Luk 21

Fo udikaamo mu yikireŋne honj afúnnáne sadaŋo k'anéer nip Díino fo yikereŋ h'anékinehne

1Angu a waato nómár, fo Yensa alóbne nim, agida n'aroŋ bim a Jaameŋo Adénno. Angu f'agune na, dam akorosoh ni m'anyikne kunyiko andékirehne andék anworoh sadaŋaŋo a keeso. 2Angu baningiining, afak afég udikaam mu údiigenkinem Díino adooh. Agida udikaamo úmár, uyikirenku honj. Angu, udikaamo úmár afúnn ñokodi ñonak, anink awor na a keeso. 3Angu na Yensa ayéjne:

- Túyoreŋ baŋ k'íteekinoonuŋ marigeno: Ingah! Udikaamo m'aworne ñokodihinem ñonako, sadahánam inno n'aworne nanka inini, íyeji, afaŋi no jamaŋo nip m'anworne nanka, maro úmár údiigenkinem Díino adoohemdooh, úmár uyikireŋ. Adoodooh kunyikhinem nip k'awor nanka a keeso.

4Abocin ayéjeeniŋ:

- Úmár mídeŋ maŋ ni índukoŋo m'úpájulne immereŋ angilagila honjoroŋ nip, k'andék anfúnn a h'anfalluntne, hómár gankir andoorne ba buworo a keeshu sadaŋo nanka. Kanda udikaamo úmár ii, abénnbenn haajankánam nip k'adooh kunyikhinem k’ayikne nip k'anéer Díino sadaŋo. Gúmár gíyejoonuŋne mara uyikireŋo udikaamo moŋon, mu údiigenkinem aniirone, h'anéerne Díino afaŋfaŋ ho índukoŋo nip annéerne Díino.

Fo Yensa alóbne a ninkoomurunku Jerusalem ingi ni jamaŋo andékehne ba buyehenku ñanfiyinkinem

5Afúrumi na, Yensa anguy a buteerehu Jaameŋo Adénno ingi ñantaalibehinem. Angu ñantaalibehinem anyéjeh:

- Háh! Jaameŋo Adénno inno ajónjoon! Ningeŋ baŋ faŋo bawaalo b’anlódumne n'ajónne fanfaŋ! Ingi ho jamaŋo annéerne#21.5 Akankaan ininkaman jamaŋo annéneer honjoŋo ininkaman sano wolo kodiforo ba bújooninku irukumbaano. Karo ayikyik h'anhájne a sílodo ba bújoonirinku gufaco mees. Hómáráŋ nip aguy sada. ba bújoonirinku jaameŋo k'annink na, hómáráŋ mees ajónjoon dáde!

Angu, f'anlóbne nim Yensa ayéjeeniŋ:

6- Oo! Kanda túyoreŋ k'íteekinoonuŋ a gubaarhu h'adékehne buyiko. Ingah! Jaameŋo adénno n'ófekeŋne inini n'ajónne, ayikhineh bísiba bi m'anfoyne mintor andékekinehne k'anfili nip fo alublubina akaan bujunoob.

7Angu, f'alóbne nim ñantaalibehinem ammiihem anyéjem:

- Ha! Arafaŋ! Daaraŋ hómár gadékehne ba buyiko? Ingi tamaseer nooraŋ gadékehne ba bujellihinkint mara waato no bufilihu Jaameŋo Adénno adasaridasa?

8Ayéjeeniŋ:

- Ingah! Ninkinan! Ku k'úduk ukáánumáŋ! Índukoŋo ñanlabahi andékekineh k'andak anjodoonuŋ k'anyéjoonuŋ immereŋ angune me,#21.8 A gúbido ungu, Yensa alóblob a gubaarhu h'ayikhinehne a duniyaŋo jégenenku da Yensa aŋoolinne ba arjanna ingi d'aŋoolinekinehne. Guyroŋ mara alóblob a gubaarhu n'akoomunkunehne Jerusalem bareŋ. Umaasaŋo mu Díino Acaabenne. Agida guyroŋoŋ Umaasaŋo mu Díino Acaabenne. Índukoŋo anyéjhineh, «Ingah! Waato abábár. Duniyaŋo búdeto gaŋane!» Agida waato nómár n'aroŋor. Anjodhuneh ñanlabahi, kanda ninkinan, haani anlóboonuŋ nim, dahu ulahureeniŋ, biki utifilineeniŋ.

9Ayéjeeniŋ:

- Ingah! Ayikhineh waat n'oyennehinkineŋne a gubaarhu biñaamaŋ bilabahi, wola anyéjoonuŋ, imme bim burumo. Aji uyennehineŋ hómár, dahu ubenuheŋ. Ingah! Hómáráŋ nip añantay ayik fanta, kanda kadéthu duniyaŋo afant aroŋroŋ. 10Fég baŋ, jandiŋ duniyaŋo badétum, duniyaŋo aléerhineh dáde mara « siy ingi siy aññaamháneh. Maasa ingi maasa aññaamháneh.#21.10 Na Yensa aŋoolinkinne ho Anabila Esay añaañne fam. (Es. 19:2) » 11Ingi faka mees, a waato nómár didiiraŋo ayindinaháneh ingi sembe k'adék fo akimbula k'apuñ bilabahi. Kúugo ayikhineh dáde ingi banéreŋo mees alabaháneh k'apas imbi jamaŋo jup. A waato nómár, Díino akankáneh honjoroŋo ho jamaŋo fégehadaŋaŋne a raafo. Angu, anningidir a raafo, anfékineh h'ajaaháliheeniŋne k'agulumbin jamméejenku jamaŋo nip. Hómár nip ajellihinkineh jamaŋo maro waato no kadéthu duniyaŋo adasáridasa.

12Ayéjeeniŋ:

- Kanda ingah! Hómáráŋ nip añantay ayik fanta, kanda kadéthu duniyaŋo mungu afant aroŋroŋ. Jandiŋ hómáráŋ banyikum, ninkinan uyokunoŋ fanfaŋ deh! Ingah! Jamaŋo andak anlakunoonuŋ k'anyehenoonuŋ dáde. Anlakunoonuŋ k'andékuroonuŋ ba a jaameŋeŋo k'ankitiyoonuŋ na anyehenoonuŋ fanfaŋ. Anlakunoonuŋ k'ankimbenoonuŋ. Anlakunoonuŋ k'ambáásinoonuŋ ba imbi ñammaasaŋo ingi imbi ñangúfánááro k'ankitiyoonuŋ anyehenoonuŋ. Hómáráŋ nip gandékehne bukaano a gubaarhu n'uguyeŋne ingi me.

13Ayéjeeniŋ:

- Angu, a gubaarhu hómár akankánehne k'upireneŋ úseediyahaŋ k'úteekineeniŋ Kúmbuuñaamo Kúnsuuminno ku me.

14Ayéjeeniŋ:

- Inini ninkinan, janteneŋ baŋ! Jandiŋ banlahumoonuŋ, moŋon moŋon fo ulah a jamméejhen mara, aji anlahen k'andékuro ba kitiŋo, fi k'onoone dukori a gubaarhu h'andékehne ba bumiken ingi h'ódekehne ba buŋoyindikinin. 15Ingah! Ninkinan, úputoŋdir a kitiŋo, me fankum ijellihinkunoonuŋ moŋon moŋon n'uñantane úlob. Me ínekuno jamméej j'ópájul, aji ñanyehenkinan ammiihoonuŋ, úpájihineh n'uñantane ujaabiyeeniŋ. Ujaabihineeniŋ ingi jamméej j'ópájul, immereŋ faŋo, dampiren k'ankakul h'ólobeeniŋne. Ampájihineh mara hómár marigen. Immereŋ dampiren k'aññopoonuŋ deh! Gúmár gíyejoonuŋne, ninkinan, dahu unoohoŋ na k'uwosenkeŋ h'ódekheŋne ba balóbo a kitiŋo.

16Abocin ayéj ñantaalibehinem:

- Túyomuŋ baŋ k'íteekinoonuŋ gu bandór. Ninkinan, ayikhineh waat n'adékireh, jamaŋo anfoyhunoonuŋ a gubaarhu gufiyumo g'ufiyumemuŋne. A waato nómár haani ñamboshánan faŋo andékekineh k'andék anlahoonuŋ k'andékuroonuŋ a halaku m'anfoyoonuŋne. Ingah! Índoonenenkinan, jamankánan, ñaññankayhánan, immereŋ mi fiyundumne, maŋ nim gandékehne bukankánan. Ba bulakánan gandékehne k'andékuroonuŋ imbi m'anfoyoonuŋne. Angu, immereŋ ambujhuneh impiinam a binanan. 17Ingah! A waato nómár n'adékirehne, ñanlabahi anfoyhunoonuŋ a gubaarhu n’uguyeŋne ingi me. 18Kanda bumburunku arinenkánan bareŋ gampirenne anduj. Ingah! Ninkinan fankánan, háteerenkánan, wúur dapiren akaan na hogurumaareŋ. Díino apahunkunoonuŋ. 19Afeero mara moŋon moŋon ugune a kunyoho k'ulah aliŋ bufiyunkum, Díino apahunkuno. Uyikhineh kanjébo ka bandór.

Ka Yensa afak abocinne alób a gubaarhu bukoomunku Jerusalem

20Yensa abocin ayéjeeniŋ:

- Angu inini, a gubaarhu bukoku Jerusalem, janteneŋ baŋ hóbun k'íteekinoonuŋ! Aji úfegeŋ bísiba ni m'anfoyoonuŋne andékirne, meŋen meŋen ingi ñammi básedenkinin, gúfurumo a didiiraŋo dídukoŋo, k'andéker ankol bukoku Jerusalem, afeeroonuŋ mara ba bukoomunku bukooro gandékuntne. 21Angu, bísibaŋo bímár, m'angune a didiirahu Júde nip, aññantay angír k'andék ankúba a montañaŋo. Maŋ nim guñantaheŋne ukaanaŋ. Ki moŋon moŋon ugune a bukoku Jerusalem, úfur a bukooro úgir k'úduk úkuba a montañaŋo. Ki moŋon moŋon ugune a kanaŋaŋo, dahu uŋoolin ba a dígo Jerusalem deh! Gít maŋ fam ba a montañaŋo!

22Yensa abocin ayéjeeniŋ:

- Ingah! A waato nómár n'adékirehne, Díino ayehenkineh jamanku Jerusalem fanfaŋ, a gubaarhu hójondoŋo h'ankanne. Ingah! Ho anabiyoŋoŋo aññaañne nip a Hañaañeno biriman fam, hómáráŋ nip adak ayikhineh.

23Yensa ayéjeeniŋ:

- Ingah! A waato nómár jamanku Jerusalem anyokuneh fanfaŋ. Indikaamo m'angune ingi badooŋo, ingi m'anlahne jalero, masa! Arinkum akabkab dáde maro immereŋ dampiren k'angír, angu anyokáneh dáde. Ingah! Díino añuumulñuumul fanfaŋ ingi jamanku didiiraŋo indi, angu ba buyehenkinin dáde gadékehne. Aléerhineh fanfaŋ a binanin. 24Fégeŋ baŋ! Ñammi básedeŋo mi guyroŋoŋne Ñanyahud andékekineh baman nanka a bukooro umbu. Kanda immereŋ dansúuma deh! Ba bújegunku didiirahánan gandékehne k'andék anyehenoonuŋ k'andooh basandihinin k'ambuj ñanlabahi.

Abocin ayéjeeniŋ:

- Ingi mees, immereŋ m'anfoyoonuŋne, anlakáneh índukoŋ mi Jerusalem k'andékureeniŋ ba a didiiraŋaŋ díduk. Nim jamanku Júde anfisfisinkunuhne a didiiraŋaŋ dilabayeŋ. Maŋ nim m'anfoyoonuŋne gandékehne ba bukankánan. Kanda mi guyroŋoŋne Ñanyahud m'anfoyoonuŋne annokuneh maŋ nanka a bukooro umbu b'enguyoŋne k'anyehenoonuŋ. Annokuneh nanka baman da Díino ayéjhinehne waato no búfunnhánin a bukooro abábár. Angu bísibaŋo bímár apútodir, Díino afúnnhuneeniŋ a bukooro umbu.

Fo Yensa alóbne a nintiku h'ayikhinehne jandiŋ úmár Yensa baŋoolinumer

25Yensa abocin ayéjeeniŋ:

- A waato nómár jamaŋo ambenuhuneh dáde mara ayikhineh h'anfékinehne a raafo ho fégahadaŋaŋne. Díino ajellihinkineh jamaŋo tamaseereŋ no bujellihinku jamaŋo mara kadéthu duniyaŋo atéejariteejar. Angu, tamaseereŋo nómáráŋ afékunuh a bísibaŋo, ingi a júuno, ingi a bahúuro. Angu, tamaseereŋo nómáráŋ ajuhulinkineh dáde ñammi duniyaŋo. Hómár gandékehne búfego a raafo. Fankaaso mees akankáneh. Ayindinaháneh fanfaŋ ki gumbankánam akeng dáde f'adék awat didiiraŋaŋ dilabayeŋ. Angu jamaŋo, aji anfégi gumbaŋo n'akengne dáde, jamméejenkinin anguulimbinahne k'ambenuh dáde. 26A waato nómár índukoŋo, aji anfégi baléero ingi kunyoho ingi h'ayikne nip a duniyaŋo, annenkineh k'andur a gubaarhu kumbenuho. Fég baŋ, a waato nómár, bísibaŋo ingi bahúuro nip ayindinaháneh dáde.

27Yensa abocin ayéjeeniŋ:

- Angu, aji hómáráŋ nip ayiki mees, jamaŋo anfékineh Údiigeeno M'acaabenaane n'adékirehne a hakubo. Angu dam adékekineh ingi sembehinem ingi bafuuh bádé ingi léerhinem no Díino anéeremne.

28Abocin ayéjeeniŋ:

- Angu, ninkinan ñantifilinkum, janteneŋ baŋ! Ingah! H'élobne nip a gu h'adékehne buyiko, aji úfegi n'atooŋne buyiko inini, dahu ubenuheŋ! Maro, aji úfegeŋ tamaseereŋo nómáráŋ, afeeroonuŋ maro waato no Díino adékehne ba bupahunkánan atéejariteeja. Gúmár gíyejoonuŋne moŋon moŋon, aji úfegi hómáráŋ, dahu uhotuba, dahu udeewun.

29Angu, Yensa balóbi nim mees aŋoolin anéereeniŋ funaare, ayéjeeniŋ:

- Ninkinan! Ningeŋ baŋ sifigo wola munnoŋo múnduko mees. 30Eke mintor, aji ínfegoŋ munnoŋo n'areebehne, afeero maro facato atéejarne. 31Maŋ nim ganik akankáneh a kadéthu duniyaŋo. Úfegeŋdir tamaseereŋo n'éfurumne balóbo, afeero mara waato no Díino akucokunehne ba buwonnunku maasayahánam adasaridasa.

32Abocin ayéjeeniŋ:

- Túyoreŋ baŋ k'íteekinoonuŋ marigeno: H'élobne nip a gubaarhu h'adékehne buyiko gucum tápár, adak ayikhineh. Ingah! Hómár nip ayikhineh a jamaano amánduko. 33Ingah! Raafo ingi réeŋo n'énfegoŋne inini, ba kadét gadékehne. Balókum bareŋ gadékehne ba gufallaŋo. Bámár dabayahar.

34Ayéjeeniŋ:

- Angu ninkinan, túyoreŋ k'itengahoonuŋ! Ninkinan, káánánteŋ! Ingah! Dahu úduk uduuhahaŋ a hadékhu bañaŋo ingi hájuŋo k'unoosoŋ, uruuhoŋ fo ukaaniyeŋ. Ingi faka, dahu úduk ukoriyeŋ a gubaarhu honjoronku duniyaŋo inno deh! Fégeŋ baŋ, aji f'ummo n'uduuha a hómáráŋ nip, bísibaŋo b'eŋoolinekinehne apiren atereŋo. Gúmár gíyejoonuŋne, bísiba bísiba, moŋon moŋon uñantay upare unooh na, ki nim dahi bísibaŋo bímár atereŋo. Maŋ ni kábo atereŋehne abóno k'alaham na, maŋ nim bísibaŋo bímár gadékehne buterenku jamanku duniyaŋo inno. 35Ingah! K'afeeroonuŋ mara bísibaŋo bímár aterenkineh jamanku duniyaŋo nip. 36Gúmár gíyejoonuŋne, ninkinan, pareereŋ unoohoŋ na k'angu ukiinahaŋ Díino, ki nim, da bísibaŋo bímár apútokunehne, datereŋoonuŋ. Kiinareŋ Díino waatowaat ki nim upireneŋ umuñahaŋ a waathu baléero b'adékirehne k'úfuroŋ na básuum. Kiinareŋ mees Díino k'anéeroonuŋ sembe a waato nómár, ki nim duneneŋ. Kiinaaremeŋ faka ki, d'enrakunoŋne, upireneŋ uwonnoŋ ingi busewo a binaam, me Údiigeeno M'acaabenaane. Ingah! Durohoŋ dam.

Nim Yensa ajaabine ñantaalibehinem dam f'ammiihemne a gubaarhu da Jaameŋo Adénno afilihunuhne.

37Angu, ásibaŋo ámáráŋ nip, Yensa gafúri harennaamo, adék ba a buteerehu Jaameŋo Adénno k'anooh na k'akawandineh jamaŋo baman bugaanigo yem. Angu, bugaanigo gapúti, Yensa afúr a bukooro k'adék adúuf a Montaaño Olifo, úmár ingi ñantaalibehinem. Nim gakaanahne ásibaŋo ámáráŋ nip. 38K'angu jamaŋo ganfúrafura k'andékeh harennaamo anlahunkam na a buteerehu Jaameŋo Adénno anrumun na tip, k'angu anjanteneh kawandhánam.

Currently Selected:

Luk 21: GD

Highlight

Copy

Compare