خروج ۹
۹
مصریأنٚ گأب و گوسوٚندٚ سٚر بلأ اَیِه
1 بأزون خوداوند موسایَ بٚفرمأسته: «وأگرد فرعونٚ ورجأ و اونَ بوگو کی عبرانیأنٚ خوداوند خودا فرمأیه: می عیبأدت کودنٚ وأسی می قومَ سٚرأدن، 2 اگه هطؤ اوشأنَ بٚدأری و ولأنی کی بٚشٚد 3 بٚدأن کی خوداوندٚ دٚس ایتأ مرض تأوٚدِه تومأمٚ شیمی مألأنٚ جأنٚ میأن، جٚه اسبٚ گله‌یأن بیگیفته دأره تأ اولأغ، شوتور، گأب و گوسوٚند. 4 من ایسرأییلٚ گله‌یأنٚ میأن و مصریأنٚ گله‌یأنٚ میأن فرق نٚهٚم، ایجور کی ایسرأییلیأنٚ گله‌یأنَ هیچی نیبه. 5 من اَ بلأیَ فردأ شیمی سٚر اَوٚرم.»
6 فردأیی، خوداوند هوطؤ کی بٚفرمأسته بو، انجأم بٚدأ. مصریأنٚ تومأمٚ گله‌یأن بٚمٚردٚد، ولی هیتأ مألأن بنی‌ایسرأییلٚ شین جٚه بین نوشؤده. 7 پٚس فرعون وأوٚرس وُورس کودن رِه ایتأ مأمور اوسه کوده کی بیدینه حِئقت دأره کی هیتأ جٚه بنی‌ایسرأییلٚ مألأن نمٚردٚده. اَنٚ اَمرأ کی بٚفأمسته اَ مأجیرأ حِئقت دأره هنده اونی دیل نرمَ نوبوسته و خودا قومَ سرأ نٚدأ.
دومبولٚ بلأ
8 پٚس خوداوند موسا و هارونَ بٚفرمأسته: «کوره خأکسترٚ اَمرأ شیمی موشتأنَ پورَ کونید و موسا فرعونٚ ورجأ او خأکیسترَ فوکونه هوا جؤر. 9 او وخت او خأکیستر غوبأرٚ مأنستَن، مصرٚ اَسٚر تأ اوسرٚ خأکَ پورَ کونه و حیوأن و اینسأنٚ جأنٚ سٚر ایجور دومبول چأکونه کی خٚیلی درد دأره.»
10 پٚس اوشأن خأکیسترَ اوسأدٚد و فرعونٚ ورجأ بِئیسأده. موسا خأکیسترَ فوکوده هوا جؤر و مصریأن و اوشأنٚ حیوأنأنٚ جأنٚ سٚر ایجور دومبول بأمؤ بیرون کی خٚیلی درد دأشتی، 11 ایجور کی جأدوگرأنم نتأنستٚد موسا جولو بِئیسٚد، چونکی اوشأن و مصری‌یأن اَ دومبولَ بیگیفته بود. 12 ولی خوداوند هوطؤ کی پیشترأنٚ رِه موسایَ بٚفرمأسته بو، فرعونٚ دیلَ سختَ کوده و اون موسا و هارونٚ گبأنَ محل نٚنأ.
تگرگٚ بلأ
13 بأزون خوداوند موسایَ بٚفرمأسته: «صُبٚ دٚم ویریز و فرعونٚ روبرو بِئیس و بوگو کی عبرانیأنٚ خوداوند خودا فرمأیه: می عیبأدت کودنٚ رِه می قومَ سٚرأدن کی بٚشٚد، 14 اَطؤ نٚبه اَیدفأرِه ویشتر بلأ تی سٚر و تی قصرٚ آدمأن و تی قومَ سٚر اَوٚرم کی بفأمید تومأمٚ دونیأ میأن می مأنستَن خودا نئیسأ. 15 من تأ هسأ تأنستیم می دٚسَ رأستَ گیرم و ایجور بلأ تی سٚر و تی قومٚ سٚر بأوٚرم کی زیمینٚ سٚر جٚه بین بیشید. 16 ولی اَنٚ وأسی تٚرَه زٚنده بٚدأشتم کی می قودرتَ تٚرَه نیشأن بدم و می نأم تومأمٚ دونیأ آدمأنٚ میأن بٚشنأخته بٚبه. 17 ینی هنو نخأیی وئألی می قوم بٚشٚد و نخأیی اوشأنَ سٚرأدی؟ 18 بٚدأن کی وئألم فردأ هه زمأتٚ میأن آسمأنٚ جَا ایجور تگرگٚ وأرٚش بوکونه کی مصرٚ تأریخٚ میأن اَطؤچی نأشته بی. 19 پٚس پیشتر جٚه اَنکی تگرگ تومأمٚ حیوأنأن و آدمأن کی صأرأیی میأن بٚمأنستده‌یَ جٚه بین بٚبره، دستور بٚدٚن همٚتأنَ جمَ کونٚد بأوٚرٚد خأنه‌یأنٚ میأن.»
20 بعضیتأ جٚه فرعونٚ قصرٚ آدمأن، خوداوندٚ اَ هوشدأرٚ جَا بٚترسِئده و خوشأنٚ گأب و گوسوٚندأن و نوکرأنَ بأوٚردٚد خأنه میأن. 21 ولی البأقی آدمأن خوداوندٚ کلامَ محل نٚنأده و هوطؤ خوشأنٚ حیوأنأن و نوکرأنَ بٚنأده صأرأیی میأن.
22 بأزون خوداوند موسایَ بٚفرمأسته: «تی دٚسَ رأستَ گیر آسمأنٚ ور کی تومأمٚ مصرٚ سٚر تگرگ وأرٚش بوکونه، حیوأنأن و گیأیأنٚ سٚر و تومأمٚ او آدمأنٚ سٚر کی اویَه زٚندیگی کونٚده.» 23پٚس موسا خو عصأیَ آسمأنٚ ور رأستَ گیفتٚه و خوداوند گؤرخأنه و تگرگ اوسه کوده و برق بوخورده زیمینٚ سٚر. 24 تومأم مصرٚ تأریخٚ میأن هیکس اَطؤچی تگرگ و وأشتنأکٚ گؤرخأنه نیدِه بو. 25 تومأمٚ مصرٚ اَسٚر تأ اوسرٚ میأن، تگرگ هرچی کی صأرأیی میأن نٚهأ بویَ بٚزِه، اینسأن و حیوأنَ بوکوشته، نبأتأنَ جٚه بین بٚبرد و دأرأنَ بٚشکٚنه. 26 تگرگ فقد ایتأ جیگأیَ خرأبَ نوکوده، اونم جوشنٚ سرزیمین بو کی بنی‌ایسرأییل اونی دورون زٚندیگی کودیدی.
27 پٚس فرعون، موسا و هارونَ خو ورجأ بٚخأسته و اَشأنَ بوگفته: «من می گونأیَ قوبیل دأرم. خوداوند حق دأره. من و می قوم تقصیر دأریم. 28 هسأ خوداوندٚ جَا بٚخأیید کی اَ گؤرخأنه و وأشتنأکٚ تگرگَ بٚدأره. دِه وٚسته! منم وئألم بیشید؛ نخأیه ویشتر اَیَه بِئیسید.»
29 موسا بوگفته: «خٚیلی خُب، هطؤ کی شهرٚ جَا بوشؤم بیرون، خوداوندٚ ور می دسأنَ رأستَ گیرم کی گؤرخأنه و تگرگ تومأنَ بٚه کی بفأمی دونیأ خوداوندٚ شین ایسٚه. 30 ولی وأخٚبم کی تو و تی آدمأن هنده یهوه خودا جَا ایطأعت نوکونیدی.»
31 او سأل تگرگ تومأمٚ کتأن و جو مأصولأنَ جٚه بین بٚبرده، چونکی جو سأقه گوشه بٚزِه بو و کتأن زپه بٚزِه بو، 32 ولی گندم جٚه بین نوشؤ بو، چونکی هنو زپه نٚزه بو.
33 موسا فرعونٚ قصرَ بٚنأ و شهرٚ جَا بوشؤ بیرون و خو دسأنَ خوداوندٚ ور رأستَ گیفته و گؤرخأنه و تگرگ قطعَ بوسته و وأرٚش بِئیسأ. 34 ولی فرعون هطؤ کی بیدِه وأرٚش و تگرگ و گؤرخأنه تومأنَ بوسته، اون و اونی قصرٚ آدمأن هنده گونأ بوکودٚد، خوشأنٚ کله خوشکی‌یَ پیش بیگیفتٚد. 35 پٚس هوطؤ کی خوداوند موسا اَمرأ بٚفرمأسته بو، فرعونٚ دیل سختَ بوسته و اَیدفأرم بنی‌ایسرأییلَ سرأ نٚدأ.
Currently Selected:
خروج ۹: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org