خروج ۸
۸
گوزگأ بلأ
1 خوداوند موسایَ بٚفرمأسته: «وأگرد فرعونٚ ورجأ و اونَ بوگو کی خوداوند اَطؤ فرمأیه: می عیبأدت کودنٚ رِه وئأل کی می مردوم بٚشٚد؛ 2 اَطؤ نٚبه گوزگأ اَمرأ تومأمٚ تی سرزیمینَ پورَ کونٚم. 3 نیلٚ روخأن گوزگأ اَمرأ پورَ بِه. روخأنٚ جَا گوزگأیأن بیرون اَیٚده، فوتورکده تی قصرٚ میأن و حتّا شٚده تی خوفتن جیگأ دورون! تی مردوم و تی قصرٚ آدمأنٚ خأنه‌یأنٚ میأنم درز کونٚده. اوشأن حتّا خمیرٚ تشتأن و نأنٚ تونورأنَ پورَ کونٚده. 4 گوزگأیأن تی سٚر و کله و تی مردوم و تی قصرٚ آدمأنٚ سٚر و کله رو بوجؤر شٚده.»
5 بأزون خوداوند موسایَ بٚفرمأسته: «هارونَ بوگو کی خو عصأیَ رأستَ کونٚه روخأنأن، چشمه‌یأن و سَلأنٚ وٚر کی گوزگأیأن بیرون بأیٚد و همٚتأ جیگأیَ پورَ کونٚد.»
6 پٚس هارون مصرٚ آبأنٚ وٚر خو دٚسَ رأستَ کوده و گوزگأیأن بأمؤده بیرون، و مصرٚ سرزیمینَ پورَ کودٚد. 7 ولی مصرٚ جأدوگرأنم بتأنستد خوشأنٚ جأدو اَمرأ هه کأرَ بوکوند و ایتأ بأرٚ شین گوزگأ بیرون بأوٚردٚد.
8 پٚس فرعون، موسا و هارونَ دؤخأده و بوگفته: «خوداوندٚ جَا بٚخأیید اَ گوزگأیأنَ اَمی جَا فرأنٚه و من قول دٚهٚم خوداوندٚ قوربأنی فأدأنٚ رِه بنی‌ایسرأییلَ سٚرأدم کی بٚشٚد.»
9 موسا فرعونٚ جوأبٚ رِه بوگفته: «ایتأ زمأت بٚنه کی تِرِه و تی قصرٚ آدمأن و تی مردومٚ رِه دوعأ بوکونٚم و جغرز نیلٚ روخأنٚ میأن تومأمٚ گوزگأیأن جٚه بین بٚشٚد.»
10 فرعون بوگفته: «فردأ.»
موسا جوأب بٚدأ: «اَنٚ وأسی کی تو بفأمی اَمی خودا یهوه مأنستَن هیکس نئیسأ اَ کأرَ کونٚم. 11 تومأمٚ گوزگأیأنَ، تو و تی خأنه و تی قصرٚ آدمأن و تی مردومٚ جَا دورَ بٚده. اوشأن فقد نیلٚ روخأنٚ میأن مأنٚده.»
12 موسا و هارون فرعونٚ قصرٚ جَا بأمؤده بیرون و موسا خوداوندٚ جَا خأهیش بوکوده کی گوزگأیأنَ جٚه بین بٚبره. 13 خوداوندم موسا دوعأیَ ایجأبت بٚفرمأسته و مصرٚ اَسٚر تأ اوسرٚ میأن تومأمٚ گوزگأیأن بٚمٚردٚد. 14 مردوم اوشأنَ سربٚسر جمَ کودٚد، ایجور کی همٚتأ جیگأیَ موردألٚ بو بیگیفته. 15 ولی گوزگأیأن کی جٚه بین بوشؤده، فرعون هنده خو دیلَ سختَ کوده و هوطؤ کی خوداوند بٚفرمأسته بو رأضی نوبوسته کی ایسرأییلٚ مردومَ سٚرأده.
پشه بلأ
16 بأزون خوداوند موسایَ بٚفرمأسته: «هارونَ بوگو کی خو عصأیَ بٚزنه زیمینٚ سٚر کی تومأمٚ مصرٚ میأن گرد و خأک بٚبد پشه.» 17 موسا و هارون هوطؤ کی خوداوند اَشأنَ بٚفرمأسته بو انجأم بٚدأده. هارون هطؤ کی خو عصأیَ بٚزِه زیمینٚ سٚر مصرٚ اَسر تأ اوسٚرَ ایتأ بأرٚ شین پشه پورَ کوده و پشه‌یأن، آدمأن و حیوأنأنَ فوتورکستده. 18 مصرٚ جأدوگرأنم اَ کأرٚ کودن وأسی حقٚ سعی بٚزِده، ولی اَیدفأرِه نٚتأنستٚده. 19 پٚس فرعونَ بوگفتٚده: «اَ کأرٚ میأن خودا دٚس نٚهأ.» ولی هوطؤ کی خوداوند بٚفرمأسته بو، هنده فرعونٚ دیل نرمَ نوبوسته و موسا و هارونَ محل نٚنأ.
مگزٚ بلأ
20 پٚس خوداوند موسایَ بٚفرمأسته: «صُبٚ دٚم ویریز و بوشو روخأنٚ کنأر و فرعونٚ رأفأ بِئیس. او زمأت کی اون بأمؤ اویَه اونَ بوگو کی خوداوند فرمأیه: می عیبأدت کودنٚ رِه می مردومَ سٚرأدن کی بٚشٚد، 21 اگه اَطؤ نٚبه تو و تی قصرٚ آدمأن و تومأمٚ مصرٚ مردومٚ خأنه‌یَ مگزٚ اَمرأ پورَ کونٚم و زیمین مگزٚ اَمرأ پورَ بِه. 22 ولی جوشنٚ سرزیمینٚ میأن کی بنی‌ایسرأییلٚ زٚندیگی جأجیگأ ایسٚه، هیتأ مگز نیشِه اویَه کی تو بفأمی من اَ سرزیمینٚ خوداوند ایسٚم 23 و تی مردوم و می مردومٚ میأن فرق نٚهٚم. اَ موجیزه فردأ بیرون اَیٚه.»
24 خوداوند اوطؤ کی بٚفرمأسته بو، فرعونٚ قصر و قصرٚ آدمأنٚ خأنه‌یَ مگزٚ اَمرأ پورَ کوده و مصرٚ خأکٚ اَسٚر تأ اوسرٚ میأن خرأبگی بٚبأر بأمؤ. 25 پٚس فرعون، موسا و هارونَ دؤخأده و اوشأنَ بوگفته: «خٚیلی خُب، شٚمٚره وئألم کی شیمی خودا رِه قوربأنی فأدید، ولی مصرٚ جَا بیرون نیشید.»
26 موسا جوأب بٚدأ: «اَمأن نتأنیم اَمی خوداوند خودا رِه مصریأنٚ چومٚ ورجأ او حیوأنأنَ قوربأنی بوکونیم کی اوشأنٚ کوشتنٚ جَا تنفر دأرٚده؛ چونکی ایمکأن دأره اَمٚرَه سنگسأر بوکوند. 27 اَمأن وأستی سه روج اَندر سفر کودنٚ رِه، مصرٚ جَا دورَ بیم خوداوندٚ دستورٚ موطأبٚق، اَمی خوداوند خودا رِه صأرأیی میأن قوربأنی فأدیم.»
28 فرعون بوگفته: «من وئألم شیمی خوداوند خودا رِه قوربأنی فأدأنٚ وأسی بیشید صأرأیی میأن، ولی خٚیلی دورَ نیبید. هسأ، مِرِه دوعأ بوکونید.»
29 موسا بوگفته: «جٚه اَیٚه کی بوشؤم بیرون، خوداوندٚ ورجأ دوعأ کونٚم و اَ بلأ فردأیی جٚه تو و تی قصرٚ آدمأن و مصرٚ مردوم دورَ بِه. ولی تی حواس بٚمأنه کی ایوأردِه اَمٚرَه فیتَ نیدی، بلکی وئألی می مردوم بٚشٚد خوداوندٚ رِه قوربأنی فأدٚد.»
30 پٚس موسا جٚه فرعونٚ ورجأ بوشؤ بیرون و خوداوندٚ ورجأ دوعأ بوکوده. 31 خوداوند موسا دوعأیَ ایجأبت بٚفرمأسته و فرعون و اونی مردومٚ جَا تومأمٚ مگزأنَ فرأنٚه، ایجور کی حتّا ایتأ دأنه مگزم نمأنسته. 32 ولی اَیدفأرم فرعونٚ دیل نرمَ نوبوسته و ولأشته ایسرأییلٚ مردوم مصرٚ جَا بٚشٚد بیرون.
Currently Selected:
خروج ۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org