ፓይዱዋ 21
21
ካናነቱ ጾነቴድኖ
1ኔጌባ መላ ቢታ፥ ካናነ ጋድያን ደእያ አራዳ ካቲ እስራኤልያ አሳይ አታርማ አፍያ ኦግያ ባጋና ይያዋ ስሴዳ ዎደ፥ እ እስራኤላቱዋና ኦላ ጋከቲደ፥ ኡንቱንቱፐ አማሬዳዋንታ ኦሞዴዳ።#ፓይ. 33:40 2ሄ ዎደ እስራኤልያ አሳይ፥ “ኔን ሀ አሳ ኑ ኩሽያን አደ እሞፐ፥ ኑን ኡንቱንቱ ካታማቱዋ ኡባና ይሳና” ያጊደ መና ጎዳው ሺቄድኖ። 3መና ጎዳይ እስራኤልያ ቃላ ስሲደ፥ ሄ ካናነቱዋ ኡንቱንቶ አ እሜዳ፤ ኡንቱንቱ ሄ ካናነቱዋነ ኡንቱንቱ ካታማቱዋ ኡባና ይሴድኖ። ሄዋ ድራዉ፥ ሄ ሳአይ ሆርማ#21:3 ሆርማ፦ ሀ ሱን ብለይ እብራዌዋን፥ “ባሻ” ግያዋ። ጌተት ሱንቴዳ።
ናሃስያ ብራታፐ መቴዳ ሾሻ
4እስራኤልያ አሳይ ሆራ ደርያፐ ደንዲደ፥ ኤዶማ ቢታ ዩሹዋ ባናዉ ዞኦ አባ አፍያ ኦግያና ቤድኖ፤ ሽን ኦግያ ቦላን አሳዉ ዳንዳያይ ዉሬዳ።#ዛረ. 2:1 5አሳይ፥ “ኑን መላ ቢታን ሀይቃናዉ ግብጼፐ ፑደ ኑና አያዉ አሄድቴ? ቁም ባዋ፤ ሃይ ባዋ፤ ሀ ኢታ ቁማይ ኑና ሸነዬዳ” ያጊደ ጾሳ ቦላነ ሙሴ ቦላ ዙዙሜድኖ።#1 ቆሮ. 10:9
6መና ጎዳይ አሳ ግዱዋን ማርዝያና ደእያ ሾሻቱዋ የዴዳ፤ ኡንቱንቱ ዱክና፥ ዳሮ እስራኤላቱ ሀይቄድኖ። 7ኡንቱንቱ ሙሴኮ ዪደ አ፥ “ኑን መና ጎዳ ቦላነ ነ ቦላ ዙዙሚደ፥ ናጋራ ኦዶ። ኑፐ ሀ ሾሻ ሃሳና ማላ፥ ኔን መና ጎዳ ዎሳ” ያጌድኖ። ሙሴ አሳ ድራዉ ዎሴዳ።
8ሄዋፐ ጉይያን መና ጎዳይ ሙሳ፥ “ኔን ሾሻ መደ፥ ኡንቱንቱ ስንን ም ቦላን ካቃ፤ ዱከቴዳ ኦንነ አ ጼሎፐ ፓጻና” ያጌዳ። 9ሙሴ ናሃሰ ብራታፐ ሾሻ መደ፥ ም ቦላን ካቄዳ። ሄዋፐ ጉይያን፥ ሾሻይ ዱኬዳ አሳይ ኡባይ ናሃስያ ሾሻ ጼሊደ ፓጼድኖ።#2 ካታ. 18:4፤ ዮሃ. 3:14
ሆራ ደርያፐ ደንዲደ ሞኣባ ቢታ ቤድኖ
10እስራኤልያ አሳይ ደንዲደ፥ ኦቦታ ግያ ሳን ዱንካኔድኖ። 11ኦቦታፐ ደንዲደ፥ ሞኣባፐ ስንና ደእያ ባዙዋን፥ አዋይ ዶልያ ባጋና፥ ላለቴዳ እየ አባርማ ካታማን ዱንካኔድኖ። 12ሄዋፐ ደንዲደ፥ ዘሬዳ ዛንጋራን ዱንካኔድኖ። 13ሄዋፐ ደንዲደ፥ አሞረቱ ቢታ ጋጻ ጋካናዉ ብያ መላ ቢታ ግዶን አርኖና ሻፋፐ ሄፍንን ዱንካኔድኖ። አርኖና ሻፋይ ሞኣባ ቢታፐነ አሞረቱ ጋድያፐ ግዱዋን ደእያ ዛዋ። 14ሄዋ ድራዉ፥ ጾሳ ኦላ ማጻፋን፥ “ሱፋ ሄራን ደእያ ዋሄባ ካታማነ አርኖና ሻፋ ዛንጋራ፥ 15ኤራ ካታማ ጋካናዉነ ሞኣባ ዛዋ ጋካናዉ ደእያ ዛንጋራ ዱገ” ያገት ጻፈቴዳ።
16ኡንቱንቱ ሄዋፐ ደንዲደ፥ ቤራ ግያሳ ቤድኖ፤ ሄዌ ጾሳይ ሙሳ፥ “አሳ ሺሻ፤ ታን ኡንቱንቶ ሃ እማና” ያጊደ ኦዴዳ ሃ ኦላ።
17ሄዋን እስራኤልያ አሳይ ሀ ማዝሙርያ የጼዳ።
“ሃ ኦላዉ፥ ፑልታ!
18ካፓቱ ቦኬዳ ሃ ኦላዉ፥
አሳ ካለያዋንቱ ኦላዉ፥
ካተቱዋ ጻምኣንነ ኡንቱንቱ ካዛራን ቦኬዳ ሃ ኦላዉ
አነ የጼቶ” ያጌዳ።
ኡንቱንቱ ሄ ባዙዋፐ ማታና ግያሳ ቤድኖ፤ 19ማታናፐ ናህልኤላ፥ ናህልኤላፐ ባሞታ ግያሳ፥ 20ባሞታፐ ደንዲደ፥ ሞኣበን ደእያ ዛንጋራ ቤድኖ፤ ሀ ዛንጋራይ ፕስጋ ደርያፐ ጋርሳን ባዙዋ ማታን ደኤ።
ካቲ ስሆንነ ካቲ ኦግ ጾነቴድኖ
(ዛረ. 2:26—3:11)
21ሄዋፐ ጉይያን፥ እስራኤልያ አሳይ አሞረ ቢታ ካትያ ስሆናኮ ኪተትያዋንታ ሀዋዳን ያጊደ ኪቴዳ፤ 22“ኑና ነ ቢታና አርኪ! ኑን ነ ጋድያ ግዱዋ ዎይ ዎይንያ ቱራ ግዱዋ ገሎኮ፤ ቃይ ሃ ኦላ ሀቃዋፐነ ኡሾኮ። ኑን ነ ቢታና አና ጋካናዉ፥ ካትያ ኦግያና ባና” ያጌዳ።
23ሽን ስሆን ባረ ቢታና እስራኤልያ አሳ አናን ድጌዳ፤ እ ባረ ኦላንቻቱዋ ኡባ ሺሺደ፥ እስራኤልያ አሳ ኦላናዉ መላ ቢታ ቤዳ፤ ያሃጻ ግያሳ ብ ጋኪደ፥ እስራኤልያ አሳና ኦለቴዳ። 24ሽን እስራኤልያ አሳይ ኦላን አሞረቱዋፐ ዳሩዋ ዎደ፥ ኡንቱንታ ቢታ አርኖና ሻፋፐ ዶሚደ፥ አሞናቱዋ ዛዋን ደእያ ያቦቃ ሻፋ ጋካናዉ ኦይቄዳ። አሞና አሳቱ ቢታ ዛዋይ ግምበት ኡቴዳ ድራዉ፥ ኡንቱንቱ ያ ገልበይክኖ። 25ያትና እስራኤላቱ አሞረቱ ካታማቱዋ ኡባ ጾኒደ አኬድኖ። ቃይ ሀሰቦናነ አ ዩሹዋን ደእያ ቄር ካታማቱዋካ ኡባ ኦይቂደ፥ ያን ኡቴድኖ። 26ሀሰቦና ካታማይ አሞረቱ ካትያ ስሆና ካታማ። ስሆን ሞኣባ ቢታ ካትያ ካሰዋ ኦሊደ፥ አርኖና ሻፋ ጋካናዉ አ ቢታ ኡባ አፐ አኬዳዋ።
27ሄዋ ድራዉ፥ ሌምሱዋን ሀዋዳን ያጌድኖ፤
“ሀሰቦና ሃይተ፤
ሄ ካታማይ ዛረ ኬጸቶ፤
ስሆና ዎልቃማ ካታማይ ዎ ኤቂደ ኬጸቶ!
28አያዉ ጎፐ፥ ታማይ ሀሰቦናፐ፥#ኤር. 48:45-46
ላጩ ስሆና ካታማፐ ከሴዳ፤
ሞኣበን ደእያ ኤራነ
አርኖና ሻፋ ሄራን ገዝያን ደእያ ካፓቱዋ ሜዳ።
29ሞኣባ፥ ነዉ አየ አና!
ካሞሻዉ ጎይንያዋንቶ፥ ህንተ ዬድታ።
ህንተ ጾሳይ፥ ካሞሽ፥
ህንተ አቱማ ናናቱዋ ባቃታናዉ፥
ህንተ ማጫ ናናቱዋ ኦሞዶ፥
አሞረቱ ካትያ ስሆናዉ እሜዳ።
30ህንተ ዘረቱ ሀሰቦናፐ ዶሚደ፥
ድቦና ጋካናዉ ኡባና ዬድኖ።
መዳባ ማታን ደእያ ኖፋሀ ጋካናዉ
ዉርሲደ ባይዜድኖ” ያጌድኖ።
31ሄዋዳን ሀኒደ፥ እስራኤላቱ አሞረቱ ጋድያን ኡቴድኖ። 32ቃይ ሙሴ ዎችያዋንታ ያእዜራ ግያ ካታማ የድና፥ እስራኤላቱ ሄ ካታማነ አ ሄራን ደእያ ቄር ካታማቱዋ ኦይቂደ፥ ሄዋን ደእያ አሞረቱዋ ከሲደ የደርሴድኖ።
33ሄዋፐ ጉይያን፥ እስራኤላቱ ስሚደ፥ ባሳነ አፍያ ኦግያና ከሴድኖ። ባሳነ ካቲ ኦግ ባረ ኦላንቻቱዋ ኡባና ኤድራአ ግያ ካታማ ኡንቱንቱና ኦለታናዉ ከሴዳ። 34ሽን መና ጎዳይ ሙሳ፥ “አዉ ያዮፓ! አያዉ ጎፐ፥ ታን ካትያ ኦጋ አ አሳ ኡባናነ አ ቢታና ነ ኩሽያን አደ እማድ። ሀሰቦናን ኡቲደ ሞዴዳ አሞረቱ ካትያ ስሆና ቦላ ኦዳዋዳን፥ ኔን አ ቦላካ ኦና” ያጌዳ። 35እስራኤላቱ ኦጋ፥ አ አቱማ ናናቱዋነ አ አሳ ኡባ እቱዋነ ፓጻ አሸናን ዎድኖ። ኡንቱንቱ አ ቢታ ላቴድኖ።
Currently Selected:
ፓይዱዋ 21: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
