Luk 23

F'andékurne Yensa ba imbi Pilat úgufánááro k'akitiyem

1Angu, banfohuni balókánin, m'anjógne na a Tilibinaalo Adénno ba bukitihu Yensa ankeng nip k'anlaham andékirem ba imbi úgufánááro m'aretuhne Pilat. Agida Pilat údin Rom. Angu úmár Pilat, umaasaŋo údenno mu Rom anohálinne k'aguy úgufánááro.

2Angu, f'andékurne Yensa imbi Pilat, ankomb bukalankánam anyéjeh:

- Gúfánáár! Inini, údiigeeno ummu m'idoorminne m'úfegne, ummu ii, ísiibáámiŋsiib k'ulek balóbo. Ummu, ii, gajundunahinejundunahin jamaŋo deh! Ingah! Ummu ii, gayéjeyej biki jamaŋo ancaam bahataŋo imbi ulaameken umaasaŋo údenno Sesar.

Nim ganjodamne Yensa imbi Pilat. Ambocin anyéj Pilat:

- Údiigeeno ummu afak ayéj úmár agune Umaasaŋo mu Díino Acaabenne. Oo! Ayéjyej úmár agune umaasaŋo!

Nim gankalamne Yensa imbi Pilat.

3Angu Pilat, bayennehini n'anlóbne, amiih Yensa ayéjem:

- Angu fi, f'ugune umaasahu Ñanyahudo, heh ? Hóge nim gúyejne?

Ayéjem:

- Maŋ n'úyejne, maŋ nim.

4Angu fo Yensa alóbne nim, Pilat ayéj ñanlaameku alimaamaŋo ingi m'anjógne na nip:

- Ingah! Me, údiigeeno ummu, me fégiri hójondoŋo h'akanne. A siwosenkum, údiigeeno ummu puñuroŋ honj h'akankunehne k'inenenem.

5Angu fo Pilat alóbeeniŋne nim, súumáreeniŋ. K'angu ammaja balóbo, anlóboh aŋŋoolinkineh anyéjeh:

- Gúfánáár! Ingah! Ummu ii, údin didiirahu Galile. Angu, biriman bim gatooŋuntne gukengunku jamaŋo ingi balókánom b'abenkininno! Adéker faka ba a didiiraŋo indi di Júde, ki nanka mees afak akengun jamaŋo ingi balókunom b'abenkininno. Angu, f'adorlane Júde nip, afak adéker ba nanka Jerusalem afak akaan maŋ ínhonduko, akengun jamaŋo ingi balókánom b'abenkininno. Gúfánáár! Ummu nim gakaanahne beŋen beŋen b'adékne.

F'anyéjne aññantay andékur Yensa ba imbi Umaasaŋo Herod k'akitiyem

6Angu Pilat, bayennehini ni ñanlaameku Ñanyahudo anyéjne Yensa a didiirahu Galile gafúruntne ayéj:

- Hom! Úmár údin Galile ?

Anyéjem

- Oo! Úmár údin Galile.

7Angu na Pilat ayéj, ni Yensa agune údin didiirahu Galile, Herod, umaasahu didiiraŋo dímár, úmár añantane alek balóbo. Agida bísibaŋo bímár Herod n'aguy maŋ na Jerusalem. K'angu Pilat ayéj aññantay andékur Yensa ba a binaanam. Angu, ankaan maŋ nim k'andékirem ba imbi Herod.

Fo Yensa akitiyaane imbi Herod

8Fo Yensa apútne imbi Herod, hómár asúum Herod dáde f'afégemne. Agida n'ayennehin gu Yensa ingi a gubaarhu tamaseereŋo n'akaanahne. Angu, biriman fam úmár asíibáásiib búfekinem. Angu, úmár n'ajíki ki ki Yensa akandáram tamaseer.

9Angu, Yensa bapúturi, Herod akomb bumiihmiihinkinem. Angu f'amiihmiihinemne, Yensa mungu jaabiirom haani úngonduk. Akota sii. 10Angu, fo Herod aŋane bukontkontinkinem, agida ñanlaameku alimaamaŋo ingi ñankeekihu Hañaañeno imme na n'anwonn maŋ na. Angu, immereŋ ankalamah Yensa imbi umaasaŋo, anjodankam hajodam habenkini. 11Angu na, Herod ingi ñammi básedeŋo m'ammarahamne, anjuti Yensa. Anyeefihem, anrohálinkem a gubaarhu n'ayéjne úmár umaasa. Angu andék andooh gusol gújooni iniman gu ñammaasaŋo, k'ankandáram. Angu bambollay, Herod ayéjeeniŋ:

- Inini, ŋoyintemeŋ ba imbi Pilat!

Angu, ankaan maŋ nim, k'andékirem ba imbi Pilat úgufánááro.

12Agida biriman fam, Pilat ingi Herod, immereŋ yennehinayereŋeŋ, anfoyayfoyay, kanda dam, immereŋ inako anyennehinay, k'angu bájegenenkinin asúum.

K'anyéjne Yensa añantay abujaa

13Angu, f'andékurne Yensa ba imbi úgufánááro Pilat, angu Pilat ahuyum ñanlaameku alimaamaŋo ingi ñanlaamero índukoŋo ingi jamaŋo nip k'andéker anwaalaham. 14Angu f'andékirne, Pilat ayéjeeniŋ:

- Inini ninkinan, jantenemuŋ baŋ! Ninkinan, údiigeeno ummu m'úyejeŋne gakengunekengun jamaŋo ingi balókunom bajóndoŋo, me, fégiri kayúulenkinem. Ingah! Ninkinan faŋo úfegeŋfeg n'ikontkontinemne nip, kanda h'okalamemeŋne, me fégiri. Úmár kandaŋ hójondoŋ. 15Ingah! Haani umaasaŋo Herod, úmár mees, fégireŋ kayúulenkinem k'akanne. Gúmár akanne aŋoyinditem ba nanka. Inini, me nuko, fégiri h'akanne ki k'abujaa. 16Inini, ifant íyejhineh ñammi básedeŋo, k'ammalam ingi ñanhonjo#23.16 Agida ñammi Rom, aji ankalamen, haani ukoŋkoŋ fo ammalo. Immereŋ anyéjyej mara aji ammalen dufak ukaan honj ki jamaŋo ankalamo. Gúmár akanne Pilat úguufánááro mu Rom ayéji ammal Yensa ingi ñanhonjo. ki gambollay ambénnem k'adék. Me, nim gilahne.

Nim Pilat alóbne ñanlaameku alimaamaŋo ingi ñanlaamero índukoŋo ingi jamaŋo índukoŋo nip m'ansorne dam.

17[Agida, immereŋ Ñanyahudo ayikyik cosaan n'ankaanah díin díin. Cosaano nómár agune, díin díin a waathu Gújunku Guwusunaamo, jamaŋo gankiinakiina úgufánááro k'abénduteeniŋ ukimbenaa. Hómár agune coosankánin n'ankaanahne a waato nómár.]#23.17 H'agoobaane ñaañiiraa a kayereŋo kánduko.

18-19Angu, immereŋ ansíibáásiib ki úgufánááro abénduteeniŋ údiigeeno m'aretuhne Barabas. Agida Barabas, atohtoh a ñammi andepandaŋo. Faka, a waathu burumo b'ayikne Jerusalem, úmár abujbuj wúur. Angu Barabas agune na a kasoŋo. Angu, fo Pilat atéekinne jamaŋo m'anjógne na anrumun mara ba búbennhu Yensa gadékehne, angu immereŋ, hómár súumureeniŋ. Angu immereŋ anlób wolaŋ samánduko anyéj:

- Wówo! Aniiro, k'úfunduto mint Barabas! Nim gísiibaminne.

K'aŋŋoolinkineh ampeejeh. 20Agida Pilat mungu síibaaraŋ bubujhu Yensa. Ásiibáásiib búbennhinem. K'angu aŋoolin ba a barumuno. 21Bapúti, immereŋ nip anfaŋunum n'ampeejeh aŋŋoolinkineh anyéjeh:

- Wówo! Abujaa! Faaŋánahintemeŋ a dinlihano!

22Angu na Pilat afak alallinne alób ingi immereŋ, ayéjeeniŋ:

- Inini, ninkinan, hójondoŋ horaŋ gakanne? Me fégiri kayúulenkinem. Ingah! Úmár kandaŋ h'abárne ki k'abujaa! Inini, ñammi básedeŋo andéker k'ammalam ingi ñanhonjo. Gambollay ambénnem k'adék. Nim gísiibane.

23Pilat, balóbi nim jamaŋo, hómár súumureeniŋ haman hotir. Angu immereŋ ammincineh gúlobo. Immereŋ bénnereŋeŋ gúlobo, anyéjeh Pilat:

- Abujaa! Faaŋánahintemeŋ a dinlihano! Aniiro!

Aŋŋoolinkineh maŋ na.

- Aniiro! Aniiro! Aniiro! Faaŋánahintemeŋ a dinlihano!

Angu, ammincineh, ampeejeh fo gúlobo adék afaŋuna Pilat.

24K'angu Pilat asabari 25k'abéndureeniŋ Barabas údiigeeno m'ankiinahemne. Hómár ingine abénduteeniŋbendur urebelo m'abujne wúur ki úmár afúr a kasoŋo. Ki Yensa mungu, Pilat ayéj ñammi básedeŋo andoohom k'ankaan ho barumuno ansíibane.

F'anfaŋunahinne Yensa a dinlihano

26Angu, afúrumi na, ñammi básedeŋo andooh Yensa k'andoohálinem dinlihano d'akillenaane, dinlihano d'andékehne ba bufaaŋunahinkinem. F'andoohálahinemne dinlihano, antuŋul hadéko ba a kantígo k'aññantane ambujom. Angu, f'aŋŋane hadéko anrah ingi údiigeen úduk m'afúrumor a kanaŋaŋo. Gurethinem Simon. Agida Simon údin saariŋo n'ayéjuhne Siren n'agune a didiirahu Libi. K'andoohom úmár mees. Bandoohem, andooh dinlihano d'andoohálinerne Yensa k'andoohálin Simon. F'ambollane anyéjem atif Yensa. 27Angu, antif binaalo ba a kantígo k'aññantane ambuj Yensa. Agida, jamaŋo imme na n'anrumun tip k'antifiheeniŋ andékeh. Indikaamo anhooŋoh a gubaarhu n'andékehne bubujhu Yensa. 28Angu Yensa, anuurula k'ayéjeeniŋ:

- Ninkinan! Indikaamanku Jerusalem, dahu uhooŋoŋ gu me deh! Hooŋoreŋ baléero b'adékehne ba jankuco a binanan, ingi imbi imberenkánan! 29Ingah! A waato nómár jamaŋo anyéjhineh: «Ingah! Indikaamo mi yikireŋeŋne jaraah, immereŋ mingu ampahálapahála. Guyroŋoŋ a kunyoho ku indikaamo m'anyikne jaraaho angune.» Nim jamaŋo gandékehne búyejo a waato nómár.

30Abocin ayéjeeniŋ:

- Agida ñammi Hañaañeno aññaaññaañ mara, a waato nómár, jamanku Jerusalem anjaahálihineh k'ansíiba ki didiirahu montaaño anener k'akúdin hádigeŋo k'angu anniiro na.#23.30 Agida Anabila Osée, úmár alóblob gu bandór k'añaañ hómár a Gúloku Díino. Nim jamaŋo m'anjaahálinne ansíibahánehne ki hómár ayikeeniŋ a waato nómár.

31Yensa abocin ayéjeeniŋ:

- Ningeŋ baŋ h'aŋŋane bukankum, me yikiri haani júnub! Angu, afeeroonuŋ mara m'anyikne júnuboŋ, dam afaŋununkuneh n'aléer a binanin.

Angu dam, nim Yensa alóbne indikaamo. 32Agida, fo ñammi básedeŋo mi Rom aŋŋane búdekuku Yensa ba b'andékehne bubujhunom, anfak antohun índiigeen inak ñanrifa. Immereŋ mees, ba bubujhánin a dinlihano gandékehne.

33Angu andékiidek, ampút k'andékehne bubujhánin. Agida, kantígo kámár ganyéjehne «Guhunku bigofo.» Angu bampúti na, anlah Yensa k'anwuraŋam. K'angu andooh dinlihano d'akillenaane k’andoohom anfaŋánahinem na. Banfaaŋunahinem mees, anwóoj gusuno k'anwonnun na dinlihano. Ñanrifaŋo inako, immereŋ mees, moŋon moŋon anfaaŋánahinem a dinlihankánam. Ummu anfaaŋánahinem a jígondinku Yensa, ummu anfaaŋánahinem a jiyaku Yensa, k'angu Yensa agune a bájegenenkinin.

34[Angu f'aŋŋane bufaaŋunahinkinem, Yensa akiina Umuyhintor, ayéjem:

- Abó! Yaafunteeniŋ! Immi pájiireŋeŋ h'aŋŋane bukaano. Yaafunteeniŋ!

Nim Yensa alóbne f'aŋŋane bufaaŋunahinkinem.]#23.34 A kayereŋo kandúkoŋo inho ñaañiira.

Angu, ñammi básedeŋo, banfaaŋánahinem mees, andooh bayaku Yensa b’anwuraŋemne k'aŋŋay bukanku tuuro k'ampájul m'adokunehne bayaaho bámár.

35Agida dam, jamaŋo jup imme na n'ankolom k'anningehem. Angu, ñanlaameku Ñanyahudo, anyeefihem anyéjeh:

- Ningeŋ baŋ! Ummu ii! Ahathat gupahunku jamaŋo, kanda pirendeŋ bupahunku bigokunom! Eke ummu gayéjehne, úmár agune Umaasaŋo mu Díino Acaabenne? Inini aji aguy Umaasaŋo Mu Díino Acaabenne, umaasahu Israyel, inini akuc baŋ a dinlihano k'ínfegoŋ!

Nim ñanlaameku Ñanyahudo aŋŋayemne buyeefulo.

36Ñammi básedeŋo mees anyeefihem. Angu, anjohundom bineegaro anyéjeh:

- Ani! Ruuhor baŋ! 37Iyoo! Eke f'ugune umaasahu Ñanyahudo?! Iyoo! Angu pahun baŋ bigokon k'ífegmiŋ!

K'anyeefihem na.

38Agida, Pilat n'atéekiner ñammi básedeŋo h'aññantane aññaañ a kayero ki nim jamaŋo ampájul h'asaabumne Yensa añantay aniiro. Angu maŋ nim gankanne. Bambollay andooh k'ankoten a dalihano a raafununku bigoku Yensa. Inini gaññaañne na anyéj: «Ummu Umaasahu Ñanyahudo.» Hómár gaññaañne k'ankoten a dalihano.

39Kanda imbi ñanrifaŋo inako m'anfaaŋánahinaane na dam, urifaŋo úduko ayéj:

- Eke fi ugune Umaasaŋo mu Díino acaabenne ba bupahunkint? Inini, pahun baŋ bigokon! Gubollay upahun mint!

40Ki urifaŋo úduko aŋoyind údinem ayéjem:

- Hey! Fi! Dahu úyej nim! Ingah! Fi dubenuh Díino baŋ? Eke mintor ankitikiti mintor anyéj mara mintor ilallo nip iññantahoŋ inniirohoŋ gub? 41Kanda mintor mungu ajajar k'ambuj mintor, mara inkaanoŋkaan hóleeri, kanda ummu kandaŋ honj. Ummu mungu jadaŋ k'ambujom.

42Balóbi nim, akir ayéj Yensa:

- Inini, Yensa! Arafaŋ! Bonkerer! Gunoohi a bunoohunku maasayahan, dahu ufiiramaam! Ku k'ulentálahaam k'uyik bankabaŋ a binaam.

43Angu fo urifaŋo akiinahemne nim, Yensa aŋoyindem ayéjem:

- Ingah! Túyor k'íteekino marigeno: Haani bísibaŋo bi gub fi uŋankáneh arjanna ingi me.

Biniirohu Yensa

44Angu afúrumi na, waathu báárigo bapúti, didiiraŋo nip amurul bim. Amurul baman rayiibo. 45Angu, a maŋ waato nómár mees, beŋen Jerusalem, a gufachu Jaameŋo Adénno, batambilhu ridoŋo n'agune na afaca, akaan habíd hanak. Agida, batambilhu ridoŋo nómár agune a jégenenku kantígo k'arennáne ingi kantígo k'afaŋunumne n'arenn. Inho ayikne beŋen a Jaameŋo Adénno beŋen a bukoku Jerusalem dam.

46Angu, fam kireŋ Yensa awuugane ayéj:

- Abó! Túyor k'iŋoyindito hátekum.

Balóbi nim mees akir aniiro.

47Angu, ulaameku ñammi básedeŋo m'awonnáne bumarahu Yensa a dinlihano, f'afégne h'ayikne dam ingi hakaananku Yensa jandiŋ baniirom, aramun Díino k'afak ayéj:

- Ingah! Ummu, afeerereemfeer fañ mara ummu úwuuhi. Kandaŋ haani honj.

Nim ulaameku ñammi básedeŋo aséediyane.

48Agida, jamaŋo imme na n'anrumun k'angu anningeh h'ayikne bísibaŋo bímár. Angu fo Yensa aniirone, immereŋ ambicay. Kanda h'anfégne dam aléerumeeniŋ dáde ki ñanlabahi anhooŋoh. 49Kanda dam ñaññanku Yensa ingi indikaamo m'ankokayerne ingi úmár biriman a didiirahu Galile, immereŋ mingu bicayereŋeŋ k'annooh maŋ na. Anwonnwonn aŋŋantálina k'angu anningeh h'ayikehne nip.

F'anninkne Yensa a búyindo

50-51Afúrumi na, ayikyik údiigeen úduk m'aretuh Isuf. Angu Isuf, údin saariŋo n'ayéjuhne Arimate n'agune maŋ na a didiirahu Júde. Agida, údiigeeno úmár atohtoh a Tilibinaalo Adénno no Ñanyahudo. Agida Isuf, wúur m'awúuh. Hakaanankánam nip ajónjoon. Faka Isuf, ahekaheka ki bísibaŋo apút bi Díino abúuñokunehne umaasahánam k'amara duniyaŋo inno. Angu Isuf, maŋ ni atohne a Tilibinaalo Adénno, f'anlekne balóbo k'anyéj Yensa añantay aniiro, úmár Isuf mungu lókiireŋ ho meŋen anlóbne. Lókiireŋ gukitiŋo g'ankitine Yensa ingi h'ankaanemne. 52Angu, f'ayennehinne mara Yensa, Díino adoohemdooh, adék amiih úgufánááro Pilat ayéjem:

- Gúfánáár! Hóge inini ipiren ídek idooh búgáku Yensa k’ídek isutura a búyindo?

53Angu, úgufánááro alóki ki Isuf adék akucun búgáku Yensa a dinlihano. Angu adék akaan maŋ nim. Bakucunti búgááro mees, adooh kasankeŋo k'agúbinum búgááro k'adoohom k'adék asuuturaham a búyindo. Agida búyindo búmár akankaan iniman rankáb r'anfiline a bawaalo k'ayik gufac.#23.53 Úpájuli, Ñanyahudo, immereŋ gara anwuboh búgáár. Gampúti ansuturaham a ránkáb r'anfil ajóon k'angu anrokom na. Anfilfil búyindo búmár, kanda ni fanti bannink na bugáár.#23.53 Agida Ñanyahudo gúduk ungo na annink agááráŋ alabahi a búyindo úmbonduko. Angu, Isuf bapúti na a búyindo dam, anink na búgáku Yensa k'asutura. Basuturahem na, adooh dawaal arok burukumbaano. 54Agida, a waato n'akanne nim, n'aguy bísibahu arjum, te jamaŋo n'aŋŋay kapareŋo ba gucunkunom maro dam agune bísibaŋo bi guyohálaŋo.#23.54 Úpájuleŋ, imbi immereŋ Ñanyahudo, bísibaŋo bi guyohálaŋo, a waathu fítirhu arijumo gatooŋumohne. Gúmár akanne ammaja busuuturahu búgááro jandiŋ fítiro babárum. 55Agida dam, fo Isuf aŋayerne bukucunku búgááro a dinlihano, indikaamo m'ankokayerne ingi Yensa biriman Galile ansosor. Angu, immereŋ antif Isuf baman a búyindo b'adékehne buninkhu búgáku Yensa. Angu indikaamo bampúti na, ankorosoh ni Isuf aŋayne busuturahu búgáku Yensa a búyindo. 56Angu indikaamo, banfégi k'anninkemne, aŋŋoolin ba a hádigeŋo h'ankucunaane. Bampúti, andék antibila kárámánjo ingi hódukoŋo h'añantane ayik ba butopotoku búgáku Yensa. Bandaŋuni mees, angu ampare nip, mara gucunkunom agune bísibaŋo bi guyohálaŋo, te Luwahu Musa ayéjyej wúur dadóol bísibaŋo bímár. Gúmár akanne ampare nip gu bandór arjumo k'annink na ba dahankánam, k'angu anyohála bísibaŋo bi guyohálaŋo.

Currently Selected:

Luk 23: GD

Highlight

Copy

Compare