استر استر فصل ۴
استر فصل ۴
مُردخای جٚه استر یاور خأیه
1 او وخت کی مُردخای جٚه اَ جوفت و کلک وأخٚوٚرَ بوسته، اوندر غورصه دأشتی کی خو رختَ چأک بٚزِه و پلأس دوکوده خو سٚر خأکیستر فوکود و ایجگره اَمرأ ایتأ زرخٚ گریه بوکود و جٚه شهرٚ میأن دٚوأرٚسته. 2 تأ اَنکی فأرٚسه پأدیشأیی کأخٚ دروأزه‌یَ. ولی نتأنسته بٚشه بودورون، چونکی هیکسَ ولأشتیدی پلأسٚ اَمرأ بٚشه کأخٚ دورون. 3 او وخت کی پأدیشأ فرمأن فأرٚسه تومأمٚ اوستأنأنَ، یوهودیأن عزأ بیگیفتٚد. اوشأن گریه زأری بوکودٚد، غذأیَ لب نٚزِده و ویشترشأن پلأس دوکودٚد، خأکیسترٚ سٚر درأزَ کشِئده.
4 او وخت کی استرٚ ندیمه‌یأن و دربأرٚ خأجه‌سرأیأن جٚه مُردخایٚ وضعٚ حأل خٚوٚر بأوٚردٚد، استر خٚیلی غورصه بوخورده و مُردخایٚ رِه رخت اوسه کوده کی پلأسٚ عوض دوکونه، ولی مُردخأی قوبیل نوکوده. 5 او وخت استر، هتاکَ کی ایتأ جٚه دربأرٚ خأجه‌سرأیأن بو و استرٚ خیدمت کودنٚ رِه اینتخأب بوبوسته بو خو ورجأ دؤخأده و اونَ اوسه کوده کی بٚشه و جٚه مُردخای وأوٚرسِه کی چی بوبوسته و چٚره پلأس دوکوده دأره. 6 هتاک بوشؤ مُردخایٚ ورجأ شهرٚ میدأنٚ میأن کی پأدیشأیی کأخٚ دروأزه روبرو نٚهأ بو. 7 مُردخای تومأمٚ ایتفأقأنَ اونٚ رِه وأگویا بوکوده و جٚه او پول کی هامانٚ وعده بٚدأ بو یوهودیأنٚ کوشتٚنٚ عوض فأده پأدیشأیی خزأنه‌یَ، خٚوٚر بٚدأ. 8 مُردخای ایتأ دسخط جٚه پأدیشأیی فرمأن کی شوشٚ دورون یوهودیأنٚ کوشتنٚ وأسی بٚدأ بوبوسته بویَ هتاکَ فأدأ کی استرَ نیشأن بٚده و اونٚ جَا بٚخأیه پأدیشأ ورجأ بٚشه و خو قومٚ رِه میأنجیگیری بوکونه. 9 هتاک وأگردسته و مُردخایٚ پیغأمَ فأرٚسأنه استرَ. 10 استر هتاکَ دستور بٚدأ وأگرده مُردخایٚ ورجأ و اونَ اَطؤ بٚگه: 11 «تومأمٚ اَ مملکتٚ مردوم دأنٚده هرکی چی زنأی چی مردأی اگه بودونٚ اَنکی پأدیشأ اونَ دؤخأنه بٚشه اونٚ بٚخصوصٚ تألأرٚ دورون، هوطؤ کی قأنون گه بوکوشته بِه، جغرز اَنکی پأدیشأ خو پأدیشأیی عصأیَ اونٚ ور درأزَ کونه. هسأ ویشتر جٚه ای مأه ایسٚه کی پأدیشأ مٚرَه دؤنخأده کی بٚشٚم اونٚ ورجأ.»
12 او وخت کی هتاک، استرٚ پیغأمَ فأرٚسأنه مُردخایَ، 13 مُردخای جوأب بٚدأ و بوگفت کی استرَ اَطؤ بٚگه: «گومأن نوأکودن او وخت کی تومأمٚ یوهودیأن بوکوشته بٚبد، تو پأدیشأیی کأخٚ میأن جأن بٚدر بری! 14 اگه اَ وضعٚ حألٚ میأن، تو سأکیت بِئیسی جٚه ایتأ دِه جأجیگأ یوهود آزأدَ بِه ولی تو و تی طأیفه بوکوشته بیدی. جودأ جٚه اَن کیسه کی بٚدأنه، بلکی هه زمأتٚ رِه ملکه بوبوستی.»
15 پٚس استر اَ پیغأمَ اوسه کوده مُردخایٚ رِه: 16 «بوشو و تومأمٚ شوشٚ یوهودیأنَ جمَ کون کی مِرِه سه شب و سه روج روزه بیگیرٚد. من و می ندیمه‌یأنم هه کأرَ کونیمی. بأزون، من شٚم پأدیشأ ورجأ، هرچن اَ کأر قأنونٚ موطأبق نییٚه. اگه بوکوشته بوبوستم، وئأل بوکوشته بٚبم!»
17 پٚس مُردخای بوشؤ و هرچی استر بوگفته بو انجأم بٚدأ.
The Gilaki Contemporary Bible is a Product of Transform Iran © 2024. All rights reserved. www.kelisayejame.org