خروج ۷
۷
1 خوداوند موسایَ بٚفرمأسته: «خُب بیدین چی گفتأندرم: من تٚرَه فرعونٚ ورجأ خودا چأکودم و تی برأر هارون، تی نبی بِه. 2 تٚرَه هرچی گم هارونَ بوگو کی اونَ فرعونٚ رِه وأگویا بوکونه و اونی جَا بٚخأیه کی ایسرأییلٚ مردومَ سٚرأده. 3 ولی بٚدأن کی من فرعونٚ دیلَ سختَ کونٚم، کی خٚیلی موجیزه‌یأن و می او نیشأنأن کی قأقَ کونه‌یَ مصرٚ میأن نیشأن بدم، 4 اون ایوأردِه شیمی گبأنَ نشتأوه. ولی من ایتأ ضربه اَمرأ کی کوشِه مصرٚ سٚر دٚس نٚهٚم و می پیله دأوری‌یأنٚ اَمرأ، می قوم بنی‌ایسرأییلَ مصرٚ جَا بیرون اَوٚرم. 5 می قودرتَ کی مصریأنَ نیشأن بٚدأم و بنی‌ایسرأییلَ مصرٚ جَا بیرون بأوٚردٚم، او وخت مصریأن فأمٚده کی من خوداوند ایسٚم.»
6 پٚس موسا و هارون اونچی کی خوداوند بٚفرمأسته بویَ، انجأم بٚدأده. 7 او زمأت کی اَشأن بوشؤ بود مصرٚ پأدیشأ ورجأ، موسا هشتأد سأل دأشتی و اونی برأر هارون هشتأد و سه سأل.
هارونٚ عصأ
8 خوداوند موسا و هارونَ بٚفرمأسته: 9 «اَیدفأرِه مصرٚ پأدیشأ شیمی جَا ایتأ موجیزه خأیٚه، پٚس هارون وأستی فرعونٚ ورجأ خو عصأیَ بِئگأنٚه زیمینٚ سٚر و عصأ بِه لأنتی.»
10 موسا و هارون ایوأردِه بوشؤده فرعونٚ ورجأ و هوطؤ کی خوداوند بٚفرمأسته بو، هارون پأدیشأ و اونی قصرٚ آدمأنٚ ورجأ خو عصأیَ بِئگأده زیمینٚ سٚر و عصأ بوبوسته لأنتی. 11 ولی فرعون مصرٚ جأدوگرأن و عألیمأنَ دؤخأده و اوشأنٚم خوشأنٚ جأدو اَمرأ هه کأرَ بوکودٚد. 12 اوشأن خوشأنٚ عصأیأنَ بِئگأنِده زیمینٚ سٚر و اوشأنی عصأیأن بوبوسته لأنتی! ولی هارونٚ لأنتی، تومأمٚ لأنتیأن جأدوگرأنٚ شینَ فٚوٚرٚسته.
13 اَ موجیزه بوستنٚ اَمرأ، مصرٚ پأدیشأ دیل هوطؤیی سخت بمأنسته و هوطؤ کی خوداوند بٚفرمأسته بو، موسا و هارونٚ گبأنَ محل نٚنأ.
خونٚ بلأ
14 خوداوند موسایَ بٚفرمأسته: «فرعونٚ دیل هوطؤ سخت ایسٚه و هنو نخأیه می مردومَ سٚرأده. 15 فردأیی صُبٚ رِه او عصأ کی لأنتی بوبوسته بویَ دٚسَ گیر و بوشو نیلٚ روخأنٚ ورجأ و اویَه فرعونٚ رأفأ بِئیس. 16 بأزون اونَ بوگو: "عبرانیأنٚ یهوه خودا مٚرَه اوسه کوده تی ورجأ کی بٚگم می مردومَ سٚرأدی کی بٚشٚد صأرأیی میأن و اونَ عیبأدت بوکوند. تأ هسأ خودا دستورَ انجأم نٚدأیی، 17 پٚس اَسه خوداوند اَطؤ فرمأیه: «ایتأ کأر کونٚم کی بفأمی من خوداوند ایسٚم."» من اونَ دستورٚ اَمرأ، می عصأ ضربه اَمرأ، نیلٚ روخأنٚ آبَ خون چأکونم. 18 تومأمٚ مأئیأن میرٚدٚه و آب موردألَ بِه، ایجور کی دِه نتأنید روخأنٚ آبٚ جَا ایتأ قؤرتٚ شین وأخورید.
19 بأزون خوداوند موسایَ بوگفته: «هارونَ بوگو کی خو عصأیَ تومأمٚ روخأنأن، رجأیأن و سَلأنٚ ور رأستَ کونٚه کی اوشأنٚ آب بٚبه خون. حتّا او آبأن کی خأنه‌یأنٚ ظرفأن و خومأنٚ میأنم دٚره بِه خون.»
20 موسا و هارون هوطؤ بوکودٚد کی خوداوند بٚفرمأسته بو. هارون مصرٚ پأدیشأ و اونی اَمرأ آدمأنٚ ورجأ، خو عصأ اَمرأ نیلٚ روخأنَ ایتأ ضربه بٚزِه و آب بوبوسته خون. 21 تومأمٚ مأئیأن بٚمٚردٚد و آب موردألَ بوسته، و اونی پٚسی دِه مصرٚ آدمأن نتأنستٚد نیلٚ روخأنٚ آبٚ جَا وأخورد. تومأم اَسر تأ اوسر مصرٚ میأن آبٚ عوض، خون بو. 22 ولی مصرٚ جأدوگرأنم خوشأنی جأدو اَمرأ بتأنستد آبَ خون چأکوند. پٚس فرعونٚ دیل هوطؤ سخت بمأنسته و هوطؤ کی خوداوند بٚفرمأسته بو، موسا و هارونٚ گبأنَ محل نٚنأ. 23 اَ موجیزه اونی رو اَثر نٚنأ بو، وأگردسته خو قصرٚ میأن. 24 مصریأن جٚه اونٚ پٚسی نیلٚ روخأن کنأرٚ میأن چأه کندیدی کی آب بیأفٚد وأخوردنٚ رِه، چونکی روخأنٚ میأن آبٚ عوض، خون شؤئؤندوبو.
25 ایتأ هفته جٚه او زمأت بوبوسته کی خوداوند نیلٚ روخأنَ بٚزِه.
Currently Selected:
خروج ۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org