استر استر فصل ۳
استر فصل ۳
هامانٚ جوفت و کلک یوهودیأنٚ جٚه بین بٚردنٚ رِه
1 چن وختٚ پٚسی، خشایارشا ایتأ جٚه خو وزیرأنَ موقأمَ بٚبرده بوجؤر کی اونٚ نأم هامان و همداتایٚ اجاجی پٚسر بو و اونَ خو وزیرأنٚ رییس چأکوده. 2 پأدیشأ دستورٚ اَمرأ همٚتأ دربأرٚ موقأمأن هامانٚ ورجأ خوشأنٚ سٚرَ تعظیمٚ رِه بیجیر اَوٚردیدی؛ ولی مُردخای اونَ تعظیم نوکودی.
3 دربأرٚ آدم نفرأن مُردخایَ بوگفتٚده: «چٚره تو پأدیشأ فرمأنٚ جَا ایطأعت نوکونی؟» اون جوأب بٚدأ: «من ایتأ یوهودی ایسم و نتأنم هامانَ تعظیم بوکونٚم.» 4 هرچن اوشأن هر روج اونٚ جَا خأستیدی اَ کأرَ بوکونه، ولی اون قوبیل نوکودی. پٚس اَشأن اَ موضویَ هامانَ خٚوٚر بٚدأده کی بیدینٚد چی تصمیم گیرِه، چونکی اَشأنَ بوگفته بو کی اون یوهودی ایسٚه. 5 او وخت کی هامان بٚفأمسته مُردخای جٚه اونَ تعظیم کودن ایطأعت نوکونه، اونَ غیظَ گیفته. 6 و چونکی بٚفأمسته کی مُردخای یوهودی ایسٚه بٚنأ بوکوده نه فقد اونَ بوکوشه، بلکی تومأمٚ یوهودیأنَم کی خشایارشا پأدیشأیی سأمأنٚ میأن ایسأبود، جٚه بین بٚبره.
7 خشایارشا پأدیشأیی دوأزدهومی سألٚ میأن نیسانٚ مأهٚ دورون کی سألٚ اوّلی مأه ایسٚه، هامان دستور بٚدأ قورعه کی اونَ «پور» گفتیدی تأوٚدٚد کی یوهودیأنٚ دسته جمی کوشتنٚ زمأت موشخص بٚبه. قورعه اَدأر ینی دوأزدهومی مأهٚ سیزدهومی روجَ نیشأن بٚدأ.
8 بأزون هامان بوشؤ پأدیشأ ورجأ و بوگفته: «ایتأ قوم تومأمٚ شیمی پأدیشأیی سأمأنٚ میأن پخشٚ پلأ ایسٚد کی اوشأنٚ قأنونأن، البأقی قومأنٚ قأنونأنٚ اَمرأ فرق دأره. اوشأن جٚه پأدیشأ قأنونأن ایطأعت نوکونٚده. هنٚ وأسی، اَشأنٚ زٚنده مأنستٚن پأدیشأ رِه منفعت نأره. 9 اگه پأدیشأیَ خوش بأیٚه ایتأ فرمأن بٚدد کی اوشأن همٚتأن بوکوشته بٚبد و من دٚه هیزأرتأ سنگٚ ترأزٚ اَندر نوقره اَ کأرٚ خرجأنٚ رِه پأدیشأیی خزأنه‌یَ فأدَم.»
10 پأدیشأ خو انگوشترَ بأوٚرده بیرون و فأدأ هامانَ کی یوهودٚ دوشمن بو و بوگفته: 11 «اَ قوم و اوشأنٚ مأل و مینأل تی دٚس نٚهأ هرجور کی صلأح دأنی اوشأنٚ اَمرأ کردٚکأر بوکون.»
12 پٚس اوّلی مأهٚ سیزدهومی روجٚ میأن، هامان دربأرٚ میرزأبینیویسأنَ دؤخأده خو حوضور. اوشأن هامانٚ دستورٚ اَمرأ تومأمٚ مملکتٚ حأکیمأن، اوستأندأرأن و موقأم‌دأرأنٚ رِه او خطأنٚ و زوأنأنٚ اَمرأ کی مملکتٚ میأن اونٚ اَمرأ گب زٚنٚده دسنیویس بینیویشتد. اَ دٚسنیو‌یسأن پأدیشأ نأم اَمرأ بینیویشته و اونٚ بٚخصوصٚ انگوشترٚ اَمرأ مُهر بوبوسته. 13 و چأپأرأنٚ اَمرأ اوسه کودٚد تومأمٚ اوستأنأنَ، اَ دستورٚ اَمرأ کی وأستی تومأمٚ یوهودیأن، زنأی و مردأی، پیر و جوأن اَدأرٚ مأهٚ سیزدهومی روجٚ میأن همٚتأ بوکوشته بٚبد و اوشأنٚ مأل و مینأل چأپؤ بٚبه. 14 اَ دسخطأنٚ بینیویشته‌یأن وأستی هرتأ اوستأنٚ میأن تومأمٚ مردومٚ رِه وأگویا بوبوسته‌بی کی همٚتأ هو روجٚ میأن آمأده بٚبد.
15اَ دستور شوشٚ میأن وأگویا بوبوسته و چأپأرأن پأدیشأ فرمأنٚ اَمرأ اونَ توندأتوند تومأمٚ مملکتٚ اَسٚر تأ اوسٚرَ فأرٚسأنِده. او وخت پأدیشأ و هامان عیأشی کودأندوبود ولی شوشٚ شهر آرأمٚ قرأر نأشتی.
The Gilaki Contemporary Bible is a Product of Transform Iran © 2024. All rights reserved. www.kelisayejame.org