ፓይዱዋ 22
22
ሞኣባን ኦሰቴዳ ሀኖታቱዋ
(22:1—32:42)
ሞኣባ ካቲ ባላቅ ባላማ ጼግሴዳ
1ሄዋፐ ጉይያን እስራኤልያ አሳይ ደንዲደ፥ እያርኮ ልክያን ዮርዳኖሳ ሄፍንን ደእያ ሞኣባ ደምባን ዱንካኔዳ።
2እስራኤልያ አሳይ አሞረቱ ቦላ ኦዳዋ ኡባ ጽፖራ ናአይ ባላቅ ስሴዳ። 3እስራኤልያ አሳይ ሎይ ዳሮ ግዴዳ ድራዉ፥ ሞኣባቱ ሎይ ዳጋሚደ ያዬድኖ። 4ሞኣባቱ ምድያማ ጭማቱዋ፥ “ቦራይ ማታ ም ይስያዋዳን ሀ ዉደ አሳይ ኑ ዩሹዋን ደእያ ኡባ ም ይሳና” ያጌድኖ።
ሄ ዎደ ሞኣባ ካቲ፥ ጽፖራ ናአይ ባላቅ 5አማዋ ጋድያን ኤፍራጺሳ ሻፋ ማታን ፓቶራ ካታማን ደእያ ብኦራ ናኣ ባላማኮ አሳ ኪቴዳ። ባላቅ፥ “በአ፥ ግብጼፐ ዳሮ አሳይ ከሴዳ፤ ኡንቱንቱ ቢታ ኡባ ማዪደ፥ ታፐ ያ ባጋን ደኢኖ።#ፓይ. 31:8፤ 2 ጰጽ. 2:15-16፤ ይሁዳ 11 6ኡንቱንቱ ታዉ ሎይ ዎልቃምያ ድራዉ፥ ሀያና ሀእ ያደ፥ ኡንቱንታ ታዉ ሸቃርኪ! ኦን ኤሪ፥ ታን ኡንቱንታ ጾናናዉነ ጋድያፐ ከሳናዉ ዳንዳያነንቶነ። አያዉ ጎፐ፥ ኔን አንጄዳዌ አንጀቴዳዋነ ኔን ሸቄዳዌ ሸቀቴዳዋ ግድያዋ ታን ኤራይ” ያጌዳ።
7ሞኣባ ጭማቱነ ምድያማ ጭማቱ ሸቂስያ ጋትያ አኪደ፥ ባላማኮ ቤድኖ። ባላቅ ጌዳዋ አዉ ኦዴድኖ። 8ባላም ኡንቱንታ፥ “ሀቼ ቃማ ሀዋን አቅተ፤ መና ጎዳይ ታዉ ኦድያዋ ታን ህንተንቶ ኦዳና” ያጌዳ። ሞኣባ ካፓቱ ባላማዋን ታኬድኖ።
9ጾሳይ ባላማኮ ዪደ፥ “ሀዋንቱ ኔናና ደእያ አሳቱ ኦኔ?” ያጊደ ኦቼዳ።
10ባላም ጾሳ፥ “ሞኣባ ካቲ፥ ጽፖራ ናአይ ባላቅ፥ 11‘ግብጼፐ ዳሮ አሳይ ከሴዳ፤ ኡንቱንቱ ቢታ ኡባ ማዬድኖ። ሀእ ኔን ያደ፥ ኡንቱንታ ታዉ ሸቃርኪ! ኦን ኤሪ፥ ታን ኡንቱንታ ጾናናዉነ ጋድያፐ ከሳናዉ ዳንዳያነንቶነ’ ያጊደ ኡንቱንታ ታኮ ኪቴዳ” ያጌዳ።
12ጾሳይ ባላማ፥ “ኔን ኡንቱንቱና ቦፓ። እስራኤላቱ አንጀቴዳዋንታ ግድያ ድራዉ፥ ኔን ሄ አሳ ሸቆፓ” ያጌዳ።
13ዎንተ ጋላስ ዎንታ ባላም ደንዲደ፥ ባላቃ ካፓቱዋ፥ “ታን ህንተናና ቤናዳን መና ጎዳይ ድጌዳ ድራዉ፥ ህንተ ቢታ ስምተ” ያጌዳ።
14ሞኣባ ካፓቱ ያፐ ደንዲደ፥ ባላቃኮ ስሚደ አ፥ “ባላም ኑናና ዬናን እጼዳ” ያጌድኖ።
15ዛሪደካ ባላቅ ካሰዋንቱፐ አ ቦንቼቴዳነ ፓይዱዋንካ ጮራቴዳ ሀራ ካፓቱዋ አኮ ኪቴዳ። 16ኡንቱንቱ ባላማኮ ዪደ፥ “ጽፖራ ናአይ ባላቅ ኔና፥ ‘ኔን ታኮ ያናዋ ኔና አያይነ ተኦፖ። 17አያዉ ጎፐ፥ ታን ነዉ ዳሮ ዎይቱዋ እማና፤ ኔን ግያዋ ኡባ አያነ ታን ኦና። ያደ ሀ አሳ ታዉ ሸቃርኪ’ ” ያጊደ ኦዴድኖ።
18ሽን ባላም ኡንቱንቶ፥ “ባላቅ ሀራይ አቶ ብራይነ ዎርቃይ ኩሜዳ ባረ ካትያ ጎልያ ታዉ እሜዳዋ ግድንቶነ፥ መና ጎዳ ታ ጾሳ አዛዙዋፐ አደ፥ ታን አያነ ፓጭሳናዉ ዎይ ጉጃናዉ ዳንዳይከ። 19መና ጎዳይ ታዉ ኦድያ ሀራባይ ደኦፐ ታን ኤራናዳን፥ ህንተካ ሀች ቃማ ሀዋን አቅተ” ያጌዳ።
20ሄ ጋላሳ ቃማ ጾሳይ ባላማኮ ዪደ፥ “ሀ አሳይ ኔና ጼሳናዉ ዬዳ ድራዉ፥ ኔን ኡንቱንቱና ባ። ሽን ታን ነዉ ኦድያዋ ጻላላ ኦ” ያጌዳ።
ባላማነ አ ሀራቶ
21ዎንተ ጋላስ ባላም ባረ ሀራቶ ኮሪደ፥ ሞኣባ ካፓቱዋና ቤዳ። 22ሽን እ ብያ ዎደ ጾሳ ሀንቁ ኤጽ ከሴዳ፤ ያትና መና ጎዳ ኪታንቻይ አ ተአናዉ ኦግያን ኤቄዳ። ሄ ዎደ ባላም ባረ ሀራቶ ቶጎዋን፥ አ ላኡ ቆማቱ አናና ደኢኖ። 23መና ጎዳ ኪታንቻይ ማሻ ዛረ ኦይቂደ፥ ኦግያን ኤቄዳዋ ሀራታ በአኔ፥ ኦግያ አጋደ፥ ጎሻ ግዶ ገላዱ። ባላም ኦግያ ዛራናዉ ሀራቶ ሾጬዳ።
24ያትና መና ጎዳ ኪታንቻይ ላኡ ዎይንያ ቱራ ሳአቱዋፐ ግዱዋን፥ ያ ባጋናነ ሀ ባጋና ግምቢያን ድረት ኡቴዳ ኡንኦ ኦግያን ኤቄዳ። 25ሀራታ መና ጎዳ ኪታንቻ በኤዳ ዎደ፥ ግምቢያ ድርሳኮ ሺቃደ፥ ባላማ ገድያ ግምቢያ ድርሳና ዳራጻዱ፤ እ ሀራቶ ላኤንዋካ ሾጬዳ።
26ሄዋፐ ጉይያን፥ መና ጎዳ ኪታንቻይ ስንዉኮ አደ፥ ሀድርሳ ባጋናካ ኡሸቻ ባጋና አያ ሳአይ ባይና ኡንኦ ሳኣን ኤቄዳ። 27ሀራታ መና ጎዳ ኪታንቻ በኣደ፥ ባላም ቶጎዋን ግሳዱ። ባላም ሎይ ሀንቀቲደ፥ ባረ ጻምአን ሀራቶ ቡኬዳ። 28ሄዋፐ ጉይያን፥ መና ጎዳይ ሀራት ዶና ዶይና፥ ሀራታ ባላማ፥ “ታን ነዉ አይ ኦኔ ኔን ታና ሀ ሄዙ ገደ ቡኬዳዌ?” ያጋዱ።
29ባላም ሀራቶ፥ “ኔን ታና ኤየዳ ድራሳ። ታ ኩሽያን ማሻይ ደኤዳዋ ግድንቶነ፥ ታን ኔና ሀእ ዎና ሽን!” ያጌዳ።
30ሀራታ ባላማ፥ “ታን ነ ደኦ ኡባን ሀች ጋካናዉ ቶግያ ነ ሀራቶ ግድክታ? ታን ነዉ ሀዋዳን ሀና ኤራይታ?” ያጋዱ።
ባላም፥ “ሀና ኤራካ” ያጌዳ።
31ሄዋፐ ጉይያን፥ መና ጎዳይ ባላማ አይፍያ ዶይና፥ መና ጎዳ ኪታንቻይ ሾኩዋፐ ሾዴዳ ማሻ ኦይቂደ፥ ኦግያን ኤቄዳዋ በኤዳ። እ ልጭ ጊደ፥ ሶምኡዋ ሳኣ ጋደ ጉፋኔዳ። 32መና ጎዳ ኪታንቻይ አ፥ “ነ ሀራቶ ሀ ሄዙ ገደ አያዉ ቡካዲ? ነ ኦጊ ታ ስንን ጌላ ግድያ ድራዉ፥ ታን ኔና ተአናዉ ሀዋ ያድ። 33ሀራታ ታና በኣደ፥ ታ ስንፐ ሄዙ ገደ ዎራ ስማዱ። ሀራታ ዎራ ስማቤናዋ ግድንቶነ፥ ታን ኔና ሀኖደ ቱሙ ዎ ድጋደ፥ ሀራቶ አሻና ሽን” ያጌዳ።
34ባላም መና ጎዳ ኪታንቻ ዛሪደ፥ “ታን ናጋራ ኦድ። ኔን ታና ተአናዉ ኦግያ ቦላን ኤቄዳዋ ታን ኤራበይከ። ኔን ዶሳቤናባ ግዶፐ፥ ታን ሀእ ጉየ ስማና” ያጌዳ።
35መና ጎዳ ኪታንቻይ ባላማ፥ “ኔን ሀ አሳቱዋና ባ፤ ሽን ታን ነዉ ኦድያዋ ጻላላ ሃሳያ” ያጌዳ። ባላም ባላቃ ቢታ ካፓቱዋና ቤዳ።
ባላቅ ባላማ ናሸቻን ሞኬዳ
36ባላም ይያዋ ባላቅ ስሴዳ ዎደ፥ አርኖና ሻፋ ዛዋን ባረ ቢታ ጋጻን ደእያ ሞኣባቱዋ ካታማን አናና ጋከታናዉ ቤዳ። 37ባላቅ ባላማ፥ “ኔን ኤለካ ያናዳን ታን ኪታበይክታ? ኔን አያዉ ታኮ ኤለካ ያበይኪ? ታን ነዉ ዎይታናዉ ቱሙ ዳንዳይክታ?” ያጌዳ።
38ባላም ባላቃ፥ “በአ፥ ሀእ ታን ኔኮ ያድ፤ ሽን ታን አያነ ጋናዉ ቱሙ ዳንዳይከ። ጾሳይ ታና ሃሳይስያዋ ጻላላ ታን ሃሳያና” ያጌዳ። 39ሄዋፐ ጉይያን፥ ባላም ባላቃና ቅርያት-ሁጾታ ግያ ካታማ ቤዳ። 40ባላቅ ሚዛነ ዶርሳ ያርሺደ፥ አሹዋፐ አማሬዳዋ ባላማዉነ አናና ደእያ ካፓቶ እሜዳ።
ባላማ ኮይሮ ትምቢትያ
41ዎንተ ጋላስ ዎንታ ባላቅ ባላማ አኪደ፥ ባሞት-ባኣል ግያሳ ፑደ ከሴዳ፤ ሄዋን ኤቂደ፥ ባላም እስራኤልያ አሳፐ ባጋ በኤዳ።
Currently Selected:
ፓይዱዋ 22: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
