استر استر فصل ۲
استر فصل ۲
استر ملکه بِه
1 چن وختٚ پٚسی، او وخت کی خشایارشا غیظ فوروز بأمؤ، وٚشتییَ خأطر بأوٚرده و او کأر کی اون بوکوده بو و او دستور کی اونٚ رِه فأدأ بو، اونَ بٚبرده فیکرٚ میأن. 2 پٚس اونٚ نیزدیکٚ موبأشرأن بوگفتٚده: «وئألید بیشیم و قشنگٚ کؤرأنَ بیأفیم و اوشأنَ بأوٚریم پأدیشأ قصرٚ میأن. 3 اَ کأرٚ کودنٚ رِه، تومأمٚ اوستأنأنَ ای عیده مأمور اوسه کونیمی کی قشنگٚ دؤخترأنَ بأوٚرد پأدیشأ حرمسرأ میأن و خأجه "هیجای" حرمسرأ رییس اَشأنَ سورخأب سیفیدأب فأده. 4 او وخت ایتأ کؤر کی پأدیشأ دیلٚ بأب بٚبه وٚشتی عوض اینتخأب بوکونه و ملکه بٚبه.»
اَ گب پأدیشأیَ خوش بأمؤ و هوطؤ کأر بوکوده.
5 شوشٚ میأن ایتأ یوهودٚ مردأی کی اونٚ نأم مُردخای بو (یائیرٚ پٚسر و شمعی نوه، جٚه قیسٚ بنیأمینی نتأج) زٚندیگی کودی. 6 او وخت کی بابِلٚ پأدیشأ نِبوکَدنِصَّر بو ایتأ عیده جٚه یوهودیأنَ یوهودأ پأدیشأ، یکنیا اَمرأ جٚه اورشلیم اسیری رِه بٚبرده، مُردخایٚم ایتأ جٚه او اسیرأن بو. 7 مُردخای ایتأ قشنگٚ عمو دؤختر دأشتی هَدَسّه نأم کی اونَ استرم دؤخأدیدی. استرٚ پِئر و مأر بٚمٚرده بود و مُردخای اونَ خو زأکٚ مأنستَن خو ورجأ دأشتی و خو دؤخترٚ مأنستَن پیله کوده بو.
8 او وخت کی خشایارشا فرمأن بٚدأ بوبوسته، استرم ایتأ عیده قشنگٚ دؤخترأنٚ اَمرأ کی نشأستی اوشأنَ ایشمأردن بأوٚردٚد شوشٚ قصرٚ حرمسرأ میأن. 9 هیجای کی حرمسرأیَ فأرٚس فوروس کودی استرَ لوطف و محبت دأشتی. اون استرٚ خورد و خورأکٚ رِه ایتأ بٚخصوصٚ برنأمه بٚنأ و سورخأب سیفیدأب اونَ فأدأ، اونٚ پٚسی هفتأ جٚه دربأرٚ ندیمهیأنَ وأدأشته کی اونَ خیدمت بوکونٚد و بِیترین جأجیگأیَ اونٚ رِه حأضیرَ کوده. 10 مُردخایٚ سفأرشٚ اَمرأ، استر هیکسَ نوگفته بو کی یوهودی ایسٚه. 11 مُردخای هر روج حرمسرأ صأرأ میأن شؤئؤن اَمؤن کودی کی جٚه استرٚ حأل وأخٚوٚر بٚبه و بٚدأنه اونٚ رِه چی گوذره.
12 او دؤخترأنَ کی بأوٚرده بود حرمسرأ وأسی، دستور اَطؤ بو کی پیشتر جٚه اَنکی پأدیشأ ورجأ بٚشٚد، شیش مأه وأستی مُرٚ روغن و شیش مأه جوروأجورٚ عطر و سورخأب سیفیدأبٚ اَمرأ اوشأنَ قشنگَ کونٚد. 13 بأزون هرتأ دؤختر کی اونی نوبت فأرٚسِئی کی جٚه حرمسرأ بٚشه پأدیشأ ورجأ، هرجور رخت و جوأهیر کی بٚخأستهبی اونَ فأدأ بوستی. 14 غروب، او دؤختر شؤیی اویَه کی پأدیشأ خوفتی و فردأ صُب رِه وأگردستی حرمسرأ اویتأ ور، پأدیشأ البأقی زنأکأنٚ ورجأ. اویَه خأجه شعشغاز، حرمسرأ رییس اونی جَا مورأقبت کودی. اون دِه نتأنستی پأدیشأ ورجأ وأگرده، جغرز اَنکی پأدیشأ اونَ پسند بوکودهبی و اونٚ نأمٚ اَمرأ خو ورجأ دؤخأدهبی.
15 استر ابیحالٚ دؤختر و ابیحال، مُردخایٚ عمو بو. مُردخای استرَ خو زأکٚ مأنستَن خو ورجأ دأشتی. او وخت کی استرٚ نوبت فأرٚسه کی بٚشه پأدیشأ حوضور، اون اوطؤ کی خأجه هیجای بوگفته بو خؤرِه بزک دوزک بوکوده. هرکی استرَ دِئی اونَ ستأیٚش کودی.
16 اَطؤیی بو کی دهومی مأهٚ دورون کی «طبتٚ» مأه بٚبه خشایارشا پأدیشأیی هفتومی سألٚ دورون استرَ بٚبردٚد پأدیشأیی کأخٚ میأن. 17 پأدیشأ، استرَ ویشتر جٚه البأقی زنأکأن دوس دأشتی و ویشتر جٚه البأقی دؤخترأن استرَ توجه بوکوده و دوس بٚدأشته، اوطؤیی کی پأدیشأ استرٚ سٚرٚ رو تأج بٚنأ و اونَ وٚشتی عوض ملکه چأکود. 18 پأدیشأ استرٚ وأسی ایتأ پیله میهمأنی تومأمٚ پیلهکسأن و مملکتٚ رییسأنٚ رِه بٚدأ و او روجَ تومأمٚ ولأیتأن میأن تعطیل بوکوده، جٚه خو پأدیشأیی دٚسٚ دیلوأزی اَشأنَ پیشکشأن بٚبخشه.
مُردخأی ایتأ جوفتٚ کلکَ فأمه
19 اَ میأن مُردخایٚم جٚه پأدیشأ ور ایتأ پیله موقأم فأگیفته بو. 20 ولی استر هنو هیکسَ نوگفته بو کی یوهودی ایسٚه، چونکی هنویٚم او زمأتٚ مأنستَن کی زأی بو، مُردخایٚ دستورأنَ ایطأعت کودی.
21 ایتأ روج هطؤ کی مُردخأی پأدیشأ دربأرٚ میأن خیدمت کودأندوبو، دوتأ جٚه پأدیشأ خأجهسرأیأن، بغتأن و تأرش نأم کی جٚه دربأرٚ نیگهبأنأن بود، پأدیشأ جَا کینه اوسأدٚد، جوفت و کلک دیچِئده کی اونَ بوکوشٚد. 22 مُردخای جٚه اَ جوفت و کلک وأخٚوٚرَ بوسته و استرَ خٚوٚر بٚدأ. استرم پأدیشأیَ وأخٚوٚرَ کوده کی مُردخای چی بوگفته. 23 پأدیشأ دستورٚ اَمرأ، اَ موضویَ فأرٚس فوروس بوکودٚد و اَنٚ پٚسی کی ثأبیت بوبوسته کی حِئقت دأره، پأدیشأ او دو نفرَ دأرٚ سٚر فأکشِه. خشایارشا دستورٚ اَمرأ اَ مأجیرأ «پأدیشأیأنٚ تأریخٚ» کیتأبٚ دورون بینیویشته بوبوسته.
Currently Selected:
استر استر فصل ۲: GCB
Highlight
Copy
Compare
Share
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org