom ayéj:
- Ummu! Afeereemfeer fañ maro atohtoh imbi índiigeeno m'ankokálinehne Yensa mu Galile! Ingah! Úmár mees údin Galile.
60Angu fo ulallinno alóbne nim, Piyer afak añop ayéj:
- Hom?! Me, pájiiri h'ólobohne! Me tohári na!
Agida f'añopne alallin maro úmár utaalibehu Yensa gireŋ, rankuluŋo ahooŋ. 61Angu, rankuluŋo bahooŋi, Umuyhintor Yensa anuurula k'aning Piyer. Banningay ingi Piyer, Piyer alentála n'ayéjemerne: «Fi, jaketo no gub uñophuneh f'abár waasaŋ alallaŋ mara pájiiro me me. Uñopdir f'abár waasaŋ alallaŋ, rankuluŋ ahonkuneh.» 62Angu, Piyer balentálay h'akanne, atif mahar f'abemaham dáde. Afúr a buteereŋo k'ahooŋ ingi baniyonku jifa.
63-64Angu, índiigeeno m'aŋŋayne buninghu Yensa jahi apah, immereŋ mingu ankomb buyeefihinem. Anlaham k'ammib igihinem. Bammibem, ammaham, anyeefihem, ansutunkom anyéjehem:
- Heh! Eke fi úyejyej anabiyoŋ? Inini, téekint mint wúuro m'amalenne!
Nim m'aŋŋane buninghu Yensa jahi apah ankaanemne dam 65k'angu anyeefihem k'ansutunkom, anjodankam fanfaŋ.
F'andékurne Yensa ba a Tilibinaalo Adénno k'ankitiyem
66Angu afúrumi na, harennaamo, ñanlaameku Ñanyahudo, ingi ñanlaameku alimaamaŋo, ingi ñankeekihu Hañaañeno ingi m'antohne a Tilibinaalo Adénno nip andak anjóg immereŋ nip a tilibinaalo ba bulekhu balóbo a gubaarhu Yensa. Banjógi ambúuñ andak andoohor Yensa. 67Angu fo Yensa apúturne, ankomb bukontkontinkinem. Ayik úduk m'ayéjem:
- Inini, fi nuko, téekint mint! Hóge fi ingine Umaasaŋo Mu Díino Acaabenne?
Ayéjeeniŋ:
- Inini, aji íyejoonuŋ me igune maŋ úmár, hóge udomhunoŋ?!
68Abocin ayéjeeniŋ:
- Ingah! Me, afeereemfeer, aji ininkaman imiihoonuŋ honj, ninkinan duŋoyindemuŋ! 69Kanda túyomuŋ baŋ k'íteekinoonuŋ a gubaarhu Údiigeeno M'acaabenaane. Damiñ angu, Údiigeeno M'acaabenaane ba kunooh a jiyaku Díino N'alahne Sembeŋo nip. Díino anékinem bunoohum a kantígo k'abúuñahaane.
70Angu f'alóbne nim, jamaŋo ankomb balóbo immereŋ nip samánduko anyéjehem:
- Hom! Angu, fi úyejyej f'ugune Úbáku Díino dakat?
Yensa ñopuroŋ, ayéjeeniŋ:
- Maŋ ni úyejeŋne, maŋ nim gigune.
71Angu na anyéjayeh:
- Ningeŋ baŋ! Ningeŋ baŋ! Mintoroŋ nip ínyennehinoŋyennehin ho úmár fankánam alóbne. Ingah! N'alóbne, asíibáásiib búyejo mara úmár agune Úbáku Díino, te na ayéjyej úmár ammurmur ingi Díino! Apuñpuñ gurethu Díino deh! Angu mintor, jadaŋ ki úduk afak aséediya a gubaarhu kayúulenkinem. Mintoroŋ nip inyennehinoŋne n'apuñne gurethu Díino.
Nim ñammi tilibinaalo ankitine Yensa dam.
Currently Selected:
Luk 22: GD
Highlight
Copy
Compare
Share
Want to have your highlights saved across all your devices? Sign up or sign in
Copyright Vision Intégrale, Senegal
